Display Style:
Column Style
दाफा भजन स्यनेज्याया जुल
लहनान्युज | दिल्लागा दशमी ११३९ (जुलाई २७ २०१९)
साँस्कृतिक संरक्षण नापं साँस्कृतिक हस्तान्तरण यायेगु मूतातुना तया यलया खपिन्छेँ त्वालय् वंगु गुला न्ह्यः २०७५ कार्तिक ८ गते निसें न्ह्यागु दाफा भजन स्यनेज्या २०७६ श्रावण ९ गते त्वाःलय् च्वंम्ह नासः द्यःया थाय् चा च्वनालि श्रावण १० दाफा पिदन ।
बुलुहुँ लोपोन्मुख जुया वनाच्वंगु नेवाः साँस्कृतिक बाजा स्यने कने यायेगु हे मू हाथ्याया जुयाच्वंगु थ्व इलय् न्हू पुस्ताया ८५ म्हसिया सक्रियता पूर्वक ब्वतिकाःगु खः ।
उगु दाफा भजन स्यनेज्याया मू खिं गुरु अष्टलाल महर्जन खःसा मू म्येँ गुरु मोतिलाल महर्जन स्यनादिगु खः । दाफा स्यनेज्या सुथांलाकेत ग्वहालिमि कथं खिं गुरुपासा भुवन महर्जन व म्यँेय् गुरुपासा किसलाल महर्जन च्वनादीगु खः ।
थुगु दाफा स्यनेज्याय् खिं व म्ये हालेगुलिइ परम्परागत ल्याखं सिइबिया न्हाप ल्यू लाःगु घोषणा याइगु खः । थुकथं खिं थायेगुलिइ राजन महर्जन न्हाप व किशोर महर्जन ल्यूलागु खः । अथेहे म्यें श्रीषन महर्जन न्हाप व दिवेश अवाले ल्यूलागु खः ।
यलया लिच्छवि जुजु बसन्तदेवया पालय् (शक सम्बत ४५२)स पलिस्था याना तःगु जःधुं, लिक्क च्वंगु तुंगः व यलया आकाश भैरव (ह्यगृव भैरव) विराजमान जुयाच्वंगु लिच्छवि त्वाः खपिन्छेँ त्वालय् साँस्कृतिक परम्परा न्ह्याकेत समस्या वयधुंकुगु अवस्था खः ।
थथे साँस्कृतिक परम्परायात पुस्तान्तरण यायेगु हथाय् जूसां तबि न्ह्याके मफयाच्वंगु खः । थ्वसिबें न्हापा २०५४ सालय् दाफा स्यनेज्या जूगु खः ।
मेयर बिद्यासुन्दरं लखुतिर्थया शिलान्यास यात
नृपेन्द्रलाल श्रेष्ठ | दिल्लागा दशमी ११३९ (जुलाई २७ २०१९)
येँ महानगरपालिका मेयर विद्यासुन्दर शाक्यं महानगरय् खाली विरोध जक जुगु धइगु खँ कनादिगु दु ।
थुगु खँ थौं येँया १५ वडाय् बिष्णुमती खुसिइ सिथय्े लख तीर्थ पुननिर्माणया शिलान्यास यायेगु झ्वलय् यँे मनपाया मेयर शाक्यं सम्पदा पुननिर्माणया योजना दयेका सहलहया लागि वडाय् छ्वया सहलह कायेगु यासा छु लिसः मवइगु तर ज्यायेगु झवलय् पगः थनेगु जक ज्या जुया च्वःगु खँय् दुःख प्वकादिल ।
महानगरं लखुतिर्थ पुननिर्माणया लागि ५० लाख खर्च यायेगु योजना दुगु धका मेयर शाक्यं जानकारी बिया दिसे पुननिर्माणया बिस्तृत परियोजना प्रतिवेदन तयार यायेत थुकिगु खर्च अप्वो जुःसा महानगरं जिम्मेवारी कायेगु जुइ धका बचं न बियादिगु दु ।
थौं जुगु उगु ज्याझ्वलय् महानगर प्रवक्ता नाप १५ वडाध्यक्ष ईश्वरमान डंगाल न महानगरया हरेक ज्याझ्वलय् विरोध जक जुया च्वंगुलि इलय् याये माःगु योजना पुरा याये मफया च्वंगु दु धका धयादिगु दु ।
उगु ज्याझ्वलय् शिलान्यास समारोह पुननिर्माण समितिया संयोजक सुवर्ण डंगोल, पूर्व संसद सदस्य लक्ष्मीदास मानन्धरपिन्सं लखु तीर्थ पुननिर्माण याये फत धाःसा नेपाल मण्डलवासी तयेगु गौरवा ज्या जुइगु धइगु धारणा तयादिगु खः ।
पुननिर्माणया लागि नेपाल राइजिङ् अमेरिका (गैर आवासीय नेपालीया संस्था, अमेरिकाया सियाटलय् च्वपिनिगु) २५ लाख बराबर ग्वाहालि दुगु खः ।
महानगरं गुथि बिधेयकयात कया सहलह
लहनान्युज | दिल्लागा नवमी ११३९ (जुलाई २६ २०१९)
येँ महानगरपालिका सम्पदा विभागया ग्वसालय् थौं ज्यापु महागुथि नेपाः येँ नगर समितिया ब्यवस्थापनय् नेपाः ब्यांक्वेटय् ‘गुथि विधेयक २०७५ सहलह मुँज्या’ ज्याझ्वः जुगु दु ।
उगु ज्याझ्वलय् येँ महानगरपालिकाया मेयर विद्यासुन्दर शाक्यया उपस्थितिइ जूगु ज्याझ्वलय् ज्यापु महागुथि नगर समितिया दुजःलिसें महागुथिया थीथी लागाया पार्षदपिंन्स ब्बति काःगु खः ।
थौं जुगु सहलह मुँज्याय् मेयर शाक्यं गुथि विधेयक आः गुकथं यंकेमाःगु नाप विधेयकयात कयाः संशोधन प्रस्ताव यंकेमाःगु विचाः तयादिगु खः ।
थौं या ज्याझ्वलय् येँ महानगरया १८ वडाध्यक्ष लिसें येँ महानगरपालिका सम्पदा विभागया कजि न्हुच्छे महर्जनया सभाध्यक्षताय् जूगु उगु ज्याझ्वलय् लसकुस न्वचू येँ महानगर समितिया कार्यबाहक नायः नानीहेरा महर्जनं यानादिगु खः ।
अथेहे, उगु ज्याझ्वलय् येँ महानगरया १५ वडाध्यक्ष नाप प्रवक्ता ईश्वरमान डंगोल, २३ वडाध्यक्ष मचाराजा महर्जन, १२ वडाध्यक्ष विकास डंगोल, २२ वडाध्यक्ष चिनिकाजी महर्जन, ज्यापु महागुथिया नायः लोककवि राजभाई जकःमि, ज्यापु महागुथिया मूछ्याञ्जे मचाराजा महर्जनलिसें रामबहादुर डंगोलपिं पाहाँ कथं झायादीगु खः ।
थुगुसी खुसिवाः व चलखं यानाः ३गू अर्ब स्वयां अप्वः खति
लहना न्यूज | ने.सं. ११३९ दिल्लागा नवमि (२६ जुलाइ, २०१९), शुक्रवाः
थुगुसी वा वयाः वःगु खुसिवाः व चलःया हुनिं ३गू अर्ब स्वयां अप्वः खति जूगु दु । आःतक खुसिबाः पाखें १गू अर्वतका व चलःपाखें २गू अर्ब स्वयां अप्वः खति जूगु गृहमन्त्रालयया राष्ट्रिय आपतकालिन कार्य सञ्चालन केन्द्रं न्ह्यथंगु दु ।
केन्द्रं थौं शुक्रवाः सार्वजनिक याःगु विवरणकथं खुसिवाः, चलः व डुवानय् लानाः ६४गू जिल्ला प्रभावित जूगु दु ।
विपद्या हुनिं आःतक १११म्ह सीधुंकूगु दु । अथे हे, ४०म्ह बेपत्ता जुयाच्वंगु दुसा ६७म्ह घाःपाः जूगु दु ।
थ्व हे दथुइ, पहाडी व तराईया लागाया छुं छुं थासय् थौं चान्हय् तसकं वा वइगु सम्भावना दुगु जल तथा मौसम पूर्वानुमान महाशाखां न्ह्यथंगु दु । वइगु स्वन्हुतक तसकं वा वइगु व मू मू खुसिइ बहाव अप्वयाः धनजनया खति जुइफइगु धासें महाशाखां सतर्क जुयाः च्वनेत स्थानीयवासीयात इनाप याःगु दु ।
कन्हय् तक इलाम, झापा, मोरङ, धनकुटा, दोलखा, रामेछाप, सिन्धुली, स्याङ्गजा, कास्की, लमजुङ्ग, गोरखा, कैलाली, कञ्चनपुर, दाङ, सुर्खेत, डडेल्धुरा व जःखःया चीचिधंगु खुसिइ आकस्मिक बहावया सम्भावना दुगु न्ह्यथंसें तटीय लागाय् सतर्क जुयाः च्वनेत इनाप याःगु दु ।
छवि व शिल्पा विरुद्ध पक्राउ पूर्जी
लहनान्युज | दिल्लागा अष्टमी ११३९ (जुलाई २५ २०१९)
निर्माता छविराज ओझा व नायिक शिल्पा पोखरेल विरुद्ध पक्राउ पूर्जी जारी याःगु दु ।
बहुविवाह सम्बन्धी कसूरय् अनुसन्धानया लागि जिल्ला अदालत, येँय् नं निम्हेसित ज्वःनेगुया लागि प्रहरीयात अनुमति बिउगु दु ।
नायिका शिल्पा पोखरेल व निर्माता छविराज ओझां डिभोर्स प्रक्रिया न्ह्यःने वःगु इलय् छविया जेठीम्ह तिरिमय्जु हेमा ओझां प्रहरीया उजुरी बिउगु इलय् थुगु घटनां न्हुगु मोड काःगु दु ।
न्हापाया कला हेमां न्हापां गौशाला प्रहरी उजुरी तःगु खः । लिपा, गौशला प्रहरींं कालिमाटी महिला सेलय् छ्वःगु खः ।
छवि व शिल्पां वि.सं २०७३ साल असार २९ गते इहिपा याःगु खःसां वःगु पौषय् जक बिहे दर्ता याःगु खः ।
