प्रधानमन्त्री केपी शर्मा ओलीं पुनः स्थापित शान्ति प्रक्रियायात बालाक्क यकेगु नाप द्वन्द्वकालीन घटनाया पुनरावृत्ति याके मबिइगु कथं वर्तमान सरकार स्पष्ट दु धका धयादीगु दु।

सङ्क्रणकालीन न्यायनाप सम्बन्धित विषयय् थौ नेपाल समाजवादी पार्टीया संयोजक नाप पूर्व प्रधानमन्त्री डा बाबुराम भट्टराई नेतृत्वया प्रमण्डलं १९ बुँदे ध्यानाकर्षणपौ लःल्हाना कयादीसे प्रधानमन्त्री ओलीं नेपाली जनतायात जातीय आधारय् विभाजित याना व सामाजिक कथं घृणा\द्वेष फैलै याना राष्ट्रिय एकतायात कमजोर यायेगु कुतः याइपि ताःलाइ मखु धका धयादीगु दु।

“जनतां न्हापा हे वान्छेगु माःगु राजतन्त्र थःगु हि नाप हिलां जक वान्छय् फत। सङ्घीय लोकतान्त्रिक गणतन्त्रया स्थापना जुगु दु। थ्व व्यवस्थायात अपुक जनताया विकास, समृद्धि व स्थायित्वया चाहना पूरा याये माःगु दु। उकिइ आः छु न अराजकतां थाय् काइगु व सत्ता समीकरणय् थुके उखे जुइगु सम्भावना मदु।”, प्रधानमन्त्री लिसे मन्त्रिपरिषदया कार्यालय, सिंहदरबारय् नापलायेगु झ्वलय् प्रधानमन्त्री ओलीं धयादीगु दु, “म्हतिइ न जि प्रधानमन्त्री व नेकपा (एमाले) या अध्यक्ष जुगु तले आःयागु चर्चा दु। नेपालय् बङ्गलादेश व श्रीलङ्काय् थे जुगु घटना वइगु स्थिति जुइ मखु। जिं आः नीनिलाया कार्यकाल दुने सङ्क्रणकालीन न्याययात क्वछिइ ज्या जुइ।”

संयोजक डा भट्टराई न निगु तधःगु दलया सरकारय् दुगुलि सङ्क्रमणकालीन न्याय क्वछिइगु कथं ज्या यायेगु  अवसर वंगुलि थःम्हेसिया न ग्वहालि याये धका धयादीगु खः। उगु ज्याझ्वलय् उगु पार्टी न उगु विधेयक पारित जूग्ुलि लसकुस यासे वइगु प्रक्रियाय् बृहत् सहमतिया नापं सत्यया अन्वेशण यायेत इनाप याःगु दु। उगु पार्टी न आयोग गठन याइगु इलय् राष्ट्रिय अन्तर्राष्ट्रियं स्वीकार्य याना तम्ह मनू ल्ययेत, आयोगय् पीडिततय्गु प्रतिनिधि तय्त व परिपूरणया विधि व मापदण्डबारे स्पष्ट यायेगु माग तःगु खः।

‘नेवाः सांस्कृतिक ज्ञानकोश’ थौ छगु ज्याझ्वः दथुइ पितब्वज्या जूगु दु। येँ महानगरपालिकाया ग्वाहालिं नेपालभाषा एकेदेमिं पिथंगु उगु ज्ञानकोशया विमोचन येँया राष्ट्रिय नाचघरय् जूगु दु।

उगु ज्याझ्वलय् जनकवि दुर्गालाल श्रेष्ठ, क्रोधकला शिरोमणि कालु कुम्हाः, संस्कृतिविद् यज्ञमानपति वज्राचार्य, साहित्यकार सुवर्णकेशरी चित्रकार, संगीतकःमि श्रीगोपाल प्रजापतिपिंसं मंकाः कथं सफूया उलेज्या यानादीगु खः।

नेवाःतय्गु बारे वृहद् रुपं म्हसीका बीगु थ्व सफू ‘नेवाः म्हसीका’, ‘संस्कृति व सम्पदा’, ‘भाषा, लिपि व साहित्य’, ‘म्ये, बाजं व प्याखं’ व ‘शिल्प, प्रविधि व ज्ञान’ यानाः न्यागू ब्वय् पिदंगु खः। ‘नेवाः म्हसीका’या विमोचन जनकवि श्रेष्ठ, ‘भाषा, ‘संस्कृति व सम्पदा’या विमोचन संस्कृतिविद वज्राचार्यं ‘भाषा, लिपि व साहित्य’ साहित्यकार चित्रकार, ‘म्ये बाजं व प्याखं’ वरिष्ठ संगीतकःमि श्रीगोपाल प्रजापति व ‘शिल्प, प्रविधि व ज्ञान’ क्रोधकला शिरोमणि कुम्हाः नं विमोचन यानादीगु खः।

उगु ज्याझ्वलय् ज्ञानकोशया परिकल्पनाकार व नेपालभाषा एकेदेमिया भाइस चान्सलर मल्ल के सुन्दरं थुगु सफू नेवाः भासं च्वयातःगु मात्र आखःग्वःया सफू जक मखु, थ्व नेवाःतय् वृहत् रुपं म्हसीका बीगु सफू खः धका धयादिगु खः। जनकवि दुर्गालाल श्रेष्ठ, येँ महानगरपालिकाया संस्कृति लिसे पर्यटन विभागया संयोजक व येँ महानगरपालिका ८ वडाया अध्यक्ष आशामान संगतपिंसं भिंतुना देछानादीगु खः। येँ महानगरपालिकाया उपमेयर सुनिता डंगोलया सभाध्यक्षताय् जुगु खः।

न्यागू ब्वय् पिदंगु ज्ञानकोशया न्यागुलिं सफू यानाः थ्यंमथ्यं नीच्यासः पृष्ठ दु। ज्ञानकोशया ‘नेवाः म्हसीका’ ब्वया संयोजन शाक्य सुरेन, ‘संस्कृति व सम्पदा’या संयोजन डा. चुन्दा वज्राचार्य, ‘भाषा, लिपि व साहित्य’या संयोजन प्रा. प्रेमशान्ति तुलाधर, ‘म्ये, बाजं व प्याखं’या संयोजन त्रिरत्न मानन्धर व ‘शिल्प, प्रविज्ञि व ज्ञान’या संयोजन विश्व शाक्यं यानादीगु खः।

मन्त्रिपरिषदं प्रधानमन्त्री केपी शर्मा ओलीया अमेरिका भ्रमण स्वीकृत याःगु दु। मन्त्रिपरिषद् बैठकं राष्ट्रसंघया महासभाय् ब्बति कायेगु निति प्रधानमन्त्रीया न्यूयोर्क भ्रमण स्वीकृत याःगु दु।

उगु भ्रमण टोलीइ परराष्ट्रमन्त्री आरजु देउवा राणा, प्रधानमन्त्रीया प्रमुख सल्लाहकार विष्णु रिमाल, परराष्ट्र सचिव सेवा लम्साल, प्रधानमन्त्री जहान राधिका शाक्य, निजी चिकित्सक न दुथ्याःगु दु।

राष्ट्रसंघया महासभा सेप्टेम्बर १० निसे २८ (२५ भदौनिसे १२ असोज) तक न्यूयोर्कय् जुइत्यःगु खः। समिट अफ द फ्युचर २२–२३ सेप्टेम्बर (६–७ असोज) जुइगु क्वछि धुकुगु दु। प्रधानमन्त्री कार्यालय स्रोतया कथं समिट अफ द फ्युचरय् सम्बोधन यायेगु कथं प्रधानमन्त्री अमेरिकाय् वनेत्यःगु खः।

ओलीें प्रधानमन्त्रीया कथं २०७५ असोजय् न राष्ट्रसंघ महासभाय् सम्बोधन याये धुकुगु दु।लिपागु इलय् असार ३० गते प्रधानमन्त्री जुयादीम्ह ओली विदेश भ्रमणय् वःगु मदुनि।

प्रधानमन्त्री केपी शर्मा ओलीनाप द्वन्द्वपीडित सङ्घं सङ्क्रमणकालीन न्यायसम्बन्धी आयोगया पदाधिकारी नियुक्ति गठन याउगुलि पीडित केन्द्रित भावनायात दुथ्याकेत माग याःगु दु।

प्रधानमन्त्री निवास, बालुवाटारय् थौ प्रधानमन्त्री ओलीयात ध्यानाकर्षणपौ लःल्यायेगु ज्या जुगु दु। उगु ध्यानाकर्षणपौ लःल्हासे सङ्घं सत्य निरुपण व मेलमिलाप आयोग व बेपत्ता जूयाच्वपि मनूत तयेगु छानबिन आयोग गठन याये वलय् राजनीतिक आधार मयासे पीडित तयेगु भावनायात निष्पक्ष कथं प्राथमिकता तइम्ह मनूयात महत्व बिइत इनाप याःगु दु।

उगु सम्बन्धी कानुन संसदपाखे पारित जूया वंगु थ्व हे भदौ १५ गते राष्ट्रपतिं प्रमाणीकरण याये धुकुगु दु। सङ्घया अध्यक्ष हिमाकुमारी घर्ती नेतृत्वया प्रतिनिधिमण्डलं बिउगु ज्ञापनपत्रय् २०६३ सालय् अन्तरिम राहतया निति सरकारं घोषणा याःगु छम्ह पीडितयात न्ह्यगू लाख ५० हजारमध्ये १ लाख ५० हजार जक ध्यवना काये धुकुगु दु सा ल्यःदनिइगु बिइत इनाप याःगु खः।

रेडियो नेपालया कार्यकारी निर्देशकय् अमरध्वज लामा नियुक्त जूगु दु।

थौ बिहीवाः च्वंगु मन्त्रिपरिषदया बैठकं लामायात रेडियो नेपालया कार्यकारी निर्देशकय् नियुक्त याःगु खः।