यलया प्रमुख जिल्ला अधिकारी ढुण्डीप्रसाद निरौलायात कोरोना संक्रमण पुष्टि जुगु दु ।

स्वन्हु न्ह्यः स्टार अस्पतालय् पीसीआर परीक्षण यागुलि थःगु रिपोर्ट पोजेटिभ वंगु धका जानकारी बिगु दु।

प्रजिअ निरौलां धागु दु, ‘आः थःगु स्वास्थ्यया अवस्था सामान्य दु । जिल्ला प्रशासन कार्यालयया हे क्वाटर आइसोलेसनय् हे च्वना प्रविधिया ग्वाहालिं महामारीविरुद्धया अभियानय् सक्रिय दुु ।’

येँ महानगरया प्रहरी आ विकास साझेदारं सतकय् त्वता तगु अनधिकृत निर्माण सामाग्री व प्रचार सामाग्री हटे यायेगुलि सक्रिय जुगु दु ।

अथेहे लँसिथय् व पार्कय् रहेका जोखिमयुक्त सिमाया कचा चाना जोखिममुक्त दयकेत, वातावरण व्यवस्थापन विभाग नाप मिले जुया लँय् सफा यायेगु ज्या यागु दु ।

नगर प्रहरी महाशाखा प्रमुख धनपति सापकोट धागु दु, सकसिया ज्यायाइगु थाय् सतकय् खः । तर ज्या सिधेका ल्यः दनिइगु सामान अथे तया थकिइ । थुकिइ सतकय् म्वामदगु सामाग्री थुप्रे जुइ ।

महानगरय् च्यागु आकाशे ताँय् तयातगु प्रचार सामाग्री नगर प्रहरीं हटे यागु दु ।

अनधिकृत निर्माण सामाग्री हटे यायेगु झ्वलय् कलंकीनिसे त्रिपुरेश्वरया मुल सतक, सुन्धारा, न्हुगु सतक, भोटाहिटी, जमल, कान्तिपथ, दरबार मार्ग, कमलादी, पुतलीसडकय् च्वंगु सामाग्री हटे यागु दु ।

कन्ह्यनिसे बानेश्वर पाखे केन्द्रीत जुइगु महाशाखाया योजना दु ।

स्वनिगलय् निषेधाज्ञा थप कडायाना ताहाके त्यंगु दु।

येँ, यल व ख्वप स्वंगु हे जिल्ला प्रशासन कार्यालयपाखे जारी यागु निषेधाज्ञा कन्ह्य क्वचाय त्यंगुलि थप कडाया प्रावधान नाप थपे याये त्यंगु दु।

कोरोना सङ्क्रमणया जोखिम अझ न दुगुलि थप कडा प्रावधान नाप निषेधाज्ञा थपे याना स्वम्ह हे जिल्लाया प्रमुख जिल्ला अधिकारीपि च्वना मापदण्ड दयका निर्देशन जारी यायेत्यंगु दु ।

अथेहे कन्ह्यनिसे थप कडा जुइगु सङ्क्रमणया अवस्था स्वया थप निर्णय यायेत्यंगु दु।

चितवनया भरतपुर अस्पतालय उपचार याना च्वपि चितवन व बाराया कोरोना संक्रमितपि सीउगु दु ।

अस्पतालं बिगु जानकारी कथं सीपि माडी नगरपालिका व बाराया जीतपुर सिमरा उपमहानगरपालिकाय् च्वपि खः।

माडी नगरपालिका–३ या ६९ दँ दुम्ह उपचारया झ्वलय् सोमव चान्ह्य १२ः४५ बजे मदुगु खः । निमोनिया व सासः ल्ह्यायेगु समस्या जुम्ह वयात वैशाख १९ गते कोरोना सङ्क्रमण पुष्टि जुगु खः।

अथहे, बाराया जीतपुर सिमरा उप–महानगरपालिका–१ च्वम्ह ३८ दँ दुम्ह मिजंम्ह कोरोनाया मदुगु खः।

छातिइ समस्या जुया वैशाख १२ गते अस्पतालय् भर्ना जुगु खः वयात १३ गते कोरोना सङ्क्रमण पुष्टि जुगु खः ।

 कोविड १९ नं संक्रमितपिनिगु उपचारया लागि ‘कोविड अस्पताल’ सञ्चालन यायेगु बिउसे थौेया कार्यपालिका बैठक क्वचागु दु 

महानरया मेयर विद्यासुन्दर शाक्यया अध्यक्षताय् च्वंगु ६१ क्वंगु कार्यपालिका बैठकय् ‘कोविड १९ महामारी व्यवस्थापन’ सम्बन्धय् तःगु प्रस्तावय् छलफल यासे कोविड अस्पताल सञ्चालनय् बःबिगु दु ।

बैठकं सुविधा सम्पन्न आइसोलेसन व कोविड अस्पताल उपयुक्त विकल्प सहितया प्रस्ताव पेश यासे वडा ३ या अध्यक्ष दीपक के. सी. या संयोजकत्वय् ७ म्ह सदस्यीय समिति गठन यागु दु ।

उगु समितिया सदस्यय् वडा ६ या अध्यक्ष दिपेन्द्र लामा, ७ या अध्यक्ष शुद्धकुमार डंगोल, वडा २२ या अध्यक्ष चिनीकाजी महर्जन, ३० या अध्यक्ष दलबहादुर कार्की, ३१ या अध्यक्ष नारायण भण्डारीपि च्वनादीगु खः।

समिति गठन लिपा बैठकया अध्यक्ष यानादीम्ह अध्यक्ष नाप मेयर शाक्यं धयादीगु दु, ‘वंगु दँ स्वया थुगु दँय् अवस्थाय् फरकय् दु। शंका दुपि मनूतस जाँच याना क्वारेन्टीनय् च्वनिइगु प्रोत्साहित यायेमागु, पर्याप्त आइसोलेसन वार्ड तयार यायेमागु व महानगर थम्हेसिया हे कोविडया अस्पताल दयके मागु ।

क्वारेन्टीन निर्माण याये मागु, आइसोलेसन दयकेगु व आवश्यकताया आधारय् अस्पतालतक दयकेगु प्रयोजनया लागि जिमिसं महानगर दुने होटल, पार्टी प्यालेस, स्थापना जुगु चल जुगु व मजुगु छु न अस्पतालय् अवलोकन यायेगु । उपि नाप सहकार्यया लागि प्रस्ताव माग यायेगु धका धयादीगु दु । छु प्रस्ताव पेश जुगु दु।’ धका धयादीगु दु।’ समितिं आइसोलेसन सञ्चालन वडा तहपाखे यायेगु कि महानगर तहपाखे, विरामीयात अक्सिजन जक बिया सामान्य उपचार यायेगु इलय् व जटिल स्वास्थ्य समस्या जुपि उपचार यायेत आवश्यक उपकरणसहितया उपचार कक्ष निर्माण यायेगु विषया शिफारिस यायेगु धका मेयर शाक्य धयादीगु दु, ‘ पूर्वाधार व जनशक्ति दुगु स्वास्थ्य संस्थानाप सहकार्य याये वलय् याकन हे सेवा व्यवस्थापन याये फइ ।’

मेयर शाक्यं बैठकय् वंगु दँय् १० करोड रुपैयाँ तया स्थापना यानागु कोविड कोषपाखे करीब ५ करोड रुपैयाँ खर्च जुगु, एम्बुलेन्स सञ्चालनया लागि संयुक्त एम्बुलेन्स चालक संघनाप सहकार्य यानागु न जानकारी यानादीगु खः।

महानगरं महामारी नियन्त्रण ज्याझ्वलय् डा. गणेश गुरुङ्, डा. अर्जुन कार्की, डा. अनुप सुवेदी व डा. सरद वन्तयातपि स्वास्थ्यविज्ञया रुपमा आमन्त्रण यायेगु बैठकं निर्णय यागु दु। बैठकय् उपप्रमुख हरिप्रभा खड्गी श्रेष्ठ व प्रमुख प्रशासकीय अधिकृत राजेश्वर ज्ञवालीं, महामारी नियन्त्रणया लागि महानगरं तत्काल निर्णय याना सेवा व्यवस्थापन यायेगु धका धयादीगु खः।