प्रहरी चौकीइ नेपालभासं खँ ल्हात धकाः जूगु विवादया झ्वलय् ज्वनातःपिं उपत्यका सतक विस्तार पीडित संघर्ष समितिया अध्यक्ष सुमन साय्मि नाप महेश्वर मानन्धर, मीन शाही, भिमदेव श्रेष्ठ,रुक्षित श्रेष्ठ, दिपेन श्रेष्ठ, विरोचन श्रेष्ठ, संजय तामाङयात वंगु बुधवाः निसें ज्वनाः कुनातःगु खः।

उकिया विरोधय् माग यासें थौं आइतवाः कालिमातिइ स्वतःस्फूर्त पसः बन्दया आह्वन याःगु खः । थौं कालिमाती चित्तधरया सालिक निसें सोल्टीमोडतकया फुक्क पसः बन्द यासे साय्मि लगायतयात तुरुन्त त्वःतेत माग याःगु खः । पसः बन्द यायेत स्वतःस्फूर्त रुपं चाःहिलाच्वंपिं स्थानीयतय्त तकं प्रहरीं छझाः पनेगु ज्या याःगु खः। प्रहरीं बन्द यानातःगु पसः चायेकेत नं दबाब बीगु लिसें प्रहरीं थःम्हं हे चायेकेगु ज्या नं याःगु खः।

बालाजुइ सतक विस्तारया निंतिं छेँ थुनातःथाय् जूगु विवादया झ्वलय् ज्वनायंकूपिं त्वःतकेगु निंतिं बालाजु प्रहरी चौकीइ वंम्ह साय्मियात चौकी दुने नेपालभासं खँ ल्हात धकाः जूगु विवादया झ्वलय् ज्वंगु खः । साय्मि लगायत मेपिन्त फौजदारी मुद्दाय् ज्वनीपिं अपराधीतय्त थें हतकडी तया बालाजु चौकीं सोह्रखुट्टे चौकीइ स्थान्तरण याःगु खः । साय्मि कालिमातिया स्थानीय वासिन्दा न खः ।

अथेहे वंगु शुक्रवाः माइतघर मण्डलाय् नं प्रदर्शन याःगु खः।

स्वास्थ्य दर्पण टेलिभिजन टक शोया गुक्वःगु दँमुज्या छगु ज्याझ्वः दथुइ मूपाहाँ नेपाली कांग्रेसया नेता प्रकाशमान सिंहं उलेज्या यानादीगु दु ।उगु ज्याझ्वलय् चिकित्सक व पत्रकारपिन्त हना ज्याझ्वः न याःगु दु । उगु हना ज्याझ्वलय् स्वास्थ्य ख्यलय् योगदान बिउपि प्रदेश १ पाखे वरिष्ठ न्यूरोलोजिष्ट डा. वीरेन्द्रकुमार विष्ट, प्रदेश २ स्त्री तथा प्रसूति रोग विशेषज्ञ डा. लक्ष्मी थापा, वाग्मती प्रदेशपाखे वरिष्ठ रेडियोलोजिष्ट डा. पशुपति रेग्मी व वरिष्ठ अर्थोपेडिक सर्जन डा. सुदीपमान वैद्ययात न सम्मान याःगु खः।

अथेहे गण्डकी प्रदेशपाखे वरिष्ठ फिजिसियन डा. वसन्तकुमार ताम्राकार, लुम्बिनी प्रदेशपाखे वरिष्ठ अर्थोपेडिक सर्जन डा. प्रकाशबहादुर थापा, कर्णाली प्रदेशपाखे वरिष्ठ रेडियोलोजिष्ट डा. रविन खड्का व सुदूरपश्चिम प्रदेशपाखे वरिष्ठ स्त्री तथा प्रसूतिरोग विशेषज्ञ डा. खगेन्द्रराज भट्ट, स्वास्थ्यकर्मी कमल नारायण श्रेष्ठ, हरिकुमार शाही, अथेहे युवा चिकित्सक मुटुरोग विशेषज्ञ डा. शंकर लौडारी, फिजिसियन डा. निरजकुमार सिंह, जनरल ल्याप्रोस्कोपीक सर्जन डा. सूर्यज्योति श्रेष्ठ अथेहे विदेशी नागरीक डा. मेड रूथ गोन्सेटयात न अवार्ड लल्हागु खः । डा. रूथ वरिष्ठ छालारोग विशेषज्ञ तथा स्विट्जरल्याण्डया पूर्वसांसद तक जुयादीइ धुकुम्ह खः।

कोभिड–१९ व्यवस्थापनय् उल्लेखनीय ज्या याःगुलि लुम्बिनी प्रदेश बाँके जिल्लाया खजुरा गाउँपालिका व वाग्मती प्रदेश चितवन जिल्ला इच्छाकामना गाउँपालिकायात संस्थागत सम्मान याःगु खः । अथेतु, स्वास्थ्य पत्रकारिताया ख्यल् उल्लेखनीय योगदान बिउपि पोखरा टेलिभिजनया सुरज श्रेष्ठ, नेपाल समाचारपत्रया भगवती तिमल्सिना, रेडियो सगरमाथाया सम्झना महर्जन, गोरखापत्र दैनिकया सरोज ढुङ्गेल, अन्नपूर्ण पोष्ट दैनिकया दिनेश गौतम, इ–कान्तिपुर डटकमया बुनु थारू व हेल्थन्यूज डटकमया नमराज भट्टयात न सम्मान याःगु खः। उगु साधारणसभाय् ‘स्वास्थ्य दर्पण विशेष–४’ विमोचन मूपाहा सिहं यानादीगु खः।

उगुु ज्याझ्वलय् शहीद धर्मभक्त अङ्ग प्रत्यारोपण केन्द्रया पूर्व निर्देशक प्रा. डा. पुकारचन्द्र श्रेष्ठ, नेपाल पत्रकार महासंघया महासचिव रमेश विष्ट, चिकित्सा शास्त्र अध्ययन संस्थान महाराजगञ्जया डिन डा. दिव्या सिंह, कलेज अफ मास कम्युनिकेसन एण्ड जर्नालिज्मया प्राचार्य डा. मञ्जु मिश्रपिन्स भिंतुना बियादीगुु खः। ज्याझ्वलय् स्वास्थ्य दर्पण मिडिया नेटवर्क प्रालिया अध्यक्ष सन्दीपकुमार श्रेष्ठं झापानिसे कर्णाली तक ७०० म्ह चिकित्सा ख्यःया व्यक्तित्वपिन्त सम्मान याये धुकगु दु धका धयादीगु खः।

मिर्गौला रोग विशेषज्ञ डा. ऋषिकुमार काफ्ले, डा. इश्वरी लौडारी, स्वास्थ्य पत्रकार मञ्चया अध्यक्ष रामप्रसाद न्यौपाने, नेपाल आदिवासी जनजाति पत्रकार महासंघया अध्यक्ष डण्ड गुरुङ, नेवाः पत्रकार राष्ट्रिय दबुया अध्यक्ष सुरजवीर बज्राचार्य, नेपाल टेलिभिजनया पत्रकार गजुरधन राई, गैर आवासीय नेपाली संघ अन्तर्राष्ट्रिय परिषदया उपाध्यक्ष अर्जुनकुमार श्रेष्ठपिन्स चिकित्सकपिन्त सुरक्षाया लागि कानून निर्माण याये मागुलि बःबियादीगु खः।

पूर्णिमा शाक्य पामिलाया न्हापागु सफू नेपालभाषाया हाइकु मुना मतिनाया ख्वबि छगु ज्याझ्वः दथुइ पितब्बज्या जुगु दु।

उगु मतिनाया ख्वबिइ सफुतिइ १३० पू हाइकु दुथ्याकाःतगु दु। छगु ज्याझ्वः दथुइ ईलोहं प्रकाशनपाखें पिकागु हाइकु मुनाया बागमती प्रदेशया सांसद शोभा शाक्य, प्रज्ञा प्रतिष्ठानया प्राज्ञ ध्रुव मधिकर्मी, ईलोहं प्रकाशनया प्रबन्ध निर्देशक नरेश वीर शाक्य, च्वसापासाया अधक्ष्य भुषण प्रसाद श्रेष्ठ, नेपालभाषा मंकाः खलः यलया पूर्वनायः किरण शाक्य, नेवाः हाइकु ख्यःया कजि सुरेश प्रधानं यलया कनिबहालय् च्वंगु होटेल गुडिवलय् जुगु ज्याझ्वलय् मंकाःकथं मतिनाया ख्वबि पितब्वज्या यानादिगु खः।

ज्याझ्वलय् ईलोहंया प्रमुख व्यवस्थापक दर्शनवीर शाक्यं सफूया बारेय् जानकारी बियादिगु खः। अथेहे बागमती प्रदेशया सांसद शाक्य, प्रज्ञा प्रतिष्ठानया प्राज्ञ मधिकर्मी, ईलोहंया प्रबन्ध निर्देशक शाक्य, च्वसापासाया अधक्ष्य श्रेष्ठ, नेपालभाषा मंकाः खलः यलया पूर्व नायः किरण शाक्य, नेवाः हाइकु ख्यःया कजि प्रधानं पिहाँवगु सफूया समालोचना लिसें नेपालभाषाय् हाइकु लेखन, हाइकुया समालोचना लगायतया बारेय् थःथःगु बिचाः तयादीगु खः।

अथेहे उगु ज्याझ्वलय् न्हूगु प्रयोगया कथं प्रकाशित कृतिया बारेय् च्वमि शाक्य व पत्रकार सिल्भिया राजोपाध्याय दथुइया खंल्हाबल्हा नं तगु खः। उगु ज्याझ्वः सुनिल बज्राचार्यं न्ह्याकादिगु खः।