निर्वाचन आयोगं नेपाल कम्युनिस्ट पार्टी (नेकपा) या निगु पक्षनाप सहलह यायेत्यःगु दु ।

केपी शर्मा ओली व पुष्पकमल दाहाल ‘प्रचण्ड’यात छुट्टाछुट्टै पौं च्वया आयोगं निर्वाचन तयारी व दल दर्ता प्रक्रियाबारे सहलह यायेत बहादुरं भवन कार्यालयय् सःतूगु दु । आयोगया प्रवक्ता राजकुमार श्रेष्ठं निर्वाचन सम्बन्धी विषयय् सहलह यायेत थौं सुथय् ११ बजे निम्ह हे अध्यक्ष व अध्यक्षयात तोके याना आधिकारिक मनूपि न्याम्ह न्याम्हेसित सःतगु जानकारी बिःगु दु।

आयोगं छ्वःगु पौं नेकपाया आधिकारिकता सम्बन्धी विवादबारे सहलह यायेत धाःगु मदु । तर आः नेकपा विवादया सन्दर्भ जुगुलि थुकिइ विषयय् न सहलह यायेत्यःगु दु । थ्व स्वया न्ह्य नेकपाया निगु पक्षं थःत आधिकारिक दावी यासे आयोगय् निवेदन बिःगु खः । तर उगु निवेदनय् निगु हे पक्षया दावी मगाःगु निर्णय आयोगं याःगु खः 

बैतडीया दशरथचन्द नगरपालिकां थौं शहीद दिवसया दिं सार्वजनिक विदा बिःगु दु ।

शहीद दशरथ चन्दया जन्मभूमिइ विशेष ज्याझ्वः यासे शहीद दिवस हनेगु कथं नगर क्षेत्रय् सार्वजनिक विदा बिःगु दु। नगरपालिकाया प्रमुख प्रशासकीय अधिकृत विक्रमबहादुर चन्दया कथं नगरपालिका दुने दक्को शैक्षिक संस्था, वडा कार्यालय व नगरपालिकाया कार्यालय थौं बन्द जुइगु दु।

अथेहे शहीद दशरथ चन्द स्मृति प्रतिष्ठानं थौं सुन्दरखालीपाखे छगु ¥याली नाप शहीद चन्दया छेँय् वना श्रद्धाञ्जलीसभा यायेत्यःगु दु। जहानियाँ राणा शासनया विरुद्ध लगे जुगुलि तत्कालीन शासकं दशरथ चन्दयात १९९७ माघ १५ गते येँया शोभा भगवतीइ गोली क्यका स्यागू खः ।

नेपाल इन्फ्रास्ट्रक्चर बैंकया आईपीओ इनेज्या थौं जुइगु दु। बिक्री प्रबन्धक एनआईबीएल एस क्यापिटलं कम्पनीया आईपीओ थौं सुथय् १० बजे इनेत्यःगु दु।

बैंकया कुल च्यागु अर्ब रुपैयाँ बराबरया च्यागु करोड कित्ता सेयर मिइगु खः। उकि मध्ये ०.२ प्रतिशत अर्थात् छगु लाख ६० हजार कित्ता कर्मचारीपिन्त  व ५ प्रतिशत अर्थात् ४० लाख कित्ता म्युचुअल फन्डया लागि छुटे याःगु खः। बाँकी न्ह्यःगु ५८ लाख ४० हजार कित्ता सेयर सर्वसाधारणया मिइगु खः । कम्पनीया आईपीआय् १५ लाख ५० हजार ३२५ गु आवेदनपाखे १८ अर्ब रुपैयाँ स्वया अप्वो आवेदन वःगु खः ।

उकि मध्ये १४ लाख ७५ हजार च्यागु आवेदकया १६ करोड ७२ लाख १० हजार कित्ता आवेदन भरिफाइड जूगु व एनआईबीएल एस क्यापिटलया मर्चेन्ट बैंकिङ प्रमुखं धाःगु दु । भेरिफाइया झ्वलय् ६ हजार २७६ आवेदन रद्द जुगु  धका धाःगु दु। बिक्री प्रबन्धक एनआईबीएल एस क्यापिटलं कम्पनीया आईपीओ प्रि(अलोटमेन्ट याना स्वीकृतिया लागि नेपाल धितोपत्र बोर्डय् छ्व धुकुगु दु ।

बोर्डपाखे स्वीकृत जुइ धुकुगुलि थौं सुथय् १० बजे क्यापिटलया केन्द्रीय कार्यालय लैनचौरय् आईपीओ इने ज्या जुइ । यदि सकसिया ५० कित्ता वा व स्वया अप्वोे आवेदन बिउपि दक्को आवेदकपिन्स न्यूनतम ५० कित्ता सेयर लाइगु खनेदुगु दु।