Display Style:
Column Style
कीर्तिपुर अस्पतालय् बागमती प्रदेशया मन्त्री अबलोकन
नृपेन्द्रलाल श्रेष्ठ | दिल्लाथ्व पुन्ही ११४०,असार २१ आइतवाः
बागमती प्रदेश सरकारया सामाजिक विकास मन्त्री माननीय युवराज दुलालं कीर्तिपुर अस्पतालया अबलोकन याःगु दु । कीर्तिपुर नगरपालिकाया ग्वाहालि नकतिनि न्ह्याःगु हेमोडायलाइसिस यूनिटया नाप आइसियू, इमर्जेन्सि व थीथी वार्डया न अवलोकन याःगु द ।
सामाजिक विकास मन्त्री दुलालं कीर्तिपुर अस्पताल सञ्चालन याःगु फेक्टका नेपाल अध्यक्ष डा.भरत प्रधान, डाइरेक्टर गौरी प्रधान, अस्पतालया नि.निर्देशक डा. पेरु प्रधान, कीर्तिपुर नगरपालिकाया मेयर नाप कीर्तिपुर अस्पतालया अध्यक्ष रमेश महर्जन, उप-प्रमुख सरस्वती खड्का, पूर्व नगर प्रमुख हिराकाजी महर्जन, सुरेन्द्र मानन्धर, दिलिप महर्जनपिन्स न सहलह
यानादिगु खः ।
उगु सहलह झ्वलय् भौतिक संरचनाया नाप माःगु पूर्वाधार पूरा जुइ धुकुगु अवस्थाय् न ने पाल सरकारं थुगु अस्पतालया १०० गू शैया स्वीकृत मबिगु अवस्थाया जानकारी यासे कीर्तिपुर अस्पतालयात प्रदेश स्तरीय अस्पताल घोाषणा याये माःगु माग न याःगु दु ।
थौं २३२म्हेसित कोरोना संक्रमण पुष्टि
लहनान्युज | दिल्लाथ्व चतुर्दशी ११४०,असार २० शनिवाः
वःगु २४ घण्टाय् थप २३२म्हेसित कोरोना भाइरस (कोभिड(१९) या संक्रमण पुष्टि जूगु दु ।
देय् यकंया प्रयोगशालाय् जूगु परीक्षणय् ४०५० म्हेसित याःगु खः ।
उगु नमुना परीक्षणय् २३२म्हेसित संक्रमण पुष्टि जूगु दु । थ्व नाप नेपालय् कोरोना संक्रमितपि १५४९१ म्हेसित जुगु धका स्वास्थ्य तथा जनसंख्या मन्त्रालयं धाःगु दु ।
थौं निम्ह सीगु दु धका स्वास्थ्य तथा जनसंख्या मन्त्रालयं धाःगु दु ।
थौं गोरखा, पालुङटारया ४४ दँ दुम्ह मिजंम्ह व रुपन्देही, देवदेहया ७५ दँ दुम्ह मिजंम्हसित कोरोना संक्रमणं सीइगु खः ।
गण्डकी प्रदेशय् थप १६म्हेसित कोरोना संक्रमण पुष्टि
लहनान्युज | दिल्लाथ्व चतुर्दशी ११४०,असार २० शनिवाः
गण्डकी प्रदेशय् थप १६म्हेसित कोरोना संक्रमण पुष्टि जूगु दु । प्रदेश क्षयरोग केन्द्र पोखरा, पोखरा स्वास्थ्य विज्ञान प्रतिष्ठान व भरतपुर अस्पताल चितवनय् याःगु परीक्षणय् गण्डकी प्रदेशया खुगु जिल्लाय् १६म्हेसित कोरोना संक्रमण खनेदुगु खः ।
शनिवाः कोरोना संक्रमण पुष्टि जूपि न्ह्यम्हेसित नवलपरासीयापि खः । देवचुली नगरपालिकाय् नीम्ह निसे ३९ दँयापि न्याम्हमिजंपि ३० व २५ दँया निम्ह मिसापिन्त कोरोना संक्रमण पुष्टि जूगु खः । उपि चितवनय् परीक्षण याःगु खः ।
अथेहे, कास्कीइ निम्ह मिजंम्हेसित कोरोना संक्रमण पुष्टि जूगु खः । म्याग्दीइ स्वम्ह, बागलुङय् निम्ह, बरेङ व ढोरपाटन नगरपालिकाय् छम्ह छम्हसित कोरोना संक्रमण पुष्टि जुगु खः ।
स्याङ्जा व तनहुँय् निम्ह, स्याङ्जा पुतलीबजार व तनहुँ भिमादय् छम्हेसित मिजंम्हेसित कोरोना खने दुगु खः ।
गण्डकी प्रदेशय् कोरोना संक्रमितपि १०७९म्ह थ्यःगु दु । उकि मध्ये स्वम्ह संक्रमितपि वासः यायेगु झ्वलय् मदुगु खः । कोरोना भाइरसया वासः याका छेँय् लिहावःपि २९६म्ह दु ।
कान्ति अस्पतालय् छम्ह मचायात कोरोना संक्रमण
लहनान्युज | दिल्लाथ्व चतुर्दशी ११४०,असार २० शनिवाः
महाराजगञ्जया कान्ति बाल अस्पतालय् वासः याका वयाच्वम्ह छम्ह १३ महिना मचायात कोरोना भाइरसया संक्रमण खनेदुगु दु ।
शुक्रवाः कोरोना पुष्टि जुम्ह उम्ह मचायात वःगु आइतवाः वासः यायेगु लागि उदयपुर थन हःगु खः । कोरोना पुष्टि जुगु लिपा बलम्बुया युनिफाइड अस्पतालय् छ्वःगु दु ।
अस्पतालया निर्देशकं कान्ति अस्पतालय् थ्व न्हापागु संक्रमण खने दुगु पुष्टि यासे, उम्ह मचाया अवस्था सामान्य जूगु धका धाःगु दु ।
अस्पतालया निर्देशकया कथं उम्ह मचाया हिंया कमी, ज्वरो वःगु समस्या जुगुलि शंका वना आइसोलेसनय् तया तःगु खः ।
वयागु सोमवाः कोरोना परीक्षणया लागि थ्रोट स्वाब संकलन याःगु खः । मचाया रिपोर्ट पोजेटिभ वःगु खः ।
सुदूरपश्चिम प्रदेशय् ५१५म्हेसित कोरोना संक्रमण
लहनान्युज | दिल्लाथ्व त्रयोदशी ११४०,असार १९ शुक्रवाः
राष्ट्रिय जनस्वास्थ्य प्रयोगशाला येँ, पाटन अस्पताल प्रयोगशाला यल, शिक्षण अस्पताल प्रयोगशाला व धनगढीया प्रयोगशालाय् याःगु परीक्षणय् थौं छन्हु हे ५१५म्हेसित कोरोना संक्रमण खने दुगु दु ।
राष्ट्रिय जनस्वास्थ्य प्रयोगशालाय् १४७म्ह, त्रिवि शिक्षण अस्पतालय् ९६म्ह, पाटन अस्पतालय् २०७म्ह व धनगढीया सेती प्रादेशिक अस्पताल प्रयोगशालाय् ६५म्हेसित कोरोना संक्रमण पुष्टि जुगु धका स्वास्थ्य तथा जनसंख्या मन्त्रालयं धाःगु दु ।
सुदूरपश्चिमय् दकलय् अप्व अछाम जिल्लाय् २३०म्हेसित संक्रमित जुगु दु । अथेहे कैलालीइ ५८म्ह, बाजुराय् ५३म्ह, डोटीमा ४७म्ह, कञ्चनपुरय् ४५म्ह, बैतडीइ ४०म्ह, डडेल्धुराय् २८म्ह व बझाङय् १४ म्हेसित संक्रमित खनेदुगु खः ।
थौं शुक्रवाः दकलय् अप्व संक्रमितपि अछामया साँफेबगर नगरपालिकाय् ५२म्ह, चौरपाटी गाउँपालिकाय २४म्ह, ढकारी गाउँपालिकाय् २७म्ह, मङ्गलसेन नगरपालिकाय् २९म्ह, तुर्माखाँद गाउँपालिकाय् १९म्ह, मेल्लेख गाउँपालिका १५ म्हेसित कोरोना संक्रमित जूगु दु ।
अथेहे बान्नीगढी जयगढ गाउँपालिकाय् २९म्ह, कमलबजारय् न्ह्यम्ह व पञ्चदेवल विनायक नगरपालिकाय् खुम्हेसित संक्रमणया पुष्टि जूगु धका जिल्ला स्वास्थ्य कार्यालय अछामया सूचना अधिकारी धाःगु दु ।
