Display Style:
Column Style
ग्यासया भाः कुहावल, डिजेल व पेट्रोलया भाः थहा वन
लहनान्युज | गुंलाथ्व षष्ठी ११३९ (अगष्ट ६ २०१९)
नेपाल आयल निगमं पेट्रोल व डिजेल नाप मचिकंया भाः थकाःगु दु । पेट्रोल लिटरय् छतका, डिजेल व मचिकंलय् ५० पैसा थकाःगु दु ।
अथेहे एलपी ग्यासया भाः प्रतिसिलिन्डर २५ तका क्वः काःगु दु । आः पेट्रोलया भाः प्रतिलिटर १०९ थ्यःगु दु सा डिजेल व मचिकं ९७ तक थ्यंगु दु ।
भाः कुहा वया आः छगः सिलिन्डर ग्यासया लागि द्धःछि व ३७५ तका थ्यंगु दु ।
हवाई ईन्धनया हकय् न्हापाया भाः यथावत हे तःगु दु ।
महर्जनया सफू व सिडि पिदन
लहनान्युज | गुंलाथ्व षष्ठी ११३९ (अगष्ट ६ २०१९)
रीता महर्जनया खसभाषाया सिडि म्येचाः व नेपालभाषाया चिनाखँया सफूया छगु ज्याझ्वः दथुइ पितब्वज्या जूगु दु ।
श्री सीता स्मृति संगीत, किपूया ग्वसालय् जुगु उगु ज्याझ्वलय् गोल्डेनभ्वाइस अफ नेपाल प्रेमध्वज प्रधान, साहित्यकार नारायणदेवी श्रेष्ठ, वरिष्ठ च्वमि यादव खरेल, शम्भुजीत बास्कोटा, किरण खरेल, सितारवादक तारावीरसिंह तुलाधर, कवि रत्नसमशेर थापापिसं कवयित्री महर्जनं च्वायदिगु सफू ‘अन्तः मनया मौन अभिव्यक्ति’ व ‘यो साँझको मधुरिम छटामा’ सिडि म्येचाः मंकाः कथं पितब्वज्या यानादिगु खः ।
अथेहे उगु ज्याझ्वलय् बरिष्ठ म्येहालामि योगेश वैद्यया च्वसा पिदंगुगु थ्व म्येचाः वय्कःया बुदिंया लसताय् पितब्वज्या यागु खः । थुगु सिडिइ गुपु म्ये दुथ्यानाच्वंगु दु ।
उगु ज्याझ्वलय् सितारवादन तारावीर सिंह तुलाधरयात अभिनन्दन नं याःगु खः ।
अथेहे उगु ज्याझ्वलय् म्येहालामि योगेश वैद्यया बुदिं हना ज्याझ्वः नं जूगु खः । थःगु जीवनय् थथे तःजिगु व अजूचायापुगु बुदिं जूगुलिं अतिकं लसतां जाःगु खँ बैद्यं कनादिल ।
इन्द्र मालीं महर्जनया चिनाखँय् भाव, मतिनाया पीडा नापं सुमधुर संगीतया समिश्रण दुगु खँ धयादिल । स्वास्थ्यया हुनिं वय्कः ज्याझ्वलय् ब्वतिकयादी मफुगुलिं वय्कलं भिडिओ सन्देश मार्फत उगु खँ न्ह्यब्वयादीगु खः ।
कवयित्री प्रतिसरा सायमिं न्ह्याकादीगु उगु ज्याझ्वलय् कवि रत्न समशेर थापाया सभाधक्ष्यताय् जुगु खःसा निता रञ्जितं सुभाय् न्वचू तयादीगु खः ।
निर्देशनयात कयाः सरकारं नाला मकाःगुलिं समन्वय समिति असन्तुष्ट
लहना न्यूज | ने.सं. ११३९ गुंलाथ्व पञ्चमि (५ अगष्ट, २०१९), सोमवाः
राष्ट्रियसभा अन्तर्गतया राष्ट्रिय सरोकार तथा समन्वय समितिं थःगु निर्देशनयात कयाः सरकारं नाला मकाःगुलिं असन्तुष्टि प्वंकूगु दु ।
फास्ट ट्राय्क, बुढी गण्डकी आयोजना व निजगढ अन्तर्राष्ट्रिय विमानस्थलय् स्थानीयया समस्या याकनं ज्यंकेत ब्यूगु उजं आःतक नं कार्यान्वयन मजूगुलिं समितिं असन्तुष्टि प्वंकूगु खः ।
समितिं सर्वसाधारणया प्रत्यक्ष सरोकारया विषय जूगुलिं गुलिफु उलि याकनं ज्यंकत निदेर्शन याःसां नं सम्बन्धित मन्त्रालयं समितिया निर्देशनया कार्यान्वयन याःगु मदुनि ।
समितिं थःगु वार्षिक प्रतिवेदन तयार यायेत न्ह्यज्यानाच्वंगु समितिं निर्देशन कार्यान्वयन जुइमफूगु विषययात प्राथमिकताय् तसें उकियात कयाः सरकारयात थप जिम्मेवारी दयेकेगु कुतः याइगु जूगु दु । वार्षिक प्रतिवेदनया मस्यौदायात कयाः सहलह यानाच्वंगु समितिं दुजःपिनिगु छ्यातालिसें छवाःया दुने क्वःछिनाः राष्ट्रियसभाय् न्ह्यब्वयेगु तयारी याःगु दु ।
समितिं तहगत राज्य संरचनाया विकासय् समन्वय, राष्ट्रिय सम्पदा, मानवाधिकार नापं परराष्ट्र सम्बन्ध, सन्धी सम्झौताया कार्यान्वयनया अवस्था, समन्यायिक विकासया अवस्था, ल्यूने लानाच्वंगु क्षेत्र, समुदाय, संस्कृति, राष्ट्रिय गौरवया आयोजना, राष्ट्रिय सुरक्षा व संवैधानिक आयोग सम्बन्धी विषयत थुगु समितिया क्षेत्राधिकार दुने लानाच्वंगु दु ।
लुँया भाः न्हुगु रेकर्ड कायम
लहनान्युज | गुंलाथ्व पंचमी ११३९ (अगष्ट ५ २०१९ं
नेपाःया बजारय् लँु या भाः न्हुगु रेकर्ड तयेगु झ्वलय् न्ह्यने लाना च्वंगु दु । थौ सोमवाः लुँया भाः ईतिहास हे न्हुगु कायम जुगु दु ।
थौं पित बिउगु नेपाल सुन चाँदी व्यवसायी संघं छापावाल लुँया भाः छगु तोलाया ६७ द्धःच्यासः कायम याःगु दु ।
म्हिगः आइतावाः लुँया भाः न्हुगु रेकर्ड कथं ६६ द्धः स्वसःया भावं कारोबार जुगु खः ।
अथेहे सोमवाः तेजाबी लुँया भाः छगु तोलाया ६७ द्धः व न्यासः थ्यंगु दु । वःगु शुक्रवाःलुँया भाः ६५ द्धः व च्यासः नं कारोवार जुगु खः ।
परम्परागत बाजंया संरक्षण यासें मतयाः
नृपेन्द्रलाल श्रेष्ठ | गुंलाथ्व पंचमी ११३९ (अगष्ट ५ २०१९ं
नेवाः समाजय् सलंसः न्ह्यःनिसें न्ह्याना वयाच्वंगु तर थौंकन्हय् न्हना वनाच्वंगु परम्परागत बाजं यलय् दँय् दसं ब्वज्या याना वयाच्वंगु दु । थ्यं मथ्यं १४५० दँ न्ह्यःनिसें यलय् मदिक्क न्ह्याना वयाच्वंगु परम्परागत, ऐतिहासिक, लोकंह्वाःगु न्यकू जात्रा मतयाः अर्थात श्रृङ्गभेरी–दीपयात्रया झ्वलय् अजाःगु न्हना वनाच्वंगु बाजंया ब्वज्या यानावया च्वंगु दु ।
यलया झिगू त्वालं पालंपाः न्ह्याका वयाच्वंगु उगु नखःमदुपि निगु लुमन्तिइ हिन्दू व बौद्ध धर्मालम्बीतसें शहरया बौद्ध मठ, मन्दीर, चैत्य, बहाः बही चाःहिलाः हनेगु याइ । नापं थःपिनिगु पाःलाःपिन्सं न्हना वनाच्वंगु बाजं मंगः बजाः, कोन्ति, बुंगः, स्वयम्भूइ वनाः ब्वज्या याइ । थुकिया नितिं थ्यं मथ्यं झिला न्ह्यःनिसें उगु बाजं थाय्गु स्यनेगु याइ ।
नौ बाजा कथं लोकंह्वाःगु जूसां नं उगु पुचलय् झिंच्यागू परम्परागत बाजंया ब्वज्या जुइ । मेय्या न्यकूपाखें दय्कातःगु विशेष ताजिया बाजंया नापनापं मृदङ्ग, धाः बाजं, दम्वःखिं, दबदब, कासीबाजं, ढोलक, क्वःखिं, नगरा, ज्वःनगरा, मगःखिं, संघबाजं, ब्याबाजं, नाय्खिं, खैजडी, म्वाय्लि, खिं, धिमय्, दहलिसेंया गुलिखय् न्हनावना च्वंगु बाजं उगु इलय् थानाः ब्वज्या याइगु खः ।
थ जाःगु महत्वं जाःगु बाजंया विशेष ब्वज्या थुगुसि मतयाः पाः फइगु त्वाःहौगः त्वालय् जूगु दु । वाङमय शताब्दीपुरुष डा. सत्यमोहन जोशी, प्रदेशसभाया दुजःपिं ज्ञानेन्द्र शाक्य, शोभा शाक्य, यल महानगरपालिकाया उपप्रमुख गीता सत्याल, वडाध्यक्षया नापनापं झिगू त्वाःया प्रतिनिधि पिनिगु उपस्थिति दुगु खःसा उगु ब्वज्याय् हौगःत्वाःया झिदँ दुपिं कलाकारनिसें ख्वीदँ दुपिं कलाकारतसें उगु परम्परागत बाजंया विशेष ब्वज्या जूगु खः ।
यल नगर लागाया झिगू त्वाःनक बहील, मंगः, चक्रबही, नागबहाः (इखाछेँ), बुबहाः, हौगः, ओकुबहाः, इखा लखु, क्वःबहाः व सौगःत्वालं पालां थुगु नखःहना वयाच्वंगु खः । ऐतिहासिक परम्परागत संस्कृति, सम्पदा ल्यंका तय्गु ज्याय् न्हूगु पुस्ताया सहभागिता महत्वपूर्ण जुइगु नापं झिदँय् छक्वः पाः वइगु जूगुलिं त्वाःया सामाजिक, आर्थिक ह्यूपालय् नं तःधंगु भूमिका म्हितीगु स्वभाविक खः ।
मतयाःपर्व न्ह्याकेगु नितिं थौंकन्हय् थ्यंमथ्यं २०÷२२गू लखतका खर्च जुइगु जूगुलिं छगू त्वालं जक याय् फइगु अवस्था मदु । झिगू त्वाः मध्ये दकलय् चीधंगु व म्हो जक जनसंख्या दुगु हौगः त्वालं थुगुसिया मतयाः पर्व हनीगु खः । थुगुसी श्रृङ्गभेरी मतयाः पर्व वइगु साउन ३२ गते सञ्चरवाः लाःगु दु ।
