सरकारं संसद् विघटन यायेवं नेकपा नाप स्वगू दलं मंकाः कथं विरोध यायेगु निर्णय याःगु दु। सत्तारुढ नेकपा, नेपाली कांग्रेस व जनता समाजवादी पार्टी न संसद् विघटन प्रति मंकाः कथं विरोध यायेगु निर्णय यायेगु धका नेकपा प्रवक्ता नारायणकाजी श्रेष्ठं धाःगु दु। संसद् विघटन यायेगु सिफारिस व राष्ट्रपतिं सदर याःगु निगु हे निर्णय गैरसंवैधानिक, असंवैधानिक व अलोकतान्त्रिक खः।

उकिया विरोध यायेगु व विरोधय् एकताबद्ध जुया वनेगु धका धाःगु दु । दक्को उपायपाखे उकिया विरोध यायेगु निर्णय जूगु दु धका प्रवक्ता श्रेष्ठं धाःगु दु। बैठकय् सहभागी कांग्रेस वरिष्ठ नेता रामचन्द्र पौडेलं थौं अनौपचारिक बैठकं सरकारया पलाःया विरुद्ध मंकाः कथं स्वगू दल विरोधं यायेगु सहमत जूगु दु। प्रवक्ता श्रेष्ठया कथं नेकपा नेतापिनिगु पहलय् स्वगू दलया बैठक कांग्रेस संसदीय दलया कार्यालयय् च्वंगु खः।

उगु बैठकय् नेकपाया वरिष्ठ नेता माधवकुमार नेपाल, झलनाथ खनाल, प्रवक्ता श्रेष्ठ, देव गुरुङ व जनार्दन शर्मा सहभागी जुयादीगु खः। कांग्रेसपाखे वरिष्ठ नेता रामचन्द्र पौडेल, प्रमुख सचेतक बालकृष्ण खाँड, नेता मिनेन्द्र रिजाल व रमेश लेखक सहभागी जुयादीगु खः। अथेहे जसपा नेता बाबुराम भट्टराई व राजेन्द्र महतो बैठकय् सहभागी जुयादीगु खः।

सरकारं पूर्वसचिव प्रेम कुमार राईयात अख्तियार दुरुपयोग अनुसन्धान आयोगया प्रमुखय् सिफारिस याःगु दु।

मंसिर ३० च्वंगु संवैधानिक परिषदया बैठकं राईयात अख्तियार प्रमुखय् सिफारिस याःगु खः।

ओलीं संवैधानिक परिषद् सम्बन्धी अध्यादेश हःगु दि कुन्हु हे राईयात आयुक्तय् सिफारिस याःगु खः। सिफारिस सम्बन्धी पत्रय् थौं संसदीय समितिइ थ्यनेवं थुगु खँ सिइदुग खः ।

राई ओलीया विश्वासपात्र कथं कायेगु याः।

राष्ट्रपति विद्यादेवी भण्डारी सरकारं सिफारिस याःगु संसद विघटन यासे निगु चरणय् २०७८ वैशाख १७ व २७ गते प्रतिनिधिसभया चुनावया मिति तोके याःगु दु ।

राष्ट्रपति कार्यालयं जारी याःगु विज्ञप्तिइ सरकारं सिफारिसय् निगु चरणय् प्रतिनिधिसभाया निर्वाचनया तिथि क्वछिगु दु ।

राष्ट्रपतिं संसद विघटनया सिफारिसय् पुनर्विचार यायेत छ्वयेमाः धका पूर्वसभामुख दमननाथ ढुंगाना धयादीगु दु।

प्रधानमन्त्री केपी शर्मा ओलीं थौं आइतवाः मन्त्रिपरिषद सःता आकस्मिक बैठकय् न्हुगु जनादेशया वनेगु धका घोषणा याःगु खः।

संसद विघटनया सिफारिस ज्वना शीतल निवासय् वःगु खः। पूर्वसभामुख ढुंगानां संसद विघटनया सिफारिस यायेगु धइगु कम्युनिस्ट पार्टी नं लोकतन्त्र चले याये मसगु धका प्रतिक्रिया बियादीगु खः।

थज्यागु सुविधाजनक बहुमत दुगु इलय् न संसद विघटन यायेगु सिफारिस यायेगु धइगु कम्युनिस्ट पार्टी व प्रधानमन्त्रीं लोकतन्त्र व संसद चले याये मसगु धका धयादीगु खः।

ढुंगाना धयादीगु दु संविधानं संसद विघटनयात छगु प्रकारं निषेध याःगु दु। संसद विघटनं संविधानय् थुलि यक्को शर्त दुसा संसद विघटन याये माःगु गज्यागु परिस्थिति सिर्जना जुगु खः धका न्ह्यसः तयादीगु खः।

वरिष्ठ अधिवक्ता शम्भु थापां प्रधानमन्त्रीयात संसद विघटन यायेगु अधिकार मदु धका धाःगु दु।

प्रधानमन्त्री केपी शर्मा ओलीं संसद विघटनयो सिफारिस यायेवं थापा धाःगु दु।

झीथाय् संविधानं संसद विघटन यायेगु प्रावधान मदु धका धयादीसे थापा, संसदपाखे सरकार गठन जुइ मफुगु अवस्थाय् जक संसद विघटन यायेगु अधिकार सुयाके मदु धका धयादीगु दु।