Display Style:
Column Style
संघीयता बल्लाकेत नगरतय् दथुइ भगिनी सम्वन्ध
नृपेन्द्रलाल श्रेष्ठ | कछलागा तृतीया ११४० (२०७७ मंसीर १८)
जुम्लाया चन्दननाथ नगरपालिकालिसे भगिनी स्वापू स्थापना यायेगु निर्णय याःगु येँ महानगरपालिकां थौं अनया नगर प्रमुख क्रान्तिका सेजुवाललिसेंया जनप्रतिनिधिलिसे सहलह याःगु दु ।
सहलहया झ्वलय् येँ महानगरपालिकाया प्रमुख विद्या सुन्दर शाक्यं निगू नगर क्षेत्र दुनेया जीवन्त संस्कृति, सम्पदा व पर्यटकीय, पर्यावरण क्षेत्रया संरक्षण, प्रवर्ध्दन, विकास व प्रचार प्रसारय् सहकार्य यायेगु धयादिल ।
'साँस्कृतिक सहर येँ व कर्णालीया दुर्गम नगरपालिका चन्दननाथ दथुइ भगिनी स्वापू स्थापना यायेगु खँ सकारात्मक खः,’ शाक्यं धयादिल, थवंथवय् सहकार्य, ठोस योजना अले नतिजामूखि क्रियाकलाप न्ह्याकेत साझेदारी यायेत स्वयागु दु ।’
संघीयतायात सार्थक व अझ बल्लाकेत लिपांगु इलय् स्वदेशया हे नगरलिसे भगिनी स्वापू स्थापना यायेगु कुतः न्ह्यःने यंकागु शाक्यं धयादिल ।
उगु इलय् शाक्यं येँया १० नगर, ख्वपया मध्यपुर थिमि व रामग्राम नगरपालिकालिसे साझेदारीया छुं ज्या न्ह्यःने यंकागु जानकारी नं याकादिल ।
भगिनी स्वापू स्थापना धुंकाः जुम्लाय् उत्पादिन बहुमुल्य जडिबुटी, स्याउ, सिमि, ख्वःसिं लिसेंया प्राङ्गरिक कृषि उत्पादनया बजारीकरण, व्यवस्थापन लिसेंया विषयस नं सहकार्य यायेफइगु शाक्यं धयादिल । रारा, सेफोक्सुण्डो थुज्वःगु थासय् वनेगु लँय् हे लाःगु चन्दननाथलिसे धार्मिक पर्यटनयात तकं स्वानाः देय्या अर्थतन्त्रयात समृद्ध दयेके फइगु बिचाः शाक्यं तयादिल ।
चन्दननाथ नगरपालिकाया प्रमुख सेजुवालं स्रोत–साधनं जाःगु येँ महानगरपालिकालिसे भगिनी स्वापू स्थापना याये दुगुलिइ लसता प्वंकादिल । निगू नगरत धार्मिक पर्यटनलिसे नं स्वानाः न्ह्याःवनेफइगु बिचाः सेजुवालं तयादिल ।
येँ महानगरपालिकाया उप–प्रमुख हरिप्रभा खड्गी श्रेष्ठं नं भगिनी स्वापू स्थापना धुंकाः निगू नगरं सहकार्य यायेफइगु धयादिल ।
थौं हे धनकुटाया पाख्रिवास नगरपालिकाया प्रमुख वृषबहादुर राई व जनप्रतिनिधिलिसे नं सहलह जूगु दु । सहलहस प्रमुख राईं नं वइगु दिनय् सहकार्य यानाः न्ह्याःवनेत भगिनी स्वापू स्थापनाया लागिं प्रस्ताव तयादिल ।
हिसिला व मणिराज कोरोनामुक्त जुल
लहानान्युज | कछलागा तृतीया ११४१, मंसिर १८ बिहीवाः
कोरोना भाइरसया संक्रमण जुया वःगु स्ववाः निसे होम क्वारेनन्टानय् च्वनाः वासः याकाच्वंपिं कलाकारपि मणि राजलवट, हिसिला महर्जन व म्ह्याय् पालिजा राजलवटपि संक्रमणमुक्त जूगु दु ।
स्ववा न्ह्य कोरोना पुष्टि जुपि वंगु वालय् इमिगु रिपोर्ट नेगेटिभ वःगु खः ।
लुँ थौं तोलां १६०० थहावन
शोभा श्रेष्ठ | कछलागा तृतीया ११४१, मंसिर १८ बिहीवाः
लुँया भाः थौ तोलां १६ सय थहावःगु दु ।
म्हिगः बुधवाः ९१ हजारं कारोबार जुगु छापावला लुँ थौं बिहीवाः छगु तोलाया ९२ हजार ६ सय रुपैयाँ तोके याःगु दु धका नेपाल सुन चाँँदी व्यवसायी महासंघं धाःगु दु ।
अथेहे तेजाबी लुँ न थौं बिहीवाः ९२ हजार १५० रुपैयाँ कारोवार जुगु दु । म्हिगः बुधवाः तेजाबी लुँ ९० हजार ५५० रुपैयाँ कारोबार जुगु खः।
अथेतु वहः तोला नीतका थहावःगु दु ।
म्हिगः ११८५ तका कारोवार जुगु खःसा थौं १२०५ तका क्वछिगु दु धका महासंघं धाःगु दु।
कोरिया वनेत रोके जुयाच्वंगु प्रकिया सुरु जुइगु
लहानान्युज | कछलागा तृतीया ११४१, मंसिर १८ बिहीवाः
कोरोनाया कारण कोरिया वनेगु रोके जुयाच्वंगु प्रक्रिया याकन हे सुरु जुइत्यःगु दु।
कोरिया यकिइगु प्रक्रिया याकन हे सुरु यायेगु तयारी जुगु धक अनया श्रम मन्त्रालयं धाःगु दु ।
प्रवासी श्रमिक युनियन एमटीयू व केसीटीयू न कोरियाया रोजगार तथा श्रम मन्त्रालय प्रवासी श्रमिक विभागया निर्देशक लगायत नाप कोरियाया ईपीएस अन्तर्गत प्रवासी श्रमिकया बारे सहलह ना रोके जुयाच्वंगु फुक्क प्रक्रिया सञ्चालन याना कोरोना महामारीया कारणं प्रवेशय् रोक लगे जुगु श्रमिकया प्रवेशया बारे सहलह जुगु खः ।
कोरियाली भाषा पास याना कोरिया वनेत पियाच्वंपि निदँ रोस्टरया ई क्वचाय्त्यःपिनिगु खुला थपे यायेगु निर्णय याःगु दु। कोभिड–१९ या कारण कोरिया दुहा वनेत कडा याःगु खः नेपालय् लकडाउन जुइवं रोजगार अनुमति प्रणाली ईपीएस माध्यमपाखे कोरिया वनिइपिनिगु फुक्क प्रक्रियाय् स्थगन याःगु खः।
चन्द्रागिरि हिल्सं साधारण शेयर बिक्री याइगु
लहानान्युज | कछलागा तृतीया ११४१, मंसिर १८ बिहीवाः
चन्द्रागिरि हिल्स लिमिटेडं साधारण शेयर बिक्री यायेगु सुरु याःगु दु । वास्तविक क्षेत्रय् तक शेयर बजारय् हयेगु लक्ष्यया साथ सरकारं हःगु नीति कथं कम्पनीले बुधबार निसे साधारण शेयर बिक्री याःगुु दु।
कम्पनीं स्थानीय आयोजना प्रभावितयात साधारण शेयर बिक्री यायेत्यःगु खः। नेपाल धितोपत्र बोर्ड नं कम्पनीयात न्हापागु चरणय् आयोजना प्रभावितयात साधारण शेयर बिक्रीया लागि अनुमति बिःगु खः। न्हापागु चरणया साधारण शेयर बिक्री याकन हे वइगु पुस १ गते तक लिबाक्क वइगु पुस १६ गते तक जुइ । कम्पनीं आयोजना प्रभावितया लागि प्रति शेयर १०० रुपैयाया दरं स्वगु लाख खुद्धः ८१९ कित्ता बिक्री याये त्यःगु खः।
आयोजना प्रभावित क्षेत्रय् येँ जिल्ला अन्तर्गत चन्द्रागिरि नगरपालिका– ३,४, ६ व ७ साविक थानकोट गाविसया दक्को वडा व साविक महदेवस्थान गाविसको वडा नं ३,४,५,६,७,८, नाप मकवानपुर जिल्लाया थाहा नगरपालिका–९ व १० खः। बिक्री प्रबन्धकया कथं कम्पनीया साधारण शेयरय् कम १० कित्ता निसे अप्वो स्वद्धल् व खुइगु तीन हजार ६० कित्ता तक बिइ फइ। अथेहे निगु चरणय् सर्वसाधारणया लागि १५ लाख ३४ हजार ९१ कित्ता शेयर बिक्री यायेत्यःगु खः ।
कम्पनी सर्वसाधारण व स्थानीयवासीयात याना कूल १८ लाख ४० हजार ९१० कित्ता सेयर बिक्री याये त्यःगु खः । धितोपत्र बोर्डपाखे कम्पनीं १८ करोड ४० लाख रुपैयाँ बराबरया साधारण शेयर बिक्रीया लागि अनुमति काःगु खः । कम्पनीया शेयर बिक्री प्रबन्धकय् ग्लोबल आइएमई क्याटिलयात ल्यःगु खः।
