Display Style:
Column Style
स्वास्थ्य मन्त्रालयं धरौटी मकास्ये वासः यायेत निर्देशन
लहानान्युज | कौलागा पारु ११४०,कार्तिक १६ आइतवाः
स्वास्थ्य तथा जनसंख्या मन्त्रालयं सरकारी अस्पतालय् धरौटी शुल्क मकायेत कोभिड १९ या बिरामीपिन्त वासः यायेत निर्देशन बिःगु खः।
आइतवाः मन्त्रालयं ग्वसाः ग्वगु कोरोना मिडिया ब्रिफिङय् मन्त्रालयया प्रवक्ता डा. जागेश्वर गौतमं धरौटी सम्बन्धी सूचं पिकागु अस्पतालयात स्पष्टिकरण न्यंगु दु।
डा.गौतमं फुपिन्त शुल्क कायेगु व मफुपिन्त निःशुल्क उपचार यायेगु निर्णय यथावत दुगु दाबी याःगु दु।
सरकारं कात्तिक २ गते निसे लागू जुइ कथं कोरोना उपचार व परीक्षणया लागि थःम्हेसिया हे शुल्क फुलेमाःगु निर्णय सार्वजनिक याःगु दु। थुगु निर्णय लिपा सरकारी अस्पतालं धरौटी शुल्क नाप सूचं प्रकाशित याःगु खः।
आर्थिक रुपं विपन्न, अशक्त व असहाय अवस्थाय् नागरिक, असहाय याक मिसा, अति अपांग जूपि नागरिक, जेष्ठ नागरिक, न्ह्यने खटे जूपि स्वास्थ्यकर्मी, सरसफाई कर्मचारी, सुरक्षाकर्मी लगायतयापिन्त जक सरकारं परीक्षण व उपचार यायेगु धका धाःगु दु।
देय् यकं २८२४ म्हेसित कोरोना संक्रमण पुष्टि
लहानान्युज | कौलागा पारु ११४०,कार्तिक १६ आइतवाः
देय् यकं थप २८२४ म्हेसित कोरोना संक्रमण पुष्टि जूगु धका स्वास्थ्य तथा जनसंख्या मन्त्रालयं धाःगु दु।
मन्त्रालयं थौं आइतवाः ग्वसाः ग्वगु कोरोना ब्रिफिङय् मन्त्रालयया प्रवक्ता डा जागेश्वर गौतमं वःगु २४ घण्टाय् २८२४ म्हेसित कोरोना संक्रमण खनेदुगु धका जानकारी बिःगु दु।
थ्व नाप देय् यकं सक्रिय संक्रमितपि ३७ हजार ७६५ म्ह थ्यःगु दु।
आःतक क्वारेन्टाइनय् २३८६ म्ह च्वना च्वंगु दु।
कोरोना २३ म्ह मन्त
लहानान्युज | कौलागा पारु ११४०,कार्तिक १६ आइतवाः
कोरोना संक्रमणं २४ घण्टाया दुने थप २३ म्ह सीगु दु।
स्वास्थ्य तथा जनसंख्या मन्त्रालयं थौं आइतवाः औपचारिक रुपं पुष्टि याःगु दु। आःतक कोरोना संक्रमणं सीपि ९६० म्ह थ्यःगु दु।
मन्त्रालयं २४ घण्टाय् ३६२० म्ह कोरोना संक्रमणपाखे डिस्चार्ज जूगु दु धका जानकारी बिःगु दु। थ्व नाप वासः याना छेँ वःपि १ लाख ३४ हजार ८४२ म्ह थ्यःगु दु। देय् यकं सक्रिय संक्रमितपि आःतक ३७ हजार ७६५ म्ह दु।
मन्त्रालयया कथं आःतक पीसीआर विधिपाखे १४ लाख ५६ हजार ३६६म्हेसित परीक्षण याये धुकुगु दु। २४ घण्टाय् जम्मा १३ हजार २३ म्हेसिगु पीसीआर परीक्षण याःगु दु।
येँ १३६२म्ह नाप स्वनिगलय् १६२२म्ह कोरोना सक्रमण
शोभा श्रेष्ठ | कौलागा पारु ११४०,कार्तिक १६ आइतवाः
वःगु २४ घण्टाया दुने स्वनिगलय् थप १६२२ म्ह कोरोना संक्रमितपि पिहावःगु दु।
स्वास्थ्य तथा जनसंख्या मन्त्रालयया कथं येँ १३६२ म्हेसित कोरोना सक्रमण जुगु धका मन्त्रालयय् धाःगु दु।
अथेहे ख्वपय् ९६ म्ह व यलय् १६४ म्हेसित कोरोना सक्रमण जूगु दु धका धाःगु खः।
देय् यक २४ घण्टाय् थप २८२४ म्हेसित कोरोना संक्रमण पुष्टि जूगु दु धका मन्त्रालयं धाःगु दु।
टेकू अस्पतालय् न धरौटी ध्यवा फ्वन
लहानान्युज | कौलागा पारु ११४०,कार्तिक १६ आइतवा:
शुक्रराज ट्रपिकल तथा सरुवा रोग अस्पताल नं कोरोना संक्रमितपिनिगु वासः यायेत धरौटी कायेगु सुरु याःगु दु।
निश्चित वर्ग बाहेंक मेगु निःशुल्क वासः मयायेगु स्वास्थ्य तथा जनसंख्या मन्त्रालयया निर्णय कथं कात्तिक १४ गतेनिसे कोरोना संक्रमितपिन्त वासः शुल्क कायेगु निर्णय जुगु धका अस्पतालं धाःगु दु।
अस्पतालं आईसीयूसहित भेन्टिलेटरय् तयेमाःपि बिरामीया लागि न्हि १५ हजार वासः खर्च तोके याःगु दु सा ५० हजार धरौटी रकम जम्मा यायेत धाःगु दु।
आईसीयू बाहेक भेन्टिलेटरय् दुपि बिरामीपिन्स न्हि ७५०० उपचार खर्च लगे जुइगु व ३० हजार धरौटी तयेमाः। क्याबिन आइसोलेसनय् च्वनिपिन्स न्हि ७५०० व ग्रास्ट्रो आइसोलेसनय् च्वनिपिन्स न्हि ३५०० वासः खर्च पुलेमाः। उमिस ३० व २० हजार धरौटी जम्मा याये मा धका अस्पतालं छगू सूचं पिकाःगु दु।
परिव परिचयपत्र वा सम्बन्धित पालिकाया सिफारिस, ७० दँ पुले धुकुपि जेष्ठ नागरिक, अति अपाङ्गता जूपि परिचयपत्र, अशक्तताया प्रमाणपत्र व याकः मिसाया प्रमाणपत्र दुपिन्त उपचार शुल्कय् छुट बिइगु दु।
अस्पतालया प्रमुख वरिष्ठ कन्सल्टेण्ड व निर्देशकया लिखित निर्णयय् विरामीया आर्थिक अवस्था, औचित्यता व आवश्यकताया आधारय् वासः खर्चय् १० प्रतिशत निसे शतप्रतिशत तक छुट बिइ फइगु धका अस्पतालं धाःगु दु।
