Display Style:
Column Style
नीति व कार्यक्रम पूवंकेगु प्रतिबद्धता
सुरेन्द्रभक्त श्रेष्ठ | अनलागा ३ ११४०,असोज १९ सोमवाः
किपू नगरपालिकाया ग्वसालय् नियमित पत्रकार सम्मेलनय् नगरपालिकाया नीति व कार्यक्रम सार्वजनिक याःगु दु।
किपू नगरपालिकाया न्हय्क्वःगु नगरसभां पारित याःगु नगरपालिकाया नीति व कार्यक्रम सार्वजनिक ज्याझ्वलय् प्रमुख प्रशासकीय अधिकृत सीता परियारं स्थानीय संचारमाध्यमं स्थानीय सरकारया सकतां ज्याझ्वःया गतिविधिया मू संवाहकया रुपं ज्या याइगु जूगुलिं स्थानीय सरकारया नितिं स्थानीय मिडिया नुगःचु जूगु बिचाः तयादीगु खः।
अथेहे, स्वास्थ्य शाखा प्रमुख सन्तमान मानन्धरं आःया कोरोना भाइरस सम्बन्धी किपूया गतिविधियात नगरपालिकाया ख्वाःपौ नगर सन्देशलिसें नगरपालिकाया वेभसाइटपाखें तथ्यांक सम्प्रेषण यानाच्वनागु जानकारी बियादिल।
सार्वजनिक जूगु नीति व कार्यक्रमय् कोभिड–१९पाखें ब्वलंगु संकट व्यवस्थापन सम्बन्धी क्षेत्रगत नीति दुने क्वारेन्टाइन सम्बन्धी व्यवस्था, पीसीआर परीक्षण प्रयोगशालाया व्यवस्थालिसें
पीसीआरया नितिं माःगु जनशक्ति व्यवस्थापनयात प्राथमिकता बियातःगु दुसा सामाजिक क्षेत्रलिसे स्वास्थ्य, खानेपानी, शिक्षा, सरसफाई व पूर्वाधारयात बः बियातःगु दु।
वंगु २०७७ असार १७ गते किपू नगरपालिकाया न्हय्क्वःगु नगरसभां पारित याःगु नीति व कार्यक्रम वंगु शुक्रवाः नगरपालिकाया न्हूगु भवनया हलय् कोरोना महामारीया हुनिं स्थगित जुयाच्वंगु नियमित पत्रकार भेटघाट ज्याझ्वः यानाः सार्वजनिक याःगु खः।
धरानय् ५५ दँ दुम्ह कोरोना संक्रमण मन्त
लहानान्युज | अनलागा ३ ११४०,असोज १९ सोमवाः
बीपी कोइराला स्वास्थ्य विज्ञान प्रतिष्ठानय् वासः याका च्वम्ह धरान उपमहानगरपालिका–१५ बाझगराय् च्वम्ह छम्ह कोरोना संक्रमित थौं सोमवाः सुथय् मन्त।
बीपी कोइराला स्वास्थ्य विज्ञान प्रतिष्ठानया कोभिड(१९ अस्पताल प्रतिष्ठानया सहप्रवक्ताया कथं ५५ दँ दुम्ह उम्ह मनू उच्च रक्तचाप व मृगौलाया ल्वगि खः धका धाःगु दु।
वयात असोज १६ गते कोरोना संक्रमण पुष्टि जुगु खः । वहे दिं अस्पतालय् भर्ना जूगु खः।
थ्व नाप धरानय् कोरोनां सीपि ९ म्ह थ्यःगु दु।
येँ महानगर १७ वडाय् कोरोना संक्रमित १५६म्ह थ्यन
शोभा श्रेष्ठ | अनलागा ३ ११४०,असोज १८ आइतवाः
येँ महानगरपालिका १७ वडाय् कोरोना संक्रमितपि १५६ म्ह थ्यःगु दु।
थौं जक उगु वडाय् ७ म्ह सक्रसमित जुगु दु सा स्वम्ह डिस्चार्ज जुगु दु।
सक्रमित जूपि थौं १७ वडाय् इन्दायणी मार्गय् स्वम्ह व मनाङ्ग गल्लीइ प्यम्हेसित कोरोना सक्रमण जूगु खः।
उगु वडाया दुने आःतक प्यम्ह सी धुकुगु दु सा ३८ म्ह डिस्चार्ज जुइ धुकुगु दु।
जागरुकया स्वक्वःगु हिदान पुलां ढल्कोय् क्वचाल
बिकाश | अनलागा ३ ११४० (असोज १८) आइतवाः
महामारीया इलय् हिया अभावं सुं नं विरामीया ज्यान मवनेमा धकाः जागरुक युवा समाजं हिदान ज्याझ्वःयात तच्वयेकूगु दु ।
थ्व हे झ्वलय् समाजं स्वक्वःगु हिदान ज्याझ्वः येँया पुलां ढल्कोय् याःगु दु ।
ब्लड डोनर्सएशोसिएसन नेपाल (ब्लोदान) या आह्वानय् जागरुक युवा समाजं येँया पुलां ढल्कोय् हिदान ज्याझ्वः याःगु खः ।
ज्याझ्वलय् २०म्ह स्थानीय हिदातां हिदान याःगु खः ।
ज्याझ्वलय् ब्लोदानया केन्द्रीय नायः सानुबाबु प्रजापति, कामपा १७ वडाया अध्यक्ष नवीन मानन्धरलिसें वागमती प्रदेश सांसद वसन्त मानन्धरतकंया ब्वति दुगु खः ।
संक्रमणया ग्याःचिकुं मनूत आपाः छेँय् हे च्वनेगु यानाच्वंगु इलय् हिदातात छेँय् हे लानाच्वंगु व हिया अभाव अप्वयेफुगु अवस्थाय् समाजं हिदानयात प्राथमिकता बियागु हिदान ज्याझ्वःया कजि लिसें समाजया ल्यू छ्यान्जे राजीव श्रेष्ठं धयादिल ।
विशेष यानाः बँ पसः चीकेगु अभियानय् सक्रिय समाजं थ्वयां न्ह्यः नं थँहिति, त्यःर लिसेंया थासय् हिदान ज्याझ्वः यायेधुंकूगु दु ।
लिसें समाजं वइगु शनिबाः इतुम्बहालय् नं हिदान ज्याझ्वः यायेत्यनागु ब्लोदानया केन्द्रिय दुजःलिसें कामपा २४ वडा सदस्य विनोद तुलाधर व समाजया सल्लाहकारं विनोद तुलाधरं जानकारी बियादिल ।
२४ घण्टाय् १३२९म्ह कोरोना संक्रमणमुक्त
लहानान्युज | अनलागा ३ ११४०,असोज १८ आइतवाः
थौं २४ घण्टाया दुने १२ हजार ७८४म्हेसिगु पीसीआर परीक्षणय् २२५३म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।
अथेहे २४ घण्टाया दुने कोरोना संक्रमणमुक्त जूपि १३२९म्ह थ्यःगु दु।
थ्व नाप आःतक कोरोना संक्रमणमुक्त जुपि ६४ हजार ६९म्ह थ्यःगु दु।
अथेतु, थौं थप ७ म्ह कोरोना सक्रमणं मदुगु दु। थ्व नाप नेपालय् कोरोना सीपि ५३५ म्ह थ्यःगु दु।
