Display Style:
Column Style
कन्ह्यनिसे किपूलि सावर्जनिक यातायात बन्द
नृपेन्द्रलाल श्रेष्ठ | गुंलागा १२ ११४०,साउन ३२ आइतवाः
किपू नगरपालिकाय् जनचेतना व लकडाउन अनुशासन अनुगमन समितिया संयोजनय् थौं छगू आकस्मिक मुँज्या जूगु दु ।
उगु मुँज्यां थौंकन्ह्य अप्वयाः वयाच्वंगु कोरोना भाइरस कोभिड १९ या संक्रमणयात न्यूनीकरण व नियन्त्रण यायेगु लागि कन्ह्य भाद्र १ गतेनिसें भाद्र ९ गतेतक सार्वजनिक यातायात बन्द याकेगु निर्णय उगु बैठकं याःगु दु ।
अथेहे, भाद्र १ गतेनिसें भाद्र ९ गतेतक वासः पसः बाहेक किपूया फुक्क पसः सुथसिया ७ बजेनिसें ११ बजेतक जक चायेकेगु निर्णय याःगु दु ।
अथेतु उगु मुँज्यां किपू दुहाँ वयेगु नाकाय् व किपू नगर क्षेत्र दुने कडाइ यायेगु नापं बहनी ९ बजेनिसे सुथं ५ बजे तक अत्यावश्यक ज्या बाहेक लँय् वयेगु वनेगु बन्द याइगु जूगु दु ।
जनचेतना मूलक ज्याझ्वःपाखें कोरोना सम्बन्धय् जनसमुदाय दथुइ पर्चा, स्टीकर, माइकिंग यानाः सचेत यायेगु जानकारी किपू नगरपालिका जनचेतना व लकडाउन अनुशासन अनुगमन समितिं धाःगु दु ।
थौंया मुँज्याय् किपू नगरपालिकाया मेयर रमेश महर्जन, उपमेयर सरस्वती खड्का रिजाललिसें वडाध्यक्षपि, कीर्तिपुर बजार व्यवस्थापन समितिया पदाधिकारीपिं व स्थानीय थीथी संघसंस्था क्लबया प्रतिनिधिपिनिगु नं उपस्थिति दूगु खः ।
६४१ म्हेसित कोरोना संक्रमण पुष्टि
लहनान्युज | गुंलागा १२ ११४०,साउन ३२ आइतवाः
वःगु २४ घण्टाय् देय् यकं ६४१म्हेसित कोरोना भाइरस (कोभिड–१९) या संक्रमण पुष्टि जूगु दु ।
देय् यकं याःगु प्रयोगशालाय् १२ हजार २४७ म्हेसिगु नमुना परीक्षण यागु इलय् ६४१म्हेसित संक्रमण पुष्टि जूगु खः ।
थ्व नाप नेपालय् संक्रमितपि आः २६ हजार ६६० म्ह थ्यःगु दु । उकि मध्ये १०४ म्ह सी धुकुगु दु । अथेहे १७ हजार ३३५म्ह वासः याका छेँय् लिहा वने धुकुगु दु ।
स्वास्थ्य तथा जनसंख्या मन्त्रालयया कथं थौं स्वनिगलय् जक च्याम्हेसित कोरोना संक्रमण पुष्टि जूगु दु ।
अथेहे मोरङय् १००म्ह संक्रमितपि थपे जूगु दु । बाराय् ७८म्ह, पर्साय् ७४म्ह, रुपन्देही ४८म्ह, धनुषाय् ३७म्ह, चितवनय् २७म्ह, रौतहटय् १४म्ह, सप्तरी व कास्की झींछम्ह झींछम्ह, बाँकय् झीम्हेसित कोरोना संक्रमण पुष्टि जूगु दु ।
नवलपरासी व महोत्तरी च्याम्ह च्याम्ह, कञ्चनपुर व तनहुँ न्याम्ह न्याम्ह, दाङय् प्यम्ह, कैलाली बर्दिया व सिराहाय् स्वम्ह स्वम्ह, सुनसरी, कपिलवस्तु, सर्लाही, नवलपुर व रोल्पाय् निम्ह निम्ह नुवाकोट, सिन्धुली, जुम्ला, रुकुम पश्चिम, इलाम, मकवानपुर, बाग्लुङ, पर्वत, झापा, लमजुङ व ताप्लेजुङय् छम्ह छम्हेसित संक्रमित जूगु दु ।
येँ १२६म्ह नाप स्वनिगः दुने १७२ संक्रमित
शोभा श्रेष्ठ | गुंलागा १२ ११४०,साउन ३२ आइतवाः
वःगु २४ घण्टाय् स्वनिगः दुने १७२म्हेसित कोरोना संक्रमित जूगु दु ।
थौं स्वास्थ्य तथा जनसंख्या मन्त्रालयया बिःगु जानकारी कथं येँय् जक १२६म्ह कोरोना संक्रमित जूगु दु ।
अथेहे यलय् ३८ म्ह व ख्वपय् च्याम्हेसित कोरोना संक्रमित जूगु दु ।
संक्रमितपि गन च्वपि धका धाःसा मन्त्रालयं धाःगु मदुनि ।
थौं देय् यक २४ घण्टाय् देय् यकं ६४१ म्हेसित संक्रमित जूगु दु ।
प्रेममान चित्रकार मन्त
लहनान्युज | गुंलागा १२ ११४०,साउन ३२ आइतवाः
नेपाःया पौभाः परम्परागत चित्रकलाया नांजाःम्ह कलाकार प्रेममान चित्रकार ७६ दय् थौं मन्त ।
कलाकार प्रेममान ताः ई न्ह्यवंनिसें दमया ल्वचं कयाच्वंम्ह चित्रकार कलंकीया नेशनल हस्पिटलय् वासः याकेगु झ्वलय थौं न्हिनय् मदुगु खः ।
वयकःया अन्तिम संस्कार थौं हे पशुपतिइ याये त्यःगु दु ।
मदुम्ह चित्रकार पौभाः कला च्वज्याय् थःगु बिस्क म्हसिका दुम्ह खः । वयकः कलाकारया लिसे लिसे नेपालभाषाया च्वमि नं खः ।
वय्कलं नेपालभाषाया आपालं कविता व म्ये च्वयादीगु दुसा वय्कःया म्ये सफू नं प्रकाशित जूगु दु । लिसें वय्कलं नेवाः संस्कृतिया बारे नं आपालं च्वसुत च्वयादीगु दु ।
वय्कः राजकीय प्रज्ञा प्रतिष्ठानं बीगु इन्द्रराज्य प्रज्ञा पुरस्कारया नापं आपालं सिरपालं विभूषित नं जुयादीगु दु । भाजु चित्रकारं नेपाःया आपालं ल्याय्म्हपिं कलाकारतय्त पौभाः च्वयेगु कला
स्यनादीगु दु ।
वय्कःया जहान लिसें स्वम्ह म्ह्याय् व छम्ह काय दी । वय्कःया जहान लिसें काय–म्ह्याय्पिं नं सकलें पौभाः च्वज्यालिसे हे आवद्ध जुयादी ।
वय्कःया अबु पृथ्वीमान चित्रकार नं नांजाःम्ह कलाकार खः ।
स्वाब संकलनय् खटे जुपि स्वास्थ्यकःमियात हे कोरोना पोजेटिभ
लहनान्युज | गुंलागा १२ ११४०,साउन ३२ आइतवाः
शंकास्पद सत्रंmमितपिनिगु स्वाब संकलन यायेत खटे जुपि स्वास्थ्यकःमिपिन्त न कोरोना पोजेटिभ खने दुगुलि विराटनगर महानगरपालिकाय् स्वाब संकलन रोके याःगु दु ।
स्वाब संकलनय् खटे जूपि चिकित्सकपिन्त थौं आइतवाः संक्रमण पुष्टि जूगु खः ।
विराटनगर महानगरपालिकाय् थप ८६ म्हेसित कोरोना संक्रमण पुष्टि जूगु दु । वःगु २४ घण्टाय् महानगरपालिका दुने ८६ म्हेसित कोरोना संक्रमण पुष्टि जूगु खः ।
थ्व नाप विराटनगरय् कोरोना संक्रमितपि ५६६म्ह थ्यःगु दु ।
अन संक्रमित मध्ये ८६ म्ह कोरोना मुक्त जूगु दु । न्ह्यम्ह कोरोना संक्रमणया कारण सी धूकुगु दु ।
