विशेष अदालतं सहसचिव नाप येँ महानगरपालिकाया पूर्व प्रमुख प्रशासकिय अधिकृत प्रदीप परियारयात २५ हजार तका धरौटीइ त्वत्येत आदेश ब्यूगु दु।

विशेष अदालतया सदस्यपि तेज नारायण सिंह राई, राम बहादुर थापा व रितेन्द्र थापाया इजलासं महानगरया कर्मचारीपि बसन्त आचार्य व नमराज ढकालयात ५०–५० हजार तका धरौटीइ त्वत्येत आदेश ब्यूगु दु।

ठेक्का ब्यूगु इलय् म्हो रकम प्रस्तावयात ठेक्का मबिउसे अप्पो कबुल यापिन्त ठेक्का ब्यूगु द्धपनय् अख्तियारं उमित भ्रष्टाचारमुद्दा दायर याःगु खः।

प्रधानमन्त्री केपी शर्मा ओलीं त्रिभुवन विश्वविद्यालयया प्वना च्वंगु उपकुलपतिइ सिफारिसजूपिं मध्ये डा दीपक अर्यालयात नियुक्त यानादीगु दु।

शिक्षा, विज्ञान लिसें प्रविधिमन्त्री रघुजी पन्तया संयोजकत्वय् नीस्वंगु सिफारिस समितिं थ्व हे असार २३ गते प्रधानमन्त्री लिसें कुलपति ओलीयात उपकुलपतिया निंतिं स्वम्हेसिया नां सिफारिस याःगु खः। थथे सिफारिस जूपिं स्वम्हपाखें थौं प्राडा अर्याल उपकुलपतिइ नियुक्त जुयादीगु प्रधानमन्त्रीया निजी सचिवालयया उपसचिव विष्णु सुवेदीं धयादिल

समितिं वर्णानुक्रम कथं आःया निमित्त उपकुलपति प्रा डा खड्ग केसी, त्रिविया विज्ञान सङ्कायया पुलांम्ह डीन प्रा डा विनिल अर्याल व जल लिसें मौसम विज्ञान विभागया पुलांम्ह प्रमुख डा दीपक अर्यालयात सिफारिस याःगु खः।

उपकुलपति प्रा डा केशरजङ्ग बरालं बियादीगु राजीनामा वंगु चैत २८ गते स्वीकृत जुइ धुंकाः वंगु चैत ३१ गते विश्वविद्यालयया कुलपतिनापं जुयाच्वनादीम्ह प्रधानमन्त्री ओलीं शिक्षाध्यक्ष केसीयात पदपूर्ति मजूतक स्वलाया निंतिं उपकुलपतिया भाला बियादीगु खः।

बागमती प्रदेश सरकारया स्वास्थ्य मन्त्रालयं ख्वपया भक्तपुर अस्पताललिसें प्रदेशया थी थी अस्पतालय् झिंखुगः डायलासिस मेसिन (उपकरण) जडान याःगु दु।

जलासेँया बिरामीयात डायलासिस सेवा कायेत सरकारी अस्पतालय् भीड जूलिसें छक्वःया निद्वः व न्यासः पुलाः निजी अस्पतालय् वनेमाःगु बाध्यतायात म्हो यायेत मन्त्रालयं थः मातहतया प्रादेशिक अस्पतालय् डायलासिस मेसिन जडान यानाःगु धकाः प्रदेशया स्वास्थ्यमन्त्री किरण थापां धयादिल।

वय्कःया कथं मन्त्रालयं भक्तपुर अस्पतालय् न्यागः मेसिन हयाः जडान याःगु दु। मन्त्रालयं धादिङ अस्पतालय् निगः, सिन्धुली अस्पतालय् निगः, त्रिशूली अस्पतालय् निगः, बकुलहर रत्ननगर अस्पतालय् निगः व हेटौँडा अस्पतालय् स्वंगः डायलासिस मेसिन जडान याःगु मन्त्री थापां धयादिल।

डायलासिस मेसिन जडाननापं अस्पतालं जलासेँया बिरामीतय्त अःपुक सेवा बिइगु धयादिसें वय्कलं लिक्कलाःगु अस्पतालपाखें सेवा कायेफइगु धयादिल। मन्त्री थापां प्रादेशिक अस्पतालय् कन्हय्या दिं उपकरण थपे यानाः यंकेगु नापं धयादिल।

भक्तपुर अस्पतालया कार्यकारी निर्देशक डा सुरेन्द्र भट्टं उपकरण वयेधुंकाः अस्पतालं न्यागू शय्याया डायलासिस सेवा न्ह्याकेधुनागु धयादिल।

स्वास्थ्य बीमा ज्याझ्वलय् स्वाःपिं नागरिकतय्सं आः निगू लख तका तकया वासः सुविधा काये खनीगु जूगु दु।

स्वास्थ्य नाप जनसङ्ख्यामन्त्री प्रदीप पौडेलं आःतक छगू लख तकाय् सीमित थ्व सुविधा आः वइगु साउन १ गतेनिसें निगु लख यायेगु घोषणा याःगु दु। थौं सामाजिक सञ्जालपाखें उगु जानकारी बियादिसें मन्त्री पौडेलं च्याताजि गम्भीर कथंया ल्वय्या निंतिं वासः खर्च निदुगं यानागु धकाः धयादीगु दु।

“कडा ल्वचं कयाः वासः यायेत खर्च मुंके मफइपिं नागरिकया पीडाय् राहत बिइत आः वइगु साउन १ गतेनिसें थ्व निर्णय लागू जुइगु जूगु दु”, फेसबुकय् वय्कलं च्वयादीगु दु। आः क्यान्सर, नुगःचुया ल्वय्, जलासेँया ल्वय्, छ्यं व दुगःक्वँय् (हेड इन्जुरी व स्पाइनल इन्जुरी), सिकलसेल, एनिमिया, पार्किन्सोनिज्म व अल्जाइमर जूपिं बिरामीतय्सं निगू लख तका तकया वासः सुविधा कायेखनीगु जूगु दु।

थ्व स्वया न्ह्यः सरकारं बीमा योजयनाय् दुथ्यापिंत थः च्वना च्वंथाय् वासः याकेफइगु व्यवस्था यायेत व फुक्कं कथंया बीमा सुविधा तब्याकेगु निर्णय याये धुंकूगु दु।

चलखं कालीगण्डकी करिडोर अवरुद्ध जूगु दु। मङ्गलबाः सनिलंनिसें वयाच्वंगु वां यानाः चलः वनाः करिडोर पूवंक अवरुद्ध जूगु खः।

जिल्ला प्रहरी ज्याकुथि बागलुङया सुचं अधिकारी वसन्त पाण्डेया कथं करिडोरया बागलुङ नगरपालिका–१० दब्ल्याङय् चलः वनाः लँ अवरुद्ध जूगु खः।

वा मदीगुलिं आः हे लँ चायेके फइगु अवस्था मदूगु धासें वय्कलं वा दितकि चलः चिइकेगु धयादिल। छुं छुं थासय् सतक तुनावना च्वंगु दु।