Display Style:
Column Style
पूच्वय् घटनाय् ज्वंपिन्त मत्वःतूसा संघर्ष न्ह्याकेगु अभियन्तातय् धापू
बिकाश | ञंलागा ५ ११४०,भाद्र २२ सोमवाः
वंगु विहिबाः यलया पूच्वय् बुंगद्यःया रथ सालेगु झ्वलय् जूगु झडपय् ज्वंपिनिगु रिहाईया माग यासें थीथी संघसंस्थातपाखें धमाधम विज्ञप्तीत सार्वजनिक जुयाच्वंगु दु ।
थ्व हे झ्वलय् गुथि विधेयकया आन्दोलनया झ्वलय् सक्रिय थीथी ३५ संघसंस्था व अभियन्तातय् नामं मंकाः विज्ञप्ती जारी जूगु दु ।
नेपाः युथ अर्गनाइजेसनया पहलय् जारी विज्ञप्तीइ विहिबाः पूच्वया घटनायात कयाः जुयाच्वंगु धरपकडया भत्सर्ना यासें ज्वनायंकूपिं सकसितं निशर्त रिहाइ यायेत माग याःगु दु ।
‘आधिकारीक निकाय गनं नं पहल मजुयाः रथ जात्रा अलपत्र त्वःताब्यूबलय् धर्म, संस्कृतिप्रतिया ज्वनाः वःगु जनसमुदाययात लःया फोहरां कयेकेगु, टियर ग्याँस कयेकेगु ज्या आपत्तीजनक खः’ विज्ञप्तीइ धयातःगु दु ।
लिसें पुल्चोकं जक मखसें छेँय् छेँय् हे वनाः अभियन्तातय्त धरपकडक यायेगु व ज्वनायंकूपिं अभियन्तातयत नापलाःवंपिन्त तकं याःगु धरपकडं राज्यया तानाशाही प्रवृित्त खनेदुगु दावी तकं विज्ञप्तीइ यानातःगु दु ।
आदिवासी नेवाःतय् गुथियात स्वायत्तता मब्यूगु हुनिं पूच्वया घटना जूवंगु धासें नेवाःतय् गुथियात स्वायत्तता व स्वसासन बीत नं विज्ञप्तीमार्फत माग याःगु दु ।
‘धार्मिक, सांस्कृतिक, ऐतिहासिक, पुरातात्विक महत्व कुबियाच्वंगु बुंगद्यःया जात्राया झ्वलय् जूगु घटनाय् राज्यया ब्यवस्थापकिय क्षमता मदुगु स्पष्ट खनेदु’ विज्ञप्तीइ दावी याःगु दु ।
रथ दयेकेधुंकूगु व बुङ्गद्यः रथारोहण् जुइधुंकूगु अवस्थाय् सुरक्षित व व्यवस्थित ढङ्गं जात्रा क्वचायेकेत तारन्ताः ताकेता याःगु अवस्थाय् नं गुठी संस्थान यल, जिल्ला प्रशासन ज्याकू यल, यल महागरनपालिका लिसें सरोकारवाला सरकारी निकाय गैरजिम्मेवार जूगु नं ठहर याःगु दु ।
विज्ञप्ती जारी याये न्ह्यः गुथि विधेयकया आन्दोलनय् सक्रिय थीथी अभियन्ता व संघसंस्थाया प्रतिनिधितय् मुना येँय् जूगु खः ।
मुनाया ब्वतिमिपिन्सं पूच्व घटनाय् ज्वंपिं अभियन्तातयगु निशर्त रिहाईया लागिं माल धाःसा सडकय् कुहांवयेगु तकंया विषयस सहलह याःगु खः ।
मुनाय् सामाजिक अभियन्ता पवित्र बज्राचार्य, राष्ट्रिय पहिचान संरक्षण संयुक्त संघर्ष समितिया प्रतिनिधिपिं, जनसरोकार समन्वय समितिया कजि श्यामकृष्ण प्रजापति, सेभ नेपाः भ्यालीया सुरज महर्जन लिसें थीथी संचारगृहस कार्यरत संचारकर्मीतय् तकं उपस्थिती दुगु खः ।
येँ २९३म्ह नाप स्वनिगः दुने ३२६म्ह संक्रमण पुष्टि
लहनान्युज | ञंलागा ५ ११४०,भाद्र २२ सोमवाः
थौं येँ जक २९३ म्हेसित कोरोना भाइरस संक्रमण पुष्टि जूगु दु ।
अथेहे यलय् २०म्ह व ख्वपय् १३म्ह संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु ।
वःगु २४ घण्टाय् देय् यकं ९७९ म्हेसित कोरोना भाइरस (कोभिड(१९) या संक्रमण पुष्टि जूगु दु ।
देय् यकंया प्रयोगशालाय् ९ हजार २१८म्हेसिगु नमुना परीक्षण याःगुलि ९७९म्हेसित संक्रमण पुष्टि जूगु दु धका धाःगु दु । थ्व नाप संक्रमितपि संख्या ४७ हजार २३६म्ह थ्यःगु दु ।
वःगु २४ घण्टाय् कोरोना भाइरस संक्रमण मुक्त जुपि १७३६ म्ह डिस्चार्ज जूगु दु ।
बुंगद्यः सालेगु झ्वलय् ज्वपिें न्हय्म्ह त्वःतूगु दु
लहनान्युज | ञंलागा ५ ११४०,भाद्र २२ सोमवाः
बुंगद्यः सालेगु झ्वलय् जूगु झडपय् ज्वनातःपिं मध्यें न्हय्म्हसित थौं त्वःतूगु दु । थ्व नापं ज्वनातःपिं झिम्हेसित त्वते धुंकूगु दु ।
थौं सनिलय् तकया दुने यलया महेश वज्राचार्य, पृथविन्दु महर्जन, सुविन शाक्य, रवि शाक्य, धुव्रराज वज्राचार्य व थिमिया श्याम कुमार था श्रेष्ठ व निराज वादेयात त्वःत धुकुगु दु ।
जात्राय् ज्वनातःपिन्ंत त्वःतकेगु लागि थीथी थासं कुतः याःगु खः । त्वःतकेगु लागि ज्यापु समाज नाप बुंगद्यः जात्रालिसे सरोकार झिंखुगूगु खलःपुचःया प्रतिनिधिपिं, नेपालभाषा मंकाः खलः यल, सांसदपिं, स्थानीय जनप्रतिनिधिपिं लगे जुयाच्वंगु खः ।
थौं हे यल जिल्लाया प्रमुख जिल्ला अधिकारी नारायणप्रसाद भट्टं ज्वनातःपिं सकसितं कन्हय् तकया दुने त्वःतेगु प्रतिबद्धता प्वंकूगु खः ।
अथेहे नेपालभाषा मंकाः खलःपाखें नं कुतः याःगु खः । अभियन्तापिंत त्वःतेकेगु निंतिं म्हिगः हे गृहमन्त्री नापलायेगु कथं ई मिले याःगु खःसां लिपा गृहमन्त्रालयं ज्वना तःपिन्त त्वःतेगु लागि नापलायेगु आवश्यक मजू थःपिंसं त्वःताबीगु प्रतिबद्धता प्वंकाहःगु खँ मंकाः खलःया न्वकु मल्ल के सुन्दरं धयादिगु दु ।
त्वःतकेगु लागि निंतिं मंकाः खलःया नायः दुर्गालाल श्रेष्ठ व छ्याञ्जे मल्ल के. सुन्दरपिंसं कुतः यानादीगु खः ।
९७९म्ह कोरोना संक्रमित
लहनान्युज | ञंलागा ५ ११४०,भाद्र २२ सोमवाः
वःगु २४ घन्टाय् नेपालय् थप ९७९ म्हेसिति कोरोना संक्रमण पुष्टि जूगु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया नियमित प्रेस ब्रिफिङय् प्रवक्ता डा जागेश्वर गौतमया कथं नेपालय् कोरोना संक्रमितपि ४७ हजार २३६म्ह थ्यःगु दु धका धाःगु दु ।
अथेहे वःगु २४ घन्टाय् कोरोनामुक्त जुपि १ हजार ७३६म्ह डिस्चार्ज जूगु दु । थ्व नाप नेपालय् आःतक कोरोनामुक्त जूपि ३० हजार ६७७म्ह थ्यःगु दु ।
वःगु २४ घन्टाय् नेपालय् थप ११म्ह कोरोना संक्रमणपि सीगु दु धका स्वास्थ्य तथा जनसंख्या मन्त्रालयं धाःगु दु ।
थ्व नाप नेपालय् कोरोना संक्रमणपाखे सीपि ३००म्ह थ्यःगु दु ।
३० हजार ६७७म्ह कोरोना संक्रमितपि डिस्चार्ज
लहनान्युज | ञंलागा ५ ११४०,भाद्र २२ सोमवाः
नेपालय् आःतक ३० हजार ६७७म्ह कोरोना संक्रमितपि डिस्चार्ज जुइ धुकुगु दु धका स्वास्थ्य तथा जनसंख्या मन्त्रालयं धाःगु दु । थ्व धइगु संक्रमितपि ६५ प्रतिशत खः ।
वःगु २४ घण्टाय् देय् यकं १७३६म्ह कोरोना संक्रमितपि डिस्चार्ज जुगु दु । थ्व नाप आःतक डिस्चार्ज जुपि ३० हजार स्वया अप्वो जुइ धुकुगु दु । अथेहे क्वारेन्टाइनय् च्वना च्वपि ४७३९म्ह थ्यःगु दु ।
आःतक नेपालय् कोरोना संक्रमितपि ४७२३६ थ्यःगु दु । वःगु २४ घण्टाय् ९७९म्हेसित कोरोना संक्रमण खनेदुगु धका मन्त्रालयया प्रवक्ता डा. जागेश्वर गौतमं सोमवाः मिडिया ब्रिफिङय् धाःगु दु ।
आःतक देय् यकं पीसीआर परीक्षणय् संख्या ७ लाख ७७५६३ म्हेसिगु याःगु धका मन्त्रालयं धाःगु खः ।
आःतक देय् यकं १७१म्ह बिरामी आईसीयूलय् व २०म्ह भेन्टिलेटरय् तया वासः याका च्वंगु दु धका डा गौतमं धाःगु दु।
