Display Style:
Column Style
येँया तीनकुनेय् अत्याधुनिक बुद्धपार्क दयेकीगु, योजना थज्याःगु दु
नृपेन्द्रलाल श्रेष्ठ | दिल्लाथ्व दशमी ११४०
येँ महानगरपालिकां वडा ३२ स्थित तीनकुनेय् अत्याधुनिक बुद्धपार्क दयेकीगु जूगु दु । आर्थिक दँ २०७७/०७८ या नीति तथा कार्यक्रमय् ह बुद्धपार्क दयेकेगु योजना दुथ्याकूगु येँ महानगरपालिकां पार्क दयेकेज्यायात तच्वःगु गतिइ न्ह्यःने यंकेगु जानकारी ब्यूगु दु ।
येँ महानगरपालिकाया मेयर विद्यासुन्दर शाक्यं नेपाल सरकारं २०३२ साल जेठ १४ य् जग्गाप्राप्ति ऐन कथं तीनकुनेया बुँ जग्गा अधिग्रहण यासांनिसें हे तीनकुनेये पार्क बनाउने योजना दयेकूगु धासें जग्गाया मुआब्जा विवाद ज्यंके मफुबलय् योजना अलपत्र लाःगु धयादिल ।
थुगुसी दक्वं विवाद ज्यंकाः योजना न्ह्यःने यंकेगु तयारीइ थःपिं जानागु प्रमुख शाक्यया धापू खः ।
प्रमुख शाक्यं तीनकुनेया मुआब्जा विवाद ज्यंकेत येँ महानगरपपालिकां प्रारम्भिक अधिकारी हे क्वःछ्यूगु व प्रतिवेदन तकं सम्वन्धित निकायस छ्वयेधुंकूगु जानकारी बियादिल ।
पार्कया डिजाइन तयारी अवस्थाय् दुगु व समस्या ज्यनाकथं ज्या तच्वःगु गति लिसें न्ह्याःवनीगु शाक्यया धापू खः ।
जग्गा अधिग्रहण यायेमाःगु व मुआब्जा इने ल्यं दनिगु क्षेत्रफलया लागिं माःगु धेबा व्यवस्थापन यायेत संघीय सरकार नं सकारात्मक दुगुलिं थुगुसी मुआब्जा विवाद ज्यनाः पार्क दयेकेज्या न्ह्याःवनीगुलिइ महानगरपालिका विश्वस्त खनेदु ।
छुं जग्गाधनीं चलनचल्तीया भावय् मुआब्जा माग यायेधुंकाः विवाद आःतक्क ज्यनेमफूगु खः । यक्व हे जग्गाधनीं न्हापा हे मुआब्जा कायेधुंकूगु दु ।
येँमपा सम्पदा तथा पर्यटन विभाग प्रमुख अर्चना शाक्यं करीब ५० रोपनी स्वयां आपाः क्षेत्रफलया तीनकुनेय् बुद्धपार्क दयेकेत डिजाइन तयार जुइधुंकूगु जानकारी बियादिल ।
‘हिन्दु व बौद्ध धर्मया फ्युजन यानाः दयेकीगु पार्कया स्वकू कुनय् ब्रह्मा, विष्णु व महेश्वरया प्रतीक लिसें ‘बुद्ध’, ‘धर्म’ व ‘संघ’यात लिधंसा नालाः डिजाइन दयेकागु दु,’ विभाग प्रमुख शाक्यं जानकारी बियादिल ।
शाक्यया कथं अण्डरग्राउन्ड पार्किङ, न्हापांगु तलाय् क्युरिओया पसः, सार्वजनिक चःबि, प्रदर्शनी कक्षत दइ । पार्कय् अपाङ्गमैत्री, मस्त म्हितेगु लिसें ज्याथःपिं नागरिकया आराम यायेगु थाय्, साइकल ट्याक लिसें च्वनीगु कथं डिजाइन तयार जूगु दु ।
डिजाइन कथं च्वयया तलाय् २सः क्षमताया ध्यानकेन्द्र दइ ।
पार्कया डिजाइन कथं तीनकुनेया दथुइ १३ मिटर जाः व ९६ मिटर व्यासया गुम्बज आकारया संरचना दइसा उगु गुम्बजय् करीब १६ मिटर तःधिकःगु बुद्धया मुर्ति नं च्वनी ।
मुर्तिबाहेक करीब छगू अर्बत्याया लगानीइ दयेकीगु बुद्धपार्कय् बुद्धमुर्ति दइगु थासय् तक्क थ्यंकेत १२ प्रवेशद्वार दइ ।
गण्डकी प्रदेश १७म्ह कोरोना सङ्क्रमण पुष्टि
लहनान्युज | दिल्लाथ्व दशमी ११४०, असार १६ मंगलवाः
गण्डकीया प्यगू जिल्लाय् न्हूपि सङ्क्रमित थपे जूगु दु ।
थौं थपे जूपि कास्कीइ च्याम्ह, तनहुँ न्याम्ह, लमजुङय् स्वम्ह व स्याङ्जाय् छम्हेसि थपे जूगु दु ।
कास्कीइ थपे जूपि पोखरा महानगरपालिकाय् च्वपि खः । सङ्क्रमितपिन्त आईसोलेसनय् यंकेगु तयारी याना च्वनागु दु धका गण्डकी प्रदेशया स्वास्थ्य निर्देशक नाप प्रदेश कोरोना नियन्त्रण व रोकथाम कार्यक्रमया प्रवक्ता बिनोदबिन्दु शर्मां जानकारी बियादिगु दु ।
गण्डकी प्रदेशया कोरोना सङक्रमिपि ९६६ मध्ये २१४ वासः याका छेँय् लिहा वने धुकुगु दु ।
कर्णालीइ डिस्चार्ज जूपि १००१म्ह थ्यन
लहनान्युज | दिल्लाथ्व नवमी ११४०, असार १५ सोमवाः
कर्णालीइ डिस्चार्ज जूपि कोरोना संक्रमित (कोभिड(१९) पिनिगु ल्याः द्धः स्वया अप्वःगु दु । आःतक प्रदेशय् द्धःछिम्ह कोरोना संक्रमित डिस्चार्ज जूगु धका कर्णालीया सामाजिक विकास मन्त्रालयया स्वास्थ्य सेवा महाशाखां धाःगु दु ।
महाशाखाया कथं वःगु २४ घण्टाया दुने कर्णालीया थीथी आइसोलेसनपाखे ४५म्ह डिस्चार्ज जूगु दु ।
दैलेखया दैलेख अस्पताल नारायण आइसोलेसनपाखे छम्ह मिसा नाप १७म्ह, सुर्खेतया पञ्चपुरी नगरपालिका सालकोट आइसोलेसनपाखे निम्ह मिसा १४म्ह, प्रदेश अस्पताल सुर्खेतय् छम्ह
मिसा ना खुम्ह, दैलेख गुराँस गाउँपालिकाया आइसोलेसनं खुम्ह मिजंपि व सुर्खेतया लेकबेसीे आइसोलेसनं निम्ह मिजंपि डिस्चार्ज जूगु दु ।
अथेहे, सोमवाः कर्णालीइ छम्ह न्हुम्ह संक्रमित थपे जूगु दु । जुम्लाया कर्णाली स्वास्थ्य विज्ञान प्रतिष्ठान जूगु परीक्षणय् रुकुम पश्चिम छम्ह मिजंम्हेसित कोरोना पुष्टि जूगु दु ।
वःगु २४ घण्टाय् छम्ह थपे जुइवं अन संक्रमितपि १४२७म्ह थ्यःगु दु । उकि मध्ये खुम्ह सीगु दु । उकि १००१ म्ह डिस्चार्ज जूगु दु । आः ४२०म्ह आइसोलेसनय् दु ।
४७६म्हेसित कोरोना संक्रमण पुष्टि
लहनान्युज | दिल्लाथ्व नवमी ११४०, असार १५ सोमवाः
वःगु २४ घण्टाया दुने स्वनिगलय् च्याम्ह नाप थप ४७६म्हेसित कोरोना भाइरस (कोभिड–१९) या संक्रमण पुष्टि जूगु दु ।
देय् यंक २२गू प्रयोगशालाय् ७७९१ म्हसिगु नमुना परीक्षण याःगु खः । थ्व नाप आः संक्रमितपि १३२४८म्ह थ्यःगु दु ।
उकि मध्ये ३१३४ म्ह वासः याका छेँय् लिहा वने धुकुगु दु । अथेहे थौ छम्ह सीगु दु । रौतहट छेँय् दुम्ह ३०दँ दुम्ह मिजंम्ह थौं यलया स्टार अस्पतालय् सीगु खः ।
थ्व नाप नेपालय् कोरोना संक्रमणपि सीपि आः २९म्ह थ्यःगु दु ।
थौं मन्त्रालयं बिःगु जानकारी कथं दकलय् अप्व संक्रमितपि डोटीइ ९६म्ह जूगु दु । बाजुराय् ६४म्ह, दाङय् ५८म्ह, अर्घाखाँचीइ ३८म्ह, बाजुराय् ३२म्ह, कैलालीइ ३०म्ह, पाल्पाय् २६म्ह,
गुल्मीइ २०म्ह, रौतहटय् १८म्ह, सप्तरीइ १५म्ह, बाग्लुङय् १४म्ह व पर्वतय् १३म्हेसित कोरोना संक्रमण पुष्टि जूगु दु ।
अथेतु, तनहुँ गुम्ह, स्याङ्जाय् च्याम्ह, धनुषाय् खुम्ह, गोरखा, प्युठान व रुपन्देहीइ न्याम्ह न्याम्ह, प्युठान, चितवन व महोत्तरीइ प्यम्ह प्यम्ह, कपिलवस्तु, धादिङ, डोल्पा व कालीकोटय् निम्ह निम्हेसित संक्रमण पुष्टि जूगु दु ।
अथेतु, पर्सा, मोरङ, धनकुटा, खोटाङ, काभ्रे, मकवानपुर, रोल्पा, बारा व रुकुम पश्चिमय् छम्ह छम्हेसि न जूगु दु ।
येँ खुम्ह यल व ख्वपय् याना च्याम्हेसित कोरोना संक्रमण
लहनान्युज | दिल्लाथ्व नवमी ११४०, असार १५ सोमवाः
थौं सोमवाः स्वनिगलय् च्याम्हेसित कोरोना संक्रमण खने दुगु दु ।
थौं जक येँय् खुम्ह नाप यल ख्वपय् छम्ह छम्हेसित कोरोना संक्रमण खने दुगु धका स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं जानकारी बियादिगु दु ।
