Display Style:
Column Style
बिराटनगरया न्युरो अस्पतालय् छम्ह संक्रमित मन्त
लहनान्युज | ञंलाथ्व ८ ११४०,भाद्र १० बुधवाः
महोत्तरीया कोरोना संक्रमित मिजंम्ह बिराटनगरय् मन्त ।
बिराटनगरया न्युरो अस्पतालय् वासः याका च्वम्ह महोत्तरीया ६० दँ दुम्ह म्हिगः चान्ह्य मदुगु खः ।
उम्ह मनू वःगु ३१ गते साउनय् अस्पताल भर्ना जूम्ह खः । वयाःगु कोरोना नाप ज्वःलागु लक्षण खनेदेय वः भदौ ३ गते स्वाब संकलन याःगुलि आइतवाः पोजेटिभ रिपोर्ट वःगु खः ।
पोजेटिभ रिपोर्ट वःगुलि संक्रमितपि वासः याइपिं थाय् आइसोलेसन कक्षय् तःगु खः । वयागु मेमेगु ल्वय् न दुगु खः ।
नेवाः देय् दबू न बुसादँ हन
लहनान्युज | ञंलाथ्व ८ ११४०,भाद्र १० बुधवाः
नेवाःतय् राष्ट्रिय संगठनया नेवाः देय् दबू न नीखुक्वःगु बुसादँ भर्चुलपाखें हना ज्याझ्वः याःगु दु ।
थौंकन्ह्य हलियकं जुयाच्वंगु महामारी कथं कोभिड १९ या हुनी जूम भर्चुलपाखें हना ज्याझ्वः याःगु खः।
उगु ज्याझवलय् मूपाहां कथं हनेबहःम्ह नेवाः न्ह्यलुवाः नाप दबूया संरक्षक मल्ल के सुन्दरं नेवाः भाय् व नेवाः संस्कार मत्वःतुसे च्वनाच्वंपिं स्वनिगःया नेवाः, स्वनिगलं पिने नेवाःभाय् मसयेकाः थःपिनिगु संस्कार तंकाः कतःया भाय् व संस्कारयात नालाच्वने बाध्य जूपिं नेवाःतय्गु समस्या बिस्कं बिस्कं जुइगुलिं सरोकार वालात नाप सहलह ब्याकाः योजनाबद्ध तरिकां नेवाःतय्त दबुलिं छसी कथं न्ह्यज्याका यंके माः धइ कथं थःगु बिचाः तःगु खः ।
अथेहे विशेष पाहां कथं शताब्दी पुरुष सत्यमोहन जोशीं नेवाः तयेत कःघाइगु मू म्हसीका धैगु नेवाः भाय् जूगुलिं नेवाः भाय् मसःपिं सकल नेवाःतय्त जि नेवाः खः धैगु म्हसीका बिइफइगु कथं नेवाःभाय् स्यनेगु अभियान दबुलिं न्ह्याकायंके हथाय् जूगु खँ कनादिल । अथेहे आः जुइगु राष्ट्रिय जनगणनाय् थःगु भाषा नेपालभाषा, पुर्खा नेवाः च्वकाः नेवाःतय्गु सही ल्याः दर्ता याकेमाःगु खँय् थःगु बिचाः प्वकादिगु खः ।
मुँज्या नायः नाप दबूया नरेश ताम्रकारं मुज्याय् वःगु सल्लाह सुझावयात सहलह याना न्ह्याकायंकेगु नं जानकारी बियादिल ।
दबूया मूछ्याञ्जे माइला बाबु द्योलां न्ह्याकादीगु उगु ज्याझ्वलय् जूमय् प्राविधिक ग्वाहालि राजन डंगोलं यानादीगु खःसा बालकृष्ण हलुवाइ–धरान, परशुराम श्रेष्ठ–बाग्लुङ, ज्ञानकाजी मानन्धर(भोंतपिन्त नेपालभाषा, साहित्य व संस्कृतियात च्वन्ह्याकेत आपालं सफू च्वसुत च्वयाः योगदान यानादीगुलिं दबूपाखें हनापौ लःल्हाःगु दु ।
निषेधाज्ञा छवाःया लागि थपे यात
शोभा श्रेष्ठ | ञंलाथ्व ८ ११४०,भाद्र १० बुधवाः
स्वनिगलय् वःगु भदौ ३ गते निसे सुरु जूगु निषेधाज्ञा मेगु छवाःया लागि थपे याःगु दु ।
येँ यल व ख्वपया स्वम्ह प्रमुख जिल्ला अधिकारीपि नाप स्वनिगः दुनेया सुरक्षा निकायया प्रमुख, नगरपालिकाया मेयर व जनस्वास्थ्य कार्यालयया अधिकारीपि नाप सहलह लिपा निषेधाज्ञा थप यायेगु निर्णय याःगु खः ।
थ्व स्वया न्ह्यः ३ गते चान्ह्य निसे लागू जुइ कथं सुरु जूगु निषेधाज्ञा थैं बुधवाः चान्ह्यः क्वचाइगु खः । स्वनिगलय् संक्रमण अप्वया वःगुलि निषेधाज्ञा थप यानागु खँ धका प्रमुख जिल्ला अधिकारीपिन्स धाःगु खः ।
वःगु सोमवाः उपत्यका नगरपालिका फोरमया बैठकं संक्रमण अप्वया वःगुलि १५ भदौ तक निषेधाज्ञा यायेत प्रशासनयात सिफारिस यायेगु निर्णय याःगु खः ।
येँयाम्ह कोरोना संक्रमित पाटन अस्पतालय् मन्त
लहनान्युज | ञंलाथ्व ८ ११४०,भाद्र १० बुधवाः
यलया पाटन अस्पतालय् वासः याका वयाच्वम्ह कोरोना संक्रमितम्ह छम्ह मन्त ।
येँ च्वम्ह उम्ह कोरोना संक्रमित ५४ दँया मिजंम्ह म्हिगः चान्ह्य ९ः३० बजे मदुगु खः ।
स्वास्थ्य कार्यालय ललितपुरं छगु विज्ञप्ति जारी यासे संक्रमित मिजं सीगु धका पुष्टि याःगु खः ।
उम्ह मनू वःगु साउन २३ गते निसे पाटन अस्पतालय् वासः याका वयाच्वम्ह खः ।
येँ थौं गन गन मत वइ मखु
लहनान्युज | ञंलाथ्व ८ ११४०,भाद्र १० बुधवाः
नेपाल विद्युत् प्राधिकरणं थौं छु ई छु छु थासय् विद्युत् कटौती याये त्यःगु दु ।
प्राधिकरणं कुलेश्वर वितरण केन्द्र अन्तर्गतया थीथी थासय् सिमा पाले माःगुलि विद्युत् कटौती याये त्यःगु दु । प्राधिकरणया कथं थौं सुथय् ११ बजे निसे ५ बजे तक विद्युत् कटौती याये त्यःगु दु ।
प्राधिकरणया कथं सोल्टी दोबाटो, सिभिल होम्स, टौख्यः, सीतापाइला, इचङ्गुनारायण, पद्मा कोलेनी, भीमढुङ्गा, नर्सरी भञ्ज्याङ, छत्रे देउराली लगायत थासय् विद्युत् कटौती जुइ धका सूचना अधिकारीं जानकारी बिःगु दु ।
