श्री हल्चोक आकाश भैरव झीनिदँ जात्राया झ्वलय् येँया ताम्सिपाखाय् राजेन्द्र रजकं तरवार छानादीगु दु। तरवार छायेगु झ्वलय् रजकं श्री हल्चोक आकाश भैरव द्यःयात तरवार छायादीगु खः।

अथेहे श्री महाकाली व श्री दक्षिणकालीयात खन्जड छायादीगु खः।

दँय्दसं वैशाख शुक्ल नवमीया दीं न्यायेकीगु राष्ट्रिय विभूति सीता उत्पत्ति दिवस लिसें जयन्ती थौं सीतायात श्रद्धा भक्तिपूर्वक पुजा आराधना यानाः न्यायेकूगु दु।

त्रेतायुगय् मिथिलाया जुजु जनकं तःधंगु यज्ञ यानाः विधि पूवंक बुँ पालेगु झ्वलय् सीता उत्पत्ति जूगु बाखं रामायणलिसें वैदिक दर्शनया धर्मग्रन्थ लिसें पुराणय् वर्णन यानातःगु दु।

भगवान् विष्णुया खुगूगु अवतारया कथं अयोध्याया राजा दशरथया काय् श्रीरामया जन्म जुइ धुंकाः लक्ष्मी सीताया कथं उत्पत्ति जूयादीगु वर्णन थीथी ग्रन्थय् यानातःगु दु। सीतायात सत्यवती, पतिव्रता लिसें आदर्श नारीया कथं हनेगु याइ। अयोध्याया जुजु दशरथया काय् राजकुमार रामनाप सीताया इहिपा जूगु खः।

सूचना अधिकारया प्रवद्र्धन, पारदर्शिता लिसे सुशासनय् योगदानयापि थीथी ब्यक्तित्व तय्त राष्ट्रिय सूचना आयोगं थःगु १८ क्वःगु स्थापना दिवस विशेष ज्याझ्वलय् हंगु दु।

थौ सोमवाः राष्ट्रपति कार्यालय शीतल निवासय् जुगु उगु ज्याझ्वलय् राष्ट्रपति रामचन्द्र पौडेलं थीथी श्रेणीइ उत्कृष्ट सूचनाया अभियन्ता, सूचना अधिकारी, कर्मचारी व पत्रकार तय्त सिरपा नापं हंगू दु।उगु ज्याझ्वलय् न्युज अफ नेपालया सम्पादक नाप नेपाल समाचारपत्रया समाचार सम्पादक दीपक रिजालयात विनय कसजू उत्कृष्ट सूचनाया हक अभियन्ता पुरस्कार २०८२ पाखे हंगु दु।

सूचना अधिकारया ख्यलय् निरन्तर पत्रकारिता याना वयाच्वंम्ह रिजालं थीथी तहय् जनचासोया मुद्दा मदिक्क ल्ह्वना वया च्वम्ह खः। राष्ट्रपति पौडेलं उगु ज्याझ्वलय सूचनाया हक अभियन्ता पत्रकार गजेन्द्र बुढाथोकी, गोरखा पत्रया वरिष्ठ फोटो पत्रकार कविता थापा व हरिराम कोण्डायात हंगु दु।

अथेहे, सूचना प्रवाहयात प्रभावकारी दयकेगु निति सरकारी संयन्त्र अङ्गया कथं उत्कृष्ट कार्यसम्पादनयापि सूचना अधिकारीपि देवीप्रसाद थपलिया, केशव सिलवाल, पदमकुमार श्रेष्ठ, हेमन्तकुमार बुढाथोकी व बुद्धिराम न्यौपानेयात उत्कृष्ट सूचना अधिकारी सिरपा लःल्हागु खः।

राष्ट्रपति रामचन्द्र पौडेलं सञ्चार जगत् संविधान प्रदत्त अधिकार पूवंक छ्यलेत व रक्षा यायेत भय मकास्ये  जुयाच्वनीगु भलसा प्वंकादीगु दु।

विश्व प्रेस स्वतन्त्रता दिवस (मे ३) या झ्वलय् थौं भिंतुना सन्देश बियादिसें राष्ट्रपति पौडेलं भलसा जुइ कथं राज्यया स्वंगू हे ब्वयात सजग व सतर्कतापूर्वक ज्या सम्पादन यायेत व आमनागरिक तय्त सत्य सूचना सम्प्रेषित यायेत सफल जुइ फयेमा धकाः भलसा प्वंकादीगु खः। वय्कलं सन्देशय् धयातःगु दु, “निरङ्कुश शासनया अन्त्य व सङ्घीय लोकतान्त्रिक गणतन्त्र स्थापना यायेत नेपाःया प्रेस जगतं महत्त्वपूर्ण भूमिका म्हितूगु तथ्य झीपिं सकसिनं स्यूगु हे खँ खः।

स्वतन्त्र व निष्पक्ष पत्रकारिताया निंतिं लोकतन्त्र अनिवार्य सर्त खः। प्रेस नापं अभिव्यक्ति स्वतन्त्रता लोकतन्त्रया जग खः। उकिं नेपाःया प्रेसं लोकतन्त्रया निंतिं जूगु आन्दोलन तय्के तसकं तःधंगु योगदान ब्यूगु दु ।”प्रेस स्वतन्त्रता प्रेसया जक मखु नागरिकतय् सुसूचित जुइ दइगु संवैधानिक हक कार्यान्वयन यायेत नं उत्तिकं अनिवार्य जुइगु व थुकिं शासन प्रणालीयात पारदर्शी व उत्तरदायी दयेकेत ग्वाहालि याइगु न्ह्यथनादिसें राष्ट्रपति पौडेलं मुक्कं समाजया लोकतान्त्रीकरणया अभियानय् प्रेस स्वतन्त्रता महत्त्वपूर्ण पक्ष खः धकाः धयादिल।

“प्रेस गुलि तटस्थ, स्वतन्त्र व सबल जुइ लोकतान्त्रिक व्यवस्था उलि हे धिसिलाना वनिइ, थुकिया निंतिं आवश्यक वातावरण निर्माण यायेगु झीपिं सकसिगु नं भाला खः। झीगु संविधानं पूर्ण प्रेस नापं अभिव्यक्ति स्वतन्त्रताया हःपाः बियातःगु दु। सूचना सङ्कलननिसें उकियात प्रवाह यायेगु प्रक्रियातक निर्वाधरूपं संलग्न जुइ दइगु हे धात्थें धायेगु खःसा प्रेस स्वतन्त्रता खः,” राष्ट्रपति पौडेलया सन्देशय् धयातःगु दु, “बहुलवादय् आधारित पत्रकारिताया अभ्यासं दक्व कथंया बुखँ तय्के दक्व नागरिकतय् सहज पहुँच स्थापित याइ व सञ्चारमाध्यमं दक्व वर्ग–समुदायतय् सः पिज्वयेकी।”

समाजय् थी थी इलय् थी थी कथंया फय्खँ ब्वलनावइ धइगु न्ह्यथनादिसें राष्ट्रपति पौडेलं फय्खं नागरिकतय्त दिग्भ्रमित याइगु व पाय्छिगु बिचाः निर्माण यायेत समस्या मजुइगु कथं स्वतन्त्र पत्रकारितां सत्यया अन्वेषण व तथ्यया सम्प्रेषण यानाः समाजय् खःगु व सत्य खँ स्थापित यायेत अझ अप्वः कुतः यायेमाःगुलिइ बः बियादिल। अप्वोया वनाच्वंगु सामाजिक सञ्जालया छ्यलाबुला व थुकिया माध्यमं प्रवाहित जुइफइगु गुलिखे मिथ्या व भ्रामक सुचनं नागरिक तय्त दिग्भ्रमित यायेफइगु व मुक्कं व्यवस्थायात कमजोर दयेकीगु हाथ्या झीगु न्ह्यःने दूगु धयादिसें राष्ट्रपति पौडेलं थजाःगु हाथ्या सामना यानाः जनतातय्त सत्य, तथ्य व भलसा जुइगु सुचं प्रवाह यायेत थौंया दिंपाखें नेपाःया प्रेस जगतयात थप ऊर्जा, हौसला व उत्प्रेरणा बिइमा धइगु मनसुवाः प्वंकादिल । “जनतातय् तःधंगु त्याग, सङ्घर्ष व बलिदानं झीसं थौं सङ्घीय लोकतान्त्रिक गणतन्त्र हयेफूगु खः ।

झीगु  ताःहाकःगु राजनीतिक सङ्घर्ष पूवनाः आः मुलुक आर्थिक रूपान्तरणपाखें समृद्धिया लँपुइ न्ह्याःवंगु दु । मुलुकया थ्व आवश्यकतायात ध्यानय् तयाः नेपाःया प्रेस उखेपाखे केन्द्रित जुया वनी धइगु अपेक्षा यानाच्वना”, राष्ट्रपति पौडेलं थःगु सन्देशय् धयादीगु दु, “नेपाःया सञ्चार जगत् संविधान प्रदत्त अधिकारयात पूवंक छ्यलेगु व रक्षा यायेत भय मकाःसे न्ह्यानाच्वनी धइगु पूर्ण भलसा कयाः राज्यया स्वंगूलिं ब्वयात सजग व सतर्कतापूर्वक ज्या सम्पादन यायेत व आमनागरिकतय्त सत्य सुचं सम्प्रेषित यायेत सफल जुइमा धइगु भिंतुना बियाच्वना।” (रासस)