संसद विघटनया मुद्दाय् रिट निवेदकया पक्षय् बहस यासे अधिवक्ता दिनमणि पोखरेल न संसद विघटन राजनीतिक न्ह्यसः खः धका बिस्यू वने मज्यु धका धयादीगु दु।

थौं सोमवाः बहसयासे अधिवक्ता पोखरेलं, ‘संविधानय् मदुगु व पार्टी दुने इन्ट्रेस्ट म्यानेज याये मफुम्हेसिया संसद विघटन यायेगु? थुकिया कारण थ्व राजनीतिक न्ह्यसः खः धका बिस्यू वने मज्यु ।’ वयकलं प्रधानमन्त्रीया थुगु पलाः सहज यायेगु ज्या अदालतं याये मज्यु धका धयादीगु खः । पोखरेलं, ‘कन्ह्य सुना नं निगु तिहाइ हइ, निगु तिहाइ न मगाः धया छगु चौथाइ धाःसा छु यायेगु ? थः सरकार चले याये मफु मेपिन्स लँ पना बिःगु, थज्याम्ह प्रधानमन्त्रीयात अपुइकेगु ज्या अदालत याये मज्यु। धका धयादीसे थ्व न्ह्यसः राजनीतिक जक धायेगु अवस्था मदु।’

प्रधानमन्त्री केपी शर्मा ओलीें प्रधानमन्त्रीया विशेषाधिकार व अन्तर्राष्ट्रिय अभ्यास संसद विघटन याःगु ख धका धयादीसे अधिवक्ता पोखरेलं नेपालया संविधानं संसद विघटनया विशेषाधिकार मबिउ । ‘संसदीय व्यवस्थाय् संसद महत्वपूर्ण खः धका धयादीगु खः,। प्रधानमन्त्री ओलीं संसद विघटन राजनीतिक न्ह्यसः धका धाःसे अदालतय् थुगु बिषय दुहा वनेमज्यु धका धयादीसे अधिवक्ता पोखरेलं, ‘मेखे ७६ (१) या प्रधानमन्त्री खः धका धाःसे, थ्व न ७६ (२) या प्रधानमन्त्री जुइ धुका १ या थ्व खः धका राजपत्रय् वये माःगु नि, गन राजनीतिक धायेगु, गन संवैधानिक खः धायेगु थे जुल ?’

नेपाल विद्युत प्राधिकरणं जुम्लाय् लोडशेडिङया धलः सार्वजनिक याःगु दु।

जुम्लाया थीथी थासय् न्हिन्हि आः मत वनिइ जुगु दु । प्राधिकरणया कथं जुम्लाया थासय् न्हि स्वघौ मत वनिइगु जुगु दु।

सार्वजनिक धलः कथं न्हि सुथय् २ बजे निसे ५ बजे तक, ८ बजे निसे १० बजे तक व ४ बजे निसे ६ बजे तक मत मवइगु जुगु दु।

लुँ तोलां थौं निसः तका क्वहावःगु दु।

म्हिगः न्ह्यसः क्वहा वया तोलां ९१ हजार ८ सय रुपैयाँ जुगु खःसा थौं लुँ तोलां ९१ हजार ६ सय तकां कारोबार जुगु दु धका नेपाल सुनचाँदी व्यवसायी महासं जानकारी बिःगु दु।

अन्तर्राष्ट्रिय बजारय् लुँया भाः क्वहा वयेवं नेपाःया बजारय् न क्वहावःगु खः । अथेहे तेजावी लुँ तोलाय् थौं ९१ हजार सच्छि थ्यःगु दु ।

थौं वहः धाःसा म्हिगः ह थे थौं न तोलाया १२३० रुपैयाँ कायम जुगु दु धका महासङ्घं धाःगु दु।

सरकारं कोरोनाया कारण समस्या जूपि उद्योग व व्यवसायय् प्रयोग जुया वयाच्वंगु मत डिमान्ड शुल्कय् छुट बिइत्यःगु दु। ताःईनिसे व्यवसायीपिन्स डिमान्ड शुल्कय् छुट बिइत इनाप याना वयाच्वंगु खः ।

व्यवसायीपिनिगु इनाप कथं थौंनिसे शुल्कय् छुट बिइत्यनागु धका अर्थ मन्त्रालयं जानकारी बिःगु दु । अर्थ मन्त्रालय विज्ञप्ति पिकया कोभिड–१९ या कारण प्रभावित उत्पादन मूलक उद्योगपिनिगु लकडाउनया इलयाःगु मत डिमान्ड शुल्क छुट कार्यान्वयन धाःगु दु। अर्थमन्त्री विष्णुप्रसाद पौडेलं थुगु निर्णय कार्यान्वयनपाखे उद्योग लाभान्वित जुइगु व कोभिडपाखे प्रभावित अर्थतन्त्र पुनरुत्थानय् थप ग्वाहालि जुइ धका धाःगु दु ।

औद्योगिक व्यवसाय नियमावली, २०७६ य् च्वयातःगु ५८ गु प्रकारया उद्योगयात आधार दय्का छुट बिइगु तयारी याःगु दु । चालु आर्थिक वर्षया बजेटय् कोभिड १९ या कारण प्रभावित उत्पादनमूलक उद्योगयात लकडाउनया इलय् विद्युत डिमान्ड शुल्क छुट बिइगु व माग कम जुइगु इलय् विद्युत खपतय् ५० प्रतिशत छुट बिइगु धका धाःगु दु।

येँ महानगरपालिकाया प्रमुख विद्या सुन्दर शाक्यं मुर्त–अमुर्त सम्पदाया संरक्षणय् येँ महानगरपालिका एकाग्र जुयाः न्ह्याःवनाच्वनागु धयादीगु दु ।

येँ महानगरपालिका वडा नं. २१ स्थित लगं त्वालय् दुगु ऐतिहासिक कीर्तिपुण्य महाविहारया आगंछेँ पुनर्निर्माणया शिलान्याश यासें महानगर प्रमुख शाक्यं परम्परा, इतिहास, सँस्कृति व संस्कारयात म्वाकातय्त येँ महानगरं फक्व ग्वाहालि यानाच्वनेगु अले उकी सकलें छधी जुयाः न्ह्याःवने नं आवश्यक दुगु धयादिल । आः महानगरपालिकां सम्पदा निर्माण, पुनर्निर्माणय् याःगु लगानी सलंसः दँया लागिं लुमन्ति कथं ल्यनीगु बिचाः तयादिल ।

‘प्राचिनकालय् दक्षिण कोलिग्राम सभ्यतां म्हस्यूगु येँया क्वःने लागाय् अवस्थित लगं बहाः ऐतिहासिक अले पुरातात्विक महत्वया बिहार खः । बुद्ध शासनकाललिसे स्वानाच्वंगु थुगु ऐतिहासिक बिहारया पुनर्निर्माण याय्खंगु येँ महानगरपालिकाया नितिं नं गौरवया खँ खः’ शाक्यं धयादिल । येँ महानगरपालिकां पुनर्निर्माण यानाबीवं तुं स्वामित्व नं येँ महानगरपालिकां काइगु भ्रम नं दयाच्वंगु धासें थज्याःगु सम्पदाया पुनर्निर्माण याय्धुंकाः महानगरपालिकां सम्वन्धित समुदाययात हे लःल्हानाबीगु खँ शाक्यं लिसा कयादिल ।

ऐतिहासिक, धार्मिक व पुरात्वात्विक महत्वया सम्पदाया संरक्षणया नितिं येँ महानगरपालिकां माक्व बजेट विनियोजन यानागु धासें गनं नं छुं कथंया सम्पदा पुनर्निर्माण, जिर्णोद्धार याय्माःसा येँ महानगरपालिका तयार दुगु शाक्यया धापू खः । येँ महानगरपालिका हनुमानढोका दरबार क्षेत्र संरक्षण कार्यक्रम अन्तरगत पुनर्निर्माण जुइत्यंगु कीर्तिपुण्य महाविहारया आगंछेँया लागत २ करोड ८५ लाख दु ।

पुनर्निर्माणया ज्या २०७८ मंसिर तक्कय् क्वचाय्केगु आज्जु तःगु दु । महानगरपालिकां थ्वयां न्ह्यः हे लगं बहाः दुने हे दुगु दिगुद्यः नं पुनर्निर्माण याय्धुंकूगु दु । २०७२ सालया तःभुखाचं क्षतिग्रस्त जूगु दिगुद्यःया नं मेयर शाक्यं हे उलेज्या यानादीगु खः ।