Display Style:
Column Style
लुखाय् हे सामाजिक सुरक्षा भत्ता
लहनान्युज | गुंलागा ३० ११४०,भाद्र ३ बुधवाः
यलया न्याखाचुक । अनया ७६दँ दुम्ह लक्ष्मीदेवी बज्राचार्यया जवःगु तुति चलय् मजूगु समस्याया हुनिं स्वाहाने थहाँकुहाँ जुइमफु । तुतांया ग्वाहालिइ वय्कः मुस्किलं छगू कोथां मेगु कोथाय् वनी । सुथन्हापां वय्कःया छेँय् सःतूगु इलय् छय्म्हेस्यां झ्यालं स्वयाः धाल, ‘कुने सु खः ? सुयात मालागु ?’ उगु इलय् यल महानगरपालिका–१६या वडा दुजः पञ्चबज्र बज्राचार्यं लिसः बियादिल, ‘जिपिं छेँय् वयाः सामाजिक सुरक्षा भत्ता (बृद्धभत्ता) इना वयाच्वनागु ।’
लक्ष्मीदेवीया छय् थ्व स्वयां न्ह्यः लाइन च्वनाः बैंकय् थः अजिया नामय् सामाजिक सुरक्षा भत्ता काःवनेगु यानाच्वंगु खः । बैंकं भत्ता काय्त सम्बन्धित मनू हे उपस्थित जुइमाःगु धाय्वं वय्कलं भत्ता काय्गु आसा हे मयाय्धुंकूगु खः । तर छेँ छेँय् वयाः सामाजिक सुरक्षा भत्ता ब्युवय्वं वय्कः तसकं लय्ताल । वय्कलं धयादिल, ‘जिपिं भत्ता काय्माःपिं परिवार ला मखु । अथेखःसां छेँतक वयाः बियादिल । आः थ्व झिंनिद्वः सामाजिक ज्याय् खर्च याय् ।’
बज्राचार्ययात भत्ता बीधुंकाः नृत्यनाथ देगः त्वालय् थ्यन । ‘ज्वजलपा दाइ ! जिपिं वडापाखें ज्येष्ठ नागरिक भत्ता इना वयाच्वनागु खः ।’ वडा दुजः बज्राचार्यं छेँय् च्वनाच्वंम्ह ७९दँ दुम्ह माइला शाक्ययात धयादिल, ‘थ्व हे झ्वलय् छितः नं ब्यु वयाच्वनागु दु ।’ छेँय् हे वय्वं वय्कः दंग जुयादिल ।
७९दँ दुम्ह आशाकाजी शाक्य तुतिया ल्वचं कयाच्वंम्ह खः । वय्कः मुस्किलं वय्वनेगु यानादी । छेँय् च्वनाच्वंच्वं दिक्क जुयाच्वनादीम्ह शाक्ययात वय्कःया भौमचां सुं बृद्ध भत्ता बीत वःगु जानकारी याकेवं वय्कःया ख्वालय् न्हिलासु खनेदत । शाक्यं धयादी, ‘जिपिं भत्ता का हे मवनेगु बिचाः यानाच्वनागु खः । तर छेँय् हे ब्यू वःगु इलय् जिमित जनप्रतिनिधि वःगु महसूस जुल ।’ वय्कलं नं थ्व धेबा समाज विकासय् छ्यलेगु धयादिल ।
थ्व छुं छुं प्रतिनिधि पात्र जक खः । यल महानगरपालिका–१६य् ३सः व २५म्हेसिगु छेँ छेँय् वनाः भत्ता इनेगु ज्याय् वडा दुजः पञ्चबज्र बज्राचार्य सक्रिय जुयाच्वनादीगु दु । ‘बैंकं ज्येष्ठ नागरिकया सम्बन्धित मनूतय्त वडाया सिफारिसय् धेबा मबीवं ज्येष्ठ नागरिकपिन्सं सास्ति फय्मालाच्वंगुलिं जिमिसं थुकथंया अभियान न्ह्याकागु खः ।’ वय्कलं धयादिल, ‘थ्व जिमिसं चुनावया
इलय् बियागु बचं नं खः ।’
वय्कःया कथं नगरया अप्वः धइथें शारीरिक अशक्त, ज्येष्ठ नागरिक व एकल मिसापिं भत्ता काय्गु हे नितिं बैंकतक वनेमाःगु थाकूगु जुयाच्वन ।
कोरोनां सीपि १२० म्ह थ्यन
लहनान्युज | गुंलागा ३० ११४०,भाद्र ३ बुधवाः
देय् यकं कोरोना संक्रमणपाखे सीपि थौं खुम्ह थ्यःगु दु ।
थ्व नाप आः तक देय् यकं कोरोना सीपि १२०म्ह थ्यःगु दु ।
थौं सीपि येँ, बर्दिया, मोरङ, ख्वप, चितवन व सुनसरी छम्ह छम्ह मदुगु खः ।
थौं ६८१म्हेसित कोरोना संक्रमण पुष्टि
लहनान्युज | गुंलागा ३० ११४०,भाद्र ३ बुधवाः
थौं ६८१म्हेसित कोरोना संक्रमण पुष्टिथौं वःगु २४ घण्टाय् ६८१ म्हेसित कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयया कथं ११ हजार ५२२ म्हेसिगु परीक्षण याःगु इलय् ६८१ म्हेसित कोरोना संक्रमण खनेदुगु खः ।
थ्व नाप नेपालय् आःतक कोरोना संक्रमितपि २८ हजार ९३८ म्ह थ्यःगु दु ।
वःगु २४ घण्टाय् कोरोना संक्रमणपि १२०म्ह डिस्चार्ज जुया छेँ लिहा वःगु दु । डिस्चार्ज जूपि आः १७ हजार ७००म्ह थ्यःगु दु ।
अथेहे थौं स्वनिगलय् जक वःगु २४ घण्टाय् १५९ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु ।
स्वनिगलय् १५९म्हेसित कोरोना संक्रमण पुष्टि
लहनान्युज | गुंलागा ३० ११४०,भाद्र ३ बुधवाः
थौं स्वनिगलय् वःगु २४ घण्टाय् १५९ म्हेसित कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयया कथं येँ जिल्लाय् जक १३७म्हेसित कोरोना संक्रमण पुष्टि जूगु दु ।
अथे यलय् १७ म्ह व ख्वपय् च्याम्हेसित कोरोना संक्रमण पुष्टि जूगु दु ।
धरानय् कोरोनाया कारण मन्त
लहनान्युज | गुंलागा ३० ११४०,भाद्र ३ बुधवाः
कोरोना भाइरस संक्रमणया कारण सुनसरी ७१ दँया छम्ह मिसा बुधवाः मदुग दु ।
धरानया वीपी कोइराला स्वास्थ्य विज्ञान प्रतिष्ठानय् वासः याका वया च्वंम्ह थौं बुधवाः ११ बजे जुया १५ मिनेटय् मदुगु खः धका प्रतिष्ठानया प्रवक्तां जानकारी बिःगु खः ।
धरानया स्थायी बासिन्दा उम्ह मनू मुसु वइगु, सास ल्हाये थाकु व ज्वरो वइगु समस्या वया साउन २४ गते सुथय् अस्पताल भर्ना जूवःगु खः । थ्व स्वया न्ह्यः साउन २३ गते वयाःगु कोरोना रिपोर्ट पोजेटिभ वःगु खः ।
उम्ह मनू दम व मुटुया ल्वगि खः धका अस्पतालपाखे धाःगु दु ।
