Display Style:
Column Style
गण्डकी प्यगू जिल्लाय् २५म्ह संक्रमित
लहनान्युज | दिल्लाथ्व पंचमी ११४०,असार १२ शुक्रवाः
गण्डकी प्रदेशय् प्यगू जिल्लाय् थप २५म्ह कोरोना भाइरस संक्रमण पुष्टि जूगु दु ।
नवलपुरय् २१म्ह, तनहुँइ निम्ह, बाग्लुङ व स्याङ्जाय् छम्ह छम्हेसित कोरोना संक्रमण पुष्टि जूगु दु । थ्व नाप गण्डकी प्रदेशमा कोरोना संक्रमण पुष्टि जूपि आः ७९२म्ह थ्यःगु दु ।
गण्डकी प्रदेशय् कोरोना संक्रमणया वासः याका गुम्ह डिस्चार्ज जूगु दु । गोरखाया गण्डकी गाउँपालिकाया न्याम्ह मिजं व गोरखा नगरपालिकाया स्वम्ह मिसा डिस्चार्ज जूगु दु ।
थ्व नाप गण्डकी प्रदेशय् कोरोना संक्रमण मुक्त जूपिनिगु ल्याः १०१म्ह थ्यःगु दु धका गण्डकी प्रदेशया कोरोना नियन्त्रण तथा रोकथाम कार्यक्रमया निर्देशक डा. विनोद विन्दु शर्मां जानकारी बियादिगु दु ।
चितवनय् ३४ म्हेसित कोरोना पुष्टि
लहनान्युज | दिल्लाथ्व पंचमी ११४०,असार १२ शुक्रवाः
चितवन भरतपुरया प्रयोगशालाय् याःगु परीक्षणय् मा थप ३४म्ह कोरोना संक्रमण पुष्टि जूगु दु ।
नवलपुरय् २१म्ह, चितवनय् १२म्ह व कैलालीइ छम्हेसित कोरोना संक्रमण पुष्टि जूगु दु ।
नवलपुरया कावासोती नगरपालिकाय् निम्ह मिसा ना झीप्यम्ह व गैंडाकोट नगरपालिकाय् न्ह्यम्ह मिजम्हेसित कोरोना संक्रमण पुष्टि जूगु दु ।
चितवन मेडिकल कलेजय् उपचाररत छम्ह मिजंम्हेसित न कोरोना संक्रमण पुष्टि जुगु दु ।
उम्ह कैलालीया गोदावरी–७ च्वम्ह ५० दँया मिजंम्ह खः ।
वःगु लिपागु परीक्षणय् २१४गू नमुना मध्ये ३४म्हेसिगु रिपोर्ट पोजेटिभ व १८०म्हसिगु रिपोर्ट नेगेटिभ वःगु धका भरतपुर अस्पतालं धाःगु खः ।
कीर्तिपुर अस्पतालय् आइतवाःनिसे डायलायसिस सेवा न्ह्याइगु
शोभा श्रेष्ठ | दिल्लाथ्व चतुर्थी ११४०,असार ११बिहीवाः
कीर्तिपुर नगरपालिकाया ग्वाहालिं वइगु थ्व हे असार १४ गते आइतवाः निसे कीर्तिपुर अस्पतालय् मृगौला ल्वगिपिनिगु लागि डायलायसिस सेवा सञ्चालन जुइ त्यःगु दु । थुकिया सम्बन्धी म्हिगः असार ११ गते छगू डमि डेमोन्स्ट्रेसन याःगु दु ।
डमि डेमोन्स्ट्रेसनय् किपू नगरपालिकाया मेयर रमेश महर्जन, उप–मेयर सरस्वती खड्का, पूर्व मेयर हिराकाजी महर्जन, वडा नं. १० या अध्यक्ष अमन महर्जन, स्वास्थ्य शाखा प्रमुख सन्तमान मानन्धर, कीर्तिपुर अस्पतालया डा. भरत प्रधान, डा.पेरु प्रधान, कन्सल्टायण्ट नेफ्रोलोजिष्ट डा.अर्चन शमसेर राणा लगायत कीर्तिपुर अस्पतालया स्वास्थ्यकःमिपिनिगु ब्बति दुगु खः ।
कीर्तिपुर अस्पतालय् करीव लच्छि न्ह्यः हे डायलासिस मेशिन हया सेवा सञ्चालन यायेगु तयारी याःगु खः । तर नेपाल सरकारया मापदण्ड कथं म्हतिइ न न्यागः डायलासिस मेशिन माःगुलि उगु सेवा सञ्चालन याये मफया च्वंगु खः ।
आः कीर्तिपुर नगरपालिकाया न्यागः मेशिन ग्वाहालि याःगु दु । अस्पतालय सेवा सुविधाय् तक डायलायसिस सेवा अप्वगु दु ।
आः न्हिन्हि २०म्ह विरामीयात सेवा बिइ फइ धका धाःग दु ।
किपू नगरपालिकायात निगः ट्याकी ग्वाहालि
लहनान्युज | दिल्लाथ्व पंचमी ११४०,असार १२ शुक्रवाः
थौं कन्ह्य हलियकं महामारी जुयाच्वंगु कोरोना भाइरस (कोभिड–१९) या कारण पटक पटक ल्हाः सिलेइगु निति सिविन नेपालं किपू नगरपालिकायात निगः टचलेस ट्याकी ग्वाहालि याःगु दु ।
किपू नगरपालिकाया उपप्रमुख सरस्वती खड्का व वडा नं. ५ या अध्यक्ष राजेन्द्र महर्जनयात उगु ट्यांकी हस्तान्तरण याःगु खः ।
उगु ट्यांकी निगलं किपू नगरपालिकां त्रिभुवन विश्वविद्यालयय् दयेका तःगु क्वारेन्टिन व वडा नं. ५ या राराहिल स्कुलय् दयेका तःगु क्वारेन्टिनय् तःगु दु ।
उगु ट्यांकी हस्तान्तरण ज्याझ्वलय् वडा नंं १० या अध्यक्ष अमन महर्जनया न ब्बति दुगु खः ।
थ्व स्वया न्ह्यः न गुथिं किपू नगरपालिकाय् न्ह्यगः ट्याकी ग्वाहालि याःगु खः ।
सुदूरपश्चिमय् झीन्हुया दुने झीनिसः संक्रमित
लहनान्युज | दिल्लाथ्व चतुर्थी ११४०,असार ११ बिहीवाः
सुदूरपश्चिम प्रदेशय् असार १ गते निसे झीन्हुया दुने १२७२म्ह संक्रमित जुगु दु ।
जेठ ३२ गते तक २६०म्ह संक्रमित जूगु खःसा असार १० गतेया दुने संक्रमितपि द्धःछि व ५३२ म्ह थ्यःगु दु ।
सुदूरपश्चिमय् असार १ गते ६६म्ह, २ गते १७म्ह, ३ गते ३१म्ह, ४ गते २२४म्ह, ५ गते १७१म्ह संक्रमित जुगु खः ।
अथेहे ६ गते १६१म्ह, ७ गते ७६म्ह, ८ गते १३७म्ह, ९ गते ११७म्ह व १० गते २७२ म्ह संक्रमित जूगु खः ।
झीन्हुया दुने कोरोना संक्रमणया कारण सुदूरपश्चिम प्रदेशय् निम्ह सीगु दु । थ्व नाप थीथी जिल्लाय् १२७म्ह संक्रमितपि डिस्चार्ज जुया छेँय् लिहा वःगु धका प्रादेशिक स्वास्थ्य निर्देशनालयं जानकारी बिःगु दु ।
सुदूरपश्चिम प्रदेशय् न्हापां वःगु चैत १४ गते दुवईपाखे वम्ह कैलालीे धनगढी इ वम्ह मनूयाके कोरोना संक्रमण खने दुगु खः ।
