Display Style:
Column Style
२४६ न्हूपिं संक्रमितय् ३१म्ह स्वनिगलय्
बिकाश | गुंलाथ्व चतुर्दशी ११४० (२०७७ श्रावण १८) आइतबाः
थौं देयया २७ कोभिड प्रयोगशालाय् मुक्कं ८द्वः ८सः व ६१ नमूना परिक्षण याःगुलिइ २सः व ४६म्हेसिके कोरोना भाईरस (कोभिड १९) या संक्रमण पुष्टि जूगु दु ।
देयया २५ जिल्लापाखें २ सय ४६म्ह न्हूपिं संक्रमित लूगुलिइ स्वनिगलय् ३१ लाःगु दु ।
लिपांगु २४ घौ दुनेया परिक्षणय् येँय् मुक्कं २२म्हेसिके संक्रमण खनेदुगु दुसा यलय् ८म्ह व ख्वपय् छम्हेसिके संक्रमण पुष्टि जूगु दु ।
लिपांगु छुं दिं न्ह्यःनिसें स्वनिगः दुने मदिक्क न्हूपिं संक्रमितत खने दयाच्वंगु दु ।
लकडाउन छ्वासूगु लिसें पिनं मनूत वयेगु अप्वःगु व थन हे नं सामाजिक दुरी, मास्क लगायतया सावधानी अप्वःसिनं ल्यूगु खनेमदुगु अवस्थाय् थन संक्रमण न्हियान्हिथं न्यना वनाच्वंगु खनेदु ।
स्वनिगःया स्थिती भयावह हे जुइफुगु चेतावनी विज्ञपिन्सं बियावःगु दु ।
विज्ञपिन्सं थन समुदायस्तरय् हे संक्रमण न्यनेधुंकूगु संकेत खनेदुगु धयाच्वंगु इलय् सरकारं धाःसा समुदाय स्तरय् संक्रमण न्यंगु मदुगु धया वयावःगु दु ।
परिक्षणयात अप्वयेकेमाःगु आःया इलय् परिक्षण हे क्वकयाः संक्रमितया ल्याः म्ह्वः क्यनाच्वंगु द्वपं सरकारयात लानावःगु दु ।
प्रा. प्रेमशान्ति तुलाधरया जहान मन्त
शोभा श्रेष्ठ | गुंलाथ्व चतुर्दशी ११४० (२०७७ श्रावण १८) आइतबाः
नेपालभाषा ख्यःया नांजाःम्ह व्यक्तित्व प्रा. प्रेमशान्ति तुलाधरया जहान अकलमान तुलाधर मन्त ।
७६ दँ दुम्ह वय्कः आइतबाः सुथय् ११ः३०ताः इलय् आकाझाकां मदुगु खः ।
वय्कःयात अल्जाइमर ल्वय् नं दुगु खःसा छुं ई न्ह्यःनिसें छ्यंया ल्वचं नं कयाच्वंगु खः ।
आइतवाः हे वय्कःया येँया कर्ण दीपय् अन्तिम संस्कार याःगु दु ।
वय्कःया निम्ह काय्पिं प्रशन्न तुलाधर व सौरभ तुलाधर अले म्ह्याय् पल्पसा तुलाधर दी ।
काय्पिं प्रशन्न व सौरभ जर्मनीइ च्वंनाच्वंगु खःसा म्हिगः तिनि हे नेपाः थ्यंकःवःगु खः ।
सम्पदा मैत्री फल्चाया पुनःनिर्माण जुल
नृपेन्द्रलाल श्रेष्ठ | गुंलाथ्व १४ ११४०,साउन १८ आइतवाः
येँ महानगरपालिका–१२या ब्रह्मत्वालय् मौलिक परम्परा व कलात्मक शैलीइ सम्पदा मैत्रीकथं श्वेत भैरब फल्चा पुनःनिर्माण याःगु दु ।
छगू ज्याझ्वःया दथुइ उगु फल्चाया उलेज्या यानादिसें बागमती प्रदेशया सभासद डा. अजयक्रान्ति शाक्यं बागमती प्रदेश सरकारया स्थानीय पूर्वाधार विकास साझेदारी ज्याझ्वःकथं फल्चाया पुनःनिर्माण यानागु धयादिल । वय्कलं पुरातात्विक सम्पदां जाःगु येँ देसय् दुगु कला, संस्कृति, मूर्त–अमूर्त सम्पदाया संरक्षण याय्माः धइगु सन्देश बियागु नं धयादिल ।
ज्याझ्वलय् येँ महानगरपालिका–१२या वडाध्यक्ष विकास डंगोलं दँय्दसं मोहनि नखःया पञ्चमि अर्थात पचिमह्रः कुन्हु जुइगु पचलि भैरया जात्रा व झिंनिदँय् छक्वः जुइगु पचलि भैरव जात्रा अन्तर्गत जुइगु गथु प्याखंया हुनिं थुगु थाय्या विशेष महत्व दुगु धयादिल ।
महानगरीय ट्राफिक प्रहरी महाशाखा सील यात
लहनान्युज | गुंलाथ्व १४ ११४०,साउन १८ आइतवाः
महानगरीय ट्राफिक प्रहरी महाशाखा रामशाह पथ (बग्गीखाना)य् निम्हेसित कोरोना संक्रमण पुष्टि जुइवं एसएसपी भिमप्रसाद ढकाल नाप ३७५म्हेसित क्वारेन्टिन तःगु दु ।
वःगु शुक्रवाः संक्रमण पुष्टि जूपिन्त धाःसा अस्पतालय् छ्वःगु दु ।
महानगरीय ट्राफिक प्रहरी महाशाखा प्रमुख ढकालं थः नाप ३७५म्ह क्वारेन्टिनय् दुगु कारण महाशाखाय् पूर्णलकडाउनया अवस्था दु धका धयादिगु दु ।
कोरोना पुष्टि जुइवं आः स्वापू दुपि नाप वयेगु वनेगु बन्देज याना तःगु दु ।
महाशाखा मातहत ट्राफिक प्रहरीया जनशक्ति १५४५म्ह दु । ३७५म्ह क्वारेन्टिन वने वः आः ११७० म्हेसिगु जनशक्ति ट्राफिक व्यवस्थापनय् खटे जुया च्वंगु दु ।
पेट्रोलियम पदार्थया भाः थहा वन
लहनान्युज | गुंलाथ्व १४ ११४०,साउन १८ आइतवाः
नेपाल आयल निगमं पेट्रोलियम पदार्थया भाः थकाःगु दु ।
निगमं थौं चान्ह्य १२ बजे निसे देखि लागू जुइ कथं पेट्रोलया भाः छगू लिटरय् नितका थकाःगु दु । अथेहे डिजल व मचिकनय् छगु लिटर १ दशमलव ५० तका थकागु दु ।
निगमया प्रवक्ता विनितमणि उपाध्यायया कथं वःगु इलय् इण्डियन आयल कर्पोरेशनपाखे प्राप्त खरिद मूल्य कथं पेट्रोलियम पदार्थया भाः थहा वःगु खः धका धाःगु दु ।
थ्व स्वया न्ह्यः पेट्रोल छगू लिटरया १०२ खःसा आः नितका थहा वना १०४ तका थ्यःगु दु । डिजल व मचिकं छगू लिटर ८८ तका व ५० पैसा खःसा आः थहा वना ९० तका थ्यःगु दु ।
