वःगु २४ घण्टाया दुने थप ३४८ म्हेसित कोरोना भाइरस (कोभिड–१९) या संक्रमण पुष्टि जूगु दु।

थ्व नाप आःतक कुल संक्रमित जूपि २ लाख ६७ हजार ९९२ म्ह थ्यःगु दु । उकि मध्ये २ लाख ६२ हजार २५९ म्ह संक्रमणमुक्त जूगु दु ।

अथेहे सीपि १९६९ म्ह सी धुकुगु दु धका स्वास्थ्य तथा जनसंख्या मन्त्रालयं धाःगु दु। आःतक देयन्यकं ३ हजार ८६१ म्ह सक्रिय संक्रमितपि दु।

उकि मध्ये ८४४ म्ह होम आइसोलेसनय् च्वना च्वंगु दु सा १६१ म्ह आईसीयू व ३५ म्ह भेन्टिलेटरय् उपचार जूया च्वंगु दु।

बाँकेय् कोरोना संक्रमणं निम्ह मनू सीउगु दु। जिल्ला कोभिड–१९ संकट व्यवस्थापन केन्द्र बाँकेया कथं छम्ह होम आइसोलेसनय् व छम्ह भेरी अस्पतालय् सीउगु दु ।

नेपालगञ्ज उपमहानगरपालिका–१० या ७० दँ दुम्ह मिजंम्ह सोमवाः चान्ह्य ९ः३० बजे होम आइसोलेसनय् व नेपालगञ्ज उपमहानगरपालिका–१ धम्बोजीया ४९ दँ दुम्ह मिजंम्हे भेरी अस्पतालय् थौं मंगलवाः सुथय् ६ः१० बजे मदुगु खः।

७० दँ दुम्ह मिजंम्ह २६ पुसय् कोरोना संक्रमण पुष्टि जुगु खः । कोरोना पुष्टि जुइवं उम्ह मनू होम आइसोलेसनय् च्वंगु खः।  धम्बोजीया ४९ दँ दुम्ह मिजंम्ह भेरी अस्पतालय् भर्ना जुगु १० मिनेट लिपा हे अस्पतालय् मदुगु खः। कोरोना परीक्षण यागु इलय् २८ पुसय् वयागु रिपोर्ट पोजेटिभ वगु खः।

सोमवाः सुथय् अचानक बेहोस जुइवं वयात भेरी अस्पतालया कोभिड वार्डय् सुथय् ६ बजे भर्ना याःगु खः । वयागु बिहान ६ बजे जुया १० मिनेटय् मदुगु धका अस्पतालं धाःगु खः।

लुँया भाः थौं निसः थहावःगु दु ।

थौं तोला निसः थहावना ९२ हजार रुपैयाँ थ्यःगु दु धका नेपाल सुनचाँदी व्यवसायी महासङ्घ न धाःगु दु।

म्हिगः लुँ तोलां ९१ हजार ८ सय रुपैयाँ थ्यःगु खः ।

अथेहे, थौं वहः तोलाय् झीन्यातका थहावना १२४५ रुपैयाँ न कारोबार जूगु दु धका महासङ्घ धाःगु दु ।