ख्वपया लोकंह्वाःगु बिस्काः जात्राया न्यान्हुया दिं म्हिगः सनिलय् भेलुख्यःया यःसिं ख्यलय् ५५ ल्हाः तःहाकःगु यःसिं क्वःथलेगु जात्रा क्वचाःगु दु।

पुलांगु दँयात बिदा यानाः न्हूगु दँयात लसकुस यायेगु कथं छन्हु न्ह्यः थंगु यःसिं म्हिगः तान्त्रिक विधि कथं पुजा यानाः सनिलया ५ः४९ या साइतय् क्वःथःगु खः।

भैलःद्यःया चिं कथं कयातःगु यःसिंकय् अष्टमातृयाका चिं कथं च्यापू खिपः चायेकाः फुक्कपाखें सात्तुसालाः यःसिं क्वःथयेगु याइ। यःसिं क्वःथलेगु यात नं बिस्काःया मू जात्रा कथं कायेगु यानातःगु दु। थ्व जात्रा लिपा तलेजु दुने दुमाजुया विशेष पुजा यानाः यःसिं ख्यलय् च्वंगु भैलः व भद्रकालीया खःयात गाःहिटि थ्यंकाः खः ल्वाकेगु याइ।

थ्व जात्रा स्वयेदसा सुख, समृद्धि, सहकाल वयेगु नापनापं शत्रुत नाश जुइ धइगु धार्मिक मान्यता दयाच्वंगुलिं थुकियात शत्रुहन्ता जात्रा नापं धायेगु याः।

येँ महानगरपालिकां थनिंनिसें बहनीसिया बससेवा सञ्चालन सुरु जुगु दु। साझा यातायातलिसेया सहकार्यय् थौं सनिलया ७ः०० ताःइलंनिसें पुल्चोकं बससेवा शुभारम्भ जुगु खः धका येँमपाया कार्यवाहक प्रमुख सुनिता डङ्गोलं जानकारी बियादिगु दु।

वय्कःया कथं थौनिसें न्हापांगु चरणय् स्वनिगःया लगंख्यः, बूढानीलकण्ठतक, बूढानीलकण्ठं, लगंख्यःतक, थानकोटं एयरपोर्टतक व एयरपोर्टं थानकोटतकया रुटय् विद्युतीय बससेवा सञ्चालन जुइ। यलया लगंख्यः, पाटन अस्पताल, अल्का, नर्भिक, प्रसूतिगृह, ट्रमा सेन्टर, वीर अस्पताल, कान्ति अस्पताल, टिचिङ अस्पताल, गङ्गालाल हृदय केन्द्र जुयाः बूढानीलकण्ठतक छगू रुट जुइ।

उत्तरदक्षिणपाखे लाःगु थ्व १६ किलोमिटरया छखेरंया रुट जुइगु येँमपां धाःगु खः। थानकोटं सतुङ्गल, कलङ्की, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने जुयाः अन्तरराष्ट्रिय विमानस्थलतक पूर्वपश्चिम दिशाया दूरी २० किलोमिटरया खः। थुगु निगू रुटय् प्यगः बहनीसिया विद्युतीय बस सञ्चालन जुइगु महानगरं जानकारी ब्यूगु खः।

“बहनीसिया ८ः०० ताःईलिपा सार्वजनिक यातायात सञ्चालन मजूबलय् थिकेक यात्रा यायेमाःगु समस्याया समाधान यायेमाःगु जरुरी जूगुलिं बहनीसिया सार्वजनिक यातायात सेवा सुरु यायेत्यनागु खः”, महानगरया कार्यवाहक प्रमुख सुनिता डङ्गोलं धयादिल, “सार्वजनिक यातायात व थुकिया विकल्प मदूगुलिं सकसित समस्या जूगुलिं थुकिया छुंछुं हदतक समाधान जुइगु विश्वास दु ।”

वय्कलं थ्वस्वयांन्ह्यः बहनीसिया इलय् मचाल्यासे व मिस्तय्त दुव्र्यवहार फयेमाःगु लिसें विद्यार्थीपिंत आर्थिक रूपं नं अप्वः खर्च जुयाच्वंगुलिइ छुं भतिचा अःपुइगु विश्वास प्वंकादिल।सेवायात अत्याधुनिक, एकीकृत, सहज, सुरक्षित, भरपर्दो दिगो प्रणालीमैत्री दयेकेगु आज्जु ज्वनाः येँमपां तयारी यानाच्वंगु वय्कःया धापू खः। सेवा प्रारम्भ याइबलय् सनिलंनिसें बहनीसिया ११ ताःईतक बस सञ्चालन जुइ ।

क्वःछिनातःगु रुटया बसस्टपं न्हियान्हिथं २० मिनेटया अन्तरय् बस वइ । बसय् सिसिटिभी क्यामरा जडान जुइ धाःसा सुरक्षाया नितिं नगरप्रहरी दइ।

कृषि लिसें पशुपन्छी विकास व वन लिसें वातावरणमन्त्री गीता चौधरीया निर्देशनकथं येँ महानगरपालिका–११, त्रिपुरेश्वरय् च्वंगु बागमती स्विट्स प्रालिया अनुगमनलिपा उत्पादन लिसें बिक्रीवितरण यायेगु दिकेब्यूगु दु।

वंगु चैत २९ गते छगू सार्वजनिक ज्याझ्वलय् उगु कम्पनीं खाजा उपलब्ध याकूगु खः । खाजाय् नयेमज्यूगु वस्तु लुयावःगु गुनासो वःगुलिं मन्त्री चौधरीं थत्थें खाद्य प्रविधि लिसें गुण नियन्त्रण विभागयात अनुगमन यायेत निर्देशन बियादिल।

उगु निर्देशनकथं विभाग व जिल्ला प्रशासन ज्याकुथि येँया मंकाः टोलीं चैत ३० गते अनुगमन याःबलय् सुचुकुचु लिसें गुणस्तरसम्बन्धी गम्भीर कमजोरी लुयावःगु धयाः चलेजूगु कानुनकथं उत्पादन दिकाः आवश्यक कारबाही प्रक्रिया न्ह्याकूगु खः।

थ्वहे दथुइ, मन्त्री चौधरीं आमनागरिक तय्गु खाद्य स्वच्छताप्रति सरकार गम्भीर जूगु न्ह्यथनादिसें छुं नं गुनासो वःसा कडा कारबाही यायेगु ध्वाथुइकादिल।

धार्मिक, सांस्कृतिक लिसें पुरातात्विक महत्त्व दूगु तोखाय् सपनतीर्थ मेला सुरु जूगु दु।

न्हूगु दँया न्हापांगु दिं जुइगु उगु मेलाय् थौं सुथंनिसें सपनतीर्थ देगलय् दर्शन यायेत वनीपिं भक्तजनत म्वःम्वः जूगु खः। सपनतीर्थ देगलय् दर्शन यानाः अनया पुखुलिइ म्वः ल्हुयाः कुष्ठरोग लनीगु जनविश्वास दु।

सपनतीर्थ देगलय् दर्शन व पुखुलिइ म्वः ल्हुइत स्वनिगःलिसें दय्या थी थी थासं भक्तजन सपनतीर्थ देगलय् थ्यंवःगु खः। सपनतीर्थय् मेलालिसें तोखाय् ऐतिहासिक बिस्काः जात्रा नं सुरु जूगु नेवा गुथिः तोखाया नायः रमेश नापितं जानकारी बियादिल।

सपनतीर्थ मेला थौं छन्हु जक जुइगु जूसां नं तोखाया जात्रा धाःसा ४ गतेतक न्ह्याइ। तोखां जात्राया झ्वलय् कन्हय् वैशाख २ गते बुधबाः तोखान्यंक व वैशाख ३ व ४ गते तोखा नगरपालिका–२ व ३ य् बिदा ब्यूगु खः।

वरिष्ठ पत्रकार धु्रवहरि अधिकारीं नेपाली भाषा, साहित्य, संस्कृति, इतिहास व कलाया उन्नतिइ च्वछायेबहःगु योगदान बियाः वयाच्वंगु ‘मधुपर्क’ लय्पौ लिसेंया पत्रपत्रिका लिसें सफूत राष्ट्रिय समाचार समिति (रासस) यात लःल्हानादीगु दु।

पत्रकारिताया नापनापं नेपाली भाषा, व्याकरण, सुरक्षा व कूटनीतिइ विशेष चिउताः तयादीम्ह नेपाल प्रेस इन्स्टिच्यूटया पूर्वअध्यक्ष अधिकारीपाखें थौं लःल्हाःगु मेमेगु सफू व पत्रपत्रिकाय् रुपरेखा, रचना, गरिमा, परिवारिक डाइजेष्ट, असली आठकाण्ड रामायणलिसेंया सच्छि पाः दु।

गोरखापत्र संस्थान पाखें २०२५ जेठ ३० निसें पिथनाः वयाच्वंगु ‘मधुपर्कं’ साहित्यकारपिं केदारमान व्यथित, सूर्यविक्रम ज्ञवाली, माधवप्रसाद घिमिरे, दैवज्ञराज न्यौपाने, लैनसिंह वाङ्देल, दौलत विक्रम विष्ट, धु्रवचन्द्र गौतम, वैरागी काइला, इन्द्रबहादुर राई, डिल्लीरमण रेग्मी, मन्जु काँचुली, पारिजात, बदरीनाथ भट्टराई, विजय मल्ल, पुस्कर लोहनी, कञ्चन पुडासैनी व भरतराज पन्तपिंत च्वछायेबहःगु थाय् ब्यूगु खः।

साहित्यकारपिं शङ्कर लामिछाने, भीम विराग, भाउपन्थी, हुतराम वैद्य, रत्न दास, अम्विकाप्रसाद अधिकारी, खेमराज केशवशरण, अशेष मल्ल, डा कृष्णचन्द्र मल्ल, भीमनिधि तिवारीलिसेंया श्रष्टाया बाखँ, चिनाखँ, च्वसू, ध्याचू, छद्याः प्याखं, च्वखँ, समालोचना, गजल, लुमन्तिव म्हसिका थें जाःगु विषयवस्तुयात मधुपर्कं २०२० व २०३० या दसकय् बांलागु थाँय् बियाः पिथंगु खनेदु।

सफू लःल्हायेगु झ्वलय् राससया महाप्रबन्धक सन्दिप राईं तसकं पुलांगु मधुपर्क लिसें नेपाःया लोकंह्वाःपिं साहित्यकारया सिर्जना दुथ्यानाच्वंगु सपूm बियादीगुलिं पत्रकार अधिकारीयात आभार प्वंकादिल। वरिष्ठ पत्रकार अधिकारीं रासस सुचं व समाचारया मुहान जूगुलिं संस्थायात बियागु सुचं सामाग्री तसकं ज्या वइगु विश्वास प्वंकादिल।