Display Style:
Column Style
लुँ वहःया भाः न्यासः क्वहा वल
लहनान्युज | ञंललाथ्व ६ ११४०,भाद्र ८ सोमवाः
लुँया भाः थौं तोला न्यासः क्वहा वःगु दु ।
म्हिगः तोलाया ९८ हजार व प्यसः जुगुलि थौं तोलाया ९७ हजार व गुसः जूगु दु ।
अथेहे वहः तोलाया १३४५ तका जूगु दु । वह तोला थौं नी न्यातका क्वहा वःगु खः ।
विराटनगर व धरानय् कोरोना सङ्क्रमितपि निम्ह मन्त
लहनान्युज | ञंलाथ्व ६ ११४०,भाद्र ८ सोमवाः
विराटनगर व धरानय् कोरोना सङ्क्रमितपि निम्ह मनू मदुगु दु ।
विराटनगर महानगरपालिका वडा नम्बर ८ हरिहर चोकय् च्वम्ह छम्ह ६५ दँया मिजं मदुगु दु । न्हिनय् वयाके छु लक्षण व समस्या मदुगु खःसा बहनि ६ बजे विराटनगरया कोभिड १९
उपचार केन्द्रय् यकूगु खः । उम्ह मनू केन्द्रय् चान्ह्य हे मदु खः ।
मोरङय् आःतक कोरोना भाइरसया संक्रमणया कारण १४ म्हेसिगु ज्यान वने धुकुगु दु ।
अथेहे बीपी कोइराला स्वास्थ्य विज्ञान प्रतिष्ठान धरानय् न्हापागु पटक प्लाज्मा थेरापी याम्ह कोरोना सङ्क्रमितसिगु ज्यान वःगु दु । धरान उपमहानगरपालिका– ८ या ६८ दँया सङ्क्रमितम्ह आइतवाः बहनि मदुगु धका प्रतिष्ठानया प्रवक्तां जानकारी बिःगु खः ।
थ्व स्वया न्ह्यः प्लाज्मा थेरापी याम्ह निम्हम्ह न शनिवाः मदुगु खः।
गण्डकी प्रदेशय् च्यम्हेसित कोरोना संक्रमण पुष्टि
लहनान्युज | ञंलाथ्व ६ ११४०,भाद्र ८ सोमवाः
गण्डकी प्रदेशया न्याःगु जिल्ला् थप ८ म्हेसित कोरोना संक्रमण पुष्टि जूगु दु ।
प्रदेश स्वास्थ्य निर्देशनालयया कथं थौ सोमवाः सुथय् सार्वजनिक याःगु विवरण कथं पूर्वी नवलपरासी (नवलपुर), तनहुँ व बाग्लुङय् निम्ह निम्ह म्याग्दी व स्याङ्जाय् छम्ह छम्हेसित कोरोना पुष्टि जूगु दु ।
नवलपुरय् विनयत्रिवेणी–१ या छम्ह मचा नाप २८ दँया छम्ह मिजंयात न कोरोना संक्रमण खने दुगु दु ।
थ्व नाप गण्डकी प्रदेशय् कोरोना पुष्टि जूपि १ हजार ८८८ म्ह थ्यःगु दु धका गण्डकी प्रदेश कोरोना नियन्त्रण तथा रोकथाम कार्यक्रमया निर्देशकं जानकारी बिःगु खः ।
चितवनय् मेपि १२ म्ह कोरोना पुष्टि
लहनान्युज | ञंलाथ्व ६ ११४०,भाद्र ८ सोमवाः
चितवनय् न्यादँ दुम्ह मचा नाप मेपि १२ म्हेसित कोरोना संक्रमण पुष्टि जूगु दु ।
कोभिड–१९ प्रयोगशालाय् आइतवाः चान्ह्य याःगु परीक्षणय् न्ह्यम्ह मिसा न्याम्ह मिजंपिन्त कोरोना संक्रमण पुष्टि जूगु दु ।
संक्रमितपि जूपि भरतपुर महानगरपालिकाय् च्वपि खः ।
भरतपुर अस्पतालया कोभिड–१९ प्रयोगशालाय् आइतवाः २०९म्हसिगु नमुना परीक्षण याःगु खः ।
२० हजार पिसिआर परीक्षण स्थानीय तह न याइगु
नृपेन्द्रलाल श्रेष्ठ | ञंलाथ्व ६ ११४०,भाद्र ८ सोमवाः
उपत्यका नगरपालिका फोरमं दक्को पालिकाय् कन्ट्याक्ट ट्रेसिङ व टेस्टिङया दायरया तब्या यायेगु लागि स्वनिगलया स्थानीय तह यायेगु क्वःछिउगु दु । थगु ज्याया लागि स्थानीय तह न पिसिआर परीक्षण व कन्ट्याक्ट ट्रसिङया दायर अप्वयेकीगु जूगु दु ।
स्वनिगलय् समुदायस्तरय् हे कोरोना संक्रमण जुइफुगु खतरायात कया उपत्यका नगरपालिका फोरमं फुक्कं पालिकाय् कन्ट्याक्ट ट्रेसिङ व टेस्टिङया दायरया तब्या यायेगु क्वःछिउगु दु ।
फोरमया अधक्ष्य येँ महानगरपालिकाया मेयर विद्यासुन्दर शाक्य, उपाधक्ष्य यल महानगरपालिकाया मेयर चिरिबाबु महर्जन व सचिव थिमि नगरपालिकाया मेयर मदनसुन्दर श्रेष्ठं छगु सहलह यासे स्वनिगया फुक्कं पालिकाय् कन्ट्याक्ट ट्रेसिङ तब्याका यंकाः २० हजार पिसिआर परीक्षण यायेगु क्वःछिउगु खः ।
थौंकन्ह्य स्वनिगलय् कोरोना संक्रमितपि न्हियान्हिथं अप्वया वनाच्वंगु खँ धासें येँ महानगरपालिकाया मेयर शाक्यं धयादिल, ‘स्वनिगः घनाबस्ती जूगुलिं थन समुदायस्तरय् कोरोना संक्रमण न्यनावन धाःसा भयावह स्थिति वयेफु । उकिं इलय् हे नियन्त्रणया निंतिं फुक्कं पालिकातय्सं एकीकृत योजना दयेकाः न्ह्याः वनेत्यनागु खः ।’
येँ महानगरपालिकाया मेयर शाक्यं आः जारी जुयाच्वंगु निषेधाज्ञाया ईयात सदुपयोग यानाः व्यापक रुपं कन्ट्याक्ट ट्रेसिङ यानाः परीक्षणया दायरया तब्याकेगु निर्णय यासे व पोजिटिभ जूपिंत वासः यायेगु व्यवस्थाया बारे सहलह जूगु दु धका धयादिगु दु । मेयर शाक्य थुकिया बारे निर्णय यायेगु निंतिं थौं छगू मुँज्या च्वनेगु धका धयादिगु खः ।
फोरमया सचिव मदनसुन्दर श्रेष्ठं १५ निसें २० हजार कन्ट्याक्ट ट्रेसिङ यायेगु योजना दुगु धका धयादिसे पालिकाय् गुबलय्, गुगु क्षेत्रय्, गुलि कन्ट्याक्ट ट्रेसिङ यायेगु माःगु स्वया ज्या न्ह्याकेगु जुइगु खँ कनादिल ।
उगु फोरमया पदाधिकारीपि नाप बैठक च्वने न्ह्यः विज्ञतलिसे नं सहलह यायेगु धका न धयादिगु दु । सहलहय् स्वास्थ्य मन्त्रालयया जनस्वास्थ्य सल्लाहकार डा. खेम कार्की, मन्त्रालयया हे प्रमुख विशेषज्ञ महेन्द्रप्रसाद श्रेष्ठ, स्वास्थ्य सेवा विभागया इपिडिमियोलोजी तथा रोग नियन्त्रण महाशाखाया निर्देशक डा. बासुदेव पाण्डेपिं दुथ्याःगु खः ।
