Display Style:
Column Style
सुरक्षितकथं थःथःगु थासय् वनेत प्रबन्ध याः : कांग्रेस
लहना न्यूज | ने.सं. ११४० चौलागा दसमि (१७ अप्रिल २०२०), शुक्रवाः
नेपाली कांग्रेसं लकडाउन लिपा न्यासि वनेत बाध्य जूपिं मजदूरतय्त सुरक्षितकथं थःथःगु गन्तब्यतक थ्यंकाबीत सरकारलिसे माग याःगु दु ।
थौं शुक्रवाः कांग्रेस प्रवक्ता विश्वप्रकाश शर्मां पिथनादीगु प्रेस विज्ञप्तिइ माःकथंया राहत बीमाःगु वा मछिनाच्वंपिंन्त सुरक्षित ढंगं थःथःगु थासय् वनेगु नितिं प्रबन्ध यायेत सरकारलिसे माग यानातःगु दु ।
थौंकन्हय् च्वनाच्वंगु थासय् आर्थिककथं ताःईतक च्वनेफइगु अवस्था मदुगुलिं सलंसः किलोमिटर न्यासि वनाः थःगु छेँय् वनाच्वंपिं नागरिकपिन्त राज्यया ग्वाहालि माःगु धासें कांग्रेसं माःकथंया राहतया व्यवस्थित योजना दयेकेत व कार्यान्वयन यायेत सरकारलिसे माग याःगु दु ।
अथे हे, कोरोना संक्रमणया जोखिम म्हो यायेत परीक्षणया चाकः अप्वयेकेत नं कांग्रेसं सरकारलिसे माग याःगु दु । सरकारं जिम्मेवारीलिसें जवाफदेहिताया गति च्वन्ह्याके मफइगु खःसा देसय् ग्यानापूगु अवस्था ब्वलनीगु नं कांग्रेसं सरकारयात ख्याच्वः ब्यूगु दु ।
कोरोनापाखें मेम्ह भूपू सैनिक मन्त
लहना न्यूज | ने.सं. ११४० चौलागा दसमि (१७ अप्रिल २०२०), शुक्रवाः
बेलायतय् कोरोनापाखें मेम्ह छम्ह पूर्व गोरखा सैनिक सित ।
लण्डनया न्यू माल्डेनय् च्वना वयाच्वंम्ह ७५दँया धनवीर थापामगर वासः यायेगु झ्वलय् मदुगु खः । सासः ल्हायेबलय् समस्या खनेदयेधुंकाः वय्कःयात वंगु मंगलवाः किङ्गस्टन अस्पतालय् भर्ना याःगु खः ।
वय्कःयात भेन्टिलेटरय् तयाः वासः यानाच्वंगु खः । पाल्पा स्थायी छेँ दुम्ह थापा लिपा बुटवलय् बसाइसराइ जूगु खः ।
न्हापांनिसें च्वःप्वःचा व उच्चरक्तचापया नियमित वासः नया वयाच्वनादीम्ह थापायात ज्वरो वयेवं अस्पताल भर्ना याःगु पाल्पा जिल्ला समाजया नायः बाचस्पति रेग्मीं जानकारी बियादीगु खः ।
नायः रेग्मीया कथं थापा जहानलिसें सन् २००९ निसें बेलायतय् च्वना वयाच्वंगु खः ।
चीनं ग्वाङ्झाओपाखे स्वास्थ्य सामग्री कया हल
लहनान्युज | चौलागा दशमी ११४०, बैसाख ५ बिहिवाः
चीनया ग्वाङ्झाओपाखे स्वास्थ्य सामग्री कया नेपाल एयरलाइन्सया निगः जहाज येँ थ्यःगु दु ।
छगः जहाज याउक अवतरण जुगु खःसा मेगु धाःसा धावनमार्गय् थ्यःगु इलय् ओभरसुट याना अवतरण याये माल ।
बिहीवाः चीन वःगु उगु निगः वाइडबडी जहाज मध्ये छगः शुक्रवाः सुथय् ७ बज व मेगु सवा ७ बजे त्रिभुवन अन्तर्राष्ट्रिय विमानस्थलय् अवतरण याःगु खः ।
उगु निगः जहाजय् कोरोना भाइरसया आशंका जुपिनिगु व संक्रमण पुष्टि जुपिनिगु परीक्षण व नाप उपचारया लागि माःगु स्वास्थ्य सामग्री कायेत वःगु खः ।
निजी क्षेत्रं नेपाल एयरलाइन्सया निगः जहाज भाडाय् कया स्वास्थ्य सामग्री नेपाल हःगु खः ।
धनगढीइ निम्हसिगुु पोजेटिभ रिपोट वयेव येँ नमुना छ्वया हल
लहनान्युज | चौलागा नवमी ११४०, बैसाख ४ बुधवाः
कैलालीया धनगढीया प्रयोगशालाय् परीक्षण याःगु इलय् निम्हेसित कोरोना संक्रमण खने दुगुलि हान परीक्षणया लागि येँ छ्वया हःगु दु ।
सुर्खेतपाखे छ्वया हःगु रुकुम पश्चिमया निम्हेसित कोरोना संक्रमण पोजेटिभ खने दुगुलि हाकन पुनपरीक्षणया लागि येँया राष्ट्रिय जनस्वास्थ्य प्रयोगशाला छ्वया हःगु दु ।
सुर्खेतं कोरोना परीक्षणया लागि बिहीवाः ९९ म्ह धनगढीया पशुपक्षी अन्वेषण प्रयोगशालाय् परीक्षण याःगु खः ।
सुर्खेतं वःगु नमुना मध्ये निम्हसित संक्रमणया आशंका खने दुगुलि हान स्वाब संकलन याना येँय् छ्वया हःगु खः ।
येँ मनपाया ग्वाहालिं सञ्चालित एम्बुलेन्सं निन्हुया दुने ४६ म्हसित निशुल्क सेवा
शोभा श्रेष्ठ | चौलागा नवमी ११४०, बैसाख ४ बुधवाः
लकडाउन इलय् हृदयघात, जँलास्येँ ल्वगि तयेत अस्पताल तक वयेगु वनेगु लागि येँ महानगरपालिकाया आर्थिक ग्वाहालि सञ्चालित निःशुल्क आकस्मिक एम्बुलेन्स सेवां निन्हुया दुने ४६ म्ह स्वया अप्वोयात सेवा बिःगु दु ।
सेवा सुरु न्हापागु व निन्हुया दुने हे ४६ म्हसित सेवा याःगु धका एम्बुलेन्स चालक संघ, नेपाल (काठमाडौं जिल्ला कार्य समिति) या अध्यक्ष गणेश सापकोटाले जानकारी बियादिगु दु । अध्यक्ष सापकोटां जमल, मैतिदेवीलगायतया थासय् च्वपिन्त डाइलोसि याकेत, मुटुरोगी, सुत्केरी व्यथा लगे जुपिन्त प्राथमिकताय् तया सेवा बियाच्वनागु दु धका न धयादिगु दु ।
जिमिगु कार्यक्षेत्र महानगरपालिका दुने जक खः । तर, अय्न महानगरपालिया पिने व स्वनिगः पिनेया ल्वगि तय्स नं स्वापु तया च्वगु दु धका सापकोटा धयादिगु दु, ‘न्हि न्यय् म्ह मल्याक मनू तयेगु फोन वः तर, जिमिसं महानगरपालिका दुनेया ल्वगि तयेत हे यक्को प्राथमिकता बिया च्वनागु धका धयादिगु खः ।
थज्यापि ल्वगि तयेत वीर अस्पताल, टिचिङ अस्पताल, बालाजुइ इाइलोसिस सेन्टरलय् यकिगु याना च्वनागु दु व थज्यागु इलय् ल्वगि तयेगु सेवा हे तधगु ज्या कथं कया वनाच्वगु दु धका धयादिगु दु ।
येँ महानगरपालिकां संयुक्त एम्बुलेन्स चालक संघ, नेपाल (काठमाडौं जिल्ला कार्य समिति) नाप सम्झौता याना लकडाउन इलय् २४ सै घण्टा सेवा बिइगु व्यवस्था मिले यानागु दु । उगु सम्झौता अनुसार न्यागः एम्वुलेन्स लकडाउनया इलय् हृदयघात, जँलास्येँ ल्वगि तयेगु लागि महानगरय् च्वपिन्त आकस्मिक सेवा बिया वयाच्वनागु दु धका येँं महानगरपालिकाया मेयर बिद्यासुन्दर शाक्यं जानकारी बियादिगु दु ।
थःगु छेँय् अस्पताल तक, छगु अस्पतालं मेगु अस्पतालय् वा अस्पतालया ल्वगि हयेगु यंकेत निशुल्क एम्बुलेन्स सेवाया सुविधा उपलब्ध यानागु येँ महानगरपालिकाया मेयर शाक्यं धयादिगु खः ।
लकडाउनया इलय् महानगरय् च्वपिन्त थःज्यापि ल्वगिपि सार्वजनिक यातायातया सवारी साधन उपलब्ध मदुगुलि अस्पतालय् वयेगु वनेत समस्या जुसा येँ महानगरपालिकाया हटलाइन नम्वर ११८० य् स्वापु तयेत इनाप यानादिगु दु ।
अथेहे, येँ महानगरपालिकां कोरोना संक्रमणया या सम्भावना जुपि ल्वगि तयेत अस्पताल तक वनेगु समस्या जुगु अवस्थाय् इमिगु सेवा बिइगु लागि येँ महानगरपालिका नाप सहकार्यय् सञ्चालन जुगु नेपाल एम्बुलेन्स सेवायात थ्व स्वया न्ह्यः हे तयारी अवस्थाय् तया तःगु खः ।
उगु सेवा कायेगु लागि १०२ नं.य् स्वापु तःसा गाः ।
