दैलेखया दुल्लु नगरपालिका–१३ य् नेकपा एमाले विजयी जूगु दु। कांग्रेसया उम्मेदवारयात ३ मतं बूका नेकपा एमालेया उम्मेदवार निर्वाचित जूगु खः।

दुल्लु–१३ य् एमालेया उम्मेदवार लाल बहादुर शाहीं ५ सय ७४ मत हःगु खः। शाहीया निकटतम प्रतिस्पर्धी नेपाली कांग्रेसया रेशमबहादुर शाही न ५७१ मत हःगु खः।

अथेहे, नेकपा माओवादी केन्द्रया ढकेन्द्र बहादुर शाही न २७८ हःगु खःसा राष्ट्रिय स्वतन्त्र पार्टीया रामबहादुर शाही न ५३ मत हःगु खः।

हलियकं एचआईभी सङ्क्रमण म्हो जुयाच्वंगु इलय् खुगु देशय् अप्पोया वंगु दु।

सन् २०१० निसे २०२३ या दथुइ अफगानिस्तान, इजिप्ट, फिजी, फिलिपिन्स, पपुआ न्यूगिनी व साउदी अरबमास एचआईभी सङ्क्रमण १०० प्रतिशत स्वया अप्पो एचआईभी व एड्ससम्बन्धी संयुक्त राष्ट्रसङ्घीय ज्याझ्वः यूएनएड्सं धाःगु दु।

सन् २०१० थुखे हलिमयय् एचआईभीया न्हुपि सङ्क्रमण जूपि मनूतयेगु ल्याः ३९ प्रतिशतं म्हो जूगु व सीपि न बच्छि मल्यका म्हो जूगु दु।

उगु खुगु देशय् धाःसा संक्रमण व सीपि न अप्पोगु दु। यूएनएड्सया कथं आः हलिमयय् झन्डै ४ करोड मनूत एड्स जुयाच्वंगु दु। एचआईभी सङ्क्रमण मध्ये बच्छि दक्षिणी व पूर्वी अफ्रिकाय् दु।

जनकपुरय् सीताराम ब्याहा पञ्चमी महोत्सव थौनिसे विधिवत शुरु जूगु दु।

त्रेता युगय् भगवान राम व आदर्श नारी सीता दथुइ जूगु ब्याहायात लुमका दँय् दँसं ब्याहा पञ्चमी महोत्सव हनिइगु याइ। सीताराम ब्याहा पञ्चमी महोत्सवया न्हापागु दिं थौ नगरदर्शन ज्याझ्वः दु।

कन्ह्यः फूलबारी लीला, मङ्गलवाः धनुष यज्ञ, बुधवाः तीलकोत्सव, मङ्सिर २० गते मटकोर व मङ्सिर २१ गते रामसीता स्वयंवर नाप ब्याहाया ज्याझ्वः दु।

स्थानीय तह उपनिर्वाचनया मतदान सुरु जुगु दु। मतदान केन्द्रया जःखः नेपाली सेनां गस्ती यानाच्वंगु दु।

थौ येँया किपू नगरपालिकाया मेयर नाप वडा नम्बर १ व ४ या वडा अध्यक्ष व येँ महानगरपालिकाया वडा नं १६ अध्यक्ष पदय् उपनिर्वाचन जुयाच्वंगु खः। सुथया ७  बजे निसे सुरु जुइगु मतदान सनिलया ५ बजेतक जुइ धका निर्वाचन आयोगं धाःगु दु।

सुरक्षाया न्हापागु घेराय् नेपाल प्रहरीयात व वयालिपा सशस्त्र प्रहरी नाप दकलय् लिपा नेपाली सेना सुरक्षा बियाच्वंगु दु।

थौ नगरपालिका प्रमुख छम्ह, उपप्रमुख छम्ह, गाउँपालिका अध्यक्ष निम्ह, उपाध्यक्ष प्यम्ह व वडाध्यक्ष ३३ याना ४१ पदय् उपनिर्वाचन जुइत्यःगु खः। उपनिर्वाचनय् थीथी २० राजनीतिक दल व स्वतन्त्र यान ३७६ म्ह उम्मेदवारपिन्स प्रतिस्पर्धा यानाच्वंगु खः।

राष्ट्रपति रामचन्द्र पौडेल व प्रधानमन्त्री केपी शर्मा ओली दथुइ नापलायेगु ज्या जूगु दु।

राष्ट्रपति निवासय् नापलायेगु झ्वलय् चीन भ्रमणबारे प्रधानमन्त्री ओलीं सहलह यायेगु ज्या जूगु दु धका प्रधानमन्त्रीया सचिवालयं धाःगु दु। राष्ट्रपति पौडेलं न प्रधानमन्त्री ओलीयात भ्रमण ताः लायेमाः धका भिंतुना ब्यूगु धका प्रमया सचिवालयं धाःगु दु।

नापलायेगु झ्वलय् परराष्ट्रमन्त्री आरजु राणा देउवा न राष्ट्रपति पौडेलया थाय् वंगु खः। प्रधानमन्त्री ओली थ्व हे वइगु सोमवाः चीनया औपचारिक भ्रमणय् वनेत्यःगु खः।