Display Style:
Column Style
येँ ८३, यलय् ३०म्ह नाप स्वनिगलय् ११९ म्हेसित संक्रमण
शोभा श्रेष्ठ | गुंलागा १० ११४०,साउन ३० शुक्रवाः
थौं शुक्रवाः स्वनिगलय् ११९म्हेसित कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयया कथं येँ जक ८३म्हेसित कोरोना संक्रमण पुष्टि जूगु दु ।
अथेहे यलय् ३०म्ह व ख्वपय् खुम्हेसित कोरोना संक्रमण पुष्टि जूगु दु ।
संक्रमितपि गन च्वपि धका धाःसा मन्त्रालयं धाःगु मदु । थौ देय् यक ५९४ म्हेसित कोरोना संक्रमण पुष्टि दु ।
रौतहटय् १७म्हेसित कोरोना संक्रमण पुष्टि
लहनान्युज | गुंलागा १० ११४०,साउन ३० शुक्रवाः
रौतहटय् बिहीवाः गौर नगरपालिकाय् २४म्हेसित कोरोना संक्रमण पुष्टि जूगु खः ।
गौर नगरपालिकाय् कर्मचारी, पत्रकार व सर्वसाधारण याना १७म्हेसित, परोहा नगरपालिकाय् प्यम्ह व गढीमाई, देवाही गोनाही व चन्द्रपुर नगरपालिकाय् छम्ह छम्हेसित कोरोना संक्रमण पुष्टि जूगु धका जिल्ला जनस्वास्थ्य कार्यालयं धाःगु दु ।
गौर नगरपालिका वडा नं ५ य् छगु हे परिवारय् न्याम्हेसित, च्याम्ह कर्मचारी व छम्ह पत्रकार नाप १७ म्हेसित संक्रमण पुष्टि जूगु दु । संक्रमितपि नाप स्वापू दुपि मालेगु सुरु जुया च्वंगु दु ।
त्रिबिया मेपि प्यम्ह स्वास्थ्यकःमियात कोरोना संक्रमण पुष्टि
लहनान्युज | गुंलागा १० ११४०,साउन ३० शुक्रवाः
महाराजगञ्जया त्रिवि शिक्षण अस्पतालय् प्यम्हेसित स्वास्थ्यकःमिपिन्त कोरोना संक्रमण पुष्टि जूगु दु ।
बुधवाः इमर्जेन्सीइ ज्या याइपि खुम्ह स्वास्थ्यकःमि पिन्त कोरोना खने दयेवः उपि नाप प्रत्यक्ष स्वापू दुपिनिगु स्वाब संकलन याना परीक्षण याःगु दु । उकि मध्ये प्यम्हेसिगु रिपोर्ट पोजेटिभ वःगु दु ।
आः पिहा वःपि संक्रमित स्वास्थ्यकःमि इमरजेन्सी मखसे मेमेगु वार्डय् च्वपिन्त जूगु दु । थ्व नाप त्रिवि शिक्षण अस्पतालमा संक्रमित स्वास्थ्यकःमिपिं २२ म्ह थ्यःगु दु ।
इमरजेन्सी विभागय् जक का सच्छि स्वया अप्व स्वास्थ्यकःमि पिनिगु स्वाब संकलन याये धुकुगु दु ।
उमिगु रिपोर्ट शुक्रवाः वा शनिवाः वइ धका धाःगु दु । उपि दक्को थौंकन्ह्य होम क्वारेन्टाइनय् च्वना च्वंगु दु ।
चितवनया भरतपुर अस्पताल सिल यात
लहनान्युज | गुंलागा १० ११४०,साउन ३० शुक्रवाः
चितवनया भरतपुर अस्पतालय् स्वाब संकलन याःगुलि १३म्ह व अस्पतालय् आकस्मिक कक्षय् ज्या याइम्ह छम्ह नर्सयात कोरोना संक्रमण पुष्टि जूगु दु । अस्पतालय् च्वपिन्त कोरोना संक्रमण पुष्टि जुइवं आः अन आकस्मिक कक्ष सिल याःगु दु ।
विहीवाः भरतपुर कोभिड ल्याबय् याःगु परीक्षणय् संक्रमण पुष्टि जूपि १६ म्ह मध्ये १३ म्हेसित भरतपुर अस्पतालमा वासः याकेत वःगु खः । थ्व नाप कोरोना समुदायलय् न्हापागु तहय् थ्यःगु निष्कर्ष स्वास्थ्यकःमि पिकाःगु दु ।
संक्रमण पुष्टि जूपि भरतपुर महानगरपालिका वडा नं. २, ४ व ७ या च्याम्ह मिजंपि खः । अथेहे राप्ती नगरपालिका वडा नं. ९ या छम्ह मिसा, खैरहनी नगरपालिका ८ या छम्ह मिजं व रत्ननगर नगरपालिका १३ या छम्ह मिजंयात संक्रमित जूगु खः ।
भरतपुर अस्पतालय् वासः यायेत वम्ह मकवानपुरया २२ दँया छम्ह मिसा, नवलपुरया २८ दँया छम्ह मिजं व सर्लाहीया ४५ दँ दुम्ह छम्ह मिजंयात संक्रमण खने दुगु खः । प्यम्ह संक्रमितपि अस्पतालय् भर्ना जूया च्वंगु दु सा ल्यः दुपि अस्पतालय् वासः यायेत व स्वाब विइगु लागि वःपि खः ।
विहीवा ८ बजे निसे मेगु सूचं पिहा मवःतलेया लागि अस्पताल सिल याःगु धका धाःगु दु ।
बुटवलय् छवाःया लागि लकडाउन घोषणा
लहनान्युज | गुंलागा १० ११४०,साउन ३० शुक्रवाः
बुटवलय् हाकन लकडाउन सुरु याःगु दु । वःगु चान्ह्यःया ११ः४५ निसे लकडाउन सुरु याना भदौ ५ गते चान्ह्य १२ बजे तकया लागि लकडाउन जूगु दु धका बुटवल उपमहानगरपालिकां
धाःगु दु ।
वःगु इलय् समुदाय स्तरय् कोरोना सङ्क्रमण खने दयेवः थप जोखिम जूया वःगु धका छवाःया लागि लकडाउन यानागु धका उपमहानगरं धाःगु दु ।
लकडाउन लिपा अत्यावश्यक बाहेक दक्को पसः व व्यवसाय बन्द जूगु खः । खाद्यान्न पसः सुथया ७ बजे निसे ११ बजे तक जक चायेके दइ ।
अथेहे सार्वजनिक व निजी गाडी चले याये दइ मखू । तरकारीया गाडी परिचयपत्र क्यना चले याये दइ ।
बैंक तथा वित्तीय संस्थां ५० प्रतिशत कर्मचारी तया सुथया १० बजे निसे न्हिनया २ बजे तक चायेके दइ ।
