Display Style:
Column Style
व्यवस्थित ढंगं नकि, जिमित आपत्ति मदु : मेयर शाक्य
लहानान्युज | कौलागा तृतिया ११४०,कार्तिक १८ मंगलवाः
येँया रत्नपार्कय् खुल्ला रुपं वंगु छुं न्हि न्ह्यवंनिसें न्ह्यानाच्वंगु निःशुल्क जा नकेगु अभियानं पिनेयापिं मनूतय्त येँ वयाः च्वनेत आकर्षित याइगु खँ स्थानीय मनूतय्सं धाःगु दु । नापं न्हिं निसःम्ह मनूत छथासं च्वनाः जा नइबलय् अनं हे कोरोना भाइरस न्यना वनीगु खतरा नं उतिकं अप्वःगु खँ धयाहःगु दु ।
थ्वहे खँयात ध्यानय् तयाः येँ महानगरपालिकां थ्व निःशुल्क जा नकेगु अभियानयात व्यवस्थित यायेगु लागिं सम्बन्धित ग्वसाः खलःयात इनाप याःगु दु । थौंकन्हय् मनूतय् वये–वने अप्वया वःगु व गाडी नं चले याना हयेधुंकूगु अवस्थाय् रत्नपार्क थेंज्याःगु थासय् न्हिनय् खुल्ला रुपं जा नकेगु ज्यां नगरया शोभा स्यनीगु जक मखु जा नइपिनिगु स्वास्थ्ययात समेत मनिंगु खँय् मनपां चिउताः प्वंकूगु खः ।
उगु ज्यायात व्यवस्थित यायेमाल धकाः थःपिंसं यानागु इनापयात अःखतं थुइकाः ‘महानगरपालिकां निःशुल्क जा नके मबिल’ धकाः हल्ला याना हःगु खँय् धाःसा येँ मनपाया मेयर विद्यासुन्दर शाक्यं आपत्ति प्वंकादीगु दु ।
‘थथे फोहोर व खुल्ला थासय् जा नकेगु छुं हे कथं मिले मजू । थःगु हे निजी थाय् वा पार्टी प्यालेसय् तयाः नकेगु व्यवस्था या धइगु जक महानगरपालिकाया आग्रह खः । नके हे मजिउ धकाः जिमिसं धयागु मदु’ मेयर शाक्यं कनादिल ।
येँ महानगरयात फ्वनाः नइपिं मनूत मदुगु शहर दयेकेगु धकाः दछि न्ह्यः हे थःपिंसं घोषणा यानागु स्मरण यासें मेयर शाक्यं धयादिल, ‘नये मखंपिं सुं दुसा उमित मानव सेवा आश्रमय् तयाः नकेगु धकाः महानगरपालिकां जिम्मा हे कायेधुंकूगु दु । उकिं माल धाःसा जिमिसं अन तयाः नका बी । येँ देय्यात फ्वनाः नइपिनिगु शहर चाहिँ दयेके मजिल ।’
रत्नपार्कय् झ्वःलिं फ्यतुनाः नयाच्वंपिं मनूतय्गु फोटो सामाजिक सञ्जालय् तयाः प्रचार यानाच्वंगु खँय् नं वय्कलं आपत्ति प्वंकादिल । ‘थ्व ला वय्कःपिनिगु आत्मसम्मानय् ठेस लाकेगु ज्या जुल । निःशुल्क नयाच्वंपिं मनूतय्गु फोटो सामाजिक सञ्जालय् तयाः ग्वसाः खलकं छु व्यापार यानाच्वन खः जिं मस्यू, तर थुकिं नयाच्वंपिं नागरिकया आत्मसम्मानय् घाः लाकेगु ज्या धाःसा जूगु दु’ मेयर शाक्यं धयादिल ।
कोरोना महामारी पनेगु लागिं सरकारं स्वला तक लकडाउन याःबलय् उकिं पीडित जूपिं मनूतय्त येँ महानगरपालिकां राहत वितरण यायेगु लिसें थीथी थासय् सार्वजनिक रुपं जा नकेगु व्यवस्था समेत याःगु खः । आः रत्नपार्कय् न्हिंन्हिं जा नकेगु ज्यां पिनें वइपिं मनूतय्त अझ आकर्षित याइगु व देगलय् सतकय् द्यनीपिं मनूतय्गु संख्या अप्वयेकीगु चिन्ता स्थानीय जनतायात जुया वःगु दु ।
थ्व विषयय् थःपिनि धापू स्पष्ट यायेगु लागिं येँ मनपां कन्हय् बुधवाः छगू पत्रकार सम्मेलन समेत यायेत्यंगु खँ नं सीदुगु दु।
येँ दुने फुक्क स्कूलय् नेपालभाषां ब्बकेगु लागि येँ महानगर इनाप यात
लहानान्युज | कौलागा तृतिया ११४०,कार्तिक १८ मंगलवाः
येँ महानगरपालिकां महानगर दुनेया फुक्क हे स्कूलय् नेपालभाषां तयार याना तःगु स्थानीय पाठ्यक्रम ब्वंकेगु लागिं इनाप याःगु दु।
येँमनपा शिक्षा विभागया शिक्षा अधिकृत मोतिराज खनालपाखें हस्ताक्षर यासें उगु निर्देशन जारी याःगु खः । मनपाया शिक्षा विभागपाखें फुक्कं विद्यालय् पौ छ्वसें थ्व निर्देशन बिःगु खः ।
शैक्षिक दँ २०७७ या आधारभूत तह (कक्षा १ निसें ८ तक) नेपालभाषाया माध्यमं स्थानीय पाठ्यक्रम ब्वंकेगु धकाः जूगु निर्णय कथं थ्व इनाप याःगु खः। येँ महानगरपालिकाया वंगु आश्विन १९ कुन्हु च्वंगु ५१ क्वःगु बैठकं येँ महानगरपालिका अन्तर्गत सञ्चालित फुक्कं स्कूलय् शैक्षिक सत्र २०७७ निसें नेपालभाषाया स्थानीय पाठ्यक्रम ब्वंकेगु निर्णय याःगु खँ धका न्ह्यथना तःगु खः।
नेपाःया न्हूगु संविधानय् हरेक स्थानीय तहयात थः मातहत लाःगु फुक्कं स्कूलय् थम्हं हे पाठ्यक्रम लागू यानाः ब्वंके फइगु अधिकार बियातःगु दु । स्थानीय थाय्या म्हसीका बीगु उगु पाठ्यक्रम स्थानीय भासं हे जुइमाःगु खँ कानूनय् उल्लेख जुयाच्वंगु दु।
येँ महानगरं नेपालभाषां ब्वंकेगु नितिं ‘येँ देय् म्हसीके’ नांया पाठ्य सफू कक्षा १ निसें ८ तगिं तक पाठ्यसफू ब्वंकेगु व्यवस्था दु। सफुली येँ देय् या कला, संस्कृति, सम्पदा, थाय्बाय्, रहनसहन, व्यक्तित्व आदि सम्बन्धी पाठ दुथ्याकातःगु दु ।
उगु पाठ्यसफू नेपालभाषां तयार यायेगु निति डा. चुन्दा वज्राचार्यया सयोकजत्वय् पाठ्यक्रम निर्माण समिति गठन याःगु खः।
येँ मनपां १ तगिमय् उगु पाठ्यसफूया आधारय् रेडियो कक्षा कायेगु शुरु यायेधुंकूगु दु।
लुँ तोलाया प्यसः थहावन
शोभा श्रेष्ठ | कौलागा तृतिया ११४०,कार्तिक १८ मंगलवाः
लुँ या भाः थौं मंगलवाः तोलाय् प्यस थहावःगु दु। नेपाल सुनचाँदी व्यवसायी महासंघ थौंया लागि लुँ तोलाया ९५ हजार ४ सय तोके यानागु दु धका धाःगु दु।
म्हिगः छगु तोलाया ९५ हजार रुपैयाँ कारोवार जूगु खः।
अथेहे तेजाबी लुँ तोलाय् न प्यस थहावना ९४ हजार ९ सय थ्यःगु दु धका महासंघं धाःगु दु।
वहः तोलाया थौं १२१० तका थ्यःगु दु।
थीथी थासय् विद्युत् कटौती जुइगु
शोभा श्रेष्ठ | कौलागा तृतिया ११४०,कार्तिक १८ मंगलवाः
नेपाल विद्युत् प्राधिकरणं थौं मंगलवाः येँया थीथी थासय् विद्युत् कटौती जुइ धका धाःगु दु।
प्राधिकरणया सूचना अधिकारी कथं येँ ग्रिड महाशाखापाखे स्युचाटार सबस्टेशनय् च्वंगु ११ केभी क्षमताया स्वीचगियर ह्यीला न्हुगु स्वीचगियर प्यानल जडान यायेगु नितिं थौं मंगलवाः सुथय्् ७ निसे १० बजे तक मत वइ मखु ।
प्राधिकरणया कथं उगु सवस्टशेनपाखे बिया वयाच्वंगु कुलेश्वर वितरण केन्द्र अन्तर्गत स्वयम्भु, बलम्बु, कलंकी, थानकोट, कालीमाटी, ताहाचल लगायतया थासय् विद्युत् कटौती जुइ धका धाःगु दु।
दिल्ली लिगया क्वालिफायरय् थ्यन
कौलागा तृतिया ११४०,कार्तिक १८ मंगलवाः
दिल्ली क्यापीटल इन्डियन प्रिमियर लिग (आईपीएल)या क्वालिफायरय् थ्यःगु दु।
अबुधाबीया शेख जायद रंगशालाय् सोमवाः जूगु कासाय् रोयल च्यालेन्जर्स बैंगलौरयात खुगु विकेटं बूका १६ ल्याः हया दिल्लीं क्वालिफायर यात्रा सुनिश्चित याःगु दु।
बैंगलौरं बिःगु १५३ रनया लक्ष्य दिल्लीं प्यःगु विकेटया क्षतिइ १९ गू ओभरय् पुरा याःगु खः।
अंक तालिकाय् शीर्ष स्थानय् थ्यःगु मुम्बई इन्डियन्स व दिल्लीया दथुइ वइगु बिहीवाः दुबई अन्तराष्ट्रिय क्रिकेट मैदानय् क्वालिफायर–१ य् प्रतिस्पर्धा याइ। विजेता फाइनल प्रवेश याइसा बूगु टीमं इलिमिनिटर विजेताया दथुइ म्हितीइ।
दिल्ली नाप बूगु बैंगलौर न प्लेअफया थाय् सुरक्षित याःगु दु। कोलकाता नाइट राइडर्स नाप समान १४ अंक हया नेट रन रेटया आधारय् बैंगलोर स्वगू थासय् थ्यःगु दु।
बैंगलौरं शुक्रवाः कोलकाता व सनराइजर्स हैदरावाद मध्ये छगू टीम नाप अबुधाबीइ इलिमिनिटरय् म्हितीइ।
प्लेअफय् थ्यःगु मंगलवाः हैदरावादं शीर्षस्थानय् च्वंगु मुम्बईयात बुकेमाः। मुम्बई न हैदरावादयात बुकुगु अवस्थाय् धाःसा कोलकता प्लेअफय् थ्यनिइ।
१२–१२ अंक हया किंग्स इलाभेन पञ्जाब, चेन्नाई सुपर किंग्स व राजस्थान रोयल्स धाःसा प्लेअफं पिहा वने धुकुगु दु।
