परराष्ट्रमन्त्री डा आरजु राणा देउवां थौं चीनया सिचुवान प्रान्तया छन्दुइ च्वंगु नेपाःया महावाणिज्यदूतावासय् निरीक्षण यानादीगु दु।

उगु झ्वलय् वय्कःयात महावाणिज्यदूत सुरेश राउतलिसेंया कर्मचारीपाखे लसकुस यानादीगु खः। मन्त्री डा राणायात महावाणिज्यदूत राउतं महावाणिज्यदूतावासया ज्याखँया बारे ध्वाथुइकादीगु परराष्ट्रमन्त्रीया सचिवालयं धाःगु दु मन्त्री डा राणां वइगु दँय् नेपाः व चीन दथुइ औपचारिक कूटनीतिक स्वापू नीस्वंगु ७० क्वःगु वार्षिकोत्सवया झ्वलय् नेपाः व चीन सरकारपाखें मंकाः कथं घोषणा जूगु नेपाः भ्रमण दँ २०२५ यात लुमंकाबिसें थुगु पृष्ठभूमिइ महावाणिज्यदूतावास यात नेपाःया पर्यटन प्रवद्र्धनया ज्याझ्वः न्ह्याकेत धयादीगु खः।

थुगु ज्याझ्वपाखें निगुलिं देय्या पर्यटन प्रवद्र्धन जुइगु लिसें जनस्तरया स्वापूयात अझ बल्लाकीगु भलसा वय्कलं प्वंकादिल। मन्त्री डा राणां नेपाःया च्या, कफी, वासः नापं नस्वाःगु जडीबुटी थें जाःगु नेपाःया विशिष्ट उत्पादनयात चिनियाँ बजारय् प्रवद्र्धनया ज्या न्ह्याकेत उजं नं बियादिल।

उगु झ्वलय् मन्त्री डा राणां नेपाः चीन सम्बन्धयात आर्थिक, सांस्कृतिक नापं जनस्तरय् थप भिंकायंकेमाःगुलिइ बः बियादीगु खः। महावाणिज्यदूतावासय् ग्वसाः ग्वःगु उगु अन्तरक्रियाय् चीनया निंतिं नेपाःया राजदूत डा कृष्णप्रसाद ओली नं ब्वति कयादीगु परराष्ट्र मन्त्रालयं धाःगु दु। (रासस)

स्वास्थ्य नापं जनसङ्ख्यामन्त्री प्रदीप पौडेलं सुस्मा कोइराला मेमोरियल अस्पतालयात जलन अस्पतालया कथं विकास यायेत्यंगु न्ह्यथनादीगु दु।

येँया शङ्खरापुर नगरपालिकाया साँखुइ च्वंगु अस्पतालया संस्थापक देशीय निर्देशक हाइन स्टालयात बिदाइ नापं न्हूम्ह देशीय निर्देशक अल्बर्ट बेन्जिनयात लसकुस यायेत बिहीबाः ग्वसाः ग्वःगु ज्याझ्वलय् मन्त्री पौडेलं सरकारं लिपांगु इलय् जलन उपचारयात प्राथमिकता बियाः ज्या न्ह्यानाच्वंगु खँ कनादीगु खः।

वय्कलं धयादिल, “सुस्मा कोइराला मेमोरियल अस्पताल जलन उपचारया निंतिं छगू विशिष्टिकृत अस्पताल खः, सरकारं निकतिनि थें हे देय्न्यंकया च्यागू अस्पतालय् जलन उपचार यायेफइगु अस्पताल कथं घोषणा याःगु खः, थुकिइ सुस्मा कोइराला अस्पतालयात तकं स्वानाः न्ह्याःवने फइ।” स्वास्थ्यमन्त्री पौडेलं जर्मनतय्गु ग्वाहालिं सुस्मा कोइराला मेमोरियल ट्रष्टपाखें न्ह्याकाःवयाच्वंगु उगु अस्पतालं मेमेगु अस्पतालय् ज्या यानाच्वंपिं चिकित्सक व परिचारिकातय्त जलन उपचारसम्बन्धी तालिम बिइफइगु धयादीगु खः।

जलन उपचारया नेतृत्व सुस्मा कोइराला अस्पतालं याये फइगु वय्कःया धापू खः। ज्याझ्वलय् पूर्व उपप्रधानमन्त्री सुजाता कोइरालां न्हापांगु इलय् दुर्गम थासय् अस्पताल चायेकेत तसकं समस्या फयेमाःगु खँ कनादिल । न्हापा देय्न्यंक हे जलनया उपचार मदयाः उगु अस्पताल नीस्वंगु वय्कःया धापू खः।

जर्मनीया ग्वाहालिं न्ह्यानाच्वंगु उगु अस्पतालं आःतक १५ द्वः ३ सः व ७५ म्हसिगु सित्तिकं वासः तकं यायेधुंकूगु दु। च्याम्ह डाक्टर नापं कर्मचारीतपाखें न्ह्याःगु उगु अस्पतालय् थौंकन्हय् १०० म्ह कर्मचारीत ज्या यानाच्वंगु अस्पतालया प्रशासन प्रमुख प्रफुल्ल शर्मां धयादिल।

प्रधानमन्त्री केपी शर्मा ओलीयात राष्ट्रिय सूचना आयोगं आर्थिक वर्ष २०८०÷०८१ या १६ क्वःगु वार्षिक प्रतिवेदन थौ लःल्हात। प्रधानमन्त्री निवास, बालुवाटारय् आयोगया प्रमुख सूचना आयुक्त महेन्द्रमान गुरुङं प्रतिवेदन प्रधानमन्त्री ओलीयात लःल्हाःगु खः।

उगु प्रतिवेदन प्रधानमन्त्रीपाखे सङ्घीय संसदय् न्ह्यब्बइगु व्यवस्था दु। उगु ज्याझ्वलय् आयोगया वर्तमान नेतृत्वय् न्यादँया कार्यकाल जूगु निर्णय ‘महत्वपूर्ण आदेश सङ्ग्रह’ या प्रधानमन्त्री ओलीं सार्वजनिक याःगु खः। प्रधानमन्त्री ओलीं सूचनाया हकयात वास्तविक हकया कथं स्थापित याससे सरोकार जूगु पक्षयात माःगु सूचं बिइगु ज्या सरकार व आयोग दथुइ सहकार्य जुइमाः धका धयादीगु खः।

वयकलं लोकतन्त्रया पक्षय् माःगु कार्यान्वयन यायेत अराजकतायात धाःसा निरुत्साहन यायेमाःगुलि बःबिउगु खः। प्रमुख आयुक्त गुरुङं थःगु न्यादँया कार्यकालय् न्याद्धः व १८२ पुनरावेदन वःगुलि ९५ प्रतिशत फस्र्याैट जूगु धका जानकारी बियादीगु खः। वर्तमान प्रमुख आयुक्त गुरुङ, आयुक्तपि कमला ओली थापा व रत्नप्रसाद मैनालीया कार्यकाल थ्व हे मङ्सिर २३ गते क्वचाइ।

प्रधानमन्त्री केपी शर्मा ओलीयात फिनल्याण्डया विदेश मन्त्रालयया वैदेशिक व्यापार लिसे विकासमन्त्री भिल्ले ताभिया न थौ बुधवाः नापलानादीगु दु।

प्रधानमन्त्री निवास, बालुवाटारय् निगुपक्षीय हित व आपसी सम्बन्धया थीथी पक्षय् खँल्हानादीगु खः।

मन्त्री ताभिया न नेपाःया जलविद्युत, फोहोरमैला व्यवस्थापन व पूर्वाधार विकासय् ग्वहालि यायेगु निति थःपि तयार दु धका प्रधानमन्त्री ओलीयात धयादीगु खः। प्रधानमन्त्री ओलीं फिनल्याण्डं नेपाःयात विकासय् याना वयाच्वनागु ग्वहालिया निति सुभाय् देछानादीगु खः।

नेपाः व फिनल्याण्डया कूटनीतिक सम्बन्ध स्थापना जुगु ५० क्वःगु दँया झ्वलय् मन्त्री ताभियो न नेपाःया भ्रमण यानादीगु खः। नापलायेगु झ्वलय् नेपाःया निति फिनल्याण्डया राजदूत ऋना ऋक्का हेइक्का, परराष्ट्र मन्त्रालयया सहसचिव गणेश ढकालपिनिगु न ब्बति दुगु धका प्रधानमन्त्रीया निजी सचिवालयं जानकारी ब्यूगु दु।

प्रधानमन्त्री केपी शर्मा ओलीलिसे राष्ट्रिय फोटो पत्रकार पुचः (एनएफपिजे) नेपाःया नवनिर्वाचित कार्यसमितिं थौं प्रधानमन्त्री निवास बालुवाटारय् नाप लानाः वय्कःयात फोटो पत्रकारतय्गु हकहितया निंतिं गुगू बुँदाया ध्यानाकर्षण पौ लःल्हाःगु दु।

संस्थाया नायः प्रदीपराज वन्त नेतृत्वया टोलीं लःल्हाःगु उगु ध्यानाकर्षण पौ नेपालय् थी थी सञ्चारगृहय् फोटो पत्रकारिता याइपिं फोटो पत्रकारतय्गु हकहितया निंतिं सरकारया पाखें माःगु ग्वाहालि व फोटो सङ्ग्रहालयया निंतिं कुतः याकादीत प्रधानमन्त्री ओलीयात ध्यानाकर्षण याःगु खः।

अथे हे ‘फोटो पत्रकारितापाखें जीविकोपार्जन याइपिं फुक्कं फोटो पत्रकारतय्गु बीमा नापं स्वास्थ्य सुरक्षा, फोटो पत्रकार तय्त व्यावसायिक तालिम बिइत दँय् दसं बजेट व्यवस्थापन, ई कथं ‘अपडेट’ जुयाच्वनेत फोटो पत्रकार तय्त माःगु क्यामेरा न्यायेत सहुलियत दरं त्यासा उपलब्ध याकेत कुतः यानादीत तकं ध्यानाकर्षण याःगु दु।

उगु झ्वलय् प्रधानमन्त्री ओलीं नवनिर्वाचित कार्यसमितियात भिंतुना बिसें पत्रकारिताय् फोटोया महत्व अप्वः जुइगुलिं फोटो पत्रकार तय्गु निंतिं देय्पाखें माःगु ग्वाहालि याइगु भलसा बियादिल।