वःगु २४ घण्टाया दुने थौं सोमवाः थप १ हजार १९७ म्हेसित कोरोना संक्रमण पुष्टि जुगु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् कोरोना संक्रमित जूपि २ लाख १० हजार ९७३ म्ह थ्यःगु दु।

अथेहे २४ घण्टाया दुने २ हजार ९३४ म्ह कोरोना संक्रमणपि डिस्चार्ज जुया छेँय् लिहावःगु दु।

थ्व नाप सक्रमणमुक्त जुपि १ लाख ७६ हजार ३६४ म्ह थ्यःगु दु।

सासः ल्हायेगु थाकुया वये वं अस्पताल यकू यकू दुहु गाउँपालिका–२ या ३० दँ दुम्ह छम्ह मनू लँय् हे मदुम्ह उम्ह मनूयात कोरोना सङ्क्रमण पुष्टि जुगु दु।

उम्ह मनू निन्हु निसे सासः ल्हायेत थाकुगु खः। नेपाल विद्युत प्राधिकरण दार्चुला वितरण केन्द्रय् ज्या याइम्ह कर्मचारी जिल्ला अस्पताल दार्चुलाय् वासः यायेगु सम्भव मजुइ वं वयात धनगढी यका च्वंगु इलय् बैतडीे सतबाजया लँय् हे मदुगु खः। कोरोना नाप मिले जुगु लक्षण खने दयेवं स्याब सङ्कलन याना कोरोना परीक्षण याःगु यलय् वयात कोरोना पोजेटिभ खनेदुगु धका बैतडी अस्पतालया प्रयोगशाला प्रमुखं जानकारी बिःगु खः।

अथेहे जिल्ला अस्पतालया आकस्मिक व प्रसुति सेवा बाहेक मेगु सेवा बन्द जुगु दु। उम्ह मनूया वासः यायेगु झ्वलय् अस्पतालया कर्मचारीपिन्त कोरोनाया जोखिमयात ध्यानय् तया अस्पतालं आकस्मिक बाहकेया मेगु सेवा बन्द जुगु धका अस्पतालं मेगु सूचं पिहा मवतले बन्द यानागु धका धाःगु दु।

बागमति प्रदेशया मुख्यमन्त्री डोरमणि पौडेलं छगू भिंतुना सन्देश जारी याःगु दु।

उगु सन्देशय् नेपाल संवतयात नेपाःया मौलिक संवतया रुपय् सकस्यां आत्मसात यायेगु ज्या जुयाच्वंगु खँ धयादिसे वय्कलं नेपाः बिस्कं बिस्कं धार्मिक व सांस्कृतिक विशेषता दुगु देय् खः धार्मिक, सांस्कृतिक नापं जातीय एकताय् बल्लाःगु खँ नं सन्देशय् न्ह्यथनादीगु दु ।

मुख्यमन्त्री पौडेलं जारी यानादीगु भिंतुना सन्देशय् ‘नेपाःया मौलिक नेपाल संवत् ११४१ या लसताय् प्रदेशय् च्वंपिं सकल दाजुकिजा, तताकेहेँ व फुकसिया सुख, समृद्धि व लिसें प्रगतिया निंतिं भिन्तुना देछाना च्वना ।’ वय्कलं आः वइगु न्हूदँ नेपाःमिया एकता अझ क्वातुइगु विश्वास नं प्वंकादीगु दु ।

नेपाल संवतया न्हूदँया लसताय् प्रधानमन्त्री केपी शर्मा ओलीं न्हूदँया लसताय् भिंतुना देछागु दु।

नेपाल संवत् ११४१ या भिंतुना बियादिसे प्रधानमन्त्री ओलीं हलियकं महामारीया रुपय् ब्वलनाच्व.गु कोभिड १९ पाखें विशेष सतर्क जुयाः नेपाल संवतया न्हूदँ हनेत आह्वान यानादीगु दु ।

प्रम ओलीं बियादीगु भिंतुना सन्देशय् धयातःगु दु, ‘शंखधर साख्वाः न त्यासाय् दुनाः दासत्वया जीवन हनाच्वंपिं सर्वसाधारण जनातयात त्यासा मुक्त यानाः स्वतन्त्रता बिउगु न्हियात प्राचीन कालंनिसें नेपाल संवतया रुपय् न्यायेका वयाच्वंगु दु।

नेपाल संवत् न्हूदँया लसताय् तत्कालीन समाज सुधारया नेतृत्व याःम्ह नेपाल संवत्या प्रवर्तकयात विशेष कथं लुमंकाच्वना ।’ वयकलं राष्ट्रया समृद्धि व जनताया सुख प्राप्तिया निंतिं छप्पँ जुइत इनाप यासें धयादीगु दु, ‘झीसं समृद्ध नेपाल, सुखी नेपाःमिया राष्ट्रिय आकांक्षा पूवंके फयेमा ।’