Display Style:
Column Style
याक मिसापिनिगु भत्ता दइ कथं कानुन संशोधन यायेत निर्देशन
लहनान्युज | तछलाथ्व तृतीया ११४०,जेठ १२ सोमवाः
प्रतिनिधिसभा कानुन न्याय तथा मावअधिकार समितिं सामाजिक सुरक्षा भत्ता सम्बन्धी सामाजिक सुरक्षा ऐन २०७५ यात संशोधन यायेत विधेयक संसदं थुगु हे अधिवेशनय् हयेत सरकारया ध्यानाकर्षण याःगु दु ।
उगु समितिं थौं सोमवाः च्वंगु बैठकं असहाय एकल तथा विधवा मिसा व अपांगता जुपिं मनू तयेनदँत बिया वयाच्वंगु सामाजिक सुरक्षा भत्तायात निरन्तरता बिइगु लागि ऐन संशोधन यायेत विधेयक चालु अधिवेशनय् पेश यायेत गृह मन्त्रालयया ध्यानाकर्षण याःगु दु ।
निदँ न्ह्यः संसदपाखे पारित याःगु ऐनय् एकल मिसा भत्ता ६० दँय लिपा जक काये दइगु व्यवस्था याःगु खःसा उगु ऐन कार्यन्वयन यायेत सरकारं पत्राचार याःगु खः । उगु परिपत्रया विरोध लिपा सरकारं ऐन संशोधन यायेगु तयारी याःगु खः ।
सामाजिक सुरक्षा ऐन २ निदँ न्ह्यः पारित जुगु खःसा संसदया राज्य व्यवस्था समितिं कमजोरी याःगु धका सांसदपिन्स धाःगु खः । उगु कमजोरीया कारण आ सरकार विवादय् वःगुलि ऐन भिंकाः प्रक्रिया न्ह्याके त्यःगु खः ।
कोरोना भाइरसं सीपि प्यम्ह थ्यन
लहनान्युज | तछलाथ्व तृतीया ११४०,जेठ १२ सोमवाः
कोरोना भाइरसया कारणं नेपालय् सीपि प्यम्ह थ्यःगु दु ।
उम्ह मनू वीगञ्जया नेसनल मेडिकल कलेजय् वासः याका च्वम्ह जेठ ४ गते सीगु खः ।
स्वास्थ्य तथा जनसंख्या मन्त्रालयं उम्ह मनू कोरोनाया संक्रमणया कारणं सीगु धका थौं जक पुष्टि याःगु खः ।
सीम्ह संक्रमित बाराया करैयामाई गाँउपालिका–७या उम्जनया ७०दँया मिजं खः ।
त्रिवि शिक्षण अस्पतालय् पीसीआर जाँच याइगु
लहनान्युज | तछलाथ्व तृतीया ११४०,जेठ १२ सोमवाः
त्रिवि शिक्षण अस्पतालय् थौं न निसे आरटी–पीसीआर विधिपाखे कोरोना परीक्षण सुरु याये त्यःगु दु ।
शिक्षण अस्पताल च्वंगु पीसीआर मेसिन तन्हु निसे स्यना च्वंगुया कारण सेवा सुरु मजुगु खः।
कीर्तिपुरय् च्वंगु माइक्रोबायोलोजी विभागया ट्रफल रिसर्च प्रोगामय् च्वंगु पीसीआर मेसिन महाराजगञ्जय् सारे याना थुगु सेवा सुरु याये त्यःगु खः ।
कीर्तिपुरया हे टोलीपिन्स च्यान्हु बिका थुगु ल्याब तयार याःगु खः ।
मेसिन स्थानान्तरण लिपा प्राविधिक कमिटी गठन याना परीक्षण सुरु यायेत राष्ट्रिय जनस्वास्थ्य प्रयोगशाला तक अनुमति बिइ धुकुगु दु ।
उगु ल्याबय् छकल हे ९६ नमूनाया परीक्षण याये फइगु थुगु मेसिनय् कम्ती न २४ गु नमूना जम्मा जुलकि परीक्षण यायेगु नियम दयेका तःगु दु ।
बाराय् छन्हुहे २३ म्ह संक्रमित
लहनान्युज | तछलाथ्व तृतीया ११४०,जेठ १२ सोमवाः
थौं बाराय् जक छन्हु हे २३ म्ह कोरोना संक्रमण पुष्टि जुगु दु ।
स्वास्थ्य तथा जनसंख्या मन्त्रालयं थौं सोमवाः सुथय् ७२ म्हेसित संक्रमण पुष्टि जुगु धका सार्वजनिक याःगु खः । थौं संक्रमण जुपि ७२ मध्ये २३ म्ह बारायापि धका धाःगु खः ।
किटजन्य रोग अनुसन्धान तथा तालिम केन्द्र हेटौंडाय् याःगु परीक्षण कथं बाराया महागढीमाई नगरपालिकाइा–२१म्ह व राष्ट्रिय जनस्वास्थ्य प्रयोगशाला काठमाडौंय् याःगु परीक्षणय्, कलैया नगरपालिका–१, कोतवालीया निम्हसित संक्रमण खनेदुगु धका धाःगु खः ।
थौं संक्रमित जुपि १८ दँया प्यम्ह, १९ दँया निम्ह, २० दँया स्वम्ह, २४ दँयापि निम्ह, २५ दँयापि प्यम्ह, ३६ दँयापि निम्हेसित जुगु धका धाःगु खः ।
अथेहे २६, ३०, ३१, ३२, ४० व ५० दँया छम्ह छम्हेसित कोरोना संक्रमण पुष्टि जुगु धका धाःगु खः ।
टोखाय् संक्रमितम्ह किराना पसः दुम्ह व ज्योतिष
लहनान्युज | तछलाथ्व तृतीया ११४०,जेठ १२ सोमवाः
थों येँय् कोरोना भाइरसाया संक्रमण जूपिं टोखा नगरपालिकायय् च्वपि छम्ह किराना पसः दुम्ह व मेम्ह ज्योतिष जूगु दु ।
उगु नगरपालिकाया ६ वडाया ४१ दँया मिजंम्ह पसः दुम्ह व ३ वडायाम्ह २७ दँया संक्रमितम्ह ज्योतिष खः ।
निम्ह संक्रमितपिं नाप स्वापू दूपि नाप वःपिनि कन्ट्याक्ट ट्रेसिङ यायेगु ज्या जुयाच्वंगु दु ।
