कोभिड–१९ संक्रमण जुया होम आइसोलेसनय् च्वना च्वपिनिगु लागि स्वास्थ्य तथा जनसंख्या मन्त्रालयं छेँ हे च्वना उपचारया सेवा कायेगु व्यवस्था यागु दु ।

होम आइसोलेसनय् च्वपिन्स थीथी स्वास्थ्य संस्थाय् ज्यायाइपि १८ म्ह चिकित्सकपिन्स फोन याना परामर्श, उपचार व प्रेषण सेवा काये फइ ।

होम आइसोलेसनय् च्वना च्वपि मनू तयेस कोरोना संक्रमण नाप सम्बन्धित शारीरिक व मानसिक समस्याबारे न तोके यानातंपि चिकित्सक नाप सहलह याये फइ।

चिकित्सक नाप सहलह यायेत थुगु नम्बरय् सम्पर्क यानादीइ फइ

लुँया भाः स्वसः क्वहा वंगु दु।

म्हिगः मंगलवाः ९० हजार ६ सय रुपैयाँ थ्यंगु लुँ थौं बुधवाः छापावाल लुँ ९० हजार तीन सय रुपैयाँ कारोवा। जुगु धका नेपाल सुन चाँदी व्यवसायी महासंघं धागु दु ।

अथेहे बुधवाः महासंघया तेजावी लुँ तोला भाः ८९ हजार ८ सय रुपैयाँ तोके यागु दु ।

अथहे वहः तोलाय् न्यातक क्वहा वंगु दु ।

मंगलवाः तोलां १ हजार ३२५ रुपैयाँ कारोबार जुगु वहः थौं बुधवाः १३२० रुपैयाँ तोके यागु दु ।

लुम्बिनी प्रादेशिक अस्पतालया फिबर क्लिनिकय् वंगु ८ घण्टाय् रुपन्देहीइ च्वपि प्यम्ह संक्रमित सीउगु दु ।

सीपि स्वम्ह मिसा वछम्ह मिजंम्ह खः । बुटवल उपमहानगरपालिका–१२ या ४७ दँ दुम्ह वैशाख १५ गते कोरोना पोजेटिभ पुष्टि जुगु खःसा उगु हे दिं अस्पताल भर्ना जुगु खः मंगलवाः  चान्ह्य १० बजे मदुगु खः धका अस्पतालया प्रवक्ता डा. विष्णु गौतमं धागु दु।

अथेहे कन्चन गाउँपालिका–४ या २७ दँ दुम्ह मिसाम्ह वैशाख १९ गते कोरोना संक्रमण खनेदुगु खः। उगु ह दिं अस्पताल भर्ना जुगु खःसा बुधबार सुथय् ५.४५ बजे मदुगु खः । अथेहे बुटवल ९ या ५४ दँ दुम्ह मिसाम्ह वैशाख १८ गते कोरोना संक्रमण पुष्टि जुगु खः। उगु दिं अस्पताल भर्ना जुम्ह बुधबार सुथय् ६.२२ बजे मदुगु खः ।

अथेहे वैशाख १४ गते कोरोना संक्रमण पुष्टि जुम्ह तिलोत्तमा नगरपालिका–४ या४० दँ दुम्ह मिसाम्ह  २१ गते अस्पताल भर्ना जुगु खःसा उपचारया झ्वलय् बुधबार सुथय् ६.३८ बजे मदुगु धका अस्पतालया प्रवक्ता गौतमं धागु दु।

वीरगञ्जय् वंगु २४ घण्टाय् थप १९० म्हेसित कोरोना संक्रमण पुष्टि जुगु दु ।

उकि मध्ये ५७ म्ह मिसा व १३३ म्ह मिजंपिन्त कोरोना संक्रमण पुष्टि जुगु धका नारायणी अस्पतालया पीसीआर प्रयोगशालां धागु दु।

प्रयोगशालाय् मंगलवाः २८८ म्हेसिगु पीसीआर व एन्टिजिन विधिपाखे परीक्षण यागु खः।

अथेहे नारायणी अस्पतालय् वीरगञ्ज– १० आदर्शनगर च्वम्ह ४० दँ दुम्ह मिजंम्ह मन्त ।

उपचारया झ्वलय् वंगु चान्ह्य ९ः३० बजे मदुगु धका नारायणी अस्पतालया कोभिड संयोजकं जानकारी बिगु दु।

गण्डकी प्रदेशया मुख्यमन्त्री पृथ्वीसुब्बा गुरुङयात एन्टिजिन परीक्षणय् रिपोर्ट पोजेटिभ वंगु दु ।

पीसीआर परीक्षणया लागि वयकःया स्वाब संकलन यागु दु उकिया रिपोर्ट वये ल्यः दनिइ ।

मंगलवाः संसदीय दलया बैठकय् सहभागी जुयादीगु खः । बैठक लिपा हे ज्वरो वंगु खः । वया लिपा एन्टिजिन परीक्षण यागु खः ।

वयकःया सचिवालयं मुख्यमन्त्री गुरुङ बिरामी जुगु पुष्टि यागु दु । वयकःया स्वकीय सचिव विक्रम न्यौपानेयात न स्वन्हु न्ह्यः कोरोना संक्रमण पुष्टि जुगु खः ।

न्यौपाने आः आइसोलेसनय् च्वना च्वंगु दु ।