Display Style:
Column Style
थौं प्रधानमन्त्रीं मन्त्रिपरिषदको बैठक सतल
लहनान्युज | चिल्लागा त्रयोदशी ११४०
प्रधानमन्त्री केपी शर्मा ओलीं मिर्गौला पुनः प्रत्यारोपण लिपा दकलय् न्हापां मन्त्रिपरिषदको बैठक थौं सतुःगु दु ।
मिर्गौला प्रत्यारोपणया लागि त्रिवि शिक्षण अस्पतालमा भर्ना जुइगु छन्हु न्ह्यः वःगु फागुन १८ गते बालुवाटारय् मन्त्रिपरिषदया बैठक सतःगु खः ।
उगु बैठकं कोरोना संक्रमण नेपालय् मवयेकेगु लागि माःगु तयारी यायेत उपप्रधानमन्त्री ईश्वर पोखरेलया संयोजकत्वय् उच्चस्तरीय समन्वय समिति गठन याउगु खः ।
चिकित्सकपिनिगु सल्लाह कथं प्रधानमन्त्रीयात संक्रमणपाखे बच्चे याउगु लागि छलफल व बैठक मयायेत सुझाव बिउगुया कारण मन्त्रिपरिषद बैठक च्वना मच्वंगु खः ।
थौंया मन्त्रिपरिषद बैठकं कोरोना संक्रमणया हे सन्दर्भय् छु महत्वपूर्ण निर्णय याये त्यःगु दु ।
येँ महानगरया मास्क व स्यानिटाइजर छ्वल
लहनान्युज | चिल्लागा द्धादशी ११४०
येँ महानगरं दक्को वडाय् द्धःछि मास्क व आधा लिटरया निगु थान स्यानिटाइजर छ्वःगु दु ।
थःथे छ्वःगु मास्क वितरण व स्यानिटाइजरयात छ्यलिगु वडा समितिया निर्णय बमोजिम याइ, महानगरया निमित्त प्रमुख प्रशासकीय अधिकृत राजेश्वर ज्ञवालीं जानकारी बियादिगु दु ।
महानगरया दक्को वडाय् बिपद् व्यवस्थापन तथा नागरिक सुरक्षा समिति गठन याये धुकुगु दु ।
वडांं समिति नाप समन्वय याना मास्क वितरण याइ धका, निमित्त प्रमुख प्रशासकीय अधिकृत ज्ञवाली धाःगु दु ।
जिमिसं हरेक वडा सहित वातावरण व्यवस्थापन बिभागया लागि स्वद्धः मास्क छ्वयाःगु दु ।
महानगरया सहरी स्वास्थ्य महाशाखाया प्रमुख नरेन्द्रबिलास बज्राचार्यं वडापाखे प्रभावकारी वितरण याइ धका जिमिसं भलसा यानागु दु धयादिसे निगु स्यानिटाइजर मध्ये छगु वडाया क्लिनिक व छगु वडा कार्यालयया लागि धका धयादिगु खः । महाशाखां सहरी स्वास्थ्य क्लिनिकया अतिरिक्त मेगु २१ गु थासय् स्वास्थ्य सहायता कक्ष सञ्चालनया तयारी दु ।
मास्क, स्यानिटाइजर, प्रचार सामाग्री, थर्मल गनसहित सहायता कक्षया सेवाग्राहीें आशंका निवारण यायेगु ज्या जुइ धका धयादिगु दु ।
कोरोनाबिरुद्ध सामाजिक सञ्जालय् झूठ प्रचारयाम्हेसित प्रहरी ज्वन
लहनान्युज | चिल्लागा द्धादशी ११४०
कोरोना भाइरस (कोभिड १९) जोडे याना सामाजिक सञ्जालय् झूठ प्रचार जुया च्वंगु द ।
थ्व हे झ्वलय् झूठ प्रचार याम्ह छम्हेसित प्रहरीं ज्वःगु दु ।
नेपालय् संक्रमण मजुकेत सरकारं अन्तराष्ट्रिय हवाई उडान नाप ताहाक चले जुइगु यात्रा व अत्यावश्यक बाहेक सेवा बन्द यायेगु घोषणा याउगु दु । कोरोना भाइरसया संक्रमण मनू तयेगु
आवत जावतपाखे फैले मजुइमा धका सरकारं थःथे घोषणा याउगु खः ।
तर, समाजिक सञ्जालय् कोरोना संक्रमणबारे म्यासेन्जर, भाइबर व हृवाट्सएपय् मखुगु खँ भाइरल जुयाच्वंगु खः ।
झुठ प्रचार जुगु : नर्भिक हस्पिटलमा ६ म्ह कोरोना खनेदुगु ।
झुठ प्रचार जुगु निगु : चान्ह्य १२ बजे विशेष सैन्य हेलिकोप्टरं कोरोना भाइरसविरुद्ध वासः ह्वलिगु, छेबँय् न पिह वयेमते ।
झुठ प्रचार जुगु स्वगु : टेकु अस्पतालय् प्लास्टिक चिना तःपि न्याम्हसिया लाश खनेदु । १७ म्ह पशुपतिइ च्याके धुकुगु दु ।
थुगु स्वगुलि छु न सत्य मखु ।
संक्रमण खने दुगु धका प्रचार हल्ला जक खः धका शनिवाः न्हिनय् नर्भिक अस्पतालं छगु वज्ञप्ति जारी याना आतक सु न बिरामीयात संक्रमण लुगु मदुनि धका प्रष्ट याउगु दु ।
अथेहे, कोरोना संक्रमण जुगु मजुगु जाँच यायेगु छगु जकः निकाय खः, राष्ट्रिय जनस्वास्थ्य प्रयोगशाला, टेकु । थ्व बाहेक मेगु गन न ल्याब वा अस्पतालयात कोरोना संक्रमण जु मजुगु जाँच यायेगु अनुमति मदु ।
झुठ प्रचार यागु अभियोगय् रामेछापय् च्वम्ह ख्वपया सिपाडोल च्वना च्वम्ह २० दँया विवेक थापा मगरयात नेपाल प्रहरीं साइबर ब्यूराें ज्वःगु दु ।
अथेतु, चान्ह्य नेपाली सेनाया हेलिकप्टरं वासः ह्वलिगु दु धका प्रचार न गलत खः धका नेपाली सेनाया प्रवक्ता एवं सहायक रथी विज्ञानराज पाण्डें खण्डन याउगु दु । सेनां पिथःगु विज्ञप्तिं थःथे झुठ प्रचारया विश्वास मयायेत सकसित इनाप याःगु दु ।
चैत ९ निसे १८ गते तक हवाई उडान स्थगित
लहनान्युज | चिल्लागा एकादशी ११४०
सरकारं थ्व हे वइगु चैत ९ निसे १८ गत तके दक्को हे हवाई उडान व ताःहाक चले जुइगु बसया ब्यवस्गा स्थगित याइगु दुु ।
थौं शुक्रवाः देशबासीया नामय् संबोधन यानादिसे प्रधानमन्त्री केपी शर्मा ओलीं चैत ९ निसे १८ गते तक हवाई उडान व ताहाकः चले जुइगु बसया चले मयाइगु जुगु दु ।
अथेहे, सरकारं दक्कोे सीमाया नाकाय् वइपिनिगु मनू तयेत अनिवार्य स्वास्थ्य जाँचया व्यवस्था यायेगु प्रधानमन्त्री ओलीं जानकारी बियादिगु खः ।
येँ महानगरपालिकाया मेयर बिद्यासुन्दर शाक्यया इनाप
नृपेन्द्रलाल श्रेष्ठ | चिल्लागा एकादशी ११४०
वंगु छुं ई न्ह्यवंनिसें विश्वन्यंकं महामारी जुयाः न्यना वनाच्वंगु कोभिड–१९ (कोरोना भाइरस) या ग्याःचिकुं देय् छगुलिं भयभीत जुयाच्वंगु दु । संघीय राजधानी समेत दुगु येँ महानगरपालिका थ्व ग्याःचिकुपाखें बिस्कं लाइगु खँ हे मन्त । थन महानगरया थः हे स्ववासीलिसें देय्न्यंकंया नागरिकत नं थीथी पेशा व्यवसाय यानाः च्वनाच्वंगु दु ।
विदेशी नागरिकत वये–वने जुइगु मू केन्द्र समेत जूगु कारणं विश्वव्यापी महामारीया रूपय् न्यना वनाच्वंगु कोभिड–१९ (कोरोना भाइरस) या संक्रमण थन याकनं न्यना वने फइगु खतरायात ध्यानय् तयाः झी सकलें सजग जुइमाःगु अतिकं आवश्यक खनेदु ।
उकिं संक्रमण खने दये न्ह्यः हे झी सकलें नागरिकत सजग जुल धाःसा यक्व हद तक थुकियात न्यूनीकरण याये फइगु सम्भावना नं दइ । थ्व संक्रमण अप्वः भीडभाड जुइगु थासय् याकनं न्यना वनीगु जूगुलिं संघीय सरकारं पित बिउगु सूचंया लिधंसाय् फयांफछि अप्वः सचेत जुइत सकल नगरवासीयात दुनुगलंनिसें इनाप यानाच्वना ।
येँ महानगरपालिका देय्या छगू महत्वपूर्ण सांस्कृतिक नगर जूगु कारणं थनया मौलिक परम्परा, संस्कृति व सम्पदा ल्यंकेगु नं उतिकं तःंधंगु दायित्व दु । थीथी इलय् न्यायेकीगु थनया विशिष्ट जात्रापर्वया लिसें मूर्त अमूर्त सम्पदाया संरक्षण व सम्बद्र्धन यायेगु तःधंगु दायित्व नं झीगु ब्वहलय् दु । थौंकन्हय् न्ह्यःने वयाच्वंगु पाहाँचः¥हे, घोडेजात्रा, जनबहाःद्यः सालीगु थेंज्याःगु मौलिक जात्रापर्वत आपालं जनसहभागिता दथुइ तःजिक न्यायेकेगु झीगु परम्परा खः ।
तर आःया विषम परिस्थितिइ थथे आपालं मनूतय् दथुइ भीडभाड यानाः जात्रापर्व न्यायेकेगु अवस्था झीथाय् मदयाच्वंगुलिं थःगु मौलिक कला, संस्कृति व परम्पराया विधियात यथावत तसें थुगुसी छकः भीडभाड यानाः अज्याःगु जात्रापर्व मन्यायेकेत नं सकल संस्कृतिह्यमिपिंत दुनुगलंनिसें इनाप यानाच्वना ।
उलि जक मखु, थन थीथी धर्म, संस्कृति माने याइपिं समुदाय नं उलि हे दु । देगः, गुम्बा, चैत्य, मस्जिद, चर्च थेंज्याःगु धार्मिकस्थलय् थःगु परम्परा कथं मुनेगु व पुजाआजा यायेगु नं झीगु पुलांगु हे चलन खः । तर धार्मिकस्थलय् अथे भीडभाड जुइबलय् नं ल्वय् न्यना वनीगु सम्भावनायात ध्यानय् तसें धार्मिकस्थलय् भीडभाड यानामदीत नं दुनुगलंनिसें इनाप यानाच्वना ।
लिसें, सार्वजनिक भ्वय्, पुजाआजा थेंज्याःगु संस्कारजन्य ज्याझ्वःत नं यक्व मनू सःताः मयायेत व अज्याःगु ज्याझ्वलय् ब्वति मकायेत नं इनाप यानाच्वना ।
येँ महानगरपालिकां कोरोना भाइरस पनेया लागिं सूचनामूलक सन्देश डिजिटल बोर्ड, पर्चा, पम्प्लेट नेपाली व नेपालभाषा निगुलिं भासं प्रकाशन यानाः महानगरन्यंकं जनचेतनामूलक अभियान न्ह्याकाच्वंगु दु । उकिं थुज्वःगु सकारात्मक सूचं त्वाःत्वालय् चुक–चुकय् थ्यंकाः ग्वाहालि यानादीत सकसितं इनाप यानाच्वना ।
येँ महानगर दुनेया फुक्कं वडाय् दुगु विपद् व्यवस्थापन समितियात समेत महानगरपालिकां सक्रिय यानाच्वंगु जूगुलिं अज्याःगु समितिलिसे नं आवश्यक समन्वय यानाः न्ह्याः वनेत अपिल यानाच्वना । थः जःखः सुयातं कोरोना संक्रमणया शंका जूसा येँ महानगरपालिकाया ग्वाहालिइ सञ्चालित एम्बुलेन्स सेवा (१०२) व महानगरया टोल फ्रि नम्बर ११८० स खबर व सुचं बियादीत नं सकसितं इनाप यानाच्वना ।
बिद्या सुन्दर शाक्य
प्रमुख
तिथिः चिल्लागा ११, ने.सं. ११४०
मितिः २०७६÷१२÷७
