येँ महानगरपालिकां सितिकं भिडियो एक्सरे सेवा न्ह्याकीगु जूगु दु। महानरपालिकां स्वास्थ्य बीमा ज्याझ्वः न्ह्यानाच्वंगु वडाया स्वास्थ्य प्रवर्धन केन्द्रपाखें नागरिकयात थूगु सेवा न्ह्याकेत्यंगु खः।

स्वास्थ्य विभागया प्रमुख दीपक केसीया कथं वडा नं १२, १६ व ३० पाखें थूगु सेवा न्ह्याकेत्यंगु खः। आइतबाः व सोमबाः वडा नं १२, १९ व १४ यापिंत वडा नं १२ य्, मंगलबाः व बुधबाः वडा नं १६, २६ व २७ यापिंत वडा नं २७ य् अथेहे बिहीबाः व शुक्रबाः वडा नं १० व ३० यापिंत वडा नं ३० य् च्वंगु स्वास्थ्य प्रवर्धन केन्द्रय् थूगु सेवा बिइत्यंगु दु।

स्वास्थ्य बीमा ज्याझ्वः न्ह्यानाच्वंगु फुक्क वडाय् भिडियो एक्सरे मेसिन स्वायेधुंकूगु दु। सेवाग्राहीया चाप अप्वःया वंलिसे सेवा तब्याकाः यंकेगु वय्कलं धयादिल। कामपां वडा नं ८ या रामघाट प्राथमिक स्वास्थ्य केन्द्र, वडा नं १४ बल्खु, वडा नं १९ कंगः, वडा नं २६ लैनचौर अथेहे वडा नं ३० ज्ञानेश्वर, वडा नं १६ बालाजु, वडा नं २७ महाबू, वडा नं १२ टेकु व वडा नं ७ चाबहिया स्वास्थ्य प्रवर्धन केन्द्रयात न्हापांगु स्वापूतय्गु थाय् कथं क्वछ्यूगु दु।

पेट्रोलियम पदार्थया भाः थहावंगु दु। नेपाल आयल निगमया कथं थौ चान्ह्यः १२ बजेनिसे लागू जुइगु कथं लिटर पेट्रोलया भाः छतका थहावंगु दु।

अथेह, हवाई इन्धनया भाः न थहावंगु दु धका निगमं छगू विज्ञप्ति पिकया जानकारी ब्यूगु दु।

आन्तरिकपाखे नितका व अन्तर्राष्ट्रियपाखे येँया निति छगु किलोलिटरय् १५ डलरं भाः थहावंगु दु धका निगमं धाःगु दु।

हिक्मतकुमार कार्कीं राष्ट्रिय समाचार समिति (रासस) यात भिंकां यंकेमाःगुलिइ बः बियादीगु दु।

राष्ट्रिय समाचार समिति (रासस)या कार्यकारी अध्यक्ष धर्मेन्द्र झायात थौं सुथय् नापलानाः वय्कलं देय् दुने व पिनेया बुखँ मदिक्क बिया वयाच्वंगु देय्या छगू जक आधिकारिक संचार माध्यम राससयात बांलाकेमाःगुलिइ बः बियादीगु खः।

राससं थ्व संस्था पलिस्था जूगु इलं निसें हे देय् व जनताया पक्षय् ज्या यानाः वयाच्वंगुलिं मुख्यमन्त्री कार्कीं उकियात च्वछानादिल। मुख्यमन्त्री कार्कीं धयादिल, “राससं लिपांगु इलय् मातृभाषा समाचार सेवा चकंकूगु दु, राज्यं याःगु ज्यायात च्वयेकेगु याःगु दु, थ्व तसकं च्वछायेबहःजू, थजाःगु रचनात्मक ज्याखँयात राससं मदिक्क न्ह्याकेमाः।”

राससनापं मंकाःज्या यायेत प्रदेश सरकार तयार दूगु खँ धयादिसें वय्कलं राससयात फक्व ग्वहालि यायेगु प्रतिबद्धता बियादिल। कार्यकारी अध्यक्ष झां राससया उत्पादनबारे कनादिसें प्रदेश सरकारलिसे याये फइगु मंकाः ज्या यायेगु सम्बन्धय् खँ धयादीगु खः। (रासस)

परराष्ट्रमन्त्री डा आरजु राणा देउवा थौं देय् लिहाँ वःगु दु। चिनियाँ विदेशमन्त्री वाङ यीया ब्वनाय् चीनया औपचारिक भ्रमण यानादीम्ह मन्त्री डा राणा चीनया छन्दुं थौं सुथय् नेपाः लिहाँ वःगु दु धका वय्कःया प्रेस सल्लाहकार एकराज पाठकं धाःगु दु।

नेपाःया प्रतिनिधिमण्डलया नेतृत्व यानाः बिहीबाः चीनया सिचुआन प्रान्तया छन्दु वनादीम्ह वय्कलं शुक्रबाः सनिलय् चिनियाँ विदेशमन्त्रीलिसे छेन्दुइ नापलानादीगु खः। उगु झ्वलय् वय्कःपिं दथुइ नेपाः व चीनया स्वापू व निगूपक्षया हितया थी थी खँनापं प्रधानमन्त्री केपी शर्मा ओलीं यानादीत्यंगु चीन भ्रमणया तयारीया बिषयया खँल्हाबल्हा जूगु खः।

प्रधानमन्त्री ओली वइगु सोमबाः चीनया औपचारिक भ्रमणय् झायादीत्यंगु दु। परराष्ट्रमन्त्री डा राणा प्रधानमन्त्री ओलीनापं नं चीन भ्रमणय् ब्वति कायादिइ। (रासस) 

लुम्बिनी बौद्ध विश्वविद्यालयया स्वक्वःगु दीक्षान्त समारोहय् जूगु दु।उगु दीक्षान्त समारोहय् निसः व ८९म्ह ब्वनामित दीक्षित जूगु खः।

विद्यावारिधिनापं थी थी सङ्कायया ब्वनामिपिन्त छगू ज्याझ्वः दथुइ प्रधानमन्त्री नापं विश्वविद्यालयया कुलपति केपी शर्मा ओलीपाखें दीक्षित याःगु खः।

उगु ज्याझ्वलय् प्रधानमन्त्री ओलीं धम्मावती गुरुमायात मानार्थ विद्यावारिधि लःल्हाःनादिगु खः। ९१ दँया गुरुमा नं बौद्ध धर्म, दर्शन व शिक्षाया विकासय् बियादिइगु ज्वःमदूगु योगदानया सम्मानयासें १७ क्वःगु विश्वविद्यालयसभां गुरुमायात व सम्मान देछायेगु क्वछ्यूगु खः।