Display Style:
Column Style
उचित व्यवस्थापन याना येँ १४ दिं स्वास्थ्य संकटकाल घोषणा यायेमा : प्रदेश सांसद शाक्य
नृपेन्द्रलाल श्रेष्ठ | ञंलाथ्व १५ ११४०,भाद्र १७ बुधवाः
वागमती प्रदेशया प्रदेश सांसद डाक्टर अजयक्रान्ति शाक्यं उचित व्यवस्थापन नाप येँ १४ दिंया लागि स्वास्थ्य संकटकाल घोषणा यायेमाः धका धयालिगु दु ।
‘थौंकन्ह्य अवस्था स्वये वलय् संक्रमण फैलैं जुइगु थाय् स्वया स्वास्थ्य संकटकाल घोषणा यायेगु हे उपयुक्त जुइ धका धयादिसे,’ वयकलं, ‘थुकि नागरिक तहपाखे न ग्वाहालिया आवश्यक माः । १४ दिं निसे २१ दिं तक स्वास्थ्य संकटकाल घोषणा याना ‘पव्लिक मोविलिटी’ पूर्ण रुपं नियन्त्रण याये फइधका धयादिगु दु
सांसद शाक्यं ‘संकटकाल घोषणा यायेगु लागि निन्हु स्वन्हु न्ह्यः हे सार्वजनिक सूचं बिया जनतायात छेँय् हे १४ दिं च्वनेगु लागि माःगु आवश्यक बस्तु व्यवस्थापन यायेत ई बिइमाः धका धयादिगु दु ।’ संकटकालया इलय् आः लकडाउन म्हो यायेगु थिक जुइ मखु धका न धयादिगु दु । ‘अति आवश्यक बाहेक पूर्ण रुपं निषेधाज्ञा पालना याये माः । थज्यागु कठिन अवस्थाय् युद्धया अवस्था लुमका सरकारं बिःगु आदेश जनतां थःगु कर्तव्य तायेका पूर्ण पालना यायेमाः धका धयादिगु दु,’ वयकलं, ‘थज्यागु इलय् न्हिया न्हिथं ज्या याना नइपि न्यूनवर्गयात १४ दिं छेँय् च्वना नयेगु बातावरण दयेकेत स्थानीयपिन्त स्थानीय सरकारं १४ दिंया लागि आवश्यक सामाग्री राहत स्वरुप उपलब्ध यायेमाः ।
न्हिया न्हिथं ज्या याना नइपिनिगु लागि संघीय व प्रदेश सरकारं उगु ईया लागि राहतया व्यवस्था यायेमाः । अथे जुल धाःसा उगु थासय् कोभिड–१९ या भाईरस न्यून जुया वनि उकि याना समुदाय स्तरय् संक्रमण फैलै जइ मखु ।’
सांसद डा.शाक्य १४ दिं निसे २१ दिं तक संकटाल लिपा छु भचा खुकुलो लकडाउन यायेत न सुझाव बियादिगु दु । ‘थज्यागु इलय् दुई चार घण्टा दक्को मापदण्ड पालना याका अत्यावश्यक ज्याया लागि खुकुलो यायेमाः । थुगु इलय् न स्वयं सेवक वा समुदायया मनू तयेस न संक्रमण अवस्थायात ध्यान बिया स्वये माः धका धयादिगु दु,’ वयकलं, ‘स्थिति विस्तारं सामान्य यायेत सहज रुपं न्ह्यने वने फइ ।’
कोरोना संक्रमणपाखे जुइ फइगु समुदाययात जोगे यायेत कन्टयाक टे«सिङया सुक्ष्म रुपं न्ह्यने यकेमाःगु सुझाव न बियादिगु दु । ‘उकिया लागि आवश्यक मात्राय् प्रत्येक स्थानीय तह नं स्वयसेवक दस्ता दयेका न्ह्यने वनेमाः । उकिया लागि स्थानीय समुदायया व्यक्ति, संघ–संस्था, अवकास काये धुकुपि शिक्षक, अवकास काये धुकुपि सुरक्षाकःमि लगायतपिन्त परिचालित
याये फइ धका धयालिगु दु ।
थज्यागु महामारी ईलय् संघ, प्रदेश वा स्थानीय सरकार याकचा जक प्रयास याना छु जुइ मखु । दक्को जाना थुगु अभियानय् वःसा जक ताःलाइ धका धयादिगु दु । वयकलं आइसोलेसन व क्वारेन्टीन निर्माण यायेत दकलय् न्हापा स्वास्थ्य मापदण्डय् ध्यान बिइमाः । थुकि होडबाजीया लागि व लोकप्रियताया नामय् जथाभावी आइसोलेसन व क्वारेन्टीन निर्माण याये मज्यू धका न बः बियादिगु दु ।
सांसद डा.शाक्यं कोभिडया सक्रमण फैलै मयायेत सूचं जक बिया मगाः कोभिड जुइ धुकुपिन्त न प्रोत्साहित जुइ कथंया सामाजिक चेतना मूलक सूचं व्यापक रुपं प्रचार यायेमाः धका सुझाव बिःगु दु ।
वीर अस्पतालय् ३९म्ह स्वास्थ्यकःमि संक्रमित, निन्हु ओपिडी बन्द
लहनान्युज | ञंलाथ्व १५ ११४०,भाद्र १७ बुधवाः
संक्रमण फैलि जुया वःगुलि वीर अस्पताल छगु सूचना जारी यासे अस्पताल ओपीडी सेवा निन्हु बन्द जुइगु जानकारी बिःगु दु ।
अस्पतालय् ११म्ह चिकित्सक नाप ३९म्ह स्वास्थ्यकःमिपिन्त संक्रमित जुगु दु । अन ७५म्ह स्वास्थ्यकःमिपि क्वारेन्टाइनय् च्वना च्वंगु दु ।
कोरोना संक्रमणया कारण जनशक्ति अभाव जुया वःगुलि वीरय् आः प्यःगु वार्ड सञ्चालनय् मदु । ल्याबया खुम्ह कर्मचारीयात कोरोना पोजेटिभ वःगुलि ल्याब सेवा न बन्द जुयाच्वंगु दु ।
सोमवाः न्यूरो व क्यान्सर वार्डया बिरामीपिन्त कोरोना पुष्टि जुगुलि उगु वार्ड न बन्द जुयाच्वंगु दु । फार्मेसीया कर्मचारीपिन्त न संक्रमण खनेदुगुलि उगु सेवा न बन्द जुगु दु । अस्पताल भर्ना जूपि बिरामीपि वासः यायेत पिने हे वने माः ।
आकस्मिक कक्षय् च्वपि स्वम्ह चिकित्सक न संक्रमित जुगुलि उगु आकस्मिक सेवाय् न प्रभावित जुगु दु ।
पेट्रोल लिटरं नितका थहा वन
लहनान्युज | ञंलाथ्व १४ ११४०,भाद्र १६ मंगलवाः
नेपाल आयल निगमं पेट्रोलया भाः थकाःगु दु ।
थौं मंगलवाः चान्ह्य निसे लागु जुइ कथं पेट्रोल लिटरं नितका थकाःगु दु ।
आः पेट्रोल छगु लिटर नितका थहा वःगुलि १०७ रूपैयाँ थ्यःगु दु ।
निगमया कथं डिजल, मचिकं, हवाइ इन्धन व ज्या थुइगु ग्यासया भाः यथावत् याःगु दु ।
इन्डियन आयल कर्पोरेसनपाखे न्हुगु भाःया वःगु सूची कथं पेट्रोलियम पदार्थया भाः थहा वःगु धका नेपाल आयल निगमया प्रवक्तां जानकारी बिःगु दु ।
थ्व स्वया न्ह्यः पेट्रोल लिटर १०५ रूपैया कायम याना तःगु खः ।
येँ निम्ह नाप देय् यकं झींछम्ह मन्त
लहनान्युज | ञंलाथ्व १४ ११४०,भाद्र १६ मंगलवाः
वःगु २४ घण्टाय् कोरोना भाइरसया संक्रमणं झींछम्ह मनू मन्त ।
स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमया कथं कोरोना संक्रमण आःतक सीपि २३९ म्ह थ्यःगु दु ।
थौ सीपि प्यदँया छम्ह मचा नाप मेपि झींम्ह मनू सीगु दु धका प्रवक्ता गौतमं जानकारी बिःगु दु ।
कोरोना संक्रमण मदुपि महोत्तरीया ३७ दँ, सिराहा ६५ दँ, पर्साय् ५३, ८० व ६० दँ, बाराय् ६० दँ, चितवनया ५२ दँ, येँ ७० व ३५ दँ नाप मकवानपुरया ५८ दँ दुम्ह मदुगु खः ।
थौं तक ४० हजार ५२९ म्हेसित कोरोना भाइरसया संक्रमण जुगु दु सा संक्रमित जुया मदुपि ० दशमलव ५९ प्रतिशतय् दु ।
कोरोनायात याकन बुका जनताया सेवाय् याकन वये : मेयर शाक्य
नृपेन्द्रलाल श्रेष्ठ | ञंलाथ्व १४ ११४०,भाद्र १६ मंगलवाः
येँ महानगरपालिकाया मेयर विद्यासुन्दर शाक्यं कोरोनायात परास्त याना याकन हे जनताया सेवाय् लिहा वयेगु विश्वास प्वका दिगु दु ।
मेयर शाक्य थौं छगु विज्ञप्ति पिकया थथे विश्वास प्वकादिगु खः । वयकलं छिकपिनिगु निरन्तर ग्वाहालि समर्थन व जि प्रति क्यनादिगु सद्भावं जित थप ऊर्जा प्राप्त जूगु दु धका धयादिसे वयकलं जारी याःगु विज्ञप्तिइ उल्लेख याना तःगु दु, “थुगु ऊर्जां कोरोनायात परास्त यायेगुलि जित थप हौसला प्राप्त जूगु दु धका धाःगु दु । जिं याकन हे कोरोनायात परास्त याना छिकपिनिगु सेवाय् समर्पित जुइगु विश्वास प्वकादिगु दु ।
मेयर शाक्य तसक सावधानी अपने याना कोभिड–१९ यात नियन्त्रण व व्यवस्थापन नाप कोरोनाया कहरपाखे येँ व स्वनिगलय् च्वपिन्त जोगे यायेगु लागि चाःन्हि थःगु थासं खटे जुया च्वनागु इलय् थःत संक्रमण पुष्टि जूगु स्मरण यानादिगु दु ।
थौं कन्ह्य हलियकं कोरोनाया कहर दु । नेपालय् न न्हिया न्हिथं कोरोना संक्रमितपिनिगु ल्याः अप्वोया वनाच्वंगु दु । संघीय राजधानी स्वनिगलय् नाप येँ महानगरपालिकाय् तक संक्रमितपि ल्याः न्हिया न्हिथं अप्वया वना च्वंगु दु धका धयादिगु खः ।
वयकलं थज्यागु जटिल परिस्थितिइ तक उच्च सावधानी अपने याना कोभिड–१९ यात नियन्त्रण व व्यवस्थापन नाप कोरोनाया कहरपाखे येँ व स्वनिगलय् च्वपिन्त जोगे यायेगु बिचारं न्ह्यने वना च्वंगु अवस्थाय् थःत संक्रमण पुष्टि जुल धका धयादिगु खः ।
मेयर शाक्यं जारी याःगु विज्ञप्तिइ भदौ १४ गते आइतवाः वयकलं थः तिरिमय्जु यात एक सय डिग्री स्वया अप्वो ज्वरो वःगुलि निम्ह नियमित परीक्षणया लागि ग्रान्डी अस्पताल वना परीक्षण यानागु इलय् कोरोना पोजेटिभ खने दुगु धका धाःगु खः ।
