Display Style:
Column Style
स्वनिगलय् सुथसिया तापक्रम ६.५ डिग्री सेल्सियस
कछलागा पारु ११४१, मंसिर १६ मंगलवाः
देय् यकं थौं मौसम सफा जुइ ।
जल तथा मौसम विज्ञान विभागया कथं थौं देय् यकं मौसमय् ह्यूपा वया हिमपात व वाः वइगु सम्भावना मदु ।
स्वनिगलय् थौं सुथसिया तापक्रम ६.५ डिग्री सेल्सियस दु ।
न्हिनय् तापक्रम २१–२३ डिग्री सेल्सियस थ्यनि धका मौसमविद् न धाःगु दु ।
३३ क्वःगु विश्व एड्स दिवस
रमित | कछलागा पारु ११४१, मंसिर १६ मंगलवाः
थौं ३३ क्वःगु विश्व एड्स दिवस । एचआइभी नियन्त्रण तथा रोकथामया लागि विश्वव्यापी ऐक्यवद्दता व साझा जिम्मेवारी धइगु नारा ज्वना विश्वयकं एड्स दिवस मान यायेत्यःगु दु ।
नेपालय् २९ हजार ५०३ म्ह एचआईभी संक्रमित दुगु धका राष्ट्रिय एड्स तथा यौनरोग नियन्त्रण केन्द्रया तथांकय् दु। उकि मध्ये ६० प्रतिशत मिजं व ४० प्रतिशत मिसापि खः । मस्त व ल्याय्म्हपि १९ हजार ४१० म्ह दु ।
नेपालय् दँय् दँसं जोखिमयुक्त वर्ग ५ प्रतिशत व सामान्य जनसंख्याय् एचआईभी संक्रमणया दर ० दशमलव १३ प्रतिशत दु। सन् २०३० तक नेपालय् एड्सया महामारी अन्त्य यायेगु सरकारया रणनीति दु ।
१९३१ म्ह कोरोनामुक्त, २९म्ह मन्त
शोभा श्रेष्ठ | कछलाथ्व पुन्हि ११४१, मंसिर १५ सोमवाः
वःगु २४ घन्टाया दुने कोरोनामुक्त १९३१ म्ह डिस्चार्ज जूया छेँय् लिहावःगु दु।
नेपालय् थ्व नाप आःतक कोरोनामुक्त जूपि २ लाख १४ हजार ५२१ म्ह थ्यःगु दु ।
अथेहे नेपालय् सक्रिय संक्रमितपि १७ हजार ४२३ म्ह थ्यःगु दु ।
वःगु २४ घन्टाया दुने नेपालय् थप २९ म्ह कोरोना संक्रमण जुया सीगु दु धका स्वास्थ्य तथा जनसंख्या मन्त्रालयं धाःगु दु ।
थ्व नाप नेपालय् कोरोना संक्रमणपि १५०८ म्ह थ्यःगु दु।
देय्यकं १४७४म्ह कोरोना सक्रमण पुष्टि
शोभा श्रेष्ठ | कछलाथ्व पुन्हि ११४१, मंसिर १५ सोमवाः
नेपालय् वःगु २४ घन्टाया दुने थप १४७४ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु ।
वःगु २४ घण्टाया दुने जम्मा ९ हजार ९११ म्हेसिगु पीसीआर परीक्षण याःगु खः ।
मन्त्रालयया कथं सोमवाः न्हुपि थपे जुपि नाप आः कोरोनाका संक्रमितपि नेपालय् २ लाख ३३ हजार ४५२ म्ह थ्यःगु दु।
स्वनिगः दुने ८०९ म्हेसित कोरोना सक्रमित
शोभा श्रेष्ठ | कछलाथ्व पुन्हि ११४१, मंसिर १५ सोमवाः
स्वास्थ्य तथा जनसंख्या मन्त्रालयया कथं वःगु २४ घण्टाया दुने स्वनिलय् थप ८०९ म्हेसित कोरोना संक्रमण पुष्टि जूगु दु ।
थौं पुष्टि जूपि ३६१ म्ह मिसापि व ४४८ म्ह मिजंपि खः ।
अथेहे थौं येँ जक ६१५म्हेसित कोरोना सक्रमण पुष्टि जूगु धका मन्त्रालययं धाःगु दु।
अथेतु ख्वपय् ६९ म्ह व यलय् १२५ म्ह न्हुपि संक्रमितपि थपे जूगु दु धका धाःगु दु।
