Display Style:
Column Style
खोकना ज्येष्ठ नागरिकपिन्त हना
सुरज, लहनान्युज | पाेहलागाः सप्तमी ११४० (जनवरी १७ २०२०)
खोकना जन स्वयम् सेवा समितिं थःगु न्हय्क्वःगु बार्षिक उत्सवया लसताय् खोकनाया ज्याजंकु क्वचाःपिं ज्येष्ठ नागरिकपिन्त हंगु दु । ज्याझ्वलय् ५१ म्ह भाजु व १०२ म्ह मय्जु यानाः मुक्कं १५३ म्ह ज्येष्ठ नागरिकपिन्त हंगु दु ।
संस्थाया अध्यक्ष बेखामुनी महर्जनया अध्यक्षताय् जूगु थुगु ज्याझ्वलय् खोकना देय् थकाली न्हूच्छेलाल डंगाल मूपाहाँसुइ जूगु खःसा विशेष अतिथिकथं समाजसेवी उर्मिला डंगोल, वरिष्ठ कलाकारपिं किरण के.सी., सुरेन्द्र के.सी, वडा नायः रविन्द्र महर्जन, नेवाः देय् दबू प्रदेश सदस्य व ज्यापु महागुथि यलया उपाध्यक्ष शरणगोपाल डंगोल, समाजसेवी विश्वरत्न तुलाधर, वडा सदस्यपिं श्यामकृष्ण महर्जन, ज्ञानभक्त महर्जन व हेलिनशोभा महर्जनपिं झायादीगु खः ।
ज्याझ्वलय् समाजसेवी सन्तोषकुमार अग्रवालं लुमुगु ज्याकेगु लःल्हानादिलसा थुगु ज्याझ्वलय् यमन श्रेष्ठ, किरण श्रेष्ठ, दिपा महर्जन, किशोरकुमार, व खोकनाया सिकाई ब्याण्डं सांगीतिक प्रस्तुति नं ब्यूगु खः । २१ ग्रुप प्रोपर्टी डिलर्स प्रा.लिं, लुभुपाखें दोसल्ला देछाःगु ज्याझ्वलय् विन्टर सोलुसन, याक आउटडोर एण्ड एडभेन्चर्स गियर प्रा.लि.पाखें तपुली लःल्हाःगु खः । थुकथं हे चन्देश्वरी डंगोलं रुमाल, कृष्ण शरण डंगालं मोजा व तारेमाम तेल मिल, खोकनाया नरेश महर्जनं चिकं लःल्हानादीगु खः ।
ज्याझ्वलय् यमन श्रेष्ठ, किरण के.सी., दिपा महर्जन, किशोर कुमार व सिकाली ब्याण्डं सांगीतिक प्रस्तुति नं न्ह्यब्वयादीगु खः ।
येँ महानगरपालिकाया खुक्वःगु नगर सभा क्वचाल
लहनान्युज | पोहेलागा चौथी ११४० (जनवरी १३ २०२०)
येँ महानगरपालिकाया खुक्वःगु नगर सभां महानगरपालिकाया भौतिक पूर्वाधार बिकास कार्यक्रम पाखें ४५ करोड ६० लाख रुपैयाँ, सम्पत्ति खरिदपाखे २७ करोड रुपैयाँ, सामाजिक बिकास कार्यक्रमपाखे १ करोड ६७ लाख रुपैया नाप खुगु शीर्षकया संशोधन याना थौं राष्ट्रिय सभा गृहलय् क्वचाःगु खः ।
महानगरया प्रमुख बिद्यासुन्दर शाक्यया अध्यक्षताय् जुगु उगु सभां संशोधित बजेटय् स्वास्थ्य सम्बन्धि कार्यक्रमपाखे ८ करोड ४४ लाख रुपैयाँ, शिक्षापाखे ५० लाख रुपैयाँ व चालु खर्चपाखे १ करोड रुपैयाँ संशोधन याउगु खः ।
चालु आर्थिक वर्षय् स्वीकृत बजेटय् थीथी शीर्षकय् खर्च मजुगु रकम घटे याना तत्काल कार्यान्वयन यायेत जरुरी महत्वया कार्यक्रम थपे याउगु खः ।
थथे बजेट थपे यायेगु ज्याझ्वलय् वडास्तरीय पूर्वाधार बिकास, सांस्कृतिक तथा पर्यटन प्रबर्धन ज्याझ्वः, महानगर बिशेष पूर्वाधार ज्याझ्वः खः । अथेहे, वडा २३ व ३० या कार्यालय भवनया लागि जग्गा तथा भवन खरिद, वडा १६ या भवन निर्माण, पार्किङ भवन निर्माण, जेष्ठ नागरिक मनोरञ्जन तथा सेवा केन्द्र स्थापना, स्कूलय् कम्प्युटर ल्याब व बिद्युतीय व्यवस्थापन प्रणाली स्थापना लगायत ज्याझ्वः दुथ्यागु खः ।
कान्ति बाल अस्पताय् हिंया कम्पोनेन्ट छुटे यायेगु उपकरण खरिद, गंगालाल अस्पतालय् अक्सिजन प्लान्ट खरिद तथा सञ्चालन, सामुदायिक स्वास्थ्य क्लिनिकया स्तरोन्नति लगायतया
ज्याझ्वः यात शंशोधित बजेटय् दुथ्याकुगु दु ।
लेखा समितिया संयोजक ध्रुव त्रिपाठी, बिधायन समितिया संयोजक नरेशमान महर्जन व शुशासन समितिया संयोजक हुमादेवी आचार्यं बार्षिक प्रगति प्रतिवेदन न्ह्यब्बयादिगु खः ।
यंगालय् शहिद धर्मभक्त माथेमा पार्क
लहनान्युज | पोहेलागा चौथी ११४० (जनवरी १३ २०२०)
जहानियाँ राणा शासन विरुद्धको क्रान्तिइ जीवन बलिदान यानादीम्ह शहीद धर्मभक्त माथेमा जन्म जूगु यंगाः त्वालय् वय्कःया हे नामं छगू न्हूगु कथंया पार्क दयेकूगु ज्या जुगु दु । येँ महानगरपालिकां दयेकूगु थुगु पार्क थ्वहे वइगु शहीद दिवस कुन्हु येँ मनपाया मेयर विद्यासुन्दर शाक्यं उलेज्या याइगु ग्वसाः दु ।
पार्कय् शहीद धर्मभक्त माथेमाया म्हं छम्हं दुगु छगू झ्वाता नं पलिस्था जुइ । पार्क दुने झ्वाता धस्वाके धुंकूगु दुसा आः शहीद दिवस कुन्हु उलेज्या जक जुइ ल्यं दनि ।
तर थ्व पार्क मेमेगु पार्क थें केवल झासु लनेगु पार्क जक धाःसा मखु । थ्व पार्कया क्वय् छगः तग्वःगु भूमिगत लः ट्यांकी नं दइ गुकियात उगु लागाय् गनं छेँ मिं नइगु थेंज्याःगु तःधंगु घटना जुल धाःसा प्रयोग याये फइ ।
२३ वडाया ओमबहाः, यंगाः त्वालय् आपालं चीधंगु गल्लि, चुक, बहाः, बहीत दु । मालीगु इलय् अन दमकल नं यंके फइ मखु । उकिं अज्याःगु थासय् गनं छेँ मिं नल धाःसा तुरुन्त हे मि स्यायेगु लागिं उगु ट्यांकीया लः छ्यलेगु ताः तयाः उगु ट्यांकी दयेकूगु खः ।
थ्व लः ट्यांकीइ ३० हजार लिटर लः न्ह्यं । २३ वडाया वडा अध्यक्ष मचाराजा महर्जनं कनादी कथं थुकी वाति लः मुंकाः जायेकेगु जुइ । थ्व ट्यांकीया पाइपय् मेथाय् यंके जिउ कथं मेगु पाइप स्वानातःगु दइ । थ्व पाइपया नापं वडापाखें छगः ल्ह्वनाः यंके जिउगु पम्पया नं व्यवस्था यानातःगु दु ।
थ्व पम्पं ९–१० तल्ला तक लः छ्वाके फइ । पार्कय् च्वंगु ट्यांकीइ लगातार १ घन्टा तक छ्वाके फइगु लः मुनाच्वंगु दइ । थुकिया नापनापं उगु लागाया थीथी चुक व बहालय् मेगु स्वंगः ति चिचीग्वःगु ट्यांकी नं दयेकेगु ग्वसाः दु । यदि पार्कया तग्वःगु ट्यांकीया लखं मगात धाःसा थ्व चिचीग्वःगु ट्यांकीया लः नं छ्यले फइगु खँ नं वडा अध्यक्ष महर्जनं कनादिल ।
विपद्या इलय् छ्यले फइगु लः ट्यांकी नापं दुगु थज्याःगु पार्क नेपाःया हे न्हापांगु खः ।
येँ महानगरपालिकां करिब ५० लाख तकाया लागतय् थ्व पार्क दयेकूगु खः । पार्कया डिजाइन यानादीम्ह इन्जिनीयर लिसें कामपा सहरी योजना आयोगया दुजः सजिव शाक्यया कथं पार्क दुने परम्परागत नेवाः शैलीया छगू सतः नं दइ गन मनूत याउँक झासु लने फइ । अन दुने छगू ई–ट्वाइलेट नं दइ । पार्क च्वंगु ट्वाइलेट, क्यब व मेमेगु यचुपिचुया ज्या यायेत वहे ट्यांकीया लः छ्यलेगु याइ । थ्वहे वइगु माघ १० गते उगु ट्यांकीया लः छ्यलाः मि स्यायेगु विधिया छगू परीक्षण ज्याझ्वः नं जुइत्यंगु दु ।
पार्क दुने शहीद धर्मभक्त माथेमाया म्हं छम्हं दुगु शालीक छगू नं दइ । कलाकार मदन तुलाधरं उगु शालीक दयेकादीगु खः । माघ १६ गते शहीद दिवस कुन्हु उगु शालीकया नं उलेज्या जुइ । वि.सं. १९६६ आश्विन ९ गते ओमबहालया नःबहिली जन्म जुयादीम्ह धर्मभक्त माथेमायात ३१ दँया वैंशय् वि.सं. १९९७ माघ १३ गते येँया सिफलय् फाँसी बिउगु खः ।
वय्कलं जोरगणेशस्थित थः हे निनिया छेँय् भेला यासें वि.सं. १९९३ सालय् नेपाःया न्हापांगु राजनीतिक संगठन नेपाल प्रजापरिषद् गठन यानादीगु खः । वय्कलं तत्कालीन जुजु त्रिभुवनया व्यायाम प्रशिक्षक जुयाः जुजुयात नापं प्रजापरिषद्या दुजः दयेकुसें प्रजातन्त्र स्थापनाया लागिं प्रतिबद्ध यानादीगु खः ।
सरकारं मथुसा जनतां छाँया सेन्टर थुनिइ
नृपेन्द्रलाल श्रेष्ठ | पोहेलागा तृतिया ११४० (जनवरी १३ २०२०)
येँ महानगरपालिका १६ वडा दुने थँबही भगवान बहाः न्ह्यःने ऐतिहासिक पलेस्वां पूखु न्हंकाः दयेकुगु छायाँदेबि कम्लेक्सया बिरुद्ध थौं सोमवाः छगू पत्रकार सम्मेलन याःगु दु । उगु पत्रकार सम्मेलनपाखें ठमेलय् च्वंगु पुरातात्विक कमल पुखूयात पुर्नस्थापना याना अन न्हापा थे पुखू हे याये माःगु माग यासे थीथी प्रमाणत सार्वजनिक याःगु दु ।
उगु अभियानया कजि भागवत नरसिंह प्रधानं गुठी संस्थानय् दुगु २०४२ सालया नापी शाखाया फिल्ड बुक कथं हे पुखू उल्लेख दुगु व मोही उल्लेख मजुगु भ्वंत पित ब्यूगु खः ।
ठमेलय् पुरातात्विक कमलपोखरी पुनस्थापना अभियानया कजि भागवत नरसिंह प्रधानं छायाँदेवी कम्प्लेक्स निर्माण जुगु थाय् ऐतिहासिक कमलपोखरीया तथ्य न्ह्य ब्बया उगु भवन थुना हे त्वःतिगु धका धयादिगु खः ।
कजि प्रधानं १५ द्धः मनू तयेगु ल्हाःचिं दुगु प्रधानमन्त्री केपी शर्मा ओलीयात ध्यानकर्षण याकागु धका जानकारी बियादिसे सम्पदाय् याइगु थथे अतिक्रमण विरुद्ध कडा पलाः तयेगु लागिु लिमचिदिगु धका न धयादिगु खः ।
‘ऐतिहासिक पुरातात्विक कमलपूखूयात छायाँ कम्प्लेक्स दयेकेगु ज्या जुगु दु थुगु भवनयात सरकार मथुसा जनतां हे थुनु धका धयादिगु खः ।’ कजि प्रधानं छायाँ कम्प्लेक्सबारे अदालतं फैसला पियाच्वनागु खः न कनादिगु खः ।
उगु पत्रकार सम्मेलनय् पित ब्यूगु प्रेस विज्ञप्तिं ठमेल (थँबहि) या म्हसिका , कमलपोखरी व डिलया ऐतिहासिक व धार्मिक महत्व , केशर शमशेरया अनधिकृत ज्यात, राजगुठी कायम, धर्मलोप मुद्दाया व्यहोरा , अनधिकृत राजीनामा, गुठीया अनधिकृत कार्य, गुठी पाखें रैतानी बदर, मोही मलाइगुे कानूनी प्रावधानत , गुठियारत नाप मिलापत्र याःगु नाप थीथी बिबरण न्ह्यब्वःगु दु ।
पवित्र कसाःयात तीर्थ हिरा सिरपाः
लहनान्युज | पोहेलागा द्धितिया ११४० (जनवरी १२ २०२०)
थुगुसिया म्येहालामि, संगीतकःमि पवित्र कसाः ‘तीर्थ–हिरा सिरपाः’पाखें सम्मानित जुयादिल ।
मंकाः धुकू बचत तथा ऋण सहकारी संस्था लिमिटेडं थुगुसिया तीर्थहिरा सिरपाः संगीतकःमि पवित्र कसाःयात लःल्हाःगु खः ।
संस्थाया दँ मुज्याय् जूगु उगु ज्याझ्वलय् येँ महानगरपालिकाया प्रमुख विद्यासुन्दर शाक्यं कसाःयात सिरपाः लःल्हानादिल ।
प्रमुख शाक्यं सम्मानित कसाःयात हनापौलिसें स्वीद्वः तका दां नं लःल्हानादीगु खः ।
ज्याझ्वलय् राजा शाक्यं सम्मानित जुयादीम्ह कसाःया म्हसीका न्ह्यब्वयादीगु खः ।
थुगु सिरपाः भाषासेवी भाइराजा तुलाधरं थः मां व अबुया नामय् नीस्वनातःगु खः ।
थुगु हे दँ मुँज्यां बालकृष्ण प्रजापतियात हे हाकनं संस्थाया न्हूम्ह नायः नं ल्यःगु दु ।
