वःगु २४ घन्टाया दुने नेपालय् थप २२ म्ह कोरोना संक्रमणपि सीगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् कोरोना संक्रमणपि १२९८ म्ह सी धुकुगु दु।

वःगु २४ घन्टाया दुने नेपालय् थप १९४५ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।

२४ घण्टाय् जम्मा १० हजार ३४० म्हेसिगु पीसीआर परीक्षण याःगु खः। मन्त्रालयया कथं आःतक पीसीआर विधिपाखे १६ लाख ४३ हजार ८९९ म्हेसिगु परीक्षण याःगु खः।

मन्त्रालयया कथं शुक्रवाः न्हुपि सक्रमित नाप आःतक कोरोना संक्रमितपि नेपालय् कोरोना संक्रमितपि २ लाख १६ हजार ९६५ म्ह थ्यःगु दु।

देय् यकं सक्रिय संक्रमितपि आःतक २४ हजार ६६५ म्ह थ्यःगु दु। अथेहे आःतक क्वारेन्टाइनय् च्वना च्वपि ७५३ म्ह थ्यःगु दु।

अथेहे वःगु २४ घन्टाया दुने कोरोनामुक्त जूपि ५३६४ म्ह डिस्चार्ज जुगु दु। नेपालय् आःतक कोरोनामुक्त जुपि १ लाख ९१०२ म्ह थ्यःगु दु। थ्व नाप नेपालय् सक्रिय संक्रमितपि ३७ हजार २२ म्ह दु।

 स्वनिगलय् कोरोना संक्रमितपि छगू लाख स्वया अप्वो जुइ धुकुगु दु।

थौं शुक्रवाः २४ घःगु दु। आःतक येँ ८१ हजार ५८८म्ह, ख्वपय् ७ हजार ३३६म्ह व यलय् ११ हजार ९४८ म्हेसित कोरोना संक्रमित जुइ धुकुगु दु।

अथेतु येँ ७१ हजार ५९१म्ह, ख्वपय् ६ हजार ४७० म्ह व यलय् ९ हजार ६३१ म्ह संक्रमणमुक्त जुगु धका मन्त्रालयं धाःगु दु। येँ जक ३१६, ख्वपय् ८३ व यलय् ८९म्ह सी धुकुगु दु।

वःगु २४ घण्टाया दुने स्वनिगलय् जक ११०७ म्ह कोरोना संक्रमित थपे जुगु दु धका स्वास्थ्य तथा जनसंख्या मन्त्रालयं धागु दु।

थौं शुक्रवाः संक्रमित पुष्टि जूपि ४८४ म्ह मिसापि व ६२३ म्ह मिजंपि खः। थौं पुष्टि जुपि येँ ८६२म्ह, ख्वपय् ७१ म्ह व यलय् १७४ म्ह न्हुपि संक्रमित थपे जुग दु।

येँ महानगरपालिका दुने ‘नो पार्किङ’ व फुटपाथय् जथाभावी तया तःगु ३० गः मोटरसाइकल व स्कुटर येँ महानगरपालिका व महानगरीय ट्राफिक प्रहरी महाशाखापाखे खटे जूपि प्रहरीं कारबाहीलय् लाःगु दु।

‘कोभिड–१९ या कारण लकडाउन नाप ‘नो पार्किङ’ व फुटपाथय् जथाभावी पार्किङ याइपि मोटरसाइकल व स्कुटर कारबाही यायेगु अभियान स्थगन जुगु खः,’ महानगरीय ट्राफिक प्रहरी महाशाखाया प्रमुख प्रहरी वरिष्ठउपरीक्षक भीमप्रसाद ढकालं ‘लकडाउन खुले जुया येँ यक्को हुलमुल जुयावःगु लि जथाभावी पार्किङ याइपि व अव्यवस्थित भिडभाड अप्वो याः वगुलि व कोरोना संक्रमण फैलै जुइ फुगु धइगु ध्यान तया थौनिसे थुगु अभियान सुरु यानागु दु धका धयादिगु खः।’

प्रहरी वरिष्ठ उपरीक्षक ढकालं मोहनि, स्वन्ति, छठ थे तजिगु नखःया इलय् हुलमुल अप्वो जुइ फुगुलि थुगु अभियानयात थप प्रभावकारी ढंग न्ह्याकेत्यनागु धका धयादिगु खः।

येँ महानगरपालिकाया नगरप्रहरी प्रमुख धनपती सापकोटां थौं हे ‘नो पार्किङ एरिया’ व फूटपाथय् पार्किङ यापि ३० गः मोटरसाइकल व स्कुटरयात कारवाही यानागु धका जानकारी बियादिसे थुगु अभियान निरन्तर वनि धका धयादीसे उमिगु भ्वँ स्वया १ हजार जरिवना यानागु धका जानकारी बियादिगु दु। 

‘लकडाउनय् बन्द जुयाच्वंगु थुगु  अभियान थौनिसे महानगरीय ट्राफिक प्रहरी महाशाखा नाप समन्वयय् याना ज्या न्ह्याकःगु खः धका धयादीगु खः। 

शहरी विकासमन्त्री कृष्णगोपाल श्रेष्ठं नेपाल सम्बतयात नेपालय् न्हुगु सम्बतया रुपय् थालनी याये माःगु धका धयादिगु दु।

नेपाल सम्बत ११४१ या लसताय् मध्यपुर थिमीइ राष्ट्रिय विभुति शंखधर साख्वाःया झ्वाताय् माल्यापर्ण यानादिसे वयकल नेपालय् थःगु हे सम्बतया रुपय् नेपाल सम्बत् छ्यलेमाः धका धयादिगु खः। दक्को जाति व भाषाभाषिया अपनत्व जुइ कथं नेपाल सम्बतया प्रचलनय् हयेमाःगु बिचाः तयादिगु खः।

नेपाल स्म्बतयात नेपाःया कामकाजय् न छ्यले माः धका धयादिगु खः। शंखधर साख्वाःयात राष्ट्रिय विभुति घोषणा याये वःनिसे टिकट प्रकासन यायेगु नेपाल भाषा उत्थान नेपाल सम्बत माने यायेगुलि महत्वपुर्ण भुमिका म्हितिम्ह पु्र्वमन्त्री नाप मानव अधिकारवादी नेता मदुम्ह पद्मरत्न तुलाधरया योगदानया चर्चा यानादीसे मन्त्री श्रेष्ठं वयकःया लुमति सरकारं रत्नपार्कय् झ्वाता तयेगु तयारी यानावया च्वनागु दु धका धयादिगु खः। 

नेपाल सम्बत व न्हुदया भिन्तुना हरेक ज्याझ्वलय् न्ह्यने खने दइम्ह नेता तुलाधरया योगदानयात सुनानं ल्वमंके फइ मखु धका धयादिगु खः।

अथे ज्याझ्वलय् पुर्वमन्त्री नाप नेपाली काग्रेसया सांसद भीमसेनदास प्रधान, पुर्वमन्त्री नाप सांसद महेश बस्नेत, मध्यपुर थिमि नगरपालिकाया मेयर मदनसुन्दर श्रेष्ठ, प्रतिष्ठानया अध्यक्ष चन्दनकृष्ण श्रेष्ठ, उपाध्यक्ष ज्ञानराम श्रेष्ठपिन्स थःथःगु खँ तयादिगु खः।