Display Style:
Column Style
शहरी विकास मन्त्री कृष्णगोपाल श्रेष्ठं ल्याण्डफिल साइटय् निरिक्षण
नृपेन्द्रलाल श्रेष्ठ | कौलाथ्व पुन्हि ११४०,कार्तिक १५ शनिवाः
शहरी विकास मन्त्री कृष्णगोपाल श्रेष्ठं लच्छिया दुने बञ्चरे डाँडाँ ल्याण्डफिल साइटय् फोहोर व्यवस्थापन यायेत निर्देशन बियादिगु दु।
शहरी विकास मन्त्रालयया जिम्मेवारी काये धुका शुक्रवाः न्हिनय् बञ्चरेडाँडा ल्याण्डफिल साइटया निरीक्षण यायेत मन्त्री श्रेष्ठं छु न बहानाय् आलटाल मयासे क्वछिगु हे इलय् फोहोर व्यवस्थापन यायेत निर्देशन बिःगु दु।
आःतक फोहोर वाना छ्वयेगु ज्या जुया वयाच्वंगु सिसडोल ल्याण्डफिल साइटया निरीक्षण याये धुका बञ्चरे ल्याण्डफिल साइटया न निरीक्षण याःगु खः।
न्हापागु व निक्वःगु चरणया ज्या लिपागु चरणमा थ्यःगु बञ्चरे ल्याण्डलफिल साइटया निर्माण प्रगतिबारे जानकारी कयादिसे वयकलं निर्माण कम्पनीया प्रतिनिधिपिन्त मंसिर १५ दुने फोहोर वान्छ्वये मिले जुइ कथु ज्या यायेत कडा निर्देशन बियादिगु दु।
लुम्बिनी–कोशी एण्ड न्यौपाने जेभिका प्रतिनिधि डम्बरबहादुर न्यौपाने मंसिर १ गतेनिसे फोहोर वाछ्येत मिले यायेत ज्या जुयाच्वंगु दु धका जानकारी बिःगु खः।
‘छि थथे यक्को पटक खँ हिले धुकुगु दु, आः मंसिर १५ गतेनिसे फोहोर वाछ्येगु कथं मिले यायेत तयारी यानादिसे ’–प्रगतिया निरीक्षण यासे मन्त्री श्रेष्ठं अथे धयादिगु खः।
येँ व यल महानगर नाप स्वनिगःया १८ गु स्थानीय तहया फोहोर व्यवस्थापन जुइगु ल्याण्डफिल साइटया फोहोर व्यवस्थापन यायेत लिचेड पाखरीया निर्माण जुयाच्वंगु दु। झीसं मंसिर १ गते दुने फोहोर वांछ्वय् मिले जुइ कथं तयारी यानागु दु–निर्माण कम्पनीया प्रतिनिधि न्यौपानें धयादिगु दु। प्रधानमन्त्री केपी ओलीं तक छु दिं लिपा हे फोहोर वाछ्य मिले जुइ कथं
ल्याण्डफिल साइट निर्माण यायेत निर्देशन बिःगु दु धका मन्त्री श्रेष्ठ निर्माण प्रगतिबारे जानकारी बिइत अकस्मात बञ्चरेडाडा थ्यःगु खः ।
मन्त्रीनाप मन्त्रालयया सचिव डा. रमेशप्रसाद सिंह, शहरी विकास तथा भवन निर्माण विभागया महानिर्देशक मणिराम गेलाल, उपमहानिर्देशक प्रद्मकुमार मैनालीपिन्स टोली निरीक्षण यायेत वःगु खः ।
मन्त्री श्रेष्ठं स्वनिगःया जःखः नगरयात सुन्दर, व्यवस्थित फोहोर व्यवस्थापन अपरिहार्य जुगु उल्लेख यासे उकिया लागि तत्काल बञ्चरे ल्याण्डफिल साइटय् फोहोर व्यवस्थापन यायेगु बाहेक मेगु बिकल्प मदुगु धका धयादिगु खः।
मन्त्री श्रेष्ठं प्रधानमन्त्रीजुया तक ध्यानकर्षण जुगु विषयय सकसिया गम्भीर जुइ माःगुलि क्वछिगु इलय् हे फोहोर बिर्सजन यायेत ढिला मयायेत निर्देशन बिःगु दु।
सचिव डा. सिहं मन्त्रीया निर्देशन कथं क्वछिगु हे इलय् फोहोर व्यवस्थापन जुइ धका धयादिसे विभागं आःतक करिब ४० करोड रुपिया खर्च जुइ धुकुगु दु। न्हापागु चरणय् ३४ करोड ६८ लाख ७४ हजार व निक्वःगु चरणया लागि ४६ करोड ५ लाख ९४ हजार रुपियाया ठेक्का सम्झौता जुइ धुकुगु दु। न्हापागु चरणया निर्माण सम्झौता बैशाख २२ तक दुगु खः। लुम्बिनी–कोशी एण्ड न्यौपाने जेभिं निर्माण सम्पन्न याये मफुगुलि विभागं थ्व हे कातिक २२ गते तक म्याद थपे याःगु खः।
निक्वःगु चरणया निर्माण ठेक्का कालिका कन्ट्रक्सनयात बिःगु खः। उगु कम्पनीं वइगु जेठ १९ दुने क्वचायेके माःगु धका सम्झौताय् दु। ठेकेदार कम्पनीं कोभिड–१९या स्वाथ्यजन्य समस्याया कारणं कामदार व निर्माण समाग्री आपुर्तिइ कठिनाई, सिसडोलय् फोहोरया चलः वःगुलि आगमन अबरुद्ध जूगु व कोल्पुखोलाय् बाढी वया निर्माण ज्याय् प्रभावित जूगु धका धयादिगु खः।
१३ दँ निसे सिसडोल ल्याण्डफिल साइटय् भ्याली १ व २ फोहोर बिसर्ज जुया वयाच्वंगु ख। न्हि ११०० सय मेट्रिक टन फोहोर बिसर्जन जुया वयाच्वंगु सिसडोल ल्याण्डफिल साइटय् येँ महानगरपालिकापाखे न्हि करिब ७ सय मेट्रिक टन फोहर बिसर्जन याना वयाच्वंगु खः।
बिसं २०६२ सालय् निदँया लागि जक फोहर व्यवस्थापन याये मिले जुइ कथं सिसडोल ल्याण्डफिल साइट तयार याःगु खः। वया लिपा दिर्घकालिन रुपय् फोहोर व्यवस्थापन बञ्चरेडाडाय् १ हजार ७ सय ९२ रोपनी जग्गा अधिग्रहण याःगु खः।
येँ १११३ नाप स्वनिगलय् १३५७ म्ह कोरोना सक्रमित
लहानान्युज | कौलाथ्व पुन्हि ११४०,कार्तिक १५ शनिवाः
वःगु २४ घण्टाय् थौं शनिवाः स्वनिगलय् १३५७ म्हेसित कोरोना संक्रमित जुगु दु।
येँ जक १११३ म्हेसित कोरोना सक्रमण जुगु दु धका मन्त्रालय् धाःगु दु। अथेहे ख्वपय् ४९ म्ह व यलय् १९५ म्हेसित संक्रमण जूगु दु धका स्वास्थ्य तथा जनसंख्या मन्त्रालयं धाःगु दु।
संक्रमितपि ५६९ मिसा व ७८८ म्ह मिजंपि खः।
शनिवाः देय् यकं थप २५०८ म्हेसित कोरोना संक्रमण पुष्टि जुगु खः। अथेहे २४ घण्टामा २२६४ म्ह संक्रमितपि डिस्चार्ज जूगु दु।
२५०८ म्हेसित कोरोना संक्रमण पुष्टि जुगु
लहानान्युज | कौलाथ्व पुन्हि ११४०,कार्तिक १५ शनिवाः
वःगु २४ घण्टाय् थप २५०८ म्हेसित कोरोना भाइरस (कोभिड(१९) या संक्रमण पुष्टि जुगु दु।
देय् या प्रयोगशालाय् ९ हजार २७९ म्हेसिगु पीसीआर टेष्ट याःगुलि ९७६म्ह मिसा व १५३२ म्ह मिजपि संक्रमण पुष्टि जूगु खः। थ्व नाप आःतक संक्रमितपि १ लाख ७० हजार ७४३ म्ह थ्यःगु दु।
उकि मध्ये १ लाख ३१ हजार २२२ म्ह संक्रमणमुक्त जुगु दु।
लोकसाहित्य भवनया लागि हलि नेवाः दबूपाखे १४लाख ग्वाहालि
नृपेन्द्रलाल श्रेष्ठ | कौलाथ्व पुन्हि ११४०,कार्तिक १५ शनिवाः
हलि नेवाः दबू नेपाः कवःपाखे संस्कृतिबिज्ञ सत्यमोहन जोशीया छेँय् दयेकूगु लोकसाहित्य परिषदया भवन दयकेगु ग्वाहालि कथं १४ लाख ग्वाहालि याःगु दु।
थौं सुथय् जोशीया छेँय् वना दबू नेपाः कवःया पदाधिकारीपिन्स उगु चेक हस्तान्तरण याःगु खः।
उगु ज्याझ्वलय् लसकुस यानादिसे परिषदया भवन दयेकेगु कजि राजित बहादुर श्रेष्ठं परिषद छेँ दयेकेगु लागि यक्को न्ह्यःनिसे कुतः जुसा दयेके मफया च्वंगु सांसद कृष्णलाल महर्जनया ग्वाहालि भवन देय्केत वयकः सांसद कोष ५० लाख ग्वाहालि ज्यान्ह्याकगु खः। आः वया हलि नेवाः दबू न ग्वाहालि जुगु लसताया खँ धयादिगु खः।
अथेहे संस्कृतबिज्ञ सत्यमोहन जोशी थुगु छेँय् आः लोकसाहित्य अनुसुन्धान यायेत ग्वाहालि जुइगु व थन वये वलय् राष्ट्रिय भावना जुइ कथं थुगु भवन तयार जुइ धका धयादिसे बिदेश वइपिन्त न होटेलय् च्वने म्वाये कथ छगु तल्ला उपलब्ध यायेगु धका धयादिगु खः।
नेपाः कवःया नायः शाक्य सुरेन लोकसाहित्य परिषदया भवन दयेके ग्वाहालि याये दुगु लसता प्वकादिसे थुगु ध्यवा पर्यात ला मखु मेगु ध्यवा लिपा लिपा न ग्वाहालि यायेगु जुइ धका धयादिगु खः।
संक्रमितपिन्त प्रोत्साहन बिःगु हे दकलय् तधःगु वासः खः मेयर विद्यासुन्दर शाक्य
नृपेन्द्रलाल श्रेष्ठ | कौलाथ्व पुन्हि ११४०,कार्तिक १५ शनिवाः
येँ महानगरपालिकाया मेयर विद्यासुन्दर शाक्यं कोरोना संक्रमणया कारण गम्भीर बिरामी जुपिन्त प्लाज्मा थेरापी मार्फत जीवन बचे यायेत ग्वाहालिया नितिं ‘प्लाज्मा दान’ बिइत इनाप याःगु दु।
छु ई न्ह्य जक कोरोनामुक्त जुया आः स्वस्थ जुम्ह मेयर शाक्यं कोरोनाया गम्भीर बिरामी जूपिन्त बचे यायेगु लागि थःम्हेसिया न प्लाज्मा दान बिइत तयार दुगु धका धयादिसे थज्यागु ज्या मेपिन्स न ग्वाहालि यायेत इनाप याःगु दु।
‘जितः कोरोना संक्रमण जुगु छु दिं लिपा हे थः जहान व म्ह्याय् यात न कोरोना पोजेटिभ खनेदुगु। आः जिपि दक्को स्वस्थ जुइ धुकूदु धका धयादिसे,’ मेयर शाक्यं ‘म्ह्याय् पलिस्था शाक्यं म्हिगः जक कान्तिपुर अस्पताल तीनकुनेय् वना ‘प्लाज्मा दान’ बिःगु दु धका धयादिगु दु।’
कोरोनाया कारण गम्भीर बिरामी जूपिनिगु जीवन बचे यायेत प्लाज्मा थेरापीं उपचारय् तधःगु ग्वाहालि जुइगु व संक्रमणमुक्त जुइ धुकूपिन्स ‘प्लाज्मा दान’ बिइत प्रोत्साहन यायेगु उदेश्यं परिवारपाखे हे प्जाज्मा बिइगु सुरुवात यानागु दु धका शाक्यं जानकारी बियादिगु दु।
पलिस्था शाक्यं दान याःगु प्लाज्मापाखे कोभिड व निमोनियाया कारण विरामी जूपि ओम नर्सिङ होमय् वासः याना वयाच्वम्ह येँ महानगरपालिका वडा–४ या ७६ दँ दुम्ह मिसायाःगु वासः जुयाच्वंगु दु।
‘स्वनिगः नाप येँ महानगरपालिका लिपागु इलय् वया कोरोनाया हटस्पट जुया वयाच्वंगु दु। थज्यागु इलय् संक्रमण लिपा स्वस्थ जीवनय् लिहावःपिन्स स्वस्थ मनू तयेगु प्जाज्मा दान बिउसा यक्कोसिया ज्यान बचे जुइ धका धयादिसे मेयर शाक्यं, ‘कोरोना संक्रमित धइगु सू सूयात न दुव्र्यवहार मयायेत इनाप याःगु दु। संक्रमितपिन्त सकसिया प्रोत्साहन बिःगु हे दकलय् तधःगु वासः खः।’
वयकलं आः महानगरपालिकाय् थीथी वडापाखे संक्रिमितपिन्त प्रोत्साहन बिइ कथं फलफुल, मास्क, आर्योवेदिक वासः लगायतया सामाग्री बिउ वनेत जनप्रतिनिधिपि होम आइसोलेसन व आइसोलेसनय् वनेगु जानकारी बियादिगु दु।
