Display Style:
Column Style
टोखाय् कोरोना सङ्क्रमितपि ८०० स्वया अप्वोल,स्वम्ह मन्त
लहानान्युज | अनलाथ्व द्धादशी ११४०,असोज १२ सोमवाः
टोखा नगरपालिकाय् कोरोना सङ्क्रमितपि ८२५ म्ह थ्यःगु दु। येँया उत्तरी क्षेत्र टोखाय् म्हिगः आइतवाः थप २९म्ह सक्रमित थपे जुइवं नगरपालिका दुने कोरोना सङ्क्रमितपि ८२५म्ह थ्यःगु दु।
वडा नं य् १ दकलय् कम २१म्ह व दकलय् अप्वो वडा नं ३ य् ९५म्ह कोरोना सङ्क्रमित जुगु दु। वडा नं २ य् ५१म्ह, वडा नं ४ य् ४३म्ह, वडा नं ५ य् ८६म्ह, वडा नं ६ य् ९१म्ह, वडा नं ७ य् ८०म्ह, वडा नं ८ य् ९४म्ह, वडा नं ९ य् ५५म्ह, वडा नं १० य् ६६ म्ह व वडा नं ११ य् ६२ म्हेसित सक्रमित जुगु दु।
कोरोना सङ्क्रमितपि मध्ये ४४४म्ह डिस्चार्ज जुगु दु। ३०४म्ह होम आइसोलेसन व ६९ सङ्क्रमितपि थीथी अस्पतालय् वासः याका वयाच्वंगु दु। उकि मध्ये न्याम्ह आःतक सम्पर्कविहिन जुया च्वंगु दु।
टोखाय् आःतक कोरोना सङ्क्रमणया कारण स्वम्ह सी धुकुगु दु। वडा नं ४, ६ व ९ य् छम्ह छम्ह सीगु खः। येँ महानगरपालिका धुका दकलय् अप्वो कोरोना सक्रमित जूगु नगरपालिका टोखा खः।
टोखा नगरपालिकाय् कोरोना सक्रमित बिरामीपिन्त वासः यायेगु लागि टोखा चण्डेश्वरी प्राथमिक स्वास्थ्य केन्द्रय् १७ शय्याया आइसोलेसन सेन्टर स्थापना याना तःगु दु।
नगरपालिकाय् सक्रमण अप्वोया वःगुलि ११ गु वडाय् हे पीसीआर परीक्षणया दायरा अप्वोकुगु दु । टोखाया प्रत्येक वडाय् १००म्हेसिगु दरं परीक्षण याना वयाच्वंगु दु।
नगरपालिकां थ्व स्वया न्ह्य कोरोना पोजेटिभ खनेदेवं होम आइसोलेसनय् च्वना च्वपिन्त न्हि ३५० भत्ता बिइगु निर्णय याःगु खः । नगरपालिकां कोरोना सङ्क्रमित जूपिन्त होम आइसोलेसनय् च्वनाच्वपि बिरामी नापलान हौसला बिया वयाच्वंगु खः।
नगरपालिका दुने कोरोना सक्रमितपि अप्वोया वःगुलि नगरपालिका दुने दुगु ग्राण्डी अन्तर्राष्ट्रिय अस्पताल धापासी, ग्रिनसिटी अस्पताल बसुन्धरा, अल नेपाल अस्पत ाल सामाखुशी, विनायक अस्पताल गोङ्गबु नाप सहकार्य याना बिरामीपिनिगु वासः याना वयाच्वंगु खः।
येँ महानगरया स्वीनिगुलिं वडाया राजस्व अनलाइनपाखें
नृपेन्द्रलाल श्रेष्ठ | अनलाथ्व द्धादशी ११४०, असोज १२ सोमवाः
येँ महानगरपालिकापाखें विद्युतीय प्रणालीपाखें राजश्व निर्धारण व संकलन याय्गु ज्या न्ह्याकूगु दु ।
राजश्व विभागया निर्देशक शिवराज अधिकारीं असोज १ गतेनिसें अनलाइन सेवा न्ह्याकागु जानकारी बियादिसें शुरुया झिंछन्हुं हे च्यासः व न्यय्म्ह करदातापाखें छगू करोड ख्वीगू लखतका राजश्व म्हःगु जानकारी बियादिल । वय्कलं असोज १३ गतेनिसें स्वीनिगुलिं वडापाखें सेवा शुरु याय्गु नं जानकारी बियादिल ।
अथे हे, येँ महानगरपालिकाया प्रमुख प्रशासकीय अधिकृत एकनारायण अर्याल नं विद्युतीय प्रणालीपाखें राजश्व म्हय्गु ज्या शुरुवात याय्वं सकारात्मक प्रतिकृया वःगु धयादिल । आर्थिक वर्ष २०७७÷७८या नीति व ज्याझ्वलय् हे येँ महानगरपालिकां म्हय्गु कर, सेवा शुल्क व जरिवाना बैंकिङ व विद्युतीय प्रणालीपाखें याय्गु न्ह्यथनागु खँ धयादिसें प्रमुख प्रशासकीय अधिकृत अर्यालं कोभिड–१९या महामारीया दथुइ थुगु प्रणालीया विकास यानाः सकारात्मक ज्या शुरुवात यानागु धयादिल । अनलाइनपाखें राजश्व भुक्तानीया शुरुवातया नापनापं वडाय् सेवाग्राही भीड म्हो जुइगु व सेवा नं प्रभावकारी जुइगु अर्यालया विश्वास दु ।
थ्व हे झ्वलय् फुक्ककथंया कर, राजस्व, दस्तुर व शुल्क भुक्तानी याय्त व थःम्हेस्यां भुक्तानी यानागु धेबाया रसिद काय्त छु छु याय्माः धइगु डेमो छुं दिनय् हे सार्वजनिक याय्गु तयारी येँ महानगरपालिकां यानाच्वंगु दु । थुकिं यानाः करदातापिन्त अझ सहज जुइगु विश्वास महानगरपालिकां काःगु दु ।
१५७३म्हेसित कोरोना संक्रमण पुष्टि, ८८५म्ह डिस्चार्ज
लहानान्युज | अनलाथ्व एकादशी ११४०,असोज ११ आइतवाः
नेपालय् थौं १५७३म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।
मन्त्रालयया नियमित प्रेस ब्रिफिङया झ्वलय् थौं आइतवाः प्रवक्ता डा जागेश्वर गौतमं वःगु २४ घन्टाया दुने १५७३ म्हेसित कोरोना संक्रमण जूगु धका धाःगु दु।
प्रवक्ता डा गौतमया कथं थ्व नाप नेपालय् संक्रमितपि आः ७३ हजार ३९४ म्ह थ्यःगु दु।
२४ घन्टाया दुने १० हजार १२३म्हेसिगु पीसीआर परीक्षण याःगु खः । आइतवाः तक ९ लाख ८८ हजार ३२७म्हेसिगु पीसीआर परीक्षण याःगु खः ।
वःगु २४ घन्टाय् कोरोनामुक्त जूपि ८८५म्ह डिस्चार्ज जूगु दु। थ्व नाप नेपालय् कोरोनामुक्त जूपि ५३ हजार ८९८म्ह थ्यःगु दु।
मन्त्रालयया प्रवक्ता डा. गौतमया कथं आःतक आइसोलेसनय् च्वनाच्वपि १९ हजार १९ व क्वारेन्टाइनय् च्वनाच्वपि ६ हजार २ सय ८१म्ह दु धका धाःगु दु।
येँ ६३३म्ह नाप स्वनिगलय् ८०९म्हेसित कोरोना संक्रमित पुष्टि
लहानान्युज | अनलाथ्व एकादशी ११४०,असोज ११ आइतवाः
वःगु २४ घण्टाय् स्वनिगः दुने ८०९म्हेसित कोरोना संक्रमित पुष्टि जूगु दु।
स्वास्थ्य तथा जनसंख्या मन्त्रालयया कथं वगु २४ घण्टाया दुने येँ ६३३,म्हेसित कोरोना संक्रमित पुष्टि जूगु दु।
अथेहे ख्वपय् ७२ व यलय् १०४ म्हेसित कोरोना संक्रमित पुष्टि जूगु दु।
उकि मध्ये येँ २३०म्ह मिसा व ४०३ म्ह मिजं, ख्वपय् २१म्ह मिसा व ५१म्ह मिजं, यलय् ४३म्ह मिसा व ६१म्ह मिजंपिन्त कोरोना संक्रमण पुष्टि जूगु दु।
नेपाली कांग्रेसया सांसद उमेश श्रेष्ठयात कोरोना संक्रमण पुष्टि
लहानान्युज | अनलाथ्व एकादशी ११४०,असोज ११ आइतवाः
नेपाली कांग्रेसया सांसद उमेश श्रेष्ठयात न कोरोना भाइरसया संक्रमण पुष्टि जूगु दु। सामाजिक सञ्जालमार्फत थःत कोरोना भाइरस संक्रमण जूगु पुष्टि याःगु दु।
सांसद श्रेष्ठं म्हिगः शनिवाः बिःगु स्वाब परीक्षणया लिच्वलय् थःत संक्रमण खनेदुगु धका समाजिक सञ्जाल फेसबुकय् च्वया जानकारी बिःगु खः । कोरोना भाइरसया संक्रमण खनेदुगुलि होम आइसोलेसनय् च्वना च्वंगु दु।
सांसद श्रेष्ठं शनिवा थःगु परीक्षणया लिच्वः थःत कोरोना संक्रमण पुष्टि जुग दु धयादिसे आः थः होम आइसोलेसनय् च्वना च्वनागु दु धयादिसे थःगु स्वास्थ्य अवस्था सामान्य दु धका जानकारी बियादिगु दु।
थः नाप प्रत्यक्ष भेटघाट व सम्पर्कय् दुपिन्स न आवश्यक सजगता अपने यायेत इनाप याःगु दु।
