न्हूदँ राष्ट्रिय समारोह समितिं न्हूदँ ने.सं. ११४१ थुगु दँय् कोरोना संक्रमणया कारणं बसन्तपुरय् दँय् दसं जुयाच्वंगु भिंतुना सभा व जुलुस स्थगित याःगु दु।

न्हुदँ पारु कन्हये सामाजिक दूरी कायम यासें सुथसिया ९ः३० ताः इलय् येँया राष्ट्रिय सभागृहय् भिंतुना सभा याइगु जूगु दु। समारोह समितिं ब्यूगु जानकारी कथं कन्हय्या ज्याझ्वलय् सदां थें प्रधानमन्त्रीयात मूपाहाँ कथं ब्वनातःगु दुसा पाहाँ कथं न्हूदँ समारोह समितिया सल्लाहकारपिं व प्रतिष्ठित व्यक्तित्वपिन्त ब्वनातःगु दु ।

उगु सभाय् येँया सांसदपिं, प्रदेशसभाया सांसदपिं, मेयर उपमेयर, वडाध्यक्ष, नेवाः आन्दोलनया सक्रिय व्यक्तित्वपिं, न्हूदँ समारोह समितिया सल्लाहकारपिं, मूल समारोह समितिया दुजःपिं, पत्रकारपिंलिसें विशिष्ट व्यक्तिपिन्त ब्वनातःगु दु । कन्हय्या ज्याझ्वलय् दकले न्हापां नेपाःया राष्ट्रिय म्ये, नेवाःतय्गु मंकाः म्ये, जनकवि दुर्गालाल श्रेष्ठं च्वयादीगु न्हूदँया भिंतुना म्ये हायेकाः लसकुस यायेत्यंगु दुसा मूपाहाँपाखें न्हूदँया लसताय् त्वाःदेवा च्याकाः न्हूगु दँयात लसकुस यायेगु ज्याझ्वः तयातःगु दु ।

अथेहे, न्हूदँया सांस्कृतिक जुलुस स्थगित जूगु हुनिं यानाः कन्हय् भिंतुना सभाय् नेवाःतय्गु स्वथ्वः सांस्कृतिक बाजं थ्वयेकेगु ज्याझ्वः तयातःगु दु । अथेहे, न्हूदँ समारोह समितिं दँय् दसं पिथनाच्वंगु तिथि पौ मूपाहाँपाखें सार्वजनिक यायेगु ज्याझ्वः तयातःगु दु । उगु ज्याझ्वः हलिंन्यंकं च्वनाच्वंपिं दथुइ थ्यंकेगु नितिं टेलिभिजन, एफएम, यूट्युब, अनलाइनपाखें प्रत्यक्ष प्रसारण यायेत्यंगु दु।

खड्गी ग्वाहाली पुचः येँ महानगरपालिका १५ वडां उगु वडा दुने च्वना थीथी ज्या याना वयाच्वपिन्त छुगु ज्याझ्वः दथुइ हने ज्या याःगु दु।

उगु ज्याझ्वःया मूपाहा कथं नेपाल ओलम्पिक कमिटीया अध्यक्ष संघीय सांसद जीवनराम श्रेष्ठ सम्मानीत जुयादिपिन्त हनापौ लल्हानादिगु खः।

अथेहे पाहाँ कथं कामपा १५ वडाध्यक्ष नाप महानगर प्रवक्ता ईश्वरमान डंगोल वडासदस्यपि निमा घ्याम्चो, आनन्द गौतम, मैयाँलक्ष्मी महर्जन व थीथी पार्टीया प्रतिनिधिपिं न उपस्थिति दुगु खः।

स्वयम्भुया भुयुख्यलय् जुगु उगु ज्याझ्वलय् नेवाः पत्रकार राष्ट्रिय दबू येँ जिल्लायात नं कदर पत्र व मतिना या चिं लः ल्हाःगु खः।

वःगु २४ घण्टाया दुने थौं आइतवाः थप १४७७ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् २ लाख ९ हजार ७७६ म्ह संक्रमितपि थ्यःगु दु।

अथेहे २४ घण्टाया दुने २ हजार ७९८ म्हेसित कोरोना संक्रमणपि डिस्चार्ज जूगु दु। थ्व नाप १ लाख ७३ हजार ४३० म्ह डिस्चार्ज जुगु दु।

अथेहे देय् यकं सक्रिय संक्रमितपि ३५ हजार १२५म्ह दु।

वःगु २४ घण्टाया दुने स्वनिगलय् थप ८०७ म्हेसित कोरोना संक्रमित पुष्टि जुगु दु धका स्वास्थ्य तथा जनसंख्या मन्त्रालयं जानकारी बिःगु दु।

थौं आइतवाः संक्रमण पुष्टि जूपि ३५२ म्ह मिसा व ४५५ म्ह मिजंपि खः।

मन्त्रालयया कथं थौं येँ जक ६३२ म्हेसित कोरोना सक्रमण जुगु दु धका मन्त्रालयं धाःगु खः।

अथेहे, यलय् १३३ म्ह व ख्वपय् ४२ म्हेसित कोरोना सक्रमण जुगु दु धका धाःगु खः।

देय् यकं कोरोना सक्रमण पुष्टि १ हजार ४७७ म्हेसित जुगु खः। 

नेवाः पत्रकार राष्ट्रिय दबू नं मदुम्ह सञ्चारकःमि विक्रम शाक्यया परिवारयात छगु लाख रुपैयाँ ग्वाहालि याःगु दु।

पत्रकार दबू न  पूच्वोया अक्षेयश्वर महाविहारय् छगु बिचाः मुज्याः यासे उगु ध्यवा लल्हाःगु खः। उगु मुँज्याय् दबूया केन्द्रीय अध्यक्ष सुरजवीर बज्राचार्य व कोषाध्यक्ष सुरेन्द्रभक्त श्रेष्ठं मंकाः कथं मदुम्ह शाक्यया जाहान धनलक्ष्मी शाक्यया हस्तान्तरण याःगु खः।

नेपालभाषाया अग्रज सञ्चारकःमि शाक्यं भाषा, साहित्य, संस्कृति व लिपिया विकासया लागि पत्रकारिता माध्यमं महत्वपूर्ण भूमिका निर्वाह याःगु दु धका पत्रकार दबूया केन्द्रीय अध्यक्ष बज्राचार्य धयादिगु खः‘ मदुम्ह शाक्यं छापा व रेडियो पत्रकारिताया ख्यलय् यक्को दखल दुम्ह मातृभाषायाछम्ह प्रतिभाशाली पत्रकार गुमे याये माःगु दु धका धयादिगु खः।’ पत्रकार दबूइा निर्वतमान अध्यक्ष श्रीकृष्ण महर्जनं शुरुइ साहित्य, संस्कृति व मनोरञ्जनात्मक गतिविधि जक केन्द्रीत नेपाल भाषाया रेडियो सञ्चारमाध्यमयात राजनीतिक, समसामयिक विषयमा बहस छलफल चले यायेगु स्तर तक विकास यायेगुलि शाक्यया तधःगु भूमिका उल्लेखनीय दुगु धका धयादिगु खः।

उगु ज्याझ्वलय् संयोजक नापं केन्द्रया वरिष्ठ उपाध्यक्ष नृपेन्द्रलाल श्रेष्ठं जनताया सूसुचित यायेगु हकया लागि अग्रपंक्ति च्वना महत्वपूर्ण भूमिका निर्वाह यायेगु पत्रकारपि गम्भीर बिरामी वा समस्या जुगु इलय् पत्रकार राष्ट्रिय दबू नं अक्षयकोष स्थापना यासे व थीथी ग्वाहालिमि पाखे व शुभेच्छुकपिन्स ग्वाहालि जुयावया च्वंगु थज्याःगु ग्वाहालि लिपा न जुइ धका भलसा कयादिगु खः।

उगु मुँज्याय् पत्रकार दबूया महासचिव सुनील महर्जनं विक्रम शाक्यं यलय् विविध गतिविधियात सञ्चार नाप स्वायेगु ज्यासे भाषिक समानता, जातीय समानताया लागि पत्रकारिता पाखे योगदान यासे पैरवी पत्रकारिताया छगु बालागु नजिर जुगु धारणा तयादिगु खः। ’मदुम्ह शाक्यया जहान धनलक्ष्मी शाक्यं दुःखड घडी  ग्वाहालि यापिन्त सुभाय् देछानादिगु खः।

मुँज्याय् उपाधक्ष्य रचना श्रेष्ठ, कोषाध्यक्ष सुरेन्द्रभक्त श्रेष्ठ, सह सचिव राजु नापित, दुजः मिना वज्राचार्य व बिक्रम शाक्यया काय् लुःज शाक्यपिनिगु न उपस्थिति दुगु खः।