Display Style:
Column Style
लुँ तोला न्यासः थहावन
शोभा श्रेष्ठ | कछलागा पारु ११४१, मंसिर १६ मंगलवाः
लुँया भाः थुगु वाःया दुने लगातार क्वहा वया च्वंगु दु।
तर थौं धाःसा न्यासः थहावःगु दु धका नेपाल सुन चाँदी व्यवसायी महासंघं धाःगु दु।
महासंघया कथं लुँ तोला न्यासः थहावना ९० हजार ५ सय थ्यःगु दु धका धाःगु दु ।
म्हिगः तोलाय् न्ह्यसः क्वा वया ९० हजार थ्यःगु खः ।
अथेहे वहः तोलां स्वीतका थहा वना ११५५ तका थ्यःगु दु ।
येँ हुलमुल यातकि आः कारवाही याइगु
लहानान्युज | कछलागा पारु ११४१, मंसिर १६ मंगलवाः
येँ तसकं हुलमुल यातकि आः कारबाही याइगु जुगु दु । जिल्ला प्रशासन कार्यालय येँ न थौं छगु विज्ञप्ति पिकया आः हुलमुल यायेगु गतिविधि सञ्चालन यातकि कानुन कथं कारबाही याइगु जुगु दु ।
येँ थीथी थासय् सभा, जुलुस, प्रदर्शन थे जाःगु ज्याझ्वः जुया वयाच्वंगुलि तत्काल थज्यागु गतिविधि बन्द यासे कोरोना सङ्क्रमणया रोकथामयात ग्वाहालि यायेत जिल्ला प्रशासनं इनाप याःगु दु । वइगु दिं हुलमुल जुइगु गतिविधि सञ्चालन यातकि सङ्क्रामक रोग ऐन २०२० व स्थानीय प्रशासन ऐन २०२८ कथं कारबाही जुइ धका विज्ञप्तिइ उल्लेख यानातःगु दु ।
विश्वय् तधःगु चुनौतीया रूपय् दुगु कोरोना सङ्क्रमण येँ न तत्काल नियन्त्रण मजुगु अवस्थाय् काठमाण्डौया प्रमुख जिल्ला अधिकारी कालीप्रसाद पराजुली सरकारं तोके याःगु मापदण्ड पालना यायेत इनाप याःगु दु।
येँया सम्पदा व पोखराया प्रकृतियात पर्यटन नाप स्वाना देय् समृद्ध दय्के फइ : मेयर शाक्य
लहानान्युज | कछलागा पारु ११४१, मंसिर १६ मंगलवाः
येँ महानगरपालिकाया मेयर विद्यासुन्दर शाक्यं नेपालया अर्थतन्त्र याःगु मेरुदण्डया रुपय् पर्यटन क्षेत्रया माध्यमपाखे अर्थतन्त्रयात समृद्घ दयेके फइ धका धयादीगु दु। येँ महानगरपालिका व रामग्राम नगरपालिका दथुइ अन्तर स्थानिय तह भगिनी सम्वन्ध स्थापना जुगु ज्याझ्वलय् ब्वति कायेत वया अध्ययन भ्रमणया झ्वलय् पोखराय् मेयर शाक्ययात लसकुस यासे पोखरा महानगरपालिकाय् छगु ज्याझ्वलय अथे धयादीगु खः।
सम्वोधन यायेगु झ्वलय् मेयर शाक्यं पर्यटनया माध्यमपाखे देय्या अर्थतन्त्रयात थकायेत समन्वय व अनुभव आदान–प्रदान आवश्यक दु धका धयादीसे, येँ दुगु सम्पदायाना येँ छगु सांस्कृतिक सहर जुगु दु। येँ महानगरं मुर्त–अमुर्त सम्पदां बालगु दु धका धयादीसे,’ मेयर शाक्यं, ‘पोखरा प्रकृतिया सुन्दरताया धनी खः। थुगु निगु महानगर दथुइ प्रकृति व सम्पदाया प्रवद्र्धन व व्यवस्थापन याये फत धाःसा कोरोनाया कारण शिथिल जुया च्वंगु पर्यटनयात चलायमान दय्का पर्यटनया हे माध्यमपाखे देय्या अर्थतन्त्रयात थकाय् फइ धका धयादीगु खः।’
न्ववायेगु झ्वलय् मेयर शाक्यं कोभिड–१९ नियन्त्रण व रोकथामया लागि येँ महानगरपालिकां याःगु कुतः, सहरी सुव्यवस्थाया लागि तःगु पलाः व सम्पदा निर्माण–पुर्ननिर्माण, भौतिक पूर्वाधार लगायतया सन्र्दभय् याःगु ज्याया खँ कनादीगु खः।
ज्याझ्वलय् न्ववानादीसे पोखरा महानगरया मेयर मानबहादुर जिसीं येँ महानगरपालिका संघीय राजधानीयो महानगरपालिका जूगुलि यक्को खँ येँ महानगरपाखे सय्के फइगु जुगुलि अभिभावकीय भूमिका जुइ माःगुलि बःबियादीगु खः। आः स्थानीय तहया भूमिकायात कमजोर दयेकिगु कुतः जुयाच्वंगु धका धयादीसे संघीयतायात संस्थागत यायेत स्थानीय तहया भूमिका महत्वपूर्ण जुइ माःगुलि बःबियादीगु खः। ‘स्थानीय तहया भूमिकाया बलाकेत येँ महानगरपालिकां नेतृत्व कायेमाः,’धका मेयर जिसी धयादीगु खः।,
येँ महानगरपालिकाया उपमेयर हरिप्रभा खड्गी श्रेष्ठ न उगु ज्याझ्वलय् उपस्थिति दुगु खः।
भाषासेवी अमृतमान श्रेष्ठ मन्त
लहानान्युज | कछलागा पारु ११४१, मंसिर १६ मंगलवाः
नेपालभाषाया सक्रिय कार्यकर्ता भाषासेवी अमृतमान श्रेष्ठ थौं चान्हय् मन्त ।
मदुम्ह श्रेष्ठ नेपालभाषाया वाःपौ इनापया व्यवस्थापक न खः।
७५ दँ दुम्ह श्रेष्ठयात क्यान्सर ल्वय् जुयाच्वंगु खः। वय्कःया निम्ह काय् व जहान दी ।
थौं मंगलवाः हे पशुपति दीपय् अन्तिम दाहसंस्कार जूगु दु ।
किपूया मेयर रमेश महर्जनपाखे इछेँ त्वाःया फल्चा
लहानान्युज | कछलागा पारु ११४१, मंसिर १६ मंगलवाः
किपू नगरपालिका १० वडाया इछेँ त्वाःया फल्चा छगु ज्याझ्वः दथुइ मूपाहाँ किपू नगरपालिकाया मेयर रमेश महर्जनं उलेज्या यानादीगु दु ।
मूपाहाँ मेयर महर्जनं फल्चा नेवाः तयेगु म्हसीका जूगु व उकिया संरक्षण झीसं हे यायेमाःगु खँय् बः बियादीसें फल्चाया यक्को महत्वय् दु । नाप फल्चाय् च्वनाः झी मा बज्येपिन्सं इताः कायेगु जक ज्या याःसां नं पर्यटकपिनिगु नितिं नेवाः बस्ती दुने दुहाँ वयागु अनुभव याइगुलि फल्चा धैगु नेवाः म्हसीकाया चिं खः । उकिं फल्चाया संरक्षण त्वालय् च्वपि लगे जुइमाःगु धका धयादीगु खः ।
ज्याझ्वलय् विशेष पाहाँ उपमेयर सरस्वती खड्का रिजालं सम्पदा ख्यलय् किपू नगरपालिकाया मू आज्जु धइगु ऐतिहासिक नाप पुरातात्विक सम्पदा फल्चाया पुनःनिर्माण निसें कयाः किपूया म्हसीका दुगु भाषा कला संस्कृति सम्पदात यात संरक्षण व समद्धनज याये माःगु खँय् बः बियादिगु खः।
उगु ज्याझ्वलय् पाहाँ कथं किपू नगरपालिकाया वडा अध्यक्षपि १० या अमन महर्जन, १ वडाया हर्ष महर्जन, २ या वडाध्यक्ष रमेशमान डंगोल व वडा सदस्यपि चिनीकाजी श्रेष्ठ, हरिशरण महर्जन, संगीता उप्रेती श्रेष्ठ, धनबहादुर महर्जन, त्रिरत्न नाप कीर्ति विहारया अध्यक्ष जुलुम शाक्य न ज्याझ्वलय् उपस्थिति दुगु खः ।
इछेँ त्वाःया थकाली बद्रीलाल तण्डुकारया सभाधक्ष्यताय् जुगु उगु ज्याझ्वलय् फल्चा निर्माणया कजि रत्नकुमार महर्जन लसकुस न्वचू बियादीगु खः ।
