सञ्चार नापं सूचनाप्रविधिमन्त्री पृथ्वी सुब्बा गुरुङं सरकारी सञ्चार माध्यमतय्त सुं नं नेता तय्गु प्रचार मयाःसे मुलुकय् जूगु विकासया चर्चा यायेत इनाप यानादीगु दु।

सार्वजनिक सेवा प्रसारण नेपाल (पिएसबी) संस्थां थौं नेपाल टेलिभिजनय् ‘सार्वजनिक सेवा प्रसारण नेपाल रुपान्तरण बहसः विविधता, विशिष्टता, पहुँच, प्रभाव व प्रवद्र्धन’ विषयकय् ग्वसाःग्वःगु सहलह ज्याझ्वलय् सञ्चारमन्त्री गुरुङं सार्वजनिक सेवा प्रसारणं नेपाःया जनतातय् सः व जनताया प्रतिनिधित्व याइगु जूगुलिं आःया कार्यदिशायात ईकथं रुपान्तरण यायेत सुझाव बियादिल।

पिएसबीं न्ह्याकूगु मुद्दातय्के राष्ट्रिय एकताया भाव थनेगु, जनताया दुःख मर्कायात उलाः क्यनेगु, समृद्धि व सुशासनय् बः बिइगु कथंया विषयवस्तु जुइमाः धकाः मन्त्री गुरुङं धयादिल। रेडियो नेपाल व नेपाल टेलिभिजन तसकं पुलांगु सञ्चार माध्यम धकाः जक चित्त बुझे यानाच्वनेगु ई मखुगु धयादिसें वय्कलं आः युग अनुकूल जुइक ज्या सम्पादन यानाः धेंधेंबल्लाय् कुहाँवयेत सुझाव बियादिल।

मन्त्री गुरुङं धयादिल, “रेडियो नेपाल व नेपाल टेलिभिजन तसकं पुलांगु सञ्चार माध्यम जुयां जक मगात, आः ई कथं कार्यक्षमता क्यनाः न्ह्यावनेमाल।

”सञ्चार सचिव राधिका अर्यालं पिएसबीया पाय्छिगु मोडल कथंया ज्या यायेत सुझाव बियादिल। जनतां कायेखनेमाःगु पाय्छिगु सूचनाया अधिकारयात संरक्षण यायेमाः धइगु वय्कःया धारणा खः। पिएसबीयात आत्मनिर्भर यायेत आवश्यक रचनात्मक ज्याखँत नालाकायेमाःगुलिइ सचिव अर्यालं बः बियादिल। लिसें, विनियमावली दयेकेत व जनशक्तितय् पाय्छिकथं व्यवस्थापन यायेत मन्त्रालयं सक्रिय भूमिका म्हितावयाच्वंगु धयादिल।

पिएसबीया कार्यकारी अध्यक्ष डा महेन्द्र विष्टं जनता न्हाप धइगु भाव ज्वनाः पिएसबीया फुक्क ज्याझ्वः सिर्जना यायेगु कनादिसें थुकिया निंतिं विज्ञतलिसे सहलह जुइधुंकूगु कनादिल। नेपाल टेलिभिजन व रेडियो नेपाल आः जनताया सः पिज्वयेकेत कटिबद्ध जुइगु वय्कःया धापू खः।

सङ्घीय संसदया निगुलि हे सदनया बैठक थौ च्वनिइगु जुगु दु। प्रतिनिधिसभाया बैठक थौ सुथय् ११ः०० बजे च्वनिइगु जुगु दु सा राष्ट्रियसभाया बैठक न्हिनय् १ः१५ बजे च्वनिइगु जुगु दु।

प्रतिनिधिसभाया बैठकय् गृह मन्त्रालय, महिला बालबालिका लिसे ज्येष्ठ नागरिक मन्त्रालय, भौतिक पूर्वाधार लिसे यातायात मन्त्रालय व कृषि लिसे पशुपक्षी विकास मन्त्रालयसम्बन्धी न्ह्यसःया लिसः सम्बन्धित मन्त्रीं बिइगु सम्भावित कार्यसूचीइ दु।

च्वसापासाया ग्वसालय् भाषानिभाः प्रेम बहादुर कसाःया १०७ क्वःगु बुदिं (जन्मजयन्ती) तःजिक हंगु दु। च्वसापासाया दबुलिइ हंगु उगु बुदिं हना ज्याझ्वलय् च्वसापासाया नायः भुषणप्रसाद श्रेष्ठं भाषानिभाः कसाःया बारे नुगःखँ तयादिगु खः।

ज्याझ्वलय् लोककवि राजभाई जकःमिं भाषानिभाः कसाःयात कया च्वयादीगु चिनाखँ वाचन यानादीगु खः।

उगु ज्याझ्वलय् नेपालभाषा एकेदेमिया चान्सलर भाषाह्यःमि मल्ल के सुन्दर, भाइस चान्सलर पुष्पराज राजकर्णिकार, शाक्य सुरेन, माणिक उराय, महेशमान लँजुवाः, नारद बज्राचार्य, उर्मिला डंगोल, नांजाःम्ह कलाकार गणेश सायमि व पवित्र कसाः लगायतया ब्वति दूगु खः।

मन्त्रिपरिषद् बैठक थौ च्वनिइगु जूगु दु। प्रधानमन्त्री केपी शर्मा ओलीं थःगु सरकारी निवास बालुवाटारय् थौ बैठक सःतूगु दु।

उगु बैठकय् भारत–पाकिस्तान तनाव, गभर्नर नियुक्ति, वइगु आर्थिक दँया बजेट, सरकारया ज्या याःगु व समसामयिक राजनीतिकया विषय सहलह यायेत्यःगु दु।

पुलांम्ह मन्त्रीलिसें नेवाः न्ह्यलुवाः तीर्थराम डंगोल नेपाःया संविधानय् नेवाः तय्गु आदिभूमिइ नेवाः स्वायत्त राज्य माः धकाः माग याःगु आन्दोलनय् नेपाली कांग्रेसपाखें सम्भवतः नेवाः स्वायत्त राज्यया ध्वाँय् ज्वनाः क्वाहाँ वःम्ह न्हापांम्ह नेता जूगु विचाः नेवाः न्ह्यलुवाः मल्ल के सुन्दरं प्वंकादीगु दु।

डंगोल मदूगु झिंस्वन्हुया पुण्यतिथिया दिं थौं नेपाः ब्यांक्वयेटय् जूगु विचाः मुँज्याय् न्वःवासें न्ह्यलुवाः सुन्दरं थथे खँ तयादीगु खः। वय्कलं मदुम्ह तीर्थराम डंगोल नेवाः मुद्दाय् न्ह्याब्लें न्ह्यःने च्वनाः सः तइम्ह व्यक्ति जूगु विचाः प्वंकादिसें तीर्थराम डंगोलं आपालं आपाः नेवाः ख्यलय् ज्या सनावंगु खँ तयादीगु दु।

अथेहे, उगु ज्याझ्वलय् पुलांम्ह रक्षामन्त्रीलिसें नेपाली कांग्रेसया नेता भिमसेनदास प्रधानं तीर्थराम डंगोल छम्ह त्यागी नेता जूगु विचाः प्वंकादिसें वय्कलं पार्टीयात न्ह्यःने यंकेगु लिसेलिसें नेवाः तय्गु नितिं थःगु जीवन पानावंगु विचाः प्वंकादिल। न्हूदँ समारोह समिति ११४५ या नायः लिसें पुलांम्ह मन्त्री राजेन्द्र प्रसाद श्रेष्ठं तीर्थराम डंगोल राजनीतिज्ञ जक मखुसे आदिवासी जनजाति आन्दोलनया न्ह्यलुवाः जूगु विचाः प्वंकादीगु खःसा न्हूदँ संरक्षण समाजया कजि प्रा.डा. नरेशमान बज्राचार्यं तीर्थराम डंगोल हानं हानं नं थ्व ख्यलय् वयेमाःगु दनि धयादिसें डंगोलं यानादीगु योगदानयात कयाः चर्चा यानादीगु खः।

अथेहे, पुलाम्ह राज्यमन्त्री दीलीप महर्जन ,येँ महानगरपालिकाया पुलाम्ह मेयर बिद्या सुन्दर शाक्य, नेपालभाषा एकेदमिया भ्वाइस चान्सलर डा. पुष्पराज राजकर्णिकार, ज्यापु महागुथि नेपाःया नायः सत्यनारायण डंगोल, ज्यापु महागुथि नेपाः येँ महानगर समितिया नायः पंच महर्जन, न्हूदँ समारोह समितिया पुलांम्ह नायः प्रेमशान्ति तुलाधर, नेवाः देय् दबूया संरक्षक नरेश ताम्राकार, वल्र्ड नेवाः अर्गनाइजेशन नेपाः च्याप्टरया शाक्य सुरेन पिन्सं नं तीर्थराम डंगोलया योगदानयात कयाः थःथःगु नुगःखँ तयादीगु खः ।