हिक्मतकुमार कार्कीं राष्ट्रिय समाचार समिति (रासस) यात भिंकां यंकेमाःगुलिइ बः बियादीगु दु।

राष्ट्रिय समाचार समिति (रासस)या कार्यकारी अध्यक्ष धर्मेन्द्र झायात थौं सुथय् नापलानाः वय्कलं देय् दुने व पिनेया बुखँ मदिक्क बिया वयाच्वंगु देय्या छगू जक आधिकारिक संचार माध्यम राससयात बांलाकेमाःगुलिइ बः बियादीगु खः।

राससं थ्व संस्था पलिस्था जूगु इलं निसें हे देय् व जनताया पक्षय् ज्या यानाः वयाच्वंगुलिं मुख्यमन्त्री कार्कीं उकियात च्वछानादिल। मुख्यमन्त्री कार्कीं धयादिल, “राससं लिपांगु इलय् मातृभाषा समाचार सेवा चकंकूगु दु, राज्यं याःगु ज्यायात च्वयेकेगु याःगु दु, थ्व तसकं च्वछायेबहःजू, थजाःगु रचनात्मक ज्याखँयात राससं मदिक्क न्ह्याकेमाः।”

राससनापं मंकाःज्या यायेत प्रदेश सरकार तयार दूगु खँ धयादिसें वय्कलं राससयात फक्व ग्वहालि यायेगु प्रतिबद्धता बियादिल। कार्यकारी अध्यक्ष झां राससया उत्पादनबारे कनादिसें प्रदेश सरकारलिसे याये फइगु मंकाः ज्या यायेगु सम्बन्धय् खँ धयादीगु खः। (रासस)

परराष्ट्रमन्त्री डा आरजु राणा देउवा थौं देय् लिहाँ वःगु दु। चिनियाँ विदेशमन्त्री वाङ यीया ब्वनाय् चीनया औपचारिक भ्रमण यानादीम्ह मन्त्री डा राणा चीनया छन्दुं थौं सुथय् नेपाः लिहाँ वःगु दु धका वय्कःया प्रेस सल्लाहकार एकराज पाठकं धाःगु दु।

नेपाःया प्रतिनिधिमण्डलया नेतृत्व यानाः बिहीबाः चीनया सिचुआन प्रान्तया छन्दु वनादीम्ह वय्कलं शुक्रबाः सनिलय् चिनियाँ विदेशमन्त्रीलिसे छेन्दुइ नापलानादीगु खः। उगु झ्वलय् वय्कःपिं दथुइ नेपाः व चीनया स्वापू व निगूपक्षया हितया थी थी खँनापं प्रधानमन्त्री केपी शर्मा ओलीं यानादीत्यंगु चीन भ्रमणया तयारीया बिषयया खँल्हाबल्हा जूगु खः।

प्रधानमन्त्री ओली वइगु सोमबाः चीनया औपचारिक भ्रमणय् झायादीत्यंगु दु। परराष्ट्रमन्त्री डा राणा प्रधानमन्त्री ओलीनापं नं चीन भ्रमणय् ब्वति कायादिइ। (रासस) 

लुम्बिनी बौद्ध विश्वविद्यालयया स्वक्वःगु दीक्षान्त समारोहय् जूगु दु।उगु दीक्षान्त समारोहय् निसः व ८९म्ह ब्वनामित दीक्षित जूगु खः।

विद्यावारिधिनापं थी थी सङ्कायया ब्वनामिपिन्त छगू ज्याझ्वः दथुइ प्रधानमन्त्री नापं विश्वविद्यालयया कुलपति केपी शर्मा ओलीपाखें दीक्षित याःगु खः।

उगु ज्याझ्वलय् प्रधानमन्त्री ओलीं धम्मावती गुरुमायात मानार्थ विद्यावारिधि लःल्हाःनादिगु खः। ९१ दँया गुरुमा नं बौद्ध धर्म, दर्शन व शिक्षाया विकासय् बियादिइगु ज्वःमदूगु योगदानया सम्मानयासें १७ क्वःगु विश्वविद्यालयसभां गुरुमायात व सम्मान देछायेगु क्वछ्यूगु खः।

येँ महानगरया बज्राचार्य गुरुजुपिनि अतिकं हनेबःम्ह ‘मूलचक्रेश्वर’ (देथाय्पा) मन्त्रसिद्धि महाविहारया ९५ दँया मोहन रत्न बज्राचार्य म्हिगः बिहिबाः बहनी आकाझाकां मन्त।

वय्कःया अन्तिम संस्कार थौं सुथय् ‘कर्ण दीप’य् बज्रयानी बौद्ध परम्पराकथं क्वचाये धुंकूगु दु।

अन्तिम संस्कार याये न्ह्यः येँया भिंmच्यागू महाविहारया बज्राचार्य गुरु गुरुमांपिं, दश महाविहार, झिखुगू बही सर्वसंघया शाक्य भिक्षुत व नेपाल परम्परागत बौद्ध धर्म संघया पदाधिकारीतय्गु पुचलं मदुम्ह मूलचक्रेश्वरया सुगति सुखावती भुवनय् बास लायेमाः धकाः कामना यासें दुर्गतिपरिशोधन धारणी पाठ याःगु खः।(रासस)

स्थानीय तह उपनिर्वाचनया मौन अवधि थनिंनिसें न्ह्याःगु दु। निर्वाचन आयोगं निर्वाचन प्रचारप्रसार याये मदूगु ई न्ह्याःगु खँ न्ह्यथँसें उपनिर्वाचनयात, स्वच्छ, स्वतन्त्र, निष्पक्ष, विश्वसनीय व भयरहित लकसय् क्वचायेकेत सकसितं इनाप याःगु दु।

स्थानीय तहया भोट कुर्केगु न्हिसिबें ४८ घौ न्ह्यवंनिसें भोट निनेगु ज्या मसिधःतक लागु जुइगु निर्वाचन प्रचारप्रसार निषेधया ई थ्वहे मंसिर १३ गते चान्हय् १२ ताः ई निसें न्ह्याःगु आयोगं धाःगु दु।निर्वाचन कसुर व सजाय ऐन, २०७२ या दफा २४ उपदफा ५ व निर्वाचन आचारसंहिता २०७९ या दफा १७ कथं थुगु इलय् राजनीतिक दलया पदाधिकारी, उम्मेदवार, दलया कचाः खलः व सम्बन्धित मनूतय्सं निर्वाचन आचारसंहिता हाचांगाया छुं ज्या मयायेत इनाप याःगु दु।

मौन अवधिइ सुं नं उम्मेदवार वा राजनीतिक दलया पक्ष व विपक्षय् भोट कुर्केगु बाय् मकुर्केगु ताः तया सभा न्ह्याकेगु, जुलुस पिकायेगु बाय् अज्यागु हे मेगु छुं ज्या मयायेत नं आयोगं इनाप याःगु दु। अथेहे, अनलाइन, छापा वा मेगु छुं ज्वलंतपाखें भोट फ्वनेगु व सामाजिक सञ्जालया माध्यमं नुगः खँ तयेगु, भोट फ्वनेगु व मेपिंत ‘शेयर’ यायेगु ज्या मयायेत आयोगया प्रवक्ता नीता पोखरेल अर्यालं सचेत यानादीगु दु।

निर्वाचन प्रचारप्रसार यायेमदूगु इलय् न्ह्यथनातःगु छुं नं गतिविधि जूगु खनेदुसा केन्द्रीय आचारसंहिता अनुगमन समिति, आचारसंहिता अनुगमन पुचः, जिल्ला आचारसंहिता अनुगमन समिति, स्थानीय प्रशासन, सुरक्षाकःमि, अनुगमन अधिकृतपाखें न्हापं सुक्ष्म अनुगमन यानाः कारबाही यायेफइगु आयोगं धाःगु दु। निर्वाचन आचारसंहिता हाचांगागु खनेदुसा तुरुन्तहे कानुनकथं कारबाही याना मू निर्वाचन अधिकृतया ज्याकुथि, निर्वाचन आयोगय् जानकारी बिइत आयोगं इनाप याःगु दु (रासस)