येँ महानगरपालिकाया मेयर विद्यासुन्दर शाक्यं कमलपूखुलि पुर्ननिर्माणया ज्या सन्तोष जनक मजुगुू धका धयादिसे अनुगमनयासे मेयर शाक्य अथे निर्देशन बियादिगु खः। ६ करोड ३६ लाखया लगानीं निर्माण जुया वयाच्वंगु उगु पूखु क्वछिना तःगु इलय् हे क्वचायेकेत निर्देशन बियादिगु खः।

ज्या जुयाच्वंगु ढिला जुयाच्वंगु धइगु गुनासो वःगुलि थःहे स्थलगत अनुगमनया लागि वयाःगु धका मेयर शाक्यं धयादिगु खः, ‘येँ महानगरपालिकां आर्थिक अभाव धका त्वहँ चिना वा छु न बहानाय् ज्या ढिला याये मज्यु।’ करीब २३ रोपनी १४ आना क्षेत्रफलय् दु। ‘पूखुया अस्थित्व ल्यंका तयेत पुर्ननिर्माणया ज्या न्ह्याकगु खः धका धयादिगु खः।

मेयर शाक्य छठया इलय् व्रत च्वनेत व उगु नखः हनेयेगुसमेत सहज जुइ कथं निर्माण ज्या जुयाच्वंगु धका जानकारी बिःगु खः। कला व संस्कृतियात स्वाये कथं जुइगु न धाःगु दु। शहरी योजना आयोगया उपाध्यक्ष सरोज बस्नेतं थुगु पूखु बास्तुशास्त्रया आधारीत कया निर्माण जुयावया च्वंगु जानकारी बियादिगु खः।

आयोगया कथं पूखुलि दुहा वयेकेत लुँखाः दुहावये वलय् हे नेपाली स्वरुप बिइ कथं निर्माण यायेत नेपाःया अप्पा व दर्शन ल्ह्व छ्यालागु दु धका धयादिगु खः। इन्जिनियर प्रेम श्रेष्ठं जेठा जेठीपिन्त ध्यानय् तया निर्माणया ढाँचा तयार यानागु अन बहनि न न्ह्यिइपुकथं ब्यवस्था यानागु दु धका जानकारी बियादिगु खः।

निर्माण व्यवसायी अर्जुन कडेँल व इन्द्र सिटौलां ४५ प्रतिशत ज्या क्वचाये धुकुगु धका अनुगमनया वःपि मेयर शाक्य, येँ महानगरपालिकाया प्रमुख प्रशासकीय अघिकृत राजेश्वर ज्ञवाली, वडाध्यक्ष भरतलाल श्रेष्ठपिन्त ज्या थ्व हे फागुन मसान्तय् सम्पन्न याना महानगरयात हस्तान्तरण यायेगु प्रतिवद्धता क्यनादिगु खः।

येँ महानगरपालिकां कोभिड १९ या कारण बेरोजगारजूपिन्त रोजगारीया लागि थः च्वनाच्वनागु थासय् या वडा ज्याकुथिइ स्वापू तयेत इनाप याःगु दु।

महानगरपालिकां थौं छगु सार्वजनिक सुचं पिकया रोजगारी गुमेजूपिन्त श्रम यायेफुपिं महानगरवासीपिन्त जीवन निर्वाहया नितिं पारिश्रमिक कार्यविधि २०७७ कथं रोजगारी बिइगु जानकारी बिगु खः । महानगरं असहाय, अशक्त व शारीरिक रुपं ज्या यायेमफुपिन्त धाःसा नयेत, च्वनेत व स्वास्थ्य उपचारया नितिं मानव सेवा आश्रमय् व्यवस्था याना तयागु दु धका महानगरपालिकां जानकारी बिःगु दु ।

थज्यापि मनूतयसें थःगु लिक्क च्वंगु वडा ज्याकुथिइ वा तप्यंक मानव सेवा आश्रमय् स्वापू तयेफइगु महानगरपालिकां सार्वजनिक याःगु सुचं दुने न्ह्यथनातःगु दु । थ्वसिबें न्ह्यः परोपकारी छुं संस्थातसें येँया तिंख्यलय् बेरोजगार, असहाय व अशक्त मनूतय्गु नितिं जा नकेगु ज्या यानाः वयाच्वंगु खः।

स्वास्थ्य जोखिम, संक्रमणया सम्भावना, सामाजिक प्रतिष्ठा व मानव अधिकार संरक्षण यायेगु धासें महानगरपालिकां वइगु मंसीर २ गतेनिसें सार्वजनिक थासय् जा नकेगु ज्याय् रोके याये त्यःगु खः। स्वास्थ्य मापदण्ड पालना यानाः भोजन सेवा संचालन यायेत महानगरपालिकां फुक्क सामाजिक संघ संस्थायात इनाप न याःगु दु ।

थुगु ज्याय् वडा ज्याकुथिपाखें माःगु समन्वय व ग्वाहालि जुइगु येँ महानगरपालिकां जानकारी ब्यूगु दु ।

कोभिड १९ विरुद्धया लडाईलय् ग्वाहालि यायेगु कथं अमेरिकी सरकारं नेपाःयात सच्छिगु भेन्टिलेटर ग्वाहालि याःगु दु। अमेरिकां थःगु अन्तर्राष्ट्रिय विकास नियोग (यूएसएआईडी) मार्फत नेपाःयात भेन्टिलेटर ग्वाहालि याःगु खः।

नेपाःया लागि अमेरिकी राजदूत ¥याण्डी बेरीं स्वास्थ्य तथा जनसंख्या मन्त्री भानुभक्त ढकालयात भेन्टिलेटर हस्तानतरण याःगु खः।भेन्टिलेटर हस्तान्तरण लिपा राजदूत बेरीं अमेरिका नेपालयात न्ह्याःगु इलय् न ग्वाहलि याना वयाच्वंगु दु नाप साझदारी यायेगु प्रतिबद्ध दु धका धयादिगु खः।

अति दुर्गम क्षेत्रया समुदायपिन्त वासः यायेगु लागि भेन्टिलेटर ग्वाहालि जुइ धका धयादिगु खः। ७० दँ निसे विपद्, द्वन्द व थाकुगु अवस्थाय् अमेरिकां नेपाःयात ग्वाहालि यानावया च्वंगु उल्लेख यासे सहकार्ययात निरन्तरता बिःगु कथं कोरोना महामारीया इलय् न ग्वाहालि यानागु खः धका धयादिगु खः।

स्वास्थ्यमन्त्री भानुभक्त ढकालं कोरोना विरुद्धया लडाईलय् जनधनया सुरक्षा यायेत अमेरिकां सुरुवाती चरणय् ग्वाहालि उल्लेख यासे तधःगु ल्याखः भेन्टिलेटर ग्वाहालि याःगुलि सुभाय् दछानादिगु खः। भेन्टिलेटरया अतिरिक्त यूएसएआइडीं देय्या ११३ गु पालिकामा संक्रमण अनुसन्धान टोलीयात न ग्वाहालि याःगु दु।

यूएसएआईडी नं आःतक २० लाख परिवारयात टेलिफोनमार्फत परामर्श तक बिःगु खः।

वःगु २४ घन्टाय् थौं कोरोनामुक्त जूपि २३४९ म्ह डिस्चार्ज जूया छेँय् लिहावःगु दु।

थ्व नाप आःतक नेपालय् कोरोनामुक्त जूपि १ लाख ६४ हजार ५९२ म्ह थ्यःगु दु। अथेहे नेपालय् आःतक सक्रिय संक्रमितपि ३८ हजार ४६१ म्ह दु।

अथेतु, वःगु २४ घन्टाया दुने नेपालय् थप १५ म्ह कोरोना संक्रमणं सीगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् कोरोना संक्रमणं सीपि ११८९ म्ह थ्यःगु दु।

वःगु २४ घन्टाया दुने नेपालय् थप १९१३ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

मन्त्रालयया कथं थौं बिहीवाः न्हुपि थपे जुइवं आःतक कोरोनाका संक्रमितपि नेपालय् २ लाख ४२४२ म्ह थ्यःगु दु।

वःगु २४ घण्टाया दुने १० हजार २२ म्हेसिगु पीसीआर परीक्षण याःगु खः।

थ्व नाप आःतक पीसीआर विधिपाखे १५ लाख ८४ हजार २१७ म्हेसिगु परीक्षण याये धुकुगु दु धका मन्त्रालयं धाःगु दु।