Display Style:
Column Style
धुलिखेल अस्पताल सिल यायेगु निर्णय
लहनान्युज | गुंलागा ९ ११४०, साउन २९ बिहीवाः
सङ्क्रमण न्हिया न्हिथं अप्वया वना च्वंगुलि काभ्रेपलाञ्चोकया धुलिखेल अस्पताल क्षेत्रय् न सिल यायेगु निर्णय याःगु दु । बिहीवाः छम्ह ल्वगि नाप झीम्हेसित कोरोना सङ्क्रमण पुष्टि जूगुलि अस्पताल क्षेत्र बन्द यायेगु निर्णय याःगु दु ।
जिल्ला सङ्कट व्यवस्थापन केन्द्र प्रमुख एवं प्रमुख जिल्ला अधिकारी श्रवणकुमार तिमल्सिना, धुलिखेल नगर प्रमुख अशोककुमार ब्याञ्जू, जिल्लाया सङ्कट व्यवस्थापन केन्द्र व कोभिड–१९ रोकथाम तथा नियन्त्रण, कमाण्ड पोस्टया सदस्य सचिव एवं जिल्ला स्वास्थ्य कार्यालय प्रमुख डा. नरेन्द्र झा लगायत स्थानीय जनप्रतिनिधि सम्मिलित बैठकं अस्पतालया आकस्मिक बाहेक मेगु सेवा बन्द यायेगु निर्णय यासे अस्पतालया न्यासःगु मिटर तापाक्क तक मेगु सूचं मवःतले बन्द यायेगु निर्णय याःगु दु ।
अस्पताल क्षेत्र सिल यासे अस्पताल जःखः व्यवसाय याना वया च्वपिन्त आइतवाः निसे छेँ हे च्वनेत धाःगु दु ।
आःतक काभ्रेपलाञ्चोकय् सङ्क्रमितपि ६२म्ह मध्ये २९ म्ह वासः याका छेँय् लिहा वने धुकुगु दु ।
अन ३२ म्ह आइसोलेशनय् च्वना वासः याका वयाच्वंगु दु । उकि मध्ये २०म्ह प्रहरी, निम्ह स्वास्थ्यकःमि, छम्ह जनप्रतिनिधि, वैदेशिक रोजगारपाखे लिहा वःपि २२म्ह व १८ म्ह कन्ट्याक्ट ट्रेसिङ व मेमेपि कारणपाखे सङ्क्रमितपि खः।
कोरोना भाइरसया संक्रमण निम्ह मन्त
लहनान्युज | गुंलागा ९ ११४०, साउन २९ बिहीवाः
कोरोना भाइरस (कोभिड–१९) या संक्रमणया कारण थप निम्ह मन्त । थ्व नाप सीपिनिगु ल्याः ९६ म्ह थ्यःगु दु ।
स्वास्थ्य तथा जनसंख्या मन्त्रालयया कथ धनुषाया मिथिला नगरपालिका–७ ढल्केबरया ८५ दँ दुम्ह मिसाम्ह कोरोना संक्रमणपाखे मदुगु खः ।
उम्ह मनू वीपी कोइराला स्वास्थ्य विज्ञान प्रतिष्ठान, धरानय् बुधवाः मदुगु खः ।
थ्व नाप अछामया रामारोशन नगरपालिका–५ या १८ दँया मिजंम्ह मदुगु खः ।
उम्ह मनू मुटु ल्वगि जूगु धका पाटन स्वास्थ्य विज्ञान प्रतिष्ठानय् मदुगु खः ।
येँ १११म्ह यलय् ११म्ह व ख्वपय् न्याम्हेसित कोरोना पुष्टि
लहनान्युज | गुंलागा ९ ११४०, साउन २९ बिहीवाः
थौं स्वनिगलय् जक १२७म्हेसित कोरोना संक्रमण पुष्टि जूगु दु ।
थौं येँ जक १११म्हेसित कोरोना संक्रमण पुष्टि जूगु दु ।
अथेहे यलय् ११ म्ह व ख्वपय् न्याम्हेसित संक्रमण खनेदुगु धका स्वास्थ्य तथा जनसंख्या मन्त्रालयं धाःगु दु ।
२४ घण्टाया दुने कोरोना संक्रमणपि १०९म्ह डिस्चार्ज जूगु दु ।
थौं ५२५म्हेसित कोरोना भाइरसया सङ्क्रमण पुष्टि
लहनान्युज | गुंलागा ९ ११४०, साउन २९ बिहीवाः
नेपालय् वःगु २४ घण्टाय् ५२५ म्हेसित कोरोना भाइरसया सङ्क्रमण पुष्टि जूगु दु ।
थ्व नाप आः नेपालय् कोरोना सङ्क्रमितपि २४ हजार ९५७म्ह थ्यःगु दु धका स्वास्थ्य तथा जनसङ्ख्या मन्त्रालयं धाःगु दु ।
कलङ्की, कालीमाटीइ अत्यावश्यक बाहेक पसः बन्द
लहनान्युज | गुंलागा ९ ११४०, साउन २९ बिहीवाः
कोरोनाया जोखिम अप्वया वये वः येँया कलङ्की, कालीमाटीइ अत्यावश्यक बाहेक दक्को पसः बन्द याःगु दु ।
कोरोना भाइरसया सङ्क्रमण समुदायस्तरय् फैलै मजुइकेगु लागि येँ महानगरपालिका वडा नम्बर १४ य् अत्यावश्यक बाहेकया पसः बन्द याःगु खः ।
वडा कार्यालयपाखे छगु प्रेस विज्ञप्ति पिकया थःगु थासय् थःगु समुदायय् हे कोरोना फैलै मजुइकेगु निष्कर्ष पिकया बिहीवाः निसे अत्यावश्यक बाहेकया पसः मचायेकेगु निर्णय याःगु खः ।
छु दिं न्ह्यः अनया छगु क्यासेट पसलय् छम्हेसित सङ्क्रमण खनेदुगु खः । वया कन्ट्याक्ट ट्रेसिङ यायेगु झ्वलय् मेपि न सङ्क्रमण खने दुगु धका विज्ञप्तिइ उल्लेख याःगु खः ।
बिहीवाः निसे १५ दिं तक वडा नम्बर १४ या कलङ्की, कालीमाटी, खड्का गाउँ, कुलेश्वर, बल्खु खुसि तकया पसः व गतिविधि बन्द यानागु धका वडाध्यक्ष शोभा सापकोटां धाःगु खः ।
आः फलफुल तथा तरकारी व्यवसायीपिन्स सुथया ५ बजे निसे ९ बजे तक जक पसः चायेके खःनि ।
अथेहे वासः लगायत खाद्यान्न खुद्रा व्यवसायीपिन्स दुरी कायम याना न्हिच्छि चायेके खःनि ।
