Display Style:
Column Style
ल्वहंकःमि (शिल्पकार) सेवा समाजया झिंन्याक्वःगु दँमुँज्या
लहनान्युज | पोहेलागा एकादशी ११४० (जनवरी २० २०२०)
ल्वहंकःमि (शिल्पकार) सेवा समाजया झिंन्याक्वःगु दँमुँज्या ल्वहंकःमितय्गु दिगुद्यः मणिद्वःस झिंन्याक्वःगु दँमुँज्या जुल ।
समाजया नायः मोतिलाल शिल्पकारया सभाध्यक्षताय् जूगु उगु ज्याझ्वलय् पाहाँकथं बाराही समाजया नायः पुष्परत्न बाराही, सिकःमि समाजया नायः विष्णुलाल सिकःमि, ताम्रकार समाजया
नायः रविन्द्रराज ताम्रकार, मणिद्वं संरक्षण समितिया नायः राजेश तण्डुकार झायादीगु खः ।
ज्याझ्वलय् एसईई, दस प्लस दुई, स्नातक व स्नातकोत्तर उतीर्ण जुयादीपिं शिल्पकार ब्वँमिपिन्त हनापौ लःल्हाय्गु ज्या जूगु खः । प्यंगू तगिमय् हे दकलय् अप्वः ल्याः हयाः पास जुयादीपिं छम्ह छम्ह ब्वँमिपिन्त मोति सिरपाः कोषया दाता मोतिलाल शिल्पकारं ‘मोति शिक्षा सिरपाः’ व हनापौ लःल्हानादीगु खः । अथे हे समाजया ज्याजंक्व यानादीधुंकूपिन्त दोसल्लां न्यय्काः हनेगु ज्या जूगु खः ।
थ्व हे झ्वलय् समाजया आर्थिक प्रतिवेदन दांभरि सुरेन्द्र शिल्पकार व प्रगति विवरण मूछ्याञ्जे अनिल शिल्पकारं न्ह्यब्वयादीगु खः । थुगु दँमुँज्यापाखें धर्मरत्न शिल्पकारया अध्यक्षताय् न्हूगु ज्यासना पुचः नं ल्यय्गु ज्या जूगु खः ।
न्हूगु ज्यासना पुचलय् सुरेन्द्र शिल्पकार न्वकू, निलन शिल्पकार मूछ्याञ्जे, दिलमोहन शिल्पकार छ्याञ्जे व सानुराज शिल्पकार दांभरि जुयादीगु दु । अथे हे दुजलय् हिराशोभा शिल्पकार, तेजेन्द्र शिल्पकार, प्रेमबहादुर शिल्पकार, यस कुमार शिल्पकार, कपिल शिल्पकार, अनुजा शिल्पकार च्वनादीगु दु ।
उदाय् समाजया झिंन्हय्क्वःगु दँमुँज्या
लहनान्युज | पोहेलागा एकादशी ११४० (जनवरी २० २०२०)
उदाय् समाजया झिंन्हय्क्वःगु दँमुँज्या जुल । दँमुँज्याया उलेज्या उदाय् समाजया नायः डा. रुपज्योति कसाः नं त्वाःदेवा च्याका यानादीगु खः ।
समाजया न्वकु डा. प्रेमरत्न स्थापितं लसकुस यानादीगु उगु ज्याझ्वलय् समाजया मूछ्याञ्जे राजु कुमार कसाःजुं वार्षिक प्रगति प्रतिवेदन न्ह्यब्वयादीगु खः । थुकथं हे दँ मुँज्याय् समाजया दांभरिं प्रवीणरत्न तुलाधरं आर्थिक प्रतिवेदन न्ह्यब्वयादीगु खः । निगुलिं प्रतिवेदन सर्वसम्मतं पास जूगु खः ।
मुँज्याय् सच्छिदँ दय्धुंकूम्ह मोतिकृष्ण तुलाधरयात दोसल्ला न्ययका हनेज्या याःगु खः । अथे हे पुष्कर न्हूच्छेमाया जिथि हना, पुण्यलक्ष्मी जिथि हना, उदाय् ज्याथः हना, फरककथं जीवन हनाच्वंपिं अशक्त हःपाः, याकः मिसा हःपाः लःल्हानादीगु खः ।
थुकथं हे कुलरत्न तुलाधर इन्जिनियर हना, चिनिमाया तुलाधर डाक्टर हना, बुद्धिरत्न हेराशोभा सिरपाः, हर्षमान अष्टमाया सिरपाः, मणि ज्ञानु (सरोज) सिरपाः, भारत रत्न सिरपाः, अमर कमला सिरपाः, हर्षरत्न लक्ष्मी प्रभा सिरपाः, चैत्य हिरा सिरपाः, मैत्रीरत्न नेपालभाषा सिरपाः, भिक्षु हिरा ताम्राकार साहित्य सिरपाः लःल्हानादीगु खः । सिरपाः उदाय् समाजया नायः डा. रुपज्योति कसाःजुं लःल्हानादीगु खः ।
दँ मुज्याँ ज्याया झ्वलय् असंबाजं गुथि व न्यत तुलाधर गुंलाबाजं खलःपिन्सं गुंलाबाजंलिसें नेवाः म्ये हाय्का न्यंकेगु ज्या नं जूगु खः । ज्याझ्वलय् उदाय्तय्गु राष्ट्रिय म्येया रुपय् विकास याःगु उदाय् म्ये हालाः ज्याझ्वः शुरु याःगु खः ।
गैंडाकाेटय् मंकाः इहि
लहनान्युज | पोहेलागा दशमी ११४० (जनवरी २० २०२०)
नेवाः मिसा दबू गैडाकोट नगरसमितिया ग्वसालय् वंगु माघ ३ व ४ गते मंकाः इहि संस्कार क्वचाःगु दु । श्रीराम पार्टी प्यालेसय् जूगु उगु ज्याझ्वःया उलेज्या गैंडाकोट नगरपालिकाया उपमेयर विष्णुकुमारी कँडेल सापकोटां यानादीगु खःसा वय्कलं तजिलजि ल्यंकातयेगु नितिं दबूया थुगु सक्रियतायात च्वछायादिल ।
ख्वपया पण्डित हरिशरण राजोपाध्यायं १३ म्ह मिसा मस्ततय्त इहि याकादीगु खः । ज्याझ्वलय् दबूया अध्यक्ष सिता श्रेष्ठं नेवाः संस्कृति संरक्षणया नितिं मयजुपिं हे न्ह्यां वनेमाःगु धासें थजाःगु पवित्र ज्याय् सकसिगु ग्वाहालि माःगु व दुगु खँ न्ह्यथनादिल । थुकथंया ज्याझ्वलं आत्मविश्वास तनेगु ज्या जूगु कनादिसें थुगु ज्याय् ग्वाहालि यानादीपिं सकलसित सुभाय् नं देछानादिल ।
सः छगू फरक अभिव्यक्तिया ग्वसालय् चिबाखं मुँज्या
लहनान्युज | पोहेलागा दशमी ११४० (जनवरी २० २०२०)
सः छगू फरक अभिव्यक्तिया ग्वसालय् १४ क्वःगु चिबाखं मुँज्या यलया तँलाछेँ, इखा लखुइ जूगु दु ।
उगु ज्याझ्लय् बाखं च्वमिपिं निर्मल बज्राचार्य, बसन्त नकःमि, दिल कुुमारी डंगोल स्वम्हेसिया थःथःपिनिगु बाखं ब्वनाः न्यंकादीगु खः ।
ज्याझ्वलय ब्वति काःपिं मध्ये छम्हेसित गोला प्रथां पाखे पूर्णिमा शाक्ययात व स्वम्ह च्वमिपिन्त मतिनाया चिं सुधिर ख्वविं लःल्हानादीगु खः ।
अथेहे मोक्ष बहादुर अमात्यं स्वम्हं च्वमिपिन्त खादां क्वखायेकाः नगद दां नं लःल्हानादीगु खः ।
स्वम्हसिगुं बाखंया समिक्षा साहित्यकार धु्रव मधिकःमिं यानादिगु खः । उगु ज्याझ्वः समाश्री न्ह्याकादीगु खः ।
बुखँ : नेवाः सूचना केन्द्र
किपा : राजेन्द्र रञ्जित
छत्रपाटी चिकित्सालय् हाड जोनी स्वास्थ्य शिविर जुल
लहनान्युज | पोहेलागा दशमी ११४० (जनवरी २० २०२०)
छत्रपाटी निःशुल्क चिकित्सालयय् नं छगु हाड जोर्नी तथा नशा ल्वय् व सर्जरी संबन्धि निःशुल्क स्वास्थ्य शिविर याःगु दु ।
उगु शिविरय् वरिष्ठ हाड जोर्नी तथा नशा रोग विशेषज्ञ डा.राजेन्द्र मान प्रधान, डा. अनुज राज बिजुक्छे, डा. अनिल शाक्य व डा. निरज श्रेष्ठ नाप जनरल सर्जन डा. किशोर मानन्धर, डा. निरज बनेपाली, डा. जितेन्द्र सिंह, डा. बिमल कुमार शाह व डा. उदिता मिश्रं स्वास्थ्य परिक्षण यानादिगु खः ।
उगु स्वास्थ्य शिविरय् १५५ म्ह मनु तयेत निःशुल्क स्वास्थ्य परिक्षण याउगु खः ।
शिविरय् निःशुल्क Video X-ray, BMDT व वासः नाप Lab Test, X-ray, Physiotherapy सेवाय् ३० प्रतिशत छ्यापंया व्यवस्था याउगु खः ।
