Display Style:
Column Style
सुदर्शना दर्शनधारीया जहान श्याम कार्की मन्त
लहानान्युज | कछलागा अष्टमी ११४१, मंसिर २३ मंगलवाः
नेवाः देय् दबूया पुलांम्ह केन्द्रिय सुदर्शना दर्शनधारीया जहान श्याम कार्की म्हिगः सोमवाः मन्त ।
मय्जु दर्शनधारीया जहान कार्की ताः ईनिसे क्यान्सर ल्वचं कयाः वासः याकाः वयाच्वंगु खः।
मदुम्ह कार्की पुलांम्ह नेपाली सेनाय् आबद्ध जुया च्वनादीम्ह खः ।
वय्कःया निम्ह काय् व छम्ह म्ह्याय् दी ।
सगरमाथाया न्हूगु उचाई ८८,४८.८६ मिटर
लहानान्युज | कछलागा अष्टमी ११४१, मंसिर २३ मंगलवाः
सगरमाथाया न्हूगु उचाई ८८,४८.८६ मिटर घोषणा जूगु दु ।
नेपाःया परराष्ट्रमन्त्री प्रदीपकुमार ज्ञवाली व चीनया विदेशमन्त्री वांग यीं मंकाः कथं न्हूगु उचाई घोषणा याःगु खः ।
थ्व स्वया न्ह्यः सगरमाथाया उचाई ८८,४८ मिटर जुया वयाच्वंगु खः । तःभुखाय् लिपा २०७२ य् उचाई ह्यूपाः वये फइगु आधारय् मापन याःगु खः । आः सगरमाथाया उचाई ०.८६ मिटर थाहां वंगु दु ।
घोषणा ज्याझ्वलय् भर्चुअल माध्यमं निगुलिं देय्उा उच्च अधिकारीपिनिगु ब्बति दुगु खः । नापी विभागया उच्च अधिकारीपिं नं ज्याझ्वलय् सहभागी जूगु खः ।
थौं मंगलवाः ८,८,४८ मिटरय् परिमार्जन यानाः उगु उचाई सार्वजनिक याःगु खः । विभागं निदँ बिकाः उचाईया पायछिगु तथ्य पिकाःगु खः । नेपालं न्हापांगुखुसि थःगु हे प्रविधि व खर्चपाखें सगरमाथाया उचाई लुइकूगु खः ।
मिसाः दबुया प्यक्वःगु दँमुज्या क्वचाल
लहानान्युज | कछलागा अष्टमी ११४१, मंसिर २३ मंगलवाः
नेवाः मिसा दबुया प्यक्वःगु दँमुज्या छगु ज्याझ्वः दथुइ क्वचाःगु दु ।
उगु ज्याझ्वलय् मूपाहाँ कथं येँ महानगरपालिकाया मेयर विद्यासुन्दर शाक्यं अनलाइन पोर्टल नेवाः दबुया उलेज्या यानादीगु खः। ज्याझ्वलय् थःगु खँ तयेगु झ्वलय् मेयर शाक्यं लैगिंक विदेभ अत्य याना दक्वः ख्यलय् मिजँ मिसाः नापंनापं न्ह्यावनेमाग खँय् बःबियादीगु खः । नापं वयकलं नेवाः मिसापिं संगठीत जुयाः न्ह्यां वनाच्वंगुलिं भिंतुना बिसें थ्व अनलाइन पोर्टल सुथांलाक्क न्ह्यायेमा धका धयादीगु खः।
अथेहे हलिं नेवाः दबुया अधक्ष्य सिजन श्रेष्ठं उगु ज्याभ्वलय् वल्र्ड नेवाः अर्गनाइजेशनं नं याकनं हे अन्तराष्ट्रिय मिसा कवः गठन जुइत्यंगु जानकारी बियादिःगु खः ।
मिसा दबुया अधक्ष्य रश्मिला प्रजापतिया सभाधक्ष्यताय् जुगु उगु ज्याझ्वलय् नेवाः देय् दबूया अधक्ष्य नरेश ताम्रकारं, नेवाः दबु प्रदेश नं ४ या न्वकु शंकरनारायण श्रेष्ठंपिन्स न ब्बति काःगु खः।
दबूया न्वकू कस्तुरी श्रेष्ठ सुभाय् देछानादिगु खःसा कोषाध्यक्ष अर्चना तण्डुकारं ज्याझ्वः न्ह्याकादीगु खः ।
देयन्यक १३८२ म्ह कोरोना सक्रमित
शोभा श्रेष्ठ | कछलागा अष्टमी ११४१, मंसिर २३ मंगलवाः
वःगु २४ घण्टाय् थौं मंगलवाः थप १ हजार ३८२ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।
संक्रमित जूपि मिसापि ३७० म्ह व मिजंपि ६४४ म्हेसित पुष्टि जूगु दु। थ्व नाप नेपालय् कोरोना संक्रमितपि २ लाख ४३ हजार ३७७ म्ह थ्यःगु दु ।
मन्त्रालयया कथं आःतक पीसीआर विधिपाखे १७ लाख ९९ हजार ६८६ म्हेसिगु परीक्षण याःगु खः।
२४ घण्टाय् जम्मा ८ हजार ९४७ म्हेसित पीसीआर परीक्षण याःगु खः।
देय्न्यकं सक्रिय संक्रमितपि १२ हजार ६८६ म्ह दु सा क्वारेन्टाइनय् च्वपि ५२३ म्ह च्वना च्वःगु दु ।
१६२१ म्ह कोरोनामुक्त, २३ म्ह मन्त
लहानान्युज | कछलागा अष्टमी ११४१, मंसिर २३ मंगलवाः
स्वास्थ्य मन्त्रालया कथं २४ घण्टाया दुने १ हजार ६२१ म्ह कोरोना संक्रमणमुत्त जुया छेँ लिहावःगु दु।
नेपालय् थ्व नाप आःतक कोरोना सक्रमणमुक्त जुपि २ लाख २९ हजार ५४ म्ह थ्यःगु दु।
अथेहे वःगु २४ घण्टाय् कोरोना संक्रमणं २३ म्ह मन्त ।
थ्व नाप आःतक सीपि १ हजार ६३७ म्ह थ्ययःगु दु।
