नेकपाया अध्यक्ष पुष्पकमल दाहाल व वरिष्ठ नेता माधवकुमार नेपाल समूह न प्रधानमन्त्री केपी शर्मा ओलीयात कारबाहीबारे निर्वाचन आयोगय् जानकारी बिःगु दु।

दाहाल व नेपाल समूह नं प्रधानमन्त्री तक जुयादीम्ह नेकपाया अध्यक्ष ओलीयात कारबाही याःगु बारे निर्वाचन आयोगयात जानकारी बिःगु दु।

आइतवाः स्थायी कमिटी बैठकं ओलीयात अनुशासनया कारबाही सिफारिस याःगु खः।

थ्व हे निर्णय स्थायी कमिटी सदस्य लीलामणि पोखरेलं थौं सोमवाः न्हिनय् आयोग वना थुकिया जानकारी बिःगु खः। स्थायी कमिटीया बहुमत सदस्यपिनिगु उपस्थितिइ पार्टी अध्यक्ष ओलीयात कारबाही यायेगु निर्णयया कपी बुझे याःगु खः।

आइतवाः स्थायी कमिटी बैठकं ओलीयात अनुशासनया कारबाही यायेगु सिफारिस यासे मंगलवाः च्वंगु केन्द्रीय कमिटीइ थुकिया प्रस्तावय् यकंगु निर्णय याःगु खः।

तर, ओली समूह न धाःसा सुना नं कारबाही याये फइ मखु धका धाःगु दु। 

पूर्वराष्ट्रपति डा. रामवरण यादवं प्रतिनिधिसभाया विघटन संवैधानिक, राजनीतिक व नैतिक रुपं गलत खः धका धयादीगु दु।

देशय् जुयाच्वंगु राजनीतिक व संवैधानिक घटनां थः तसक दुःखी व मर्माहत जुगु दु धका धयादीगु दु। पूर्वराष्ट्रपति यादवं थौं सोमवाः सम्बोधन यानादीसे जितः म्हिगःया घटनां मर्माहत व दुःखी जुगु दु, प्रधानन्त्री व राष्ट्रपतिया उगु पलाखं संवैधानिक, राजनीतिक व नैतिक रुप मिले मजु।

आइतवाः प्रधानमन्त्री केपी शर्मा ओलीं प्रतिनिधिसभा विघटन यायेगु सिफारिस व राष्ट्रपति विद्यादेवी भण्डारीं अनुमोदन याःगु यात कया पूर्वराष्ट्रपति यादवं संविधान विपरीत जगु दु धका धाःगु खः। संविधानया मर्म भावना विपरीत जुगु ज्यायात कया राष्ट्रपति संस्थाय् न्ह्यसः वःगु दु धका धाःगु दु ।

थुगु संविधान व जनतां सर्वोच्च निकाय संसद् पाखे समस्याया छिनोफानो याना न्ह्यने वने माःगु हे थुगु इलय् आवश्यकता दु। जनतां सर्वोच्च निकाय संसद् भंग जुइवं थः नाप ३ करोड जनता मर्माहत जूगु दु धका धयादीगु दु। पूर्वराष्ट्रपति यादवं सम्बोधनया अन्त्यय्, ‘आशा व विश्वास दु। थुकिइ सम्मानित सर्वोच्च अदालतया ध्यान वनि, वनेहे माः।

जिगु विनम्र इनाप दु।’ दीक्षान्त समारोहय् लिखित मन्तव्य बियादीसे वयकःया सम्बोधनया अन्त्यय् प्रतिनिधिसभाया असंवैधानिक विघटनया विषयय् खँ ल्ह्वनादीगु दु।

विकसित लिपाःगु राजनीतिक घटनायात कया प्रधानमन्त्री केपी ओलीं थौं देशवासीया नामय् सम्बोधन याये त्यःगु दु।

संसद् विघटन व न्हुगु निर्वाचनबारे प्रधानमन्त्री ओलीें सम्बोधन यायेत्यःगु धका सचिवालयं धाःगु दु। सम्बोधन नेपाल टेलिभिजन व रेडियोपाखे न्हिनय् ३ बजे प्रसारण जुइ त्यःगु खः।

प्रधानमन्त्री ओलीया सिफारिसय् आइतवाः राष्ट्रपति विद्या भण्डारीं प्रतिनिधिसभा विघटन यासे वइगु  वैशाखय् निगु चरणय् निर्वाचन तिथि क्वछिगु खः।

थ्व हे दथुइ सोमवाः प्रधानमन्त्री निवास बालुवाटारय् थः समर्थित सांसदपिन्त सम्बोधन यासे प्रधानमन्त्री व नेकपा अध्यक्ष केपी शर्मा ओलीं थीथी बहानाय् सरकारयात झुले यायेगु ज्या जुगुनि ताजा जनादेश कायेत न्हुगु निर्वाचनय् वने माःगु धका धाःगु दु।

नेकपाया सचिवालय सदस्य नाप गृहमन्त्री रामबहादुर थापां थः निकट नेतापिनिगु भेला सःतुगु दु।

उगु भेलाय् सहभागी थापा समूहया सहभागी नेतापिन्स संसद् विघटन प्रतिगामी पलाः खः धका धाःगु दु । सहभागी नेतापिन्स गम्भीर व असंवैधानिक राजनीतिक घटनायात मुकदर्शक जुया च्वने मज्यु धका धाःगु दु।

तर, समूहया नेता थापां धाःुसा समग्र परामर्श लिपा जक थुगु विषयया लिपागु धारणा दयेकेगु धका धाःगु दु। प्रधानमन्त्री नाप पार्टीया अध्यक्ष केपी शर्मा ओली समूह न सांसदपिन्त बालुवाटारय् व मेम्ह अध्यक्ष पुष्पकमल दाहाल नाप वरिष्ठ नेता माधवकुमार नेपालपक्ष समूहया सांसदपि बानेश्वरय् बिस्क बिस्क भेला जुया च्वंगु इलय् थापा समूहया निकट केन्द्रीय सदस्यपिन्स भेला याःगु खः ।

थापा समूहया नेकपा केन्द्रीय कमिटीइ करिब ४० सदस्य दुगु दाबी याना वयाच्वंगु खः। लिपागु निर्णायक विवादय् प्रधानमन्त्री ओलीया हे समर्थन दुगु आशंका जुयाच्वंगु इलय् थः निकट नेतापिनिगु बिस्क भेला जुगु खः । भेलाय् निगु दुई दर्जन नेता सहभागी जुगु धका धाःःगु दु।

वःगु असारय स्थायी कमिटी विवादय् थापां गुवलय् ओली गुवलय् दाहाल व नेपाल समूहया भेला थ्यःगु खः।

संसद विघटनया विरुद्ध प्रदर्शन सिंहदरबार न्ह्यने बिरोध याःवःपिन्त थौं प्रहरीं ज्वःगु दु।

आइतवाः असंवैधानिक रूपं संसद विघटन याना मध्यावधि निर्वाचनया तिथि तोके यायेवं उकिया विरुद्ध देयन्यकं थीथी थासय् प्रदर्शन जुयाच्वंगु दु।

थ्व हे दथुइ थौं सोमवाः सुथय् प्रदर्शन यायेगु निति सिंहदरबारय् वःपि कृष्ण पहाडी नेतृत्वया पुचःयात प्रहरीं धरपकड यासे नियन्त्रणय् काःगु दु।

उमिसं संसद विघटन लोकतन्त्रया दकलय् तधःगु उपहास खः धका प्रतिनिधि सभा विघटन असंवैधानिक अलोकतान्त्रिक व स्वेच्छाचारी च्वया तःगु प्लेकार्ड ज्वना प्रदर्शनय् क्वहा वःगु खः।