Display Style:
Column Style
भिक्षु ज्ञाणपूर्णिकया शंखमुलय् अन्त्येष्टि
नृपेन्द्रलाल श्रेष्ठ | दिल्लाथ्व पुन्ही ११४०,असार २१ आइतवाः
मदुम्ह संघनायक भिक्षु ञाणपूर्णिक महास्थविरया वंगु आइतवाः शंखमुलय् अन्त्येष्टि याःगु दु ।
भिक्षु, भिक्षुणी, थीथी बौद्ध संघसंस्थाया प्रतिनिधिपिं लिसें सलंसः उपासक उपासिकापिनिगु दथुइ मदुम्ह भिक्षुया दाहसंस्कार याःगु खः । बौद्ध परम्पराकथं मरणानुस्मृति (मृत्यु स्मरण बोध याकीगु श्लोक) पाठ याय्धुंकाः स्थविरवाद बुद्धधर्मया परम्पराकथं दाहसंस्कार याःगु खः ।
कार्यवाहक संघनायक भिक्षु बोधिसेन महास्थविर, अखिल नेपाल भिक्षु महासंघया नायः भिक्षु मैत्री महास्थविर व भिक्षुणीपाखें ञाणवती गुरुमां नं मदुम्ह भिक्षुयात मि तयाबिज्याःगु खः । व लिपा हे सशस्त्र प्रहरीया छगू टुकडीं सलामी अर्पण याःगु खः । थ्व स्वयां न्ह्यः संघीय सांसद कृष्णगोपाल श्रेष्ठं सरकारया प्रतिनिधिकथिं भिक्षुया सीम्हय् राष्ट्रिय ध्वाँय् फाय्कादीगु खः ।
भिक्षु मदुगुलिं अपूरणीय क्षति
भिक्षु ञाणपूर्णिक महास्थविर मदुगुलिं बुद्धधर्म व नेपाःया छम्ह बौद्धिक व आध्यात्मिक ब्यक्तित्व तंकेमाःगु धयादिसें राष्ट्रपति विद्यादेवी भण्डारी, प्रधानमन्त्री केपी शर्मा ओलीं शोक प्वंकादिल । भिक्षु मदुगुलिं बुद्धधर्म व नेपाःया शान्ति स्थापनाय् ज्वःमदुगु क्षति जूगु शोक बक्तब्यय् न्ह्थनातःगु दु । वसपोल मदुगुलिं दुःख प्वंकादिसें म्यान्मार, थाइल्याण्ड, श्रीलंका सरकार व अनया संघसंस्थां शोक वक्तब्य छ्वया हःगु भिक्षु निग्रोधं जानकारी बियाबिज्यात ।
थ्व हे दथुइ अखिल नेपाल भिक्षु महासंघं छगू विज्ञप्ती पिथंसें नेपाःया स्थविरवाद बुद्धधर्मया पुनःजागरणय् आधुनिक शिक्षा प्राप्त याना बिज्याःम्ह भिक्षु ञाणपूर्णिक महास्थविर मदुगुलिं बौद्ध साहित्यया अनुवाद, अभिधम्मया ब्याख्या व बुद्धधर्मया विकासय् तःधंगु धक्का लाःगु न्ह्यथंगु दु । महासंघया महासचिव भिक्ष्ुा कौण्डन्य महास्थविरं पिथना बिज्याःगु उगु विज्ञप्तीइ वसपोलया त्याग, लगनशीलतापाखें सय्काः बुद्धधर्मया विकासया नितिं थप दायित्व वःगु नं न्ह्यथनातःगु दु ।
भारतं वःगु २१ दिनय् कोरोना संक्रमण छम्ह मन्त
लहनान्युज | दिल्लाथ्व पुन्ही ११४०,असार २१ आइतवाः
कोरोना भाइरस (कोभिड(१९) या संक्रमणं बाग्लुङय् छम्ह मिजंम्ह सीगु दु । उम्ह मनू वःगु असार एक गते भारतं नेपाल वम्ह खः । उम्ह मनू नेपालय् वःगु २१ दिनय् मदुगु खः ।
परिवार नाप मजदुरी यायेगु लागि भारत वम्ह उम्ह मनू क्षयरोगया वासः याना च्वम्ह खः । तर २९दँ दुम्ह भातया वासः याकेगु लागि खर्च जुटे याये मफया असार १ गते लिहा वःगु खः ।
भारतं लिहा वये धुका सुरक्षाया लागि परिवारया सदस्यपिन्स वयात ब्यागल च्वनेगु व्यवस्था याना वयाच्वंगु खः ।
तर स्थानीयपिन्स भारत वःगु धासे जबरजस्ती क्वारेन्टिनय् च्वनेत दबाब बिइवः क्वारेन्टिनय् वनेत बाध्य जूगु खः ।
स्थानीयपिन्स खबर याये वः ढोरपाटन नगरपालिकां असार १२ गते खुङ्गाया छोरेगाउँ माविइ क्वारेन्टिनय् हःगु खः ।
थप २९३म्हेसि कोरोना भाइरसया संक्रमण पुष्टि
लहनान्युज | दिल्लाथ्व पुन्ही ११४०,असार २१ आइतवाः
वःगु २४ घण्टाय् थप २९३म्हेसि त कोरोना भाइरस (कोभिड–१९) या संक्रमण पुष्टि जूगु दु ।
थ्व नाप संक्रमितपिनिगु ल्याः १५७८४ म्ह थ्यःगु दु । उकि मध्ये ३५म्ह सीइ धुकुग दु सा ६५४७म्ह डिस्चार्ज जुइ धुकुगु दु ।
स्वास्थ्य तथा जनसंख्या मन्त्रालयया कथं थौं दकलय् अप्व कञ्चनपुरय् ३२म्हसित संक्रमण जूगु दु । अथेहे रौतहटय् २९म्ह, येँं, धनुषा व कैलालीइ २७, २७ म्ह, बाजुराय् २०म्ह, सल्यान १५म्ह, सुर्खेत व महोत्तरीइ १२,१२म्ह व प्युठानय् ११म्हेसित खनेदुगु दु ।
डडेलधुराय् गुम्ह, सर्लाही व दैलेखय् न्ह्यम्ह न्ह्यम्ह, बर्दियाय् न्याम्ह, रुकुम पश्चिम, अर्घाखाँची व् बैतडीइ प्यम्ह प्यम्ह, डोटीइ स्वम्ह, ताप्लेजुङ, झापा, मोरङ, कपिलवस्तु, रुपन्देही तनहुँ, कास्की, नुवाकोट, रामेछाप, सिन्धुपाल्चोक व यलय् निम्ह निम्हेसित संक्रमण पुष्टि जूगु दु ।
अथेतु, पाँचथर, सिराहा, पर्सा, मकवानपुर, बाँके, ख्वप, सल्यान, इलाम, म्याग्दी, धादिङ, बाग्लुङ, लजजुङ, गोरखा, नवलपरासी, स्याङ्जा व अछामय् छम्ह छम्हेसित संक्रमित जूगु दु धका मन्त्रालयं थांैं धाःगु दु ।
थौं येँ जक २७म्हेसित कोरोना संक्रमण पुष्टि
लहनान्युज | दिल्लाथ्व पुन्ही ११४०,असार २१ आइतवाः
थौं जक स्वनिगलय् ३०म्हेसित कोरोना संक्रमण पुष्टि जूगु दु ।
स्वास्थ्य तथा जनसंख्या मन्त्रालयं थौं बिःगु जानकारी कथं येँ २७ म्ह, यलय् निम्ह व ख्वपय् छम्हेसित कोरोना संक्रमण खने दुग धका धाःगु दु ।
येँ संक्रमित जुपि मध्ये राष्ट्रिय जनस्वास्थ्य प्रयोगशालाय् याःगु परीक्षणय् न्याम्ह, वीर अस्पतालय् छम्ह व त्रिवि शिक्षण अस्पतालय् २१म्हेसिमके खने दुगु दु ।
शिक्षण अस्पताल याःगु परिक्षणय् ख्वयाम्ह छम्ह व यलयाम्ह निम्हेसित कोरोना संक्रमण खनेदुगु धका मन्त्रालयं धाःगु दु ।
जेट मेसिन सञ्चालन याःगु न्हापागु वडा
नृपेन्द्रलाल श्रेष्ठ | दिल्लाथ्व पुन्ही ११४०,असार २१ आइतवाः
यल महानगरपालिका- ३ वडा ढः सफा यायेगु उच्च प्रविधियुक्त जेट मेसिन सञ्चालनय् हःगु देय् या हे न्हापागु वडा जुगु दु ।
थुग वडां चालू आर्थिक वर्षया बजेटपाखे ७७ लाख पुला उगु जेट मेसिन न्यानःगु धका वडा नं ३ या वडा अध्यक्ष श्रीगोपाल महर्जन धयादिगु दु ।
जेट मेशिन बहुप्रयोजनया लागि उपयोगी जु । जेट मेसिनं २० मिटर क्वय् तक ढः सफा याये फइ, सफा लः साला तयेत, ढः दुने बोरा, प्लास्टिक थाना च्वंगु लिकाये फइ । उगु जेट मेशिनं जाम जूगु ढः या लः तयेगु व सफा लखं हाई प्रेसरया जेट मेशिन मार्फत सफा याइ ।
‘देय् यकं जेट मेसिन सञ्चालन याःगु थ्व हे न्हापागु वडा जुइफु । महानगरपालिकां जक जेट मेसिन न्याना च्वंगु थन वडा हे मेशिन सञ्चालन याःगु दु धका धयादिगु खः ।’ उगु मेशिनया उलेज्या यानादिसे यल क्षेत्र नं ३ या सांसद पम्फा भुसालं थुगु ज्या मेमेगु वडायात उच्चत्तम प्रविधियुक्त मेसिनपाखे ज्या यायेगु प्रोत्साहन याइगु धका भलसा कयादिगु खः ।
वडा हे उच्चत्तम प्रविधियुक्त मेसिन सञ्चालन यागुलि लय्तादिसे महानगरपालिकाया मेयर चिरिबाबु महर्जनं स्मार्ट प्रविधिले हे जनतायात गुणस्तरीय सेवा बिइगु धका थःगु खँ तयादिल ।
थ्व स्वया न्ह्यः शव बाहन सञ्चालन यायेत वडां आः ज्येष्ठ नागरिकपिनिगु लागि निशुल्क विधुतीय गाडी सञ्चालनय् हयेगु तयारी याना च्वंगु खः ।
