Display Style:
Column Style
लुँ तोलां निसः थहावन
शोभा श्रेष्ठ | कौलाथ्व षष्ठी ११४०,कार्तिक ६ बिहीवाः
लुँया भाः थौं तोलाय् निसः थहावःगु दु।
थौं लुँया भाः निसः थहावना तोलाया ९५ हजार ७ सय रुपैयाँ निर्धारण जूगु दु धका नेपाल सुनचाँदी व्यवसायी महासंघ धाःगु दु।
लुँया भाः थहावःसा वहःया भाः क्वहा वःगु दु। थौ वहः तोलाय् झीतका क्वहा वया १२३० रुपैयाँय् कारोबार जूगु दु धका महासंघ धाःगु दु।
गोदावरी नगरपालिकां निःशुल्क वासः यायेगु : मेयर गजेन्द्र महर्जन
नृपेन्द्रलाल श्रेष्ठ | कौलाथ्व षष्ठी ११४०,कार्तिक ६ बिहीवाः
नेपाल सरकारं कोरोना वासः यायेगु व परीक्षण निःशुल्क मयागु निर्णय यासा यलया गोदावरी नगरपालिकां थःगु नगरवासीपिनिगु परीक्षण यायेत निःशुल्क यायेगु निर्णय यानागु दु धका गोदावरी नगरपालिकाया मेयर गजेन्द्र महर्जन लहनान्युजयात कनादिगु दु।
गोदावरीया मेयर महर्जनं म्हिगः छगु सूचं जारी यानादिसे नगरवासीपिनिगु कोरोना परीक्षण निःशुल्क यायेगु धका धाःगु खः। कोरोनाया लक्षण खनेदुपिन्स अनया आनन्दवन अस्पतालय् स्वाव बिइत धाःगु दु।
थौं कन्ह्य हलियक फैलै जुयाच्वंगु कोरोना भाइरसपाखे जोखिम न्युनीकरण यायेत नगरवासीया सुरक्षाया लागि आःतक गोदावरी नगरपालिकां थीथी स्वास्थ्य सम्बन्धी ज्याझ्वः याना वयाच्वंगु दु।
थौं कात्तिक ६ गते निसे गोदावरी नगरपालिकाया दुने च्वपि नगरवासीपिन्त कोरोना भाइरसया लक्षण खनेदुपिन्त गोदावरी नगरपालिकाया विपद व्यवस्थापन कोषं आनन्दवन अस्पतालय् स्वाब (पीसीआर) परीक्षण निःशुल्क यायेगु धका मेयर महर्जन लहनान्युजयात जानकारी बियादिगु खः।
अथेहे छेँय् होम आइसोलेसन च्वने मछिइपिन्स नगरपालिकां होटेलय् निःशुल्क आइसोलेसनय् च्वनेगु ब्यवस्था याःगु दु। गोदावरी नगरपालिकाय् आःतक स्वसः न मल्याक मनू तयेत कोरोना सक्रमण जुइ धुकुगु दु।
अभिनेता हरिवंश आचार्य संक्रमणमुक्त
लहानान्युज | कौलाथ्व षष्ठी ११४०,कार्तिक ६ बिहीवाः
अभिनेता हरिवंश आचार्य व वया तिरिमय्जु कोरोना संक्रमणमुक्त जुगु दु।
थौं आचार्यं थःगु सामाजिक संजाल फेसबुकपाखे थःपिं कोरोना संक्रमणमुक्त जुगु धका जानकारी बिःगु दु।
पचली भैरवजात्राया फोटो फिचर
लहानान्युज | कौलाथ्व पंचमी ११४०,कार्तिक ५ बुधवाः
कौलाथ्व पंचमी कुन्हु येँया पचलीइ भैरब द्यःया जात्रा जूगु दु।
पचली भैरवया जात्राया झ्वलय् येँया टेकुं पचली भैरवयात बसन्तपू हनुमानध्वाखा चाःहीइकूगु दु ।
किपा रमेश शाक्य
देय् यकं ५ हजार ७४३ म्हेसित कोरोना संक्रमण पुष्टि
लहानान्युज | कौलाथ्व पंचमी ११४०,कार्तिक ५ बुधवाः
वःगु २४ घण्टाय् थौं बुधवाः थप ५ हजार ७४३ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।
मन्त्रालयं थौं ग्वसाः ग्वःगु नियमित कोरोना मिडिया ब्रिफिङया झ्वलय् प्रवक्ता डा जागेश्वर गौतमं थौं नाप आःतक १ लाख ४४ हजार ८७२ म्ह संक्रमितपि थ्यःगु दु धका धाःगु दु। थ्व नाप आः देय् यकं सक्रिय संक्रमितपि ४४ हजार ४७६ म्ह थ्यःगु दु।
अथेहे २४ घण्टाय् २ हजार ९९६ म्ह कोरोना संक्रमणमुक्त जुया छेँय् लिहावःगु दु। थ्व नाप आःतक कोरोनामुक्त जूपि ९९ हजार ६०५ म्ह थ्यःगु दु।
स्वास्थ्य मन्त्रालयया कथं आःतक पीसीआर विधि न १३ लाख ३४ हजार ८९७ म्हेसिगु परीक्षण याये धुकुगु खः। वःगु २४ घण्टाय् जक २० हजार ११८ म्हेसिगु पीसीआर परीक्षण याःगु खः।
