Display Style:
Column Style
नेवाः सूचना केन्द्रया निक्वःगु दँमुँज्या
लहनान्युज | गुंलाथ्व चौथी ११३९ (अगष्ट ४ २०१९)
‘थःथः सहलह ब्याके नेवाः ज्याझ्व फयां फछि मल्वाके’ धैगु नारा ज्वना न्ह्यावःगु नेवाः सूचना केन्द्रया निक्वःगु दँमुँज्या क्वचाःगु दु । उगु ज्याझ्वलय् मदुम्ह बाखं च्वमि अष्टमुनि गुभाजुया ‘मनू–नुगः’ सफू न पितब्वज्या प्रतिभा समाज, सातोआकि भवनया हलय् जूगु खः ।
राजेन्द्र रञ्जितया सभाधक्ष्यताय् जुगु उगु ज्याझ्वलय् भाषासेवी नाप समाजसेवी हितकरवीर सिंह कंसाकार मुपाहाँ कथं झायादीगु खः । ज्याझ्वलय् सरस्वती तुलाधरं लसकुस न्वचू तयादीगु खःसा रमिता बज्राचार्यं ज्याझ्वः न्ह्याकादीगु खः ।
मदुम्ह अष्टमुनि गुभाजुया बाखंमुना सफू ‘मनू–नुगः’ मूपाहाँ कंसाकार व वरिष्ठ बाखं च्वमि, भाषासेवी राजा शाक्यं मंकाः कथं पितब्वज्या यानादीगु खः ।
ज्याझ्वलय् नेवाः देय् दबूया नायः नरेश ताम्राकार, डा. पुष्प राज राजकर्णिकारं नेवाः सूचना केन्द्र नीस्वंगु तातुना व आवश्यक्ता बारे ध्वाथुइकादिगु खः । सफूया प्रकाशक सरस्वती बज्राचार्यं मदुम्ह अष्टमुनि यानावयाच्वंगु भाषा सेवां प्रभावित जूगु व वय्कलं नेपालभासं च्वयातःगु सफू प्रकाशित यायेगु खँय् थः आकर्षित जुयाः थम्हं फुगुचाःगु ग्वाहालि यानागु खँ कनादिल ।
मदुम्ह अष्टमुनिया बारे समालोचक पूर्ण ताम्राकारं चर्चा यानादिसे पितब्वज्या जूगु सफुतिइ सामाजिक नापं मार्मिक १४ पु बाखं दुथ्याःगु व अतिकं सान्दर्भिक जूगुलि सकसिनं थुगु सफू छक्वः स्वयेहे माःगु खँय् बःबियादिल ।
नेवाः सूचना केन्द्रं मुंकूगु बुखँ संम्प्रेषण यानाः ग्वाहालि यानावया च्वंगु मिडियात नेवाः अनलाइनन्युज, लहनान्युज डट् कम, झीगु डट कम, तिकिझ्याः वाःपौ व नेपालभाषा टाइम्सयात मूपाहाँ कंसाकारं सुभाय् पौ लःल्हानादीगु खः ।
अथेहे उगु दँमुज्यां न्हूम्ह नायः नरेन्द्र श्रेष्ठयात सर्वसम्मतिं ल्यःगु दु ।
टङ्कप्रसाद–रमादेवी पाठक पत्रकारिता पुरस्कार लल्हात
लहनान्युज | गुंलाथ्व तृतिया ११३९ (अगष्ट ४ २०१९)
टङ्कप्रसाद–रमादेवी पाठक पत्रकारिता पुरस्कार–२०७५ पाखे नेपाल पत्रकार महासङ्घया पूर्वअध्यक्ष शिव गाउँलेयात लल्हाःगु दु ।
टङ्क–सरिता फाउण्डेशनं येँ छगु ज्याझ्वः दथुइ नेपाल कम्युनिष्ट पार्टी (नेकपा) या वरिष्ठ नेता माधवकुमार नेपालं गाउँलेयात उगु सिरपा लःहाःगु खः ।
गाउँलेयात भ्रष्टाचार विरुद्ध बुखँ च्वंयादिगुनि निद्धः अमेरिकी डलर राशि पुरस्कार लल्हाःगु खः ।
अथेहे टङ्कप्रसाद–रमादेवी पाठक पत्रकारिता प्रोत्साहन पुरस्कार–२०७५ वरिष्ठ पत्रकार चन्द्र भण्डारी व देवीका घर्तीमगरयात लल्हाःगु खः ।
थुगु सिरपा ५०० डलर नगद नाप हनापौ न लल्हाःगु खः । अथेहे द्धःछि डलर राशि दुगु ‘हेम–सरिता पाठक अन्तर्राष्ट्रिय सङ्गीत पुरस्कार–२०७५’ पाखे वरिष्ठ जनवादी गायक जेवी टुहुरेयात लल्हाःगु खः ।
सगरमाथा आरोही कल्पना महर्जनयात पत्रकार दबु हन
नृपेन्द्रलाल श्रेष्ठ | गुंलाथ्व पारु ११३९ (अगष्ट २ २०१९)
पत्रकार सगरमाथा आरोही कल्पना महर्जनयात छगु ज्याझ्वः दथुइ नेवाः पत्रकार राष्ट्रिय दबु न हने ज्या यागु दु ।
वःगु दँय् नेपाः पाखे दक्षिण मोहदा व थुगु दँय् उत्तरी मोहदा तिब्बत पाखें सगरमाथा गयादिम्ह न्हापांम्ह मिसा पत्रकार कथं रेकर्ड तयेत तयेत तालाःगुनि पत्रकार महर्जनयात हने ज्या याःगु खः ।
यल जिल्लाया दुजः पत्रकार महर्जनं नेवाः पत्रकार राष्ट्रिय दबुया लोगो दुगु ध्वाँय् सरगमाथा च्वकाय् ब्वयेकादिगु खःसा वयकः उ्रत्तरी मोहडापाखे २३ मे २०१९ (२०७६ जेष्ट ९ गते विहिवाः) कुन्हु सुथसिया १०ः२० मा सफल आरोहण यानादिगु खः।
अथेहे पत्रकार महर्ज नं नेपाःया दक्षिणी मोहडा पाखे २० मे २०१८ (२०७५ जेठ ९ गते) सफल आरोहण यानादिगु खः ।
दबूया ग्वसालय् जुगु उगु हने ज्याय् ग्वसाः खलः कजि दबुया न्वकु नृपेन्द्र लाल श्रेष्ठ नायः श्रीकृष्ण महर्जन, न्वकु सुरजबीर बज्राचार्य, सगरमाथा आरोहण व्यवस्थापक रवीन्द्र महर्जन, मू
छ्यान्जे सुनिल महर्जन व केन्द्रिय सल्लाहकार विजयरत्न असंबरे पिन्सं नं छम्ह मिसा पत्रकारया सगरमाथा आरोहण सफलता यात कया भिन्तुना देछानादीगु खः ।
निदँत्या दुने लुम्बिनी गुरुयोजना पूवंकेत प्रधानमन्त्रीया निर्देशन
लहना न्यूज | ने.सं. ११३९ गुंलाथ्व पारु (२ अगष्ट, २०१९), शुक्रवाः
प्रधानमन्त्री केपी शर्मा ओलीं वइगु निदँत्याया दुने लुम्बिनी गुरुयोजनाया ज्या पूवंकेत लुम्बिनी विकास कोषयात निर्देशन बियादीगु दु ।
कोषया नायः लिसें संस्कृति, पर्यटन तथा नागरिक उड्डयन मन्त्री योगेशकुमार भट्टराईलिसें कोषया पदाधिकारीलिसे प्रधानमन्त्री निवास वालुवाटारय् जूगु मुँज्याय् प्रधानमन्त्री ओलीं उकथं निर्देशन बियादीगु खः ।
प्रधानमन्त्री ओलीं लुम्बिनीयात बुद्ध जन्मस्थल जक मजूसे बौद्ध धर्म व दर्शनया उद्गमस्थलकथं अन्तर्राष्ट्रियस्तरय् स्थापित यायेत निर्देशन बियादीगु दु ।
कोषया उपाध्यक्ष अवदेशकुमार त्रिपाठीकथं मुँज्याय् रामग्राम पवित्र स्तूपाया गुरुयोजना दयेकेत, कपिलवस्तु विकासया दिगो संरचना तयार यायेत प्रधानमन्त्रीं निर्देशन बियादीगु खः ।
प्रधानमन्त्री ओलीं लुम्बिनी, कपिलवस्तुनिसें देवदहतक बौद्ध पर्यटक हयेगु लकस ब्वलंकेत व उगु लागाय् विद्युतीय मेट्रोलाइन दयेकेगु नितिं तयारी यायेत नं निर्देशन बियादीगु त्रिपाठीं
जानकारी बियादिल ।
उपाध्यक्ष त्रिपाठीं लुम्बिनीयात विशिष्ट बौद्ध अध्ययन केन्द्रकथं विकसित यायेगु व नेपाल भ्रमण वर्ष २०२० यात ध्यानय् तयाः वइगु बुद्धजयन्ती अन्तर्राष्ट्रिय सम्मेलन लिसें हनेगु क्वःज्यूगु नं जानकारी बियादिल ।
लुम्बिनी गुरुयोजना जापानी विज्ञ किन्जों तयार यानादीगु खः ।
क्षयरोग संस्थाया ४० क्वःगु स्थापना दिवस
बाबुकाजी श्रेष्ठ | गुंलाथ्व पारु ११३९ (अगष्ट २ २०१९)
नेपालक्षय रोग निवारण संस्था जिल्ला शाखा ख्वपया ४० क्वःगु स्थापना दिवस हने ज्या जुगु दु ।
थनि पि द न्ह्यः भक्तपुर अस्पतालया तात्कालिन सुपरिन्टेन्डण्टडा. तिर्थ राणाया सभापतित्वय् स्थापना जुुगु थुगु संस्थाया ४० क्वःगु स्थापना दिवसया उलेज्या संस्थापक सभापति राणा हे यानादिगु खः । वयकलं पिदँ न्ह्यः स्वनागु नेपाल क्षयरोग निवारण संस्था ख्वप शाखा आ न न्ह्यःज्याना च्वंगु खना लय्तागु खँ न कनादिगु दु ।
संस्थाका सभापति राम सिख्वःया सभाधक्ष्यतायु जुगु उगु ज्याझ्वलय् संस्थाया सचिव राजेश्वरी शिल्पकारं ख्वपय् क्षयरोगया अवस्था, समस्या व चुनौतिया बारेय् न्ववानादिगु खः । स्वास्थ्य कार्यालयया प्रमुख प्रार्थमणि अर्याल, लक्ष्मण सुजखु लगायतपिन्स नं न्ववानादिगु खः ।
जिल्ला समन्वय समितिया हलय् जुगु उगु ज्याझ्वलय् ख्वपया प्यंगु जिल्लाय् प्यंगु नगरपालिका मध्ये मध्यपुर थिमि नगरपालिकापाखे विगत स्व दँ न्ह्यःनिसे क्षयरोग नियन्त्रणया ज्याझ्वःया साझेदारी याना वयाच्वंगु खः ।
राष्ट्रिय क्षयरोग केन्द्रपाखे नियमित रुपय् क्षयरोग नियन्त्रण ज्याझ्वःया सहकार्य याना वया च्वंगु जानकारी निवर्तमान सभापति बाबुकाजी श्रेष्ठं सञ्चारकःमि पिन्त धयादिगु खः । श्रेष्ठं जनस्वास्थ्य समस्याया रुपय् क्षयरोगयात राष्ट्रिय क्षयरोग नियन्त्रण ज्याझ्व? ताः लाकेगु लागि स्थानीय सरकार प्राथमिकताया साथ स्वया संस्थानाप सहकार्य यायेत आग्रह यानादिगु खः।
