समाज कल्याण परिषद अन्तगर्त भृकुटीमण्डपय् च्वंगु बाः मपुगुलि नीगु पसः तालाबन्दी याःगु दु। तदँनिसे बाः मपुगु पसलय् थौ तालं ग्वया ब्यूगु दु।

बाः मपुगु ५६ गु सटल नीगु शटर समाज कल्याण परिषदया कर्मचारी तय्सं सुरक्षाकर्मी ग्वहालिं तालं ग्वया ब्यूगु खः। रिपोर्टस क्लबया शटर नापं मेमेगु संस्थाया कार्यालय तक लागु दु। 

प्रतिनिधिसभाया उपसभामुख रुबीकुमारी ठाकुरं थौनिसें पदभार ग्रहण यानादीगु दु।

थ्व हे चैत २७ गतेया प्रतिनिधिसभा बैठकपाखें उगु पदय् निर्वाचित जुयादीम्ह उपसभामुख ठाकुरं सिंहदरबारय् च्वंगु ज्याकुथिइ थ्यंकाः पदबहाली यानादीगु खः।

उपसभामुख ठाकुरं थौं हे सभामुख डोलप्रसाद अर्यालनाप न्हापांगु औपचारिक कथं नापलादिल। सभामुख अर्यालं उपसभामुख ठाकुरयात भिंतुना बियादीगु सभामुखया सचिवालयं धाःगु दु।

बिस २०८३ या लसताय् सङ्घीय राजधानीया प्रमुख पर्यटकीय गन्तव्य ठमेलय् ‘ठमेल सतक महोत्सव’ जुइत्यंगु दु।

ठमेल पर्यटन विकास परिषदया ग्वसालय् नेपाली न्हूदँयात अन्तरराष्ट्रियस्तरय् म्हसिकेगु ताःतया थौं न्हिनय् येँ महानगरपालिका–२६ त्रिदेवीमार्गय् ‘ठमेल सतक महोत्सव’ जुइत्यंगु खः।परिषदया उपाध्यक्ष सहदेव धमला (विमलं) नेपाली न्हूदँयात अन्तराष्ट्रियस्तरय् म्हसिकेगु निंतिं महोत्सव ग्वसाः ग्वयेत्यनाःगु धकाः जानकारी बियादिल।

“न्हूदँया पूर्वसन्ध्याय् ठमेल दुनेया सतकय् थीथी स्टल तयाः नसा त्वँसा व वस्तुत न्ह्यब्वयेत्यंगु नापं मौलिक सांस्कृतिक ज्याझ्वः न्ह्यब्वइगु जूगु दु,” उपाध्यक्ष धमलां धयादिल। वय्कःया कथं त्रिदेवीमार्गय् च्वंगु सतकय् ३२ गू स्टल दयेकाः नयेगु नसाया प्रवद्र्धन व हलंज्वलंत मिइत्यंगु दु । अथे हे, सनिलया ६ः०० ताः इलंनिसें थीथी सांस्कृतिक ज्याझ्वःत ग्वसाःग्वयाः न्हूदँयात लसकुस यानाः चान्हसिया १२ः३० ताः इलय् क्वचाइगु परिषद धाःगु दु।

नेपाः वइपिं विदेशी पर्यटकमध्ये ८० प्रतिशत पर्यटक ठमेल चाःह्यूवइगु यानाच्वंगु दु। उगु सतक महोत्सवय् तःल्याखय् आन्तरिक लिसें बाह्य पर्यटकया ब्वति दइगु परिषद्ं धाःगु दु।

नेपाल मजदुर किसान पार्टीया नायः लिसें वरिष्ठ राजनीतिज्ञ नारायणमान बिजुक्छेँ ‘रोहितं’ च्वयादीगु सच्छि दँ लिपाया ख्वप सफूया स्वक्वःगु संस्करण म्हिगः सार्वजनिक याःगु दु।

ख्वप नगरपालिकां म्हिगः ग्वसाः ग्वःगु सच्छि दँ लिपाया ख्वप सफूया स्वंक्वःगु संस्करण सार्वजनिक ज्याझ्वलय् नायः बिजुक्छेँ लिसें थीथी व्यक्तित्वपिंसं मंकाः कथं सार्वजनिक यानादीगु खः।

ज्याझ्वलय् विजुक्छेँ सच्छि दँ लिपाया ख्वपया परिकल्पनायात पूवंकेत सफू ज्यालगे जुइगु धयादिसें न्हापांगु व निक्वःगु संस्करण पिथने धुंकाः ब्वनामिपिंसं ययेकूगु व माग कथं स्वक्वःगु संस्करण हयागु धयादिल।

मुक्कं २४४ पृष्ठया उगु सफुतिइ च्वमि बिजुक्छेँं च्वयादीगु च्वसूत मुनातःगु दु । नेपाःया कला व तजिलजिया अध्ययनया निंतिं माःगु पृष्ठभूमि सफुतिइ दुथ्याना च्वंगु दु।

वंगु ६५ दंनिसें कला साधनाय् सक्रिय जुयाच्वनादीम्ह पुलांम्ह कलाकार लिसें प्राध्यापक राधेश्याम मुल्मीया स्वगूगु एकल कला प्रदर्शनी थनिंनिसें येँय् न्ह्याःगु दु।

नेपाल ललितकला प्रज्ञा प्रतिष्ठानलिसेया सहकार्यय् नेपाल व्यावसायिक कलाकार सङ्घ (क्यान)या ग्वसालय् नक्सालय् ‘प्रतिविम्ब’ शीर्षकय् प्रदर्शनी सुरु जूगु खः । थौं उलेज्याया सत्रय् वय्कःया जीवनीसम्बन्धी वृत्तचित्र नं प्रदर्शन याःगु खः। वृत्तचित्रय् ७७ दँ दुम्ह मुल्मीया न्हापांनिसें थौंतकया कलायात्रा दुथ्याकातःगु खः। कलाकार मुल्मीं उगु किपालय् जीवन, जगत् व प्रकृतियात रङया माध्यमं प्रस्तुत यानादीगु खः।

उलेज्या समारोहय् पुलांम्ह कलाकार शशीविक्रम शाहं कलाकार मुल्मीया किपालं अत्थें न्वंवानाच्वंगुलिं छुं नं विवेचना यानाच्वनेम्वाः धयादिल। प्रज्ञा प्रतिष्ठानया उपकुलपति लालकाजी लामां कलाकार मुल्मीया किपालय् समाज विश्वयात प्रतिविम्बित यानातःगु धासें च्वछानादिल। वृत्तचित्र निर्माता जीवननाथ धमलां मुल्मीयात विज्ञान व कलायात संयोजन याइम्ह कलाकारकथं थःम्हं म्हस्यूगु धयादिल।

वय्कलं धयादिल, “वय्कःया कलाय् जीवन व कलायात छगुलिं मेगुया पूरककथं प्रतिविम्बित याःगु प्रतीत जुइ ।”कलाकार मुल्मीं थःगु कला यात्राय् यक्व थथ्याःक्वथ्याः पार यानाः थन थ्यंकादीगु धयादिल। ग्वसाःखलः कलाकार सङ्घया नायः प्रेमलाल श्रेष्ठं कलाकार मुल्मीया कलाय् नेपाली परिवेश, न्हिंन्हिंसिया जीवनया लिसें सांस्कृतिक व आध्यात्मिक पक्ष अभिव्यक्त जूगु खंकेफइ धयादिल।

स्वन्हुतक सञ्चालन जुइगु प्रदर्शनीइ २५ गू किपाः दुथ्याकातःगु खः।