वःगु २४ घण्टाया दुने ८४७ म्ह कोरोनामुक्त जूगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक कोरोना संक्रमणमुक्त जूपि २ लाख ३९ हजार ४१६ म्ह थ्यःगु दु।

अथेहे २४ घण्टाय् १३ म्ह सीगु दु।

थ्व नाप आःतक कोरोना संंक्रमणं सीपि १ हजार ७४३ म्ह थ्यःगु दु।

स्वास्थ्य तथा जनसंख्या मन्त्रालयया कथं थौं वःगु २४ घण्टाया दुने थप ७३६ म्ह कोरोना संक्रमण पुष्टि जूगु दु ।

संक्रमण पुष्टि जूपि २९१ म्ह मिसा व मिजंपि ४४५ म्ह खः। थ्व नाप आःतक नेपालय् २ लाख ५० हजार ९१६ म्ह कोरोना संक्रमण खने दुगु दु।

आःतक पीसीआर परीक्षणयापि १८ लाख ४९ हजार १३६ म्ह थ्यःगु दु । २४ घण्टाया दुने ५ हजार ५५५ म्हेसिगु पीसीआर परीक्षण याःगु खः।

देय्न्यकं सक्रिय संक्रमितपि ९ हजार ७५७ म्ह दु । अथेहे ४५२ म्ह क्वारेन्टाइनय् च्वना च्व.गु दु।

थौं सुथय् येँ महानगरपालिकाया मेयर विद्यासुन्दर शाक्यं पुलाम्ह जनप्रतिनिधि चन्द्रानन्द नेवाःया छेँय् म्ह्यपि वना वयकःयात सिरपा लल्हानादीगु दु।

तक्वःतक निर्वाचित जनप्रतिनिधिया रूपय् वयकलं महानगरयात याःगु सेवाया कदर यासे येँ महानगरपालिकां थुगु दँय् महानगर दिवसया लसताय् दुगु दँय् स्थापना याःगु ‘स्व. जनकमान श्रेष्ठ स्वशासन पुरस्कार’ वयकयात थौं मेयर शाक्यं लल्हानादीगु खः।

स्वास्थ्यया कारण सिरपाः कायेत वये मफुगुलि वयकयात छगु लाख नाप हनापौं मेयर शाक्य नाप प्रमुख प्रशासकीय अधिकृत राजेश्वर ज्ञवाली, येँ महानगर १८ वडाध्यक्ष  न्हुच्छेकाजी महर्जनपि छेँय् वःगु खः । जित थौं गौरव जुगु दु धका धयादिसे मेयर शाक्यं पुलाम्ह वडाध्यक्ष नेवाः जिगु गुरु व अविभावक निम्ह खः धका धयादीसे ।

इतिहासयात सम्मान याये दया जितः तसकं लय्ता धका धयादीसे यक्को नीतिगत खँ मिले यायेगु ल्यःदनी । ‘जि आः मेयर जूसा वयकः जिगु गुरु व अविभावक निम्ह खः,’ शाक्यं धयादीगु दु, ‘वयकःपाखे झीसं अझ न सयेका काये फइगु ल्यदनी । यक्को नीतिगत खँ वयकःपाखे सय्काःगु दु धका धयादीगु खः।

नेवाःयात राजनीतिक गुरु माने याना तम्ह आः १८ वडा अध्यक्ष न्हुच्छेकाजी महर्जनं जिगु न गुरु खः धका धयादीगु दु ।

नेवाः न्हापागु पटक २०१९ सालया स्थानीय निर्वाचनय् वडा सदस्य निर्वाचित जुगु खःसा २०३२ साल लिपा कार्यबाहक प्रधानपञ्चया तक जिम्मेवारी जुयादीगु खः।

नेपाली सेफ सन्तोष साह ‘बीबीसी मास्टर सेफ प्रोफेसनल्स् २०२० यूकेया शीष प्यःगु थासय् थ्यःगु दु।

‘बीबीसी वान’ म्हिगः मंगलवाः चान्ह्य जुगु फाइनल राउन्डया न्हापागु चरणय् वना प्यःगु थासय् थ्यःगु खः ।

हरेक चरणय् नेपाली नँसा दयेका निर्णायकपिनिगिु मन त्याकूसे सन्तोष न्ह्यने वनाच्वंगु खः ।

‘इन्भेन्सन् राउन्ड’ य् सन्तोषं डिजर्टया रुपय् कोदाया खिर नकूगु खः। सन्तोषं कोदाया खीर नाप अँया कुल्फी व तराईलय् चले जुगु अँया ‘अमोट’ दयेकूगु खः। निर्णायकया इनापय् खरायोया ‘फ्रेन्च क्लासिक डिस’यात वं नेपाली भुटन स्टाइलय् तयार याना निर्णायकपिन्त नकूगु खः ।

‘कोदोया खिर दयेकेगु तयारी न्हापानिसे यायेगु कुतः याना वयाच्वंगु खः। तर निर्णायकया रोजाइ खरायोया डिस तत्काल दयेकेत दबाब बिःगु खः,’।

किपू नगरपालिका वडा नं. ४ या गाम्चाय् मिसापि मुना स्थापना याना तःगु सुनौलो महिला बचत तथा ऋण सहकारी संस्था लिमिटेडया प्रारम्भिक साधारण सभा जूगु दु।

उगु सुनौलो महिला बचतया साधारण सभा छगु ज्याझ्वः दुथुइ मूपाहाँ किपू नगरपालिकाया मेयर रमेश महर्जनं यगु सभाया उलेज्या यानादीगु खः।

उगु ज्याझ्वलय् विशिष्ट पाहाँ कथं किपू नगरपालिकाया उप–मेयर सरस्वती खड्का पाहाँपि ४ नं. वडाया अध्यक्ष राजेन्द्र बानियाँ नाप सदस्यपि सुरेन्द्र खनाल, अनिल बाँस्कोता व उर्मिला बस्नेतपिनिगु न उपस्थिति दुगु खः।