नेपाल आयल निगमं पेट्रोल, डिजेल व मचिंकया भाः थकागु दु।

म्हिगः सोमबाः चान्हय् १२ निसें लागू जुइ कथं लिटरं नितका चिकंया भाः थकाःगु दु धका निगमया प्रवक्ता विनितमणि उपाध्ययं जानकारी बिःगु दु ।

आः न्हूगू भाः कथं पेट्रोल लिटरया ११० तका थ्यगु दुसाः डिजेल व मचिकंया ९३ तका थ्यगु दु।

पुनर्निर्माण लिपा तसक बालागु लानिपूखुलि घाँय् लिकायेगु ज्या जुगु दु । छु दिं न्ह्यनिसे पूखुलि घाँय् या कारणं बामलाना च्वंगु पूखुलि येँ महानगरपालिकां घाँय् लिकायेगु ज्या जुगु दु ।

महानगरपालिकां अन नगर प्रहरीयात उगु घाँय् लिकायेगु ज्या जुगु खः । ‘राजधानीया केन्द्रय् दुगु थुगु पूखु शुद्धीकरणया दीर्घकालीन समाधानया लागि सरोकारवाला निकाय नाप जिमिसं सहलह यानाच्वनागु दु,’ येँ महानगरपालिकाया प्रमुख प्रशासकीय अधिकृत राजेश्वर ज्ञवालीं धयादीगु दु, ‘पुनर्निमाण प्राधिकरणपाखे जिमित लानिपूखु पुर्ननिर्माण लिपा हस्तान्तरण यायेगु ज्या जुगु मदु । अय्न, पूखुलि जिमिगु क्षेत्राधिकार दुने लागुलि जिमिसं शुद्धीकरणया कुतः यानागु दु ।’

सहर बालाकेगु कथं लानि पूखुलि घाँय् बुया बामलागुलि व  सामाजिक सञ्जाल व सञ्चार माध्यमय् वःगुलि महानगरपालिका ध्यानाकर्षण जुगु व  सरसफाइया प्रक्रिया न्ह्यने यकःगु धका ज्ञवालीं धयादीगु खः। ‘लखय् बुगु घाँसं याना पूखुया सुन्दरता हे तना वःगुलि नगरप्रहरीया ग्वाहालिं उगु घाँय् लिकायेगु ज्या जुगु खः। दीर्घकालिन व्यवस्था मजुतले पूखुया सरसफाइयात महानगरपालिकां याना च्वनेगु जुइ,’ ज्ञवालीं धयादीगु दु, ‘लखय् न्या मतयानि सुरुइ तयागु लखं थथे जुगु खः ।

थुगु विषयय् जिमिसं विज्ञपि नाप सहलह यानाच्वनागु दु। पूखुलि घाँय् या कारण बामलागुलि पूखुलि सफा याना न्या तयेगु  व विस्तारं दीर्घकालिन समस्या समाधानया लँय् वनेगु तयारी दु।’ येँ महानगरका प्रहरी प्रमुख धनपती सापकोटां न्हि नीम्ह नगरप्रहरी ग्वाहालि पूखुलि घाँय् लिकायेगु ज्या जुयाच्वंगु दु धका जानकारी बियादीगु दु ।

वःगु २४ घण्टाया दुने थौं सोमवाः थप ३२२ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् २ लाख ६७ हजार ६४४ म्ह संक्रमितपि थ्यःगु दु । अथेहे वःगु २४ घण्टाय् ३७४ म्ह कोरोना संक्रमणपि डिस्चार्ज जूया छेँ लिहावःगु दु।

अथेहे थ्व नाप आःतक कोरोनामुक्त जुपि २ लाख ६१ हजार ८१८ म्ह थ्यःगु दु। अथेहे सक्रिय संक्रमितपि ३ हजार ८६१ म्ह दु। मन्त्रालयया कथं थ्व नाप  पीसीआर विधिपाखे २० लाख १६ हजार ७५८ म्हेसित परीक्षण याये धुकुगु दु 

कोरोना संक्रमणं वःगु २४ घण्टाय् खुम्ह सीगु दु । हालसम्म कोरोना संक्रमणं आःतक सीपिनिगु ल्याः १ हजार ९६५ म्ह थ्यःगु दु ।

कोरोना भाइरस (कोभिड–१९) न्हुगु प्रकार नेपालय् दुहावःगु पुष्टि जुगु दु । पुसया न्हापागु वाय् बेलायतपाखे वःपि स्वम्हेसित न्हुगु कोरोना भाइरसया संक्रमण जुगु पिहावःगु दु। पुसया न्हापागु वाय् बेलायतपाखे वःपि खुम्हेसित कोरोना संक्रमण जुगु धका पुस १३ गते पुष्टि जुगु खः। तर जिन सिक्वेन्सिङ मजुगुया कारण न्हुगु प्रकार खः वा मखु धका खुले मजुगु खः। 

स्वास्थ्य तथा जनसंख्या मन्त्रालयया कथं पुस २७ गते उमिगु नमुना हङकङ प्रयोगशालाय् छ्वःगु खः । उकि मध्ये स्वम्हेसित न्हुगु कोरोना भाइरस पुष्टि जुगु दु। २८ दँया मिसा, ३२ व ६७ दँया मिजंपिंके न्हुगु प्रकारया भाइरस खने दुगु खः।

उकि मध्ये २८ दँया मिसा व ३२ दँ या मिजंयाके नेगेटिभ जुइ धुकुगु दु सा ६७ दँ दुम्ह मिजयाके आः न पोजेटिभ जुगु दु। तर वयाके लक्षण मदुगु धका स्वास्थ्य मन्त्रालयया प्रवक्ता डा. जागेश्वर गौतमं धाःगु दु ।