Display Style:
Column Style
मंसीर १४गते उपनिर्वाचन यायेत सिफारिस
लहनान्यूज | ने.सं. ११३९ दिल्लागा आमै (१ अगष्ट, २०१९), विहिवाः
निर्वाचन आयोगं प्रतिनिधिसभा, प्रदेशसभा र स्थानीय तगिमय् प्वनाच्वंगु थासय् मंसीर १४ गते, सञ्चरवाः निर्वाचन याकेत पाय्छि जुइगु सिफारिस याःगु दु ।
राजनीतिक दलतलिसेया परामर्श लिपा आयोगं थौं विहिवाः सरकारयात थःगु परामर्शलिसेंया उकथं सिफारिस याःगु खः ।
मन्त्रीपरिषदपाखें तिथि घोषणा याये ल्यंदनि । स्वंगू हे तगिंया प्वनाच्वंगु मुक्कं ५०गू थासय् छन्हुं हे चुनाव याकेत आयोगया सुझाव दु । प्रतिनिधिसभा सदस्य–१, प्रदेशसभा सदस्य–३, नगरपालिका प्रमुख– १, गाउँपालिका अध्यक्ष–३, गाउँपालिका उपाध्यक्ष–१ र वडाध्यक्ष–४१गू पद प्वनाच्वंगु दु । स्वंगुलिं तगिंया चुनाव २०७४ सालय् जूगु खः ।
स्थानीय तगिंया चुनावया तिथि आयोगया परामर्शय् सरकारं अथे हे प्रतिनिधिसभा व प्रदेशसभाया उप–निर्वाचनया तिथि सरकारलिसेया परामर्शय् आयोगं क्वःछीगु कानूनी प्रावधान दु । सरकारं स्थानीय तगिंया तिथि क्वःछीधुंकाः उगु दिनस प्रतिनिधिसभा व प्रदेशसभाया निर्वाचन याकेकथं तिथि क्वःछीगु आयोगया तयारी दु ।
प्रमुख निर्वाचन आयुक्त दिनेश थपलियालिसेंया पदाधिकारीििपन्सं म्हिगः बुधवाः प्रधानमन्त्री केपी शर्मा ओलीलिसे उपनिर्वाचनयात कयाः सहलह याःगु खः । व लिपा थौं विहिवाः आयोगय् राजनीतिक दलतलिसे परामर्श यानाः आयोगं तिथि सिफारिस याःगु खः ।
प्रतिनिधिसभा व प्रदेशसभा निर्वाचन निदँ न्ह्यः मंसीरय् जूगु खः । स्थानीय तगिंया चुनाव धाःसा व स्वयां न्ह्यः बैशाखनिसें असोजतक स्वंगू चरणय् क्वःचाःगु खः ।
प्रतिनिधिसभाया बैठक सूचं टिका स्थगित
लहनान्युज | दिल्लागा औसी ११३९ (अगष्ट १ २०१९)
प्रतिनिधिसभाया थौं या बैठक सूचं टिकां साउन २० गते तकया लागि स्थगित याःगु दु ।
संसदय् वया च्वंगु पंगः तायेकेगुु सम्बन्धय् सभामुख कृष्णबहादुर महराया आव्हानय् सर्वदलीय बैठकय् दल दथुइ सहमति मजुइ वं थौं च्वनेगु कथं सःतुगु बैठक सूचं टिका स्थगित याःगु खः ।
संघीय संसद भवनय् च्वंगु उगु सर्वदलीय बैठकय् सदन सञ्चालन न्ह्याकते दलपिं सकारात्मक खनेदुसा थःथःगु अडानया हे कायम जुगुनि सहमति मजुइ वं स्थगित याःगु खः ।
बैठकय् सत्ता पक्षपाखे नेकपा संसदीय दलया उपनेता सुवास नेम्बाङ, उपप्रधानमन्त्री उपेन्द्र यादव, समाजवादी पाटीया अध्यक्ष डा. बाबुराम भट्टराई, मुख्य सचेतक देव गुरूङ नाप प्रमुख प्रतिपक्षी दल नेपाली कांग्रेस संसदीय दलया उपनेता विजयकुमार गच्छदार, मुख्य सचेतक बालकृष्ण खाँण, नेता मिनेन्द्र रिजाल, राजपाया पाखे राजकिशोर यादव, महन्थ ठाकुर, लक्ष्मणलाल कर्ण लगायत पिनिगु उपस्थिति दुगु खः ।
नेत्र विक्रम चन्द विप्लव समूहया सर्लाही जिल्ला इन्चार्ज कुमार पौडेल व राजपाया कार्यकर्ता सरोजनारायण सिंहयात प्रहरीको गोली कयेका स्याःगु घटनाया छानबिन यायेत संसदीय छानबिन समिति गठन याये माःगु माग यासे नेपाली कांग्रेस व राजपां असार २४ गते निसे सदन अवरुद्ध याना वया च्वंगु खः ।
उपनिर्वाचन यायेगु बारे सहलह यायेत बैठक
लहनान्युज | दिल्लागा औसी ११३९ (अगष्ट १ २०१९)
निर्वाचन आयोगं प्रतिनिधिसभा, प्रदेशसभा व स्थानीय तहलय् खालिगु जुगु थासय् उपनिर्वाचन यायेगु बारे सहलह यायेत थौं सर्वदलीय बैठक सःतूगु दु ।
आयोगं सःतुगु थौं सुथय् ११ः३० ता इलय् निर्वाचन आयोगया सभाकक्षय् च्वनीगु बैठकय् राष्ट्रिय दल लिसें स्थानीय तहलय् प्रतिनिधित्व जुगु १८ गू दलयात सःतूगु खः ।
४७ गु थासय् उपनिर्वाचन जुइगु
आयोगं थीथी कारण खालि जूगू ४७ गू थासय् उपनिर्वाचन यायेत्यंगु खः । आयोगं बिगु जानकारी कथं प्रतिनिधिसभाय् छगू, प्रदेशसभाय् स्वंगू, स्थानीय तहलय् प्रमुख प्यंगू व उपप्रमुखय् छगू थासय् जनप्रतिनिधि विहिन नाप ३८ गू वडाय् नं जनप्रतिनिधि मदु ।
वंगु फागुन १५ गते ताप्लेजुङय् जूगु हेलिकोप्टर दुर्घटनाय् लानाः तत्कालीन पर्यटन व नागरिक उड्डयनमन्त्री रवीन्द्र अधिकारी मदुगु खः ।
अथेहे, प्रदेश ५ या प्रदेशसभा दुजः उत्तरकुमार ओली कार दुर्घटनाय् लाःगु खःसा दाङ क्षेत्र नम्बर ३ या ‘ख’पाखें निर्र्वािचत ओलीया वासः यायेगु झ्वलय् मदुगु खः ।
गण्डकी प्रदेशया सांसद टेकबहादुर घर्तीया वंगु मंसीरय् न्हूदिल्लीइ जण्डिसया कारण मदुगु खः । मेम्ह ख्वप–१ ‘ख’पाखें निर्वाचित सांसद हरिहरण लामिछाने मस्तिष्कघातपाखें मदुगु खः ।
अथेहे स्थानीय तहलय् छम्ह मेयर व निगू गाउँपालिका अधक्ष्यपि मदुगु खः । धरान उपमहानगरपालिकाया मेयर तारा सुब्बाया वंगु दँया साउनय् निमोनियापाखें मदुगु खःसा पाँचथरया फाल्गुनन्द गाउँपालिकाया अधक्ष्य अमरकुमार नेम्वाङ व संखुवासभाया मकालु गाउँपालिकाया अधक्ष्य खड्गबहादुर कटुवाल सतक दुर्घटनाय् लाना मदुगु खः ।
असफल जुगु महसुस जुइवं मन्त्री पद त्वःते मन्त्री भट्टराई
लहनान्युज | दिल्लागा औसी ११३९ (अगष्ट १ २०१९)
नवनियुक्त पर्यटनमन्त्री योगेश भट्टराई न असफल जुगु महसुस जुइवं मन्त्री पद त्याग यायेगु घोषणा यानादिगु दु । मन्त्री पद भार ग्रहण याःगु कन्ह्य कुन्हु हे पत्रकार पिन्त प्रतिक्रिया बियादिसे भट्टराई थथे धयादिगुु खः ।
थौं सुथय् तत्कालीन एमालेया पार्टी कार्यालय बल्खुइ वना मदन भण्डारीया शालिकय् स्वामा देछानादिगुु खः ।
नेपाल भ्रमण वर्ष २०२० यात लक्षित यासे गौतमबुद्ध अन्तर्राष्ट्रिय विमानस्थल व पोखरा विमानस्थलया ज्या याकन जुइगु जानकारी न बियादिगु खः । नाप सहमति याना निजगढ अन्तर्र्रािष्ट्रय
विमानस्थलया ज्या न न्ह्याकिइगु जुइ धका न धयादिगु खः ।
मदननगर बल्खु लिपा मन्त्री भट्टराई तत्कालीन माओवादी पार्टी कार्यालय पेरिसडाँडाय् वना जनयुद्धया सहिद नाप वेपत्ता परिवारयात स्मरणयासे दयेका तःगु स्तम्भय् व स्वामा देछानादिगु खः ।
सत्यमोहनया सच्छिदँ बुदिंया लसता ज्याझ्वः
अमिर मैया रञ्जित | दिल्लागा औसी ११३९ (अगष्ट १ २०१९)
शताब्दीपुरुष सत्यमोहन जोशीया सच्छिदँ बुदिंया लसता नापं प्रतिभा समाजया रजत जयन्तीया लसताय् प्रतिभा समाज कुपण्डोलय् बुधवाः थीथी ज्याझ्वः जूगु दु ।
उगु प्रतिभा समाजया रजत जयन्तीया ज्याझ्वलय् शताब्दी पुरुष जोशीयात दोसल्लां न्ययेकाः हना ‘नेपालभाषा साहित्यबारे विशेष प्रबचन व सहलह ज्याझ्वः न जूगु खः ।
उगु ज्याझ्लय् समाजं विपन्न युवा विद्यार्थीतय्त शैक्षिक नापं बौद्धिक विकासय् ग्वाहालि यानावया च्वंगु भूमिकाबारे डा. पुष्पराज राजकर्णिकारं जानकारी खःसा रत्नध्वज जोशीं प्रभावित जुयाः नेपालभाषा साहित्य, संस्कृति च्वन्ह्याकेया नितिं राणाकालं निसें थौंतक्कया अवस्थाबारे मूपाहाँ जोशीं लुमन्ति कनादिल ।
अथेहे, ज्याझ्वलय् नेपालभाषा थकायेगु लागि २००७ सालय् प्रेमबहादुर कंसाकारं कलकत्तां पत्रिका प्रकाशन यानाः स्वयम्भूलाल श्रेष्ठ, धुँस्वा सायमि, आशा राम शाक्य, केदारमान ब्यथित थेंजापिं साहित्यकारतय्गु जन्म जूूगु खँ कनादिल ।
मांभाय् साहित्यया हःपालं थः मदन पुरस्कारं सम्मानित जूगु कनादिसे जोशीं नेपालभाषा एकेडेमि, नेपालभाषा खँग्व धुकू नितिं बरिष्ठ समालोचक इन्द्र माली, नेपालभाषा इतिहासया नितिं प्रा. प्रेमशान्ति तुलाधर, नेपालभाषा एफएम सञ्चालन यायेत थःनापं मेमेपिनिगु योगदानया चर्चा यानादिल ।
उगु ज्याझ्वलय् नेपालभाषा एकेडेमिया भाइसचान्सलर यज्ञरत्न धाख्वा, नेपालभाषा परिषदया ध्रुव मर्धिकःमि, च्वसापासाया अध्यक्ष भुषणप्रसाद श्रेष्ठ, लोक साहित्य परिषदका अध्यक्ष प्रा. प्रेमशान्ति तुलाधर, नेपालभाषा केन्द्रीय विभागया पुलांम्ह प्रमुख तुल्सीलाल सिंह, इन्द्रमान रञ्जित तानाका, लोककवि राजभाइ जकःमि, तुल्सी साय्मिपिसं थःथःपिनिगु खँ तयादिगु खः ।
उगु ज्याझ्वः डा. बज्रराज शाक्यया सभाध्यक्षताय् जुगु खःसा शाक्य सुरेनं न्ह्याकादीगु खः ।
किपा: नेवाः सूचना केन्द्र
