राष्ट्रियसभा नायः नारायणप्रसाद दाहाल व टर्कीया संसद ग्रान्ड नेसनल एसेम्बलीया सभामुख नुमान कुर्तुल्मुस नापलानादीगु दु।अन्तर व्यवस्थापिका सङ्घ (आइपीयू)या १५२ क्वःगु महासभाय् ब्वति कायेत इस्तानबुलय् झायाच्वनादीम्ह नायः दाहालं शनिबाः टर्कीया संसदया सभामुखयात नापलानादीगु खः।

नापलायेगु झ्वलय् निगू देय् दथुया स्वापू, थःथवंय् हित व संसदीय सहकार्यया विषयय् सहलह जूगु नायः दाहालया सचिवालयं धाःगु दु। वहे झ्वलय् नायः दाहालं संसदीय सहकार्यया माध्यमं निगू देय् दथुया स्वापू अझं क्वातुकेमाःगु धयादिसें संसदीय अनुभव कालबिल, भ्रमण व संसदीयमैत्री समूह नीस्वनेगु निंतिं थःपिं तयार दूगु धयादिल।निगू देय् दथुया कूटनीतिक स्वापू खुगू दशकनिसें तसकं सौहार्द व थःथवंय् हनाबनाय् लिधना च्वंगु धयादिसें नायः दाहालं आः वइगु दिनय् निगूपक्षीय स्वापूयात अझं तब्याकेत नेपालय् हे टर्कीया दूतावास नीस्वनेत इनाप यानादिल।

आः टर्कीलिसे स्वानाच्वंगु फुक्क ज्याया निंतिं नेपाःमिपिं भारतया राजधानी दिल्ली वनेमाःगु जुयाच्वंगु धयादिसें नायः दाहालं नेपाः व टर्की दथुया श्रम सम्झौता यायेगु नापनापं नेपालय् हे टर्किस दूतावास नीस्वनेफुसा निगू देय् दथुया मंकाः ज्या अझं अःपुइगु विश्वास प्वंकादिल। आइपीयूया महासभाय् टर्की सरकार व संसद्ं याःगु लसकुस व हार्दिकताया निंतिं नायः दाहालं सुभाय् देछानादिल।

उगु ज्याझ्वलय् टर्कीया संसद् ग्रान्ड नेसनल एसेम्बलीया सभामुखं राष्ट्रियसभा नायःलिसें नेपाली संसदीय प्रतिनिधिमण्डलयात इस्तानबुलय् लसकुस यायेदयाः थः तसकं लय्तानागु धयादिल। टर्की व नेपाः दथुया निगूपक्षीय स्वापू अझ धिसिलाकेत थःपिं न्ह्याबलें तयार दूगु धयादिसें सभामुख नुमानं नेपालय् टर्किस दूतावास चायेकेगु खँय् थःपिं सकारात्मक दूगु धयादिल। टर्किया सरकारं नेपाःया निंतिं सीमित कोटाया शैक्षिक छात्रवृत्तिया व्यवस्था यानागु न्ह्यथनादिसें वय्कलं छात्रवृत्तिया कोटा अप्वयेकेगु व निगू देय् दथुया बनेज्या नापं तब्याकेगु प्रतिबद्धता प्वंकादिल।

आः वइगु नोभेम्बरय् कोप–३१ टर्कीइ जुइत्यंगु न्ह्यथनादिसें सभामुख नुमानं उकिया नेतृत्वया निंतिं टर्कीयात माःगु ग्वाहालि यायेत इनाप नापं यानादिल। नापलायेगु झ्वलय् आइपीयूय् ब्वति काःवंपिं नेपाली संसदीय प्रतिनिधिमण्डलया दुजःपिनिगु नापं उपस्थिति दूगु खः।

सार्वजनिक प्रशासन सम्बन्धी संयुक्त राष्ट्र संघया विज्ञ समिति (ऋभ्एब्) या २५ क्वःगु सत्रय् संयुक्त राष्ट्र संघया मुख्यालय जुगु खः।

उगु ज्याझ्वलय् सार्वजनिक संस्थायात बालाकेगु व सार्वजनिक विश्वास पुनर्निर्माण यायेगु उद्देश्यं सुधार याये माःगुलि सहलह यायेत हलियकंया शासन विज्ञ, नीति निर्मातापि नाप नागरिक समाजया प्रतिनिधिपि छथाय् मुना सहलह ब्याकूगु खः।

सार्क पत्रकार मञ्चया अन्तर्राष्ट्रिय अध्यक्ष राजु लामां न्यूयोर्कय् उच्चस्तरीय सत्रय् ब्बति कायेगु नापं शासन, पारदर्शिता व संस्थागत विकासय् ब्बति काःगु खः।ऋभ्एब् सत्र सार्वजनिक प्रशासन प्रणाली सुधार यायेगु, जवाफदेहिता अप्पोकेगु व बहुपक्षीय सहयोग नाप न्हुगु शासन अभ्यासपाखे दिगो विकास लक्ष्य (क्म्न्क) पाखे प्रगति अझ अप्पोकेगु खँय् केन्द्रित जुइ।

उगु मुज्याय् विज्ञतय्स थौ विश्वव्यापी वातावरणय् समावेशी नीति निर्माण, डिजिटल रूपान्तरण व सरकार व नागरिक तयेगु दथुइ नवीकरण याइगु भलसा दयेमागुलि बः बिउगु खः। 

बागमती प्रदेशको संस्कृति लिसे पर्यटन मन्त्रालयपाखे निर्मित मुद्रा सङ्ग्रहालय दोलखाया भीमेश्वर नगरपालिका–२ य् औपचारिक कथं लःल्हागु दु।

स्थानीय तहया सहभागिताय् उगु सङ्ग्रहालय पर्यटन लिसे सांस्कृतिक संरक्षणय् महत्त्वपूर्ण पूर्वाधारया कथं कायेगु याः। बागमती प्रदेश संस्कृति लिसे पर्यटन मन्त्री सुरेश श्रेष्ठं प्रदेशं दयेकूगु अलपत्र जुयाच्वंगु छु न संरचना आः उपभोगय् हयेत मन्त्रालयं ज्या यानाच्वंगु दु धका धयादीगु खः ।

अथेहे पूर्वाधार हस्तान्तरणय् मन्त्रालयया सचिव दीपेन्द्र सुवेदीं संग्राहलय कन्ह्य पर्यटक तयेगु निति अध्ययन नाप अवलोकनपाखे यक्को खँ सिइके फइ धका धयादीग्ु खः।

उगु ज्याझ्वलय् बागमती प्रदेशया मन्त्री सुरेश श्रेष्ठ, मन्त्रालयया सचिव दीपेन्द्र सुवेदी नाप आयोजना इकाई कार्यालय काठमाडौँया प्रमुख उत्तम चापागाईँ पिनिगु न ब्बति दुगु खः।

डिजेल व मचिकनय् लिटरं ३० तका थहावंगु दु। आयल निगमं थौ चान्ह्यः १२ बजेनिसे लागू जुइगु कथं भाः थहावंगु दु धका जानकारी ब्यूगु दु।

निगमया कथं पेट्रोलया भाः यथावत यागु दु।अथेहे, आन्तरिकपाखे हवाई भाः लिटरं न्यातका थहावंगु दु।

टोखाय् बिस्काः जात्रा न्ह्याःगु दु। तःल्याखय् नेवाःत दूगु थनया सपनतीर्थया मेला नापं न्ह्याःगु दु।

जात्रा व्यवस्थापन समितिया ल्यूकजि गणेशमान श्रेष्ठया कथं म्हिगः देगलं गामय् खः हयेगु व गां चाःहिकाः सपनविनायकया खः यलागः त्वालय्, चण्डेश्वरीया खः थलागः त्वालय् व मसानकालीया ख्यः जुयाः भूतख्यलय् दिकूगु खः।

थौं सुथय् स्वंगूलिं खःयात गां चाः हिकाः मसानकालीया खः भूतख्यःया फल्चाय् दिकेधुंकाः बलि पुजा बियाः कोठु गणेश व मसानकाली निगूयां खः थलागः त्वालय् दिकूगु खः। थौं सनिलय् तलेजु पाखें सिन्दुरजात्रा याइ।

वैशाख ३ गते सुथय् तपलाक्षीः पाखें भुइसिन्ह जात्रा यानाः द्यः खः यात हासल त्वालय् दिकाः न्हिनय्  कुमारी द्यः लिसेंया भुइसिन्ह जात्रा यानाः सरस्वती व महाद्यःया खः बाहेकं मेमेगु खःयात पुखूलिइ यंकाः शुद्ध याइगु वय्कलं धयादिल। जात्राया लिपांगु दिं वैशाख ४ गते सुथय् बाजं थानाः भुइसिन्ह जात्रा यानाः गां चाःहिलेगु याइ । वैशाख ५ गते सुथय् यःसिं क्वःथले धुंकाः जात्रा क्वचाइ ।

टोखाय् थौं सार्वजनिक बिदा विस्काः जात्राया लसताय् टोखा नगरपालिकां थौं टोखा नगरपालिका जःछि सार्वजनिक बिदा ब्यूगु दु। वंगु चैत १५ गतेया टोखा कार्यपालिकाया बैठकं थौं नगरपालिका लागाय् सार्वजनिक बिदा बिइगु निर्णय याःगु खः।