राष्ट्रिय स्वतन्त्र पार्टी (रास्वपा)या संसदीय दलया बैठकं प्रतिनिधिसभाया उपभामुख पदय् श्रम संस्कृति पार्टीं उम्मेदवारी बियादीम्ह रुविकुमारी ठाकुरयात मतदान यायेगु निर्णय याःगु दु।

सिंहदरबारय् थौं च्वंगु बैठकं उपसभामुख पदय् ठाकुरयात पार्टीया सांसदतय्सं मतदान यायेगु निर्णय याःगु खः।ठाकुरया समर्थकय् रास्वपाया अशोककुमार चौधरी च्वनादीगु खः।

थौं जुइगु निर्वाचनया निंतिं उपभामुखय् श्रम संस्कृतिया ठाकुर व राष्ट्रिय प्रजातन्त्र पार्टीया सरस्वती लामा उम्मेदवार जुयादीगु खः।

नेपाल आयल निगमं पेट्रोलियम पदार्थया भाः हाकनं थकाःगु दु। अन्तरराष्ट्रिय बजारय् पेट्रोलियम पदार्थया भाः थतक्वत जुयाच्वंगु न्ह्यथसें निगमं भाः थकाःगु खः।

निगमं थौं चान्हसिया १२ः०० ताः इलं निसें लागू जुइगु यानाः पेट्रोल, डिजेल, मचिकं, एलपी ग्यास व हवाई इन्धनया भाः थकाःगु खः। निगम सञ्चालक समितिया बैठकं पेट्रोलया भाः लिटरय् झिंन्हय्तका व डिजेल लिसें मचिकंया भाः लिटरय् नीन्यातका नीन्यातकाया ल्याखंया भावं थकाःगु खः।

अथे हे, एलपी ग्यासया भाः छगः सिलिन्डरया सच्छिया ल्याखं भाः थकाःगु दु। निगमया कथं हवाई इन्धन (आन्तरिक)पाखे लिटरय् खुतका भाः थकागु दु। न्हूगु मू धलः कथं आः स्वनिगलय् पेट्रोलया भाः लिटरया निसः व झिंगुतका थ्यंगु दु। अथे हे डिजेल व मचिकं लिटरया निसः तका थ्यंगु दु। एलपी ग्यास छगः सिलिन्डरया निद्वः व झितका थ्यंगु दु।

अथे हे हवाई इन्धन (आन्तरिक)पाखे लिटरया निसः व ५७ तका कायम जूगु दु। सरकार भन्सार महसुल व पूर्वाधार विकास करया नामय् कयाः वयाच्वंगु शुल्कय् ५० प्रतिशत छ्यापं ब्यूगु जूसां द्यापं म्हो मजूगुलिं भाः थकायेमाःगु दाबी याःगु दु। थौं भाः थकाःगु जूसां तकं निगमयात बाःछिया थ्यंमथ्यं न्हय्गू अर्ब ८१ क्वति तका घाटा जुइगु निगमया दाबी दु।

नेपाल स्टक एक्सचेञ्ज (नेप्से) परिसूचक ४८.७१ ल्याखं थहाँवयाः २ द्वः व ८५१.२४ या बिन्दुइ कायम जूगु दु। थ्व १.७३ प्रतिशतया वृद्धि खः।

थौं ३३८ गू कम्पनीया २ द्वः ७९ लख ३१ द्वः व ७७० कित्ता शेयर १ लख ८ द्वः व ८६९ क्वः खरिद बिक्री जूबलय् ९ अर्ब ९१ क्वति ९२ लख १० द्वः व २११ ध्यबा बराबरया कारोबार जूगु नेप्सें धाःगु खः।

प्रतिनिधिसभाया उपसभामुखया निंतिं राष्ट्रिय प्रजातन्त्र पार्टीं सरस्वती लामा व श्रम संस्कृति पार्टीं रुवीकुमारी ठाकुरया उम्मेदवारी दर्ता जूगु दु।

लामाया प्रस्तावकय् ज्ञानबहादुर शाही लिसें समर्थकय् ताहिर अलि भाट, खुस्बु ओली व भरत गिरी च्वनादीगु दु धाःसा ठाकुरया प्रस्तावकय् आरेन राई लिसें समर्थकय् अशोककुमार चौधरी व अम्बिकादेवी सङ्ग्रौला च्वनादीगु सङ्घीय संसद् सचिवालयं धाःगु खः।

सचिवालयया कार्यतालिकाकथं थौं सुथय् ११ ताःइलंनिसें २ः०० ताः ई तक सभाय् सुं नं दुजःपिंत उपसभामुख पदय् निर्वाचित यायेमा धकाः प्रतिनिधिसभा नियमावली, २०७९ या नियम ८ या उपनियम (२) कथंया प्रस्तावया सुचं दर्ता यायेत ई क्वःछ्यूगु खः।दर्ता जूगु उम्मेदवारीया सुचंयात दर्ता झ्वःकथं धलः पिकायेत २ः३० ताः तक ई क्वःछ्यूगु खः।

उम्मेदवारया प्रस्तावकं प्रस्ताव व समर्थकं समर्थन यानाः उम्मेदवारीया सुचनय् थ्व हे चैत २७ गते न्हिनेसिया ४ ताःइलय् जुइगु सभाया बैठकय् सहलह जुयाः निर्णयार्थ प्रस्तुत याइगु जुइ। संविधानतः सभाया सभामुख व उपसभामुखय् बिस्कंगु राजनीति दल व बिस्कंगु लिङ्गं प्रतिनिधित्व जुइगु व्यवस्था दु ।

वंगु फागुन २१ गतेया निर्वाचनलिपा जूगु प्रतिनिधिसभाया न्हापांगु अधिवेशनअन्तर्गत थ्व हे चैत २२ गतेया बैठकं सभामुखय् राष्ट्रिय स्वतन्त्र पार्टीया डोलप्रसाद अर्याल निर्विरोध निर्वाचित जुयादीगु खः।

नेपाल कम्युनिष्ट पार्टी (एमाले) या नायः लिसें पूर्व प्रधानमन्त्री केपी शर्मा ओली स्वास्थ्योपचारया निंतिं छन्हु निन्हु अस्पतालय् हे च्वनादीत्यंगु दु।

जेनजी आन्दोलन घटनाया छानबिन यायेत गठित उच्चस्तरीय आयोगया प्रतिवेदनया आधारय् अनुसन्धानया झ्वलय् प्रहरी हिरासतय् च्वनादीम्ह वय्कः थौं रिहा जूगु खः। वय्कः ज्वँसांनिसें हे अस्पतालय् उपचार याका च्वनादीगु खः।

नायः ओलीं सरकारं थःत पूर्वाग्रह व प्रतिशोधपूर्णरूपं फौजदारी अभियोग बियाः १३ न्हुतक गैरकानुनी नियन्त्रणय् तयातःसां नं मुद्दा न्ह्याकेगु आधार व दसि मगाःगुलिं अन्तय् थः रिहा जूगु न्ह्यथनादिल।सर्वोच्च अदालतया परमादेश कथं रिहा जुइधुंकाः सामाजिक सञ्जालं लिच्वः बिसें नायः ओलीं थःगु रिहाइया निंतिं सः थंपिं सकलसित सुभाय् बियादिल।

आयोगया प्रतिवेदन कार्यान्वयन यायेगु सरकारया निर्णयया आधारय् प्रहरीं नायः ओलीयात ख्वपया गुण्डुं थ्व हे चैत १४ गते नियन्त्रणय् काःगु खः।