Display Style:
Column Style
स्सास्थ्य मन्त्रालयपाखे निषेधाज्ञा छवाः थप यायेगु सुझाव
लहनान्युज | ञंलागा ७ ११४०,भाद्र २४ बुधवाः
कोरोना संक्रमण स्वनिगलय् अप्वोया वःगुलि स्वास्थ्य तथा जनसंख्या मन्त्रालयं निषेधाज्ञा थप छवाःया लागि तयेमाः धका धाःगु दु ।
वःगु स्वानिसे जारी लकडाउन थौं चान्ह्यः १२ बजे निसे क्वचायेत्यःगु खः । आः हाकन छवाः लकडाउन याना महामारी नियन्त्रण याये अपुइ धका स्वास्थ्य मन्त्रालयं मेगु छवाःया लागि तयेत सुझाव बिःगु दु ।
निसः स्वया अप्वो एक्टिभ केस जुगु थाय् लकडाउन व न्यासः स्वया अप्वो एक्टिभ केस दुगु थाय् कर्फ्यु हे तयेगु स्वास्थ्यया मापदण्ड कथं वने माः धका धाःगु दु ।
मन्त्रालयया कोभिड–१९ इन्सिडेन्ट कमाण्ड सिस्टम (आईसीएस) प्रमुखं जनस्वास्थ्यया हिसावं निषेधाज्ञायात निरन्तरता यायेमाः धका धाःगु दु । आः पूर्ण रुपं लकडाउन चायेकेगु इलय्
अस्पताल व चिकित्सकपिन्त संक्रमित व्यवस्थापन याये थाकुइ धका धाःगु दु । आः हे लकडाउन चायेकेगु इलय् संक्रमण अप्वोया वनिगुलि अस्पतालय् न समस्या जुइफु । उकि छवाः कडा रुपं निषेधाज्ञा तःसा बालाइ धका धाःगु दु ।
उपत्यका नगरपालिका फोरम नं सीमापाखे दुहा वयेगु नाकाय् कडा यायेमाःगु व जनजीवन छ्वाःसुकेत धाःगु दु । थ्व स्वया न्ह्य निजी सवारी साधनय् जोर–बिजोर प्रणालीपाखे सञ्चालन यायेगु सुझाव बिःगु दु ।
तर गुलिं विज्ञपिन्से निषेधाज्ञा जक समस्याया समाधान मखु आः मेगु विकल्प माःला वने माःग सुझाव बिःगु दु । उमिसं निषेधाज्ञायात छ्वासुका जनजीवनयात सामान्य दयेका वनेत इनाप याःगु दु ।
लुँ तोलां खुसः थहा वन
लहनान्युज | ञंलागा ७ ११४०,भाद्र २४ बुधवाः
लुँया भाः थौं तोलां खुसः थहा वःगु दु । नेपाल सुनचाँदी व्यवसायी महासंघया कथं छापावाल लुँया भाः छगु तोलाया ९६ हजार ४ सय रुपैयाँ कायम याःगु दु ।
अ
थेहे तेजाबी लुँया भाः खुसः थहा वना ९५ हजार ९ सय रुपैयाँ कायम जूगु दु ।
वहः तोलां न्यातका थहावःगु दु । नेपाली बजारय् थौं वहः तोला १३१५ रुपैयाँ थ्यःगु दु धका महासंघं धाःगु दु ।
नाकाय् सेना खटे यानाः कडाई यायेत नगरपालिका फोरमया माग
नृपेन्द्रलाल श्रेष्ठ | ञंलागा ६ ११४० (भाद्र २३) मंगलवाः
स्वनिगःया निगू महानगरलिसें १८ नगरपालिकातय् मंकाः संस्था उपत्यका नगरपालिका फोरमं उपत्यका दुहांवयेगु दक्वं नाकाय् सेना खटे यानाः स्वनिगः दुहांवयेगुलिइ कडाई यायेत माग याःगु दु ।
थौं च्वंगु फोरमया बैठकय् फोरमया न्वकू लिसें यल महानगरपालिकाया प्रमुख चिरिबाबु महर्जनं स्वनिगः दुनेया जनजीवन छ्वासुकाः नाकाय् सेना खटे यानाः कडाई यायेत संघीय सरकार व स्वंगुलिं जिल्ला प्रशासनलिसे माग यायेगु निर्णय जूगु धयादिल ।
फोरमया सचिव अले मध्यपुर थिमि नगरपालिकाया प्रमुख मदनसुन्दर श्रेष्ठं धयादिल, ‘भदौ २५ गतेनिसें स्वनिगः दुहांवयेगु दक्वं नाका व प्रवेश विन्दुइ तसकं कडाई यानाः जोखिम न्युनिकरणयात ध्यानय् तयाः सुरक्षा सतर्कता नालाः स्वास्थ्य मापदण्ड अनिवार्य रुपं यायेगु याकेगु कथं निषेधाज्ञा छ्वासुका वनेगु निर्णय यानागु दु ।’
बैठकं अझं छुं दिं सार्वजनिक यातायातयात रोक तयाः मेगु सवारीइ जोर–विजोर प्रणाली लागु यायेत नं इनाप याःगु दु ।
बैठकं उद्योग, व्यवसाय व कलकारखाना न्ह्याकेबलय् स्वास्थ्य सुरक्षा मापदण्ड पालना यायेगु याकेगु नं निर्णय याःगु दु ।
बैठकय् स्वनिगःया १८गुलिं पालिकां लिपांग्ु निषेधाज्ञा ज्वःछि स्वनिगलय् करीब ३८द्वःया कन्ट्याक्ट ट्रेसिङ यानागु जानकारी ब्यूगु खः ।
स्वनिगलय् समूदायस्तरय् हे कोभिड—१९ या संक्रमण न्यनेफुगु खतरायात बिचाः यासें तत्काल हे स्वास्थ्य मन्त्रालयलिसेया समन्वयस करीब २८द्वःत्याया कन्ट्याक्ट ट्रेसिङ यायेगु निर्णय तकं जूगु जानकारी ब्यूगु दु ।
बैठकय् फोरमया सचिव श्रेष्ठं स्थानीय तह, प्रदेश व संघीय सरकारया समन्वयस आइसोलेसनया लागिं १६सः व क्वारेन्टीनया लागिं १५सः बेड दयेकेधुनागु जानकारी बियादिल ।
येँ महानगरपालिकां जक हे निषेधाज्ञा ज्वःछि ७द्वःत्या स्वयां आपाःया कन्ट्याक्ट ट्रेसिङ यानागु व उकी ३सः व ४०म्हेसित कोरोना पोजेटिभ खनेदुगु उपमेयर हरिप्रभा खड्गी श्रेष्ठं जानकारी बियादिल ।
बैठकं कागेश्वरी मनोहरा नगरया मेयर कृष्णहरि थापाया कजिसुइ स्थानीय सरकार सञ्चालन ऐन संशोधनय् बिचाः दयेकेत ५ दुजःया कार्यदल गठन याःगु दु ।
संघीय मामिला तथा सामान्य प्रशासन मन्त्रालयं स्थानीय सरकार सञ्चालन ऐन संशोधन प्रक्रिया न्ह्यःने यंकेधुंकाः थुकी दुनेया व्यवस्थाया स्पष्ट व्याख्या यायेत, थःगु च्यूताः व सरोकारया बिषय कःघायेत कार्यदल गठन याःगु खः ।
लिसें २०२८ सालय् जारी शिक्षा ऐन व थ्व अन्तर्गत दयेकूगु प्रबन्धया लिधंसाय् आः शिक्षक दरबन्दीया सम्बन्धय् शिक्षा तथा मानव स्रोत विकास केन्द्रं न्ह्याकूगु प्रक्रिया दिकेत च्वयाः छ्वयेगु निर्णय नं बैठकं याःगु दु ।
येँ ३००म्ह नाप स्वनिगलय् ३९६म्ह कोरोना संक्रमण
लहनान्युज | ञंलागा ६ ११४०,भाद्र २३ मंगलवाः
वःगु २४ घण्टाय् स्वनिगः दुने थप ३९६म्हेसित कोरोना भाइरस (कोभिड–१९) या संक्रमण पुष्टि जूगु दु ।
अथेहे येँ जक ३००म्हेसित कोरोना भाइरस (कोभिड–१९) या संक्रमण पुष्टि जूगु दु ।
अथेतु, ख्वपय् ५८ म्ह व यलय् ३८म्हेसित संक्रमण पुष्टि जुगु धका स्वास्थ्य तथा जनसंख्या मन्त्रालयं धाःगु दु । थ्व नाप येँ जक संक्रमित जुपि ६ हजार ९१७ म्ह थ्यःगु दु
यलय् ९३९म्ह व ख्वपय् ७२४म्ह थ्यःगु दु ।
अथेहे येँया ८०दँ दुम्ह मिसा व ८५ दँ दुम्ह मिजंम्ह कोरोना संक्रमणं सी गु दु धका मन्त्रालयं जानकारी बिःगु दु ।
स्वनिगः दुने निषेधाज्ञा विषय सहलह
लहनान्युज | ञंलागा ६ ११४०,भाद्र २३ मंगलवाः
स्वनिगः दुने निषेधाज्ञा थपे यायेगु वा मयायेगु धइगु विषय सहलह जुयाच्वंगु दु । थौं मंगलवाः येँ, ख्वप व यलया प्रमुख जिल्ला अधिकारीपि दथुइ भर्चुअल संवाद जुया च्वंगु दु ।
कोरोना संक्रमण अप्वोया वःगुलि स्वगू जिल्लाय् भदौ ४ गते निसे निषेधाज्ञा याःगु खः । स्वक्वःगु पटक थपे याःगु निषेधाज्ञा बुधबार चान्ह्य क्वचायेत्यःगु खः ।
आः न संक्रमण नियन्त्रणय् पूर्ण रुप मवःगुलि स्वगु जिल्लाया प्रमुख जिल्ला अधिकारी छगु हे मत जु्या च्वंगु मदु । आःया अवस्थाय् निरन्तर बिलकि जनस्तरपाखे विरोध जुइ धका प्रमुख जिल्ला अधिकारीपिनिगु बुझाइ दु ।
गृह मन्त्रालय न निषेधाज्ञायात छ्वासुकेगु कथं खाका प्रस्तुत यायेत धाःगु दु ।
निषेधाज्ञायात छ्वासुकेगु लागि निगु प्रस्ताव वयाच्वंगु दु । न्हापागु छवाःया लागि निषेधाज्ञा थपे याना रोजगारी थाय् खुला यायेगु । निगु, जोर–विजोर प्रणाली लागू याना सवारी साधन चले याकेगु ।
४ भदौ जूगु जारी निषेधाज्ञाया कारण छवाः लिपा संक्रमण दर घटे जुइ धका प्रशासकपिनिगु विश्लेषण दु । उकि तत्कालया लागि उद्योग, कलकारखाना व पसः, स्वास्थ्य मापदण्ड पालना याना खुले याके माःगु धारणा दु ।
